Sotu (Sayambre) - Valdecarombu - Estremera - Vegagüerta - Capozu - Cordiñanes (Valdión)

9 de Xunetu de 2016

Track: Sotu (Sayambre) - Cordiñanes (Valdión)

Son les 9 y cuartu la mañana cuando tamos preparaos pa entamar esta Travesera 2015 - 2016 dende Sotu, nel conceyu de Sayambre. Nesti guapu pueblu, onde ficieron un aparcaderu bien curiosu, pa montañeros y visitantes, daremos los caberos preparativos y garraremos puxu pa salir a caleyar con fuercia.

Partimos dende Sotu en Sayambre (905 m)

Despedímonos del equipu de sofitu, Fernan, Mariano, Oscar y Feli, garrando carretera pa travesar Sotu, col envís de garrar la pista del GR-201, hasta la boquera de la riega los Barrios, onde camudamos de percorríu pel 07 del Parque Nacional de los Picos que lleva hacia'l banzáu de la H.ocica.

Xubiremos los 450 m de desnivel dende Sotu hasta'l puertu de Barcinera (1342 m), penando pol calor que vamos pasar, pero charrando gayoleros por tolo que tenemos que conocer nesti día, parando cada pocu a mirar pal Niah.u al oeste, pal H.ariu al sur y pal Cantu Cabroneru y el so traveséu enriba nuesa al norte.

Paséu con calor hacia'l puertu de Barcinera (1342 m)

Dende Barcinera tendremos de facer una llarga baxada, pero colo guapa y a la solombre d'un fayéu d'ensuañu, faise menos pesar perder tantísimu desnivel otra vegada. Aún así, préstanos cruciar el Dobra (1045 m), per una ponte de piedra preciosa y tornaremos a xubir hacia Valdecarombu

Fuera de la viesca'l sol apreta enforma avisándonos de que lo meyor ye parar a enfrescanos na fonte'l Chamozo, recargando agua y picando dalgo, ya qu'en dos hores y media de camín gastamos enerxíes y bébora.

Cruciamos el Dobra y tornamos a xubir hacia Valdecarombu

Magar del descansu siguimos a la gueta'l senderu que tien de facenos llibrar dellos parés d'entrada a Valdecarombu. Fadrémoslo pela manzorga, d'un paré dempués de cruciar una riega y penriba d'esti meterémonos nuna pequeña foz qu'al traviés d'un canalizu sacarános a un pequeñu descansu onde decidir que facer na siguiente parte de la ruta.

Tenemos dos opciones: siguir Valdecarombu pelas Pandiellas y posteriormente La Duernona hasta Vegagüerta o intentar ascender una especie de Half Dome preciosu, que sacante la figura de la Torre Santa, paezme d'una visión especial en tol valle.

Empozámonos en Valdecarombu hasta'l desvíu al canalón de Treslleres

Esti picu con forma de fola de mar hacia Vegagüerta, ye la Punta Estremera, siendo ascendida dende'l camín del Burro o entrándo-y pel canalón de Treslleres. Aldericamos un ratín y decidimos tirar per Treslleres, entamando un tramu perduru d'enorme pedrera y total ausencia de sienda y sombra. 

La so primer parte faime alcordame un pelín del Canalón del Texéu salvando les enormes distancies, pero llueu la vexetación va desapaeciendo y algamamos mayor avance de peñona en peñona hasta topanos con un puntu de resquiebra nesta canal, onde la Punta Estremera xurde más picante si cabe.

Avanzamos adulces ganando metru a metru al tarrén de xuegu

Nesti pasu, vemos una clara vira qu'empobínanos hacia'l nuesu destín saliéndonos de Treslleres la cual siguiría pegadina al Cuetu'l Verde hasta los Alto de la Verde y pel nuesu camín saldremos hacia los H.oyos d'Argüeyes o como ye'l nuesu casu hacia la Punta Estremera.

Siguimos ascendiendo, pero viendo'l ritmu del grupu, decidimos parar a xintar enantes d'acometer el tramu final d'ascensu. Necesistamos unos minutinos de descansu, sombra, xintar, beber lo que podamos... queda muncho día y va facese durísimo.

La pendiente nun da respiru y decicidmos parar a xintar a la solombra

Siempre nestos momentos camiento si fice bien n'intentar esti monte o si ya tendríemos abondo cola travesía. Nun ye que seya un monte d'espatarrar, pero'l so accesu inciertu, hasta dempués de recuperar fuercies fainos perder un tiempu descomanáu, teniendo qu'esperar pol restu de collacios, ya que metímonos por llugares distintos.

El secretu ta en garrar de referencia un peñón solitariu y trepar per delantre d'él con tarrén dalgo suelto o meyor arrodialo hasta un colláin verde con dos güeyinos de roca al llau y tornar per una sienda hacia una fastera de terraces pela qu'avanzase curiosu hasta la parte alta.

Dende'l colláin verde hasta los altos hai que restolar pa nun enguedeyase

Cola calma y esperando por tol grupu, ponémonos a la fín, en dimposición de superar el tramu final pela parte alta del monte hasta'l so preciosu cumal... un balcón ablucante con vistes de la Torresanta o Peñasanta de Llión.

Punta Estremera (2135 m) cola reína tres de nós

Llevo un ratín esfrutando de les vistes, saco semeyes a toos, comento la xugada, los nomes de los picos de la redolada pero nun pueu más que mirar pal malditu reló... son les 4 y cuartu y tamos más altos de Vegagüerta... quédanos un infiernu por baxar... y la cara de la xente ye de cansanciu.

Pasamos pel Cuetalbu (2164 m) pa descender a Vegagüerta

Lo dicho, el reló sigue tic-tac y tenemos que siguir, asína que ponémonos en marcha, lo cual desmonta dafechu a Benjamín que ya venía tocáu y casi fundíu. Crestiaremos un pocu hasta'l Cuetalbu de 2164 m y entraremos nun tarrén pelín más complexu pa descender hasta'l camín del Burru.

Como la xente va cansao y van con cuidadín per esti quebraeru calizu, baxo a escape, equivocándome nunos puntos y otros non y aporto al Burru pa garrar l'arista sur del Tesu Cotalbín y meteme nel bolsiellu otru dosmil más de 2187 m... cota más alta del día. 

Adelántome corriendo pa facer el tesu Cotalbín (2187 m)

Ensín más... una autosemeya cola Reína y desciendo esnalando pa pillar al restu del grupu que diben caleyando darréu hacia'l refuxu de Vegagüerta, con ganes de parar a repostar un poquín d'agua y de descansar anque fuera un segundín.

Fadrémoslo charrando con unes máquines que venía de facese un viote na sur y tiramos a la fonte la cual alcontramos casi desapaecía baxo'l ñeveru. Nun podemos parar de más, pero hai que dexar garrar aliendu y tamién pa un día que pillo vistes en Vegagüerta, intentar asimilar el mundiu que ye esti requexu del Cornión.

Enfrescámonos coles vistes y l'agua de la fonte de Vegagüerta... bien frío

Llevamos nel intre, unos 11,5 km en casi 9 hores, personalmente nun pueu dicir más, los datos falen por si solo, en Picos les coses nun se caminen soles, cuesta y muncho. Asina que damos los ánimos posibles, hai xente que nin con ánimos se ve con fuercies pero vamos baxando y empobinándonos hacia la canal de Capozu.

Nun voi falar muncho d'ella, dicir que ye de les más guapes de Picos, ye cómoda de baxar y cómoda de xubir nos paeciera va dos años, anque viéramos muncho menos y moyáramonos y pasáremos friu munchísimo más.

Descendemos per Capozu cola lluz escapándose adulces

El descensu faise llargu hasta pa los que vamos entainando, nun quiero saber como lo fueron pasando per detrás, pero si lo sé, porque cuando parábemos a xuntanos, Natalia por exemplu llegaba y sentábase porque nun podia más.

Ye increyible lo qu'aguanta'l cuerpu humanu, eso sí, al día siguiente nun ye a recuperase tolo que debiera y dellos collacios d'esta primer estaya decidieron que ya tuvieren abondo y con razón, ya que tovía pasando los Cabidos tocaba tol faldéu del monte Corona... que ye llarguísimu hasta Cordiñanes.

Finalmente queda tol tramu dende'l monte Corona hasta Cordiñanes

Col atapecer nesi color anaranxáu sol Llambrión aportábemos por turnos a Cordiñanes y faciémoslo a les diez en puntu los primeros, col culu pegáu pa poder cenar si nun fuera polos regateos del grupu de sofitu a la travesera, encabezáu por Fernan.

Como se pue facer pa tar casi 12 hores caleyando, pues metíendose 20.9 km de percorríu, travesando tol macizu del Cornión, con una ascensión acumulada de 2090 m y un descensu 2140 m, nin más nin menos... bona paliza ensin dubia.

Camudando'l Camín con Benjamín... que bien lluchó esta semeya