martes, 2 de agosto de 2011

Travesera (2010 - 2011) - Estaya 2: Caín (Llión) - Mueñu - Palanca - Llambrión - Colláu H.ermosu (Llión)

15 de Xunetu de 2011

Track: Caín (Llión) - Colláu H.ermosu



7 de la mañana, y ya tamos en pie, necesitamos de toles hores del día, ya que vamos facer una de les canales, sinon la más, llarga p'acceder al macizu de los Urrieles. Inda nun tenemos les pates recuperaes del día anterior y tienen que ponése a furrular en breve.

Quedaron atrás, la primer estaya de la Travesera, les cerveces d'antes de cenar, la duchina, la cena, la post-cena y la nueche, na que pudimos descansar bien. La verdá que comparáu col añu anterior, que fizo un calor insoportable, esti añu durmí perbien y llevántome a desayunar col apih.ote típicu mañaneru, pero con un xeitu bien dixebráu del añu anterior, asína que sufriremos pero con sen positivu.


Semeya de grupu en Caín

Despedímonos de los encargaos del Albergue de Caín, dándo-yos les gracies pol bon tratu, y camentando que ye un sitiu perfeutu de pasu, pa facer montaña (duches, baños y lliteres cómodes pa durmir), pero-y falta una meyor cocina. Nun se pue tener tou, supongo.

A estes altures, ya ta bien claru como vamos repartinos. El nuesu sofitu lloxísticu (Mariano y Oscar) despídise de nós, hasta la última pernocta en Áliva, asína qu'un apretón de manos y un abrazu ye lo menos. Carlos sigue tocáu de la rodiella, pero ta empeñáu siendo esto perpositivu, en xubir a Colláu H.ermosu, asína que Fernan ufrezse a ser el so guía pa xubir pola Canal d'Asotín dende'l cercanu pueblu de Cordiñanes.


Partiendo de Caín (459 ms) y dexándola abaxo

Poro, quedamos Pangua, César, Bittor y un servidor, pa facer la canal del Mueñu. Tengo'l track, asína que vámonos a l'aventura los cuatru. Agora a posteriori, ya se por qué Fernan tiro por Asotín, con Carlos, jaja.

Vamos a da-y una nota toponímica a esta canal del Mueñu. Digo Mueñu y no Moeño, porque esta canal toma'l nome d'una especie de cabra al estilu de les pirenáiques qu'estinguióse nos entamos del sieglu pasáu. Nesta fastera nomábase Mueñu o Mueyu, hasta qu'esaniciáronla los cazadores supongo... una pena.


Dexamos les partes más abiertes y encaxonámonos

Al liu,... salimos sobre les 8 y cuartu la mañana de Caín travesándolo y dando un saludín al Caineh.u dempués de garrar augua a los sos pies. Magar de cruciar el cares, nel mesmu puntu nel que tomamos el seu Mabru pa garrar la canal de Dobresengos, vamos tomar la direición contraria, y en varies envueltes fáciles de siguir vamos llegar a un colláu con cabañes nomaos los praos de Castro.

Equí hai un marabayu de senderos que traviesen pedreros así que despistéme un pocu y xubimos más a la esquierda de lo que debiéramos metiéndonos nun aéreu p'acceder al senderu, que taba muncho más abaxo y a la drecha. Asína que tirá-y hacia la mandrecha hasta ganar el senderu que va pegáu a la riega la Peguera.


El día sigue zarrándose y abriendo a cachinos

Una vegada que tenemos el senderu, ya nun tenemos más que dir xubiendo desnivel, no que ye una típica canal de Picos, siempre n'envueltes amestando tramos de pedreru y sienda per yerba. Demientres miramos pal suelu, el día penriba, sigue xugando cola ñebla, y a tramos vemos tol desnivel que vamos xubiendo con Caín a lo lloñe y tamién les parés que zarren esta canal qu'amuésanse desafiantes.

Dempués d'una hora y 45 minutos d'ascender casi ensín parones, vamos descansar un pocu na Mah.ada de Mueñu (1070 ms), pa picar dalgo y recuperar fuercies. Neste tipu de canales, hai que tener una paciencia pergrande ya que si nun se retuerce muncho, vas tar viendo'l final de la canal dende bien abaxo y per muncho qu'asciendas paez que nun llegas nunca.


Puerta de Mueñu arrodiáu por delles torres

Eso ye lo que pasa nesta, ya que vese dende bien abaxo, la Puerta de Mueñu coles sos vigues: Torre la Puerta de Mueñu y la Torre la Celada. Ensín mirar muncho más, baxamos la tiesta como los burros, y siguimos alantre a la gueta del senderu más cenciellu a facer.

Pocu más alantre, tendremos un descansín, al ascender a una llomba, onde axúntase otru barrancu que vien a la nuesa mandrecha. La verdá ye que será de los pocos descansos y por ello, esfrutamos viendo les últimes viesques y praos verdes, ya que dientro de pocu la caliza nos golpeará na vista con tola so fuercia de collores grises.


La canal sigue interminable, pero les vistes del Cornión son ablucantes

El tiempu sigue pasando (2 hores y media) y los metros van quedando abaxo (1380 ms), cuando tenemos qu'arrodiar una paré, pola so mandrecha pa siguir avanzando. Nel intre, el día ta espeyáu, y pa descansar los xemelos de tanta xubida, cada pocu dámonos la vuelta, y tenemos una de les meyores vistes del Cornión que pue algamáse na que ser capaces de dixebrar tolos cumales posibles y teniendo un mar de ñubes enriba'l Cares nun tien preciu. Tres collores vienen a la tiesta: Azul, gris y blancu.

El siguiente tramu, será casi rectu, y n'él la yerba dirá esapaeciendo pocu a pocu, predominando los pedreros, hasta que dempués d'una hora meterémonos de llenu na parte final de la canal. D'esta parte recta y mui pindia pasaremos a dar un par d'envueltes, bordiando delles grandes peñes nel nuesu avanzar, hasta que pegándonos a la paré esquierda, algamaremos el canalizu final de la canal.


Últimes envueltes grandes enantes del final de la canal

Estos últimos metros, a partir de los 2000 d'altor, van ser mui duros, alternándose les caberes partes de yerba con una inclinación mui fuerte, y pedreros nos que cada pasu p'alantre ye dar dos p'atrás, poro restolamos a cada pasu cual ye la meyor opción, y en dalgún pasu inclusu, preferimos trepar poles llambries y peñes, que siguir pol pedreru.


Tola canal de Mueñu embaxo y el final bien cerquino

Con munchísimu esfuerzu y mui pegaos unos d'otros, pol peligru de tirános piedres, vamos a aportar a la Puerta Mueñu y los sos 2230 metros d'altor. Nunca na mio vida, ficiera una canal tan dura, llarga y pindia nos sos tramos finales, nos que casi díbemos trepando.

Nun hai que dicir, que les vistes a un lláu y a otru son de lo más impresionante de Picos. Hai que dase cuenta que tamos a más de 2200 ms d'altor y dexamos atrás na canal tol paisaxe del Macizu del Cornión y agora tenemos xusto embaxo l'Hoyu Grande, lo que supón una vista de los Urrieles alloriante col Torre Cerredu xusto enfrente.


Torre Cerredu-Bermeh.a-Tiro L'Osu;Arenizas-Tesoreru;Llambrión-Palanca

Problemes pa tener estes vistes??? Nenguno... quiciás les 5 hores que llevamos pa dar preste a esta canal y los más de 1700 ms de desnivel direutu??? Na ho, será por fuercies, jaja. En serio, quiciás nun fui capaz d'amosar la paliza que ye esta canal. O a lo meyor sí, la canal de Dobresengos ye más conocida y la xuben los corredores y demás non?? Pues, la entrada al Hoyo Grande, final de la canal ta unos 300 ms d'altor más abaxo. Pa facése una idega val, jeje.


Na Puerta Mueñu (2230 ms)

En fin, nun tengo más que dicir sobre la dureza de la Canal de Mueñu, namái que Fernan, pa mi qu'albidraba la frayadura de canal y por eso tiró felizmente con Carlos, jeje. De toes formes, la canal ye preciosa y ya tábemos enriba d'ella, colo que nós tamién tábemos félices anque mui cansaos, ya inda nun acabara'l día.

Dempués d'un merecíu descansu, con dalgo de chocolate y frutos secos, vamos siguir a la gueta de la ruta más afayaiza pa xubir al nuesu prósimu finxu, como yera la Torre la Palanca. Asína que vamos abandonar esta puerta y les sos parés formaes por Torre la Puerta Mueñu, Torrezuela y Torre Pamparrosu a la manzorga y Torre la Celada, Torres del H.ou La Llera y Torre del Mediu a la mandrecha y vamos trepar un pocu p'aupanos sobre la falda de la Torre la Celada.


Caleyando hacia la Palanca y la Torre la Puerta Mueñu y Dobresengos y Cabrones

Ye la una y media aproximáu, y quedamos con Fernan nel cumal de la Palanca sobre les dos, asína qu'intentamos nun perdenos nun tarrén calizu como poques vegaes pue vese. Pa ello, aparte del gps, vamos siguir dellos h.itos que van empobinándonos al traviés d'un mar de peligroses torques, grietes afiláes y llambries que formen les parés del Hoyu Grande.

Nun hai que ser una eminencia, pa ver qu'esta fastera de los Urrieles, nun ta fecha pa cualesquier montañeru y menos na dómina ivernal. Hai qu'andar con mil güeyos, porque nun hai sienda posible, tan solu dalgún h.itu pue llevate pol bon camín o non, poro lo meyor ye saber dixebrar los cumales y saber a onde quies endirixite.


Dende la collada Celada: Torres D.Mella, D.Ubeda y Peñalba a un lláu y T. Celada al otru

Nel nuesu casu, queríemos xubir a les cercaníes de la collada Celada, onde garraríemos l'arista que xube a la Torre la Palanca. Con dalguna indecisión qu'otra fuimos a ello dempués d'una hora de camín, y ya dispusímonos, dempués de delles semeyes a los impresionantes cumales cercanos, a atacar a la Palanca.


Peña Bermeh.a y arista de xubida a la Palanca

Nun hai que dicir, que los güeyos durante tola arista díbense ensín querer hacia'l Cornión onde ya podíamos ver tola so estensión cola Peña Bermeh.a más al sur. D'otra miente, entre semeya y semeya fuímos distanciándonos yendo Pangua y César más adellantáos y Bittor y yo, tranquilamente fuimos faciendo cota tres cota de l'arista de la Palanca hasta los sos 2613 ms d'altor onde taba esperándonos Fernan dende unos minutinos.


El Santón de Pangua y l'arista cimera de la Palanca

Paez mentira'l control que tien Fernan de la montaña, que ya dixéranos qu'a les 2 y media taríemos na cume de la Palanca, y tan sólo llegamos un cuartu d'hora más tarde que foi esáutamente'l tiempu que perdimos al entamu de la canal del Mueñu y que fuimos arrastrando dende cuantayá.


Na Torre la Palanca (2613 ms)

Un abrazu merecíu entre toos ya que llevábemos unos 2150 ms de desnivel direutu y milenta comentarios con Fernan sola canal de Mueñu y la so dureza, sol paisaxe que teníemos en toles direiciones, sola canal d'Asotín, sol estáu de Carlos.... llevábemos tan solo 6 hores y media sin venos, y paecía una auténtica eternidá.



Grupu del Llambrión, Peñes Cifuentes, l'Hoyu Grande y el Picu dende la Palanca

Ye lo que tien la montaña, acaba ún perdiendo la noción del tiempu y casi nun te das cuenta de que ye la hora de xintar y fame había abonda. Asína que caún garró la meyor postura nesti pedreru que ye la Palanca y devoramos el bocata como si nos fuera la vida nello.

Media hora dempués, tábemos caleyando de nuevu ensín saber mui bien cuales yeren los siguientes oxetivos, ya que la ruta taba siendo pol momentu muncho más dura de lo qu'albidrábemos y nun yeremos a pescanciar si seríemos capaces de dir a pol gran oxetivu del día, la Torre d'El Llambrión.


Nel Cumal de la Torre Diego Mella (2532 ms)

Sinceramente se que Fernan, tamién taba cansáu y con pocos ánimos pa tal ascensión y yo tenía los pies mui cansaos pa más caliza, poro dempués de la primer parte de la baxada de la Palanca, la cual ye bien fácil hasta'l colláu qu'arrímase a una de les primeres torres que descienden hacia'l colláu H.ermosu, averéme col envís d'atacar la primera delles ensín saber si yera dalguna d'importancia.

Dexé la mochila, y tireme decidíu al colláu y dempués de destrepar y trepar un par pasos fáciles, encumé nuna primer cota pa pasar con un pocu d'ambiente a una segunda, la más alta que dióme unos 2532 ms, qu'a posteriori supe que yera la Torre Diego Mella.


Entamando la xubida al Llambrión

Una vuelta rápida al colláu, y entamé la baxada entainando hasta que garré a Fernan y Bittor que baxaben pegaos a la paré d'estes tres torres, teniendo que salvar cuanto menos unos dos o tres pasos con bien d'ambiente y dalguna destrepada. Mientres Pangua y César tirárense per un canalizu-pedreru qu'anque tenía'l peligru de les piedres paez ser que nun yera pa tanto y nunca meyor dicho yera más ruiu que nueces.

Cuala foi la sorpresa al baxar a unos 2250 ms, onde sepáranse les ascensiones del Llambrión y Palanca??? Pues nin más nin menos, que Pangua taba con bien de ganes de xubir al Llambrión tamién. Bufff, nesi momentu, pamidega que tanto Fernan como yo, desistiéramos va bona dafechu de tal fazaña.


Xubiendo poles marielles al Llambrión

Son 8 hores y media les que llevamos de ruta, y aún así, nun se d'onde sacamos les fuercies pa contentar a Pangua. Quiciás saber que tenía qu'abandonar la travesera nel día de mañana, fízonos garrar un pocu puxu, y tirar con él p'arriba. Hai que dase cuenta que tamos a 2250 ms y hai que facer un ascensu de 400 ms de desnivel.

Dexamos les mochiles, onde quédanse Bittor que nun lo pasó mui bien na baxada de la Palanca y César que nota daqué na rodiella per detrás y prefier nun arriesgar de más. Ensín pesu, avanzamos casi a la carrera pol H.ou del Llambrión, y ye que tenemos na tiesta qu'o entainamos o quedamos ensín cena.


Delles vistes prestoses dende la xubida al Llambrión

Dexamos bien ceo'l h.ou atrás, y metémonos siguiendo les marques marielles, hasta que garramos una canaliza qu'en diagonal y tras dalguna trepada non demasiáu complexa, faínos ganar otru puntu nel qu'hai que decidise si pasar una barriga aérea que da mal rollu o lo que fice de primeres, trepar una muria con agarres na parte superior.

La verdá ye que ye un pasu dalgo peligrosu, pero magar d'él metémonos nun pedreru onde desapaecen les marques marielles y debemos siguir los numberosos h.itos, que descúbrenmos delles roques de carbón, por dalgo ún de les Torres d'esta llambria xigante ye la Torre Las Minas de Carbón.


Pedreru inmensu na parte superior del Llambrión

Pasaremos toa esta fastera, intentado orientanos lo meyor posible colos h.itos y ganaremos lo que parez l'arista final, que nos tien reserváu dellos pasos fáciles de trepada pero con unos aéreos hacia'l H.ou Tresllambrión que ponen la piel de pita.


Cabrones-Torre Cerredu y caída col llagu cimeru a lo lloñe

Nun se bien cómo nin por qué, tamos finalmente nel vértice del Llambrión y el gps que ta más positivu que'l día del Torre Cerredu márcame 2647 ms, xústamente un metru más que'l Torre. Les polémiques pa quien les quiera, a mi tráeme ensín curiáu tala cosa.

Solo sé, que toi cansáu, tengo sede, acabo facer un cumal más complexu que Torre Cerredu col so peligru y nun esfruté tolo que debiera, y el querer baxar d'ellí cuanto antes y llegar al refuxu, amuesa a les clares la mala decisión que tomamos al xubir con tal cansanciu y la cara de Fernan ta diciéndome lo mesmu dafechu.


Mis pates nel Llambrión (2647 ms) y pa compensar Fernan nel 96

Hasta la semeya que sacamos de cume, y que nin siquiera miramos si taba bien, dexa nidio lo que toi diciendo, jeje. Eso sí, mis piernes y mi bandera asturina ficieron cumal, pero mi cabeza y mi corazón tan casi desdexándolo y solo quieren baxar.

Calculamos que dempués d'una hora d'ascensu quedarános otra de descensu más el restu de baxada y camín hasta'l refuxu. Son les 5 y media pasaes, vamos andar pillaos de xuru pa la cena de les 7, anque nun mos azotamos lo más mínimu ya que vimos como yeren los trepes y los pasos aéreos.


Refuxu del colláu H.ermosu

Asína que, facemos una baxada espress, pero mui controlada, ya inclusu decidimos los tres facer el pasu pela barriga aéreu, que tien mala pinta, pero nun ye tan xabaz al final. Con too y con ello, lo pior de tola baxada la sede y el calor que faínos tar bocasecaman enforma.


Fernan durante la baxada

Ensín más, garramos tola canaliza en baxada, con curiáu pa nun tiranos piedres y baxamos como esguilos hasta'l H.ou del Llambrión onde empobinámonos lo más rápidu posible hasta onde tan les mochiles col envís de garrar l'augua lo antes posible.


Baxada hacia'l senderu qu'aporta al refuxu de Colláu H.ermosu

Con ello, ya solo nos quedaba fundir tol augua que teníemos nes mochiles, y baxar hacia'l senderu qu'endiríxenos al refuxu de Colláu H.ermosu, primeru baxando desnivel siguiendo les marques marielles y llueu ya per senderu, hasta'l guapu refuxu.


Ablucante semeya del refuxu de H.ermosu coles Peñes Cifuentes detrás

Foi too un placer aportar al refuxu al fin, saludar a Carlos, ver que taba de mui bon humor, a pesar d'esperar por nós más de 6 hores, y poder tomar una cervecina nun de los requexos más guapos de Picos. Les vistes hacia la Torre'l Frieru y les Torres de Salinas y Liordes son cuanto menos ablucantes.

Casi, por un segundu escaézseme tol cansanciu que tenemos enriba con tales vistes, pero dempués de 10 hores y 45 minutos de ruta, 12 kms de distancia percorría y sobretóu dempués de los 2550 ms de desnivel acumuláu que tuviemos que xubir y casi 1000 de descensu, les pates, pies y hasta la tiesta tan más que cansaos.


Momentos de descansu y diversión


Menos mal que como siempre, tar entre collacios, fai que los ratos a pasar nos refuxos seyan llevaderos y se pueda tar de rises viendo a Pangua escorriendo pites, o simplemente dempués d'una bona cena nel refuxu poder xubir hasta la cercana Torre de H.ermosu onde esfrutar d'un guapu atapacer col relaxamientu que conlleva.


Relaxándonos coles vistes dende H.ermosu

La nueche diba ser, como siempre, una incógnita anque camiento que cada día que pasa soi a descansar meyor nos refuxos, y menos mal porque este nun ye nengún spa precisamente jeje. A ver si son a igualo daqué y qu'al menos nun haya qu'escapáse pente les peñes a plantar un pinu, o nun tener que baxar 50 ms a la gueta d'una fonte onde poder llaváse un puquiñín.

Eso sí, fuime pal sobre, col tastu al llabor bien fecho (sacante l'ascensu al Llambrión), y sobromanera cola illusión intauta al conocer una fastera de Picos dafechu desconocía pa mi y coles ganes y fuercies pa siguir conociendo más nesta Travesera 2010-2011.

Muncho más na prósima entrega...


Camudando'l Camín presenta'l Cornión

Nesti segundu día de la Travesera ficimos: Torre La Palanca (2613 ms), Torre Diego Mella (2532 ms) y Torre d'El Llambrión (2647 ms) toos ellos pertenecientes al Club 111 de Picos

Ver progresos en: Retos montañeros

4 comentarios:

  1. Mui buenes collaciu:

    Como trabajamos en verano, incluso!!!!!!! has descubierto mi cohartada para no subir a Mueñu. De vez en cuando se puede permitir alguna devilidad o que?.
    Un abrazu.

    ResponderEliminar
  2. Berto, perguapa y dura estaya. Dende Caín hasta lo cimero Picos (metru arrriba, metru abaxu). Dígotelo..., nun te lo digo... Voy dicítelo. Nunca tuve en Collau H.ermosu. Manda güevos, pero ye asina. El llambrión ye la mio asinatura pendiente. Namás una vegada tuviéramos per allí y xubimos la Torre Blanca y enriscámonos nel Tiru Llagu (putes les pasamos)y dallí colamos pal Torrecerréu y nunca más volviera. A ver cuando-y pongo remediu.
    Un saludu

    ResponderEliminar
  3. Berto, me la pisaste!!!!!!!!!!
    El próximo día 9 si el tiempo no lo impide, iniciamos nosotros otra travesera y los dos primeros días practicamente igual. solo cambia que en vez de la Verdilluenga y Cuvicente, nosotros solo Los Cabrones de Peña Blanca, luego por Trea a Caín. el segundo hasta La Palanca igual, luego sin parar en Cdo Jermoso, por Argayo Congosto y Asotín a Cordiñanes y Posada de Valdeón. Tercer y cuarto día, de nuevo al Cornión haciendo noche en Vegabaño, para finalizar en La Ercina. No tenemos coche escoba.
    De todas formas me prestó mucho vuestra entrada, así ya me puedo hacer una mejor idea de lo que me espera en Mueñu que es lo que no conozco.
    quedamos esperando las dos jornadas que faltan de vuestra travesera.
    Un saludo amigo

    ResponderEliminar
  4. Fernan, ya sabes de sobra que ficisti un llabor acoyonante yendo con Carlos y dexando pa otra esa canal qu'espero faigas otru día.

    Cienfuegos, nun pue ser que nun tuvieras en H.ermosu, jaja. Pero bono, a grandes males grandes y fáciles remedios o que??

    Monchu, espero que te fuera d'aida la reseña de Mueñu y que sufriérais lo xusto, jeje. Bona soba, tamién ties pensada pa la travesera, jeje.

    Un abrazu

    ResponderEliminar