martes, 22 de agosto de 2017

Poncebos (Cabrales) - Canal de Sabugu - Amuesa - H.ou Los Cabrones (Cabrales)

8 de Xunetu de 2017

Track: Poncebos (Cabrales) - Canal de Sabugu - Amuesa - H.ou Los Cabrones (Cabrales)


Tamos en Poncebos, preparaos, ilusionaos, cargaos coles mochiles y con muches ganes de pasar cuatru díes pelos Picos. Los planes A... preparaos, los planes B... nel bolsiellu por si les mosques y los planes C... na tiesta dempués de dellos años patiando, lo cual va dándonos una migayina d'esperiencia.

A lo que vamos, magar d'un madrugón curiosu y de dellos enguedeyos a la hora de quedar, arrcamos cola furgo hacia Cabrales, pel camín clásicu de l'Autovia'l Cantábricu, Posada, Altu H.ortigueru y Arenas nel conceyu Cabrales, onde como ya dixi na entrada resumen... almorzamos toos xuntos.

Partimos de Poncebos (251 m)

Pa les 9 menos cuartu, tamos entamando a caleyar hacia la sienda'l Cares, decidiéndonos esta vegada a facer la de la parte baxa. Tengo que dicir que fai milenta años que nun pasaba per ella y a tolos que nun la conocíen prestónos enforma esti paseín.

Dicir, que ye encomendable nun aventurase per ella si nun ye a primer hora de la mañana, ya que tola bayura xente que suel dir pela superior, podría azotanos piedres, teniendo un bon problema si dalguna ye a alcanzanos.

Esfrutamos d'un paséu perguapu pel senderu baxo del Cares

De toes formes, les nueses intenciones yeren dobles, queriendo esfrutar esta sienda y col envís d'alcontrar el pasu hacia la canal d'Estorez. Tengo que dicir que tolos nuesos intentos de cruciar el Cares, fueron en baldre, por mor del caudal del rigu y dempués d'intentar acceder a la sienda superior pelo que yo creo ye'l sedu'l Molín, dímonos por vencíos y tornamos so los nuesos pasos hacia la canal del Escaleru.

Dicir, que tolos intentos d'alcontrar pasu hacia Estorez, ficieron que perdiésemos alreor d'hora y media de xubíes y baxaes, que de xuru tamién pasó factura a les pates de los miembros del grupu. Con too, xubiremos peles envueltes de la canal del Escaleru, pasando dempués al perguapu senderu armáu p'ascender a la sienda d'arriba, na parte más amplia de la canal.

Ascendiendo la parte baxa de la canal del Escaleru

Aportaremos a la sienda'l Cares, ante l'atenta mirada del xentíu senderista, qu'entrúganos d'au venimos, con acentos de varios países. La verdá, ye que vamos cola sensación de ser estraterrestres pente tol rebañu que caleya penriba'l rigu Cares.

La verdá ye que l'ambiente nel grupu ye de rises, de cero esmolecimientu pelo que se nos venía enriba y d'esti xeitu percorrimos el tramu del Cares, hasta atopar cola canal de baxada hacia'l nuesu nuevu oxetivu: La Canal de Sabugu.

Algamamos la sienda'l Cares caleyando sele dando vista a Estorez que quedará pa otra ocasión

Pente glayíos ya ixuxús, descendemos la canal, dexando ablucaos a tolos caleyeros del Cares. Cierto ye que nos pasamos un pocu, coles carreres pel pedreru y les rises, pero dempués de nun algamar la canal d'Estorez, teníemos ganes de metenos en Sabugu cuanto antes y de pasu esfrutar d'una llera perfeuta pa baxar a fueu.

Una vegada que tamos toos nel calce del Cares, tocará poner les chancles y cruciar les sos fríes agues, sobretou cuando pasamos peles dela surxencia del Farfáu. Tener que parar penriba les peñes, dellos segundos, pa notar los pies, diz muncho de lo frío del agua.

Pasaes les rises del cruciar el rigu, enllenamos les cantimplores del agua del Farfáu y ponémonos les botes pa entamar, lo que va ser la criba más grande que viera yo nunca nel monte. En cabeza punxéronse Tito y Carlos, intentando descubrir per onde diba'l senderu más trilláu y poniendo un ritmu qu'a la fín, pasó-yos factura enforma.

Descendemos al Cares pa entamar la llarguísima y pindia canal de Sabugu

Esti tipu de canales ensín senderu claru, hai que tomales con calma, garrando un ritmín sele y restolando pente les yerbes onde meyor podemos pisar. Personalmente, paezme que salí l'últimu y poquín a pocu fui pasando a la xente, pero onde meyor camentaba que se podía caleyar.

Unos echándose a la manzorga y otros penmediu la canal vamos dir ganando altor so los 1300 m de desnivel direutu que tien Sabugu. Más menos, a la metá de la canal, vamos parar toos nun de los pocos puntos llanos enriba d'una pequeña llomba pa intentar reunificar y que la xente descansare.

Nel intre, ya aldovinaba que la xera d'ascender esta canal diba ser mui, mui dura pol calor, pola poca sienda p'ascender y polo pindia que yera. Ésto, asoleyóse nos tiempos que ya díbemos sacando los d'alantre a los últimos del grupu, rondando casi la media hora.

Xubiendo ensin senderu claru hasta más menos la metá de la canal

Magar del descansu, entamamos de nuevu a ascender, tornándose más dura si cabe l'ascensión, tanto polo pindio, como pola solana que taba faciendo mella en toos nosotros. Según vamos xubiendo y xubiendo, lluchando col tarrén, restolando per onde faise meyor camín... la xente va desapareciendo y quedando atrás... mui atrás.

Tol restu de la durísima canal, voi esmolecíu por como lo tarán pasando. Vamos en cabeza Alberto y yo, que se supón qu'andamos bien físicamente de correr pel monte y ta costándonos un triunfu avanzar canal p'arriba, tirando del mochilón pa cuatru díes que llevamos al llombu.

Aportaré'l primeru a la boquera de la canal y nun pueu facer otra cosa qu'azotar la mochila a tomar vientos y tirame nel prau a descansar. L'esfuerzu ye brutal, el calor tamién y la canal fízose durísima, quiciás la más dura ya incómoda d'andar que nunca xubiera y ya van unes cuantes.

Segunda parte de la canal de Sabugu... más dura si cabe que la primera

Poquín a pocu, van arribando'l restu la cabecera del grupu, hasta que llega un momentu nel que ya nun vien más xente y nun pinta que lleguen aína. Faigo una primer intentona con Haritz de dir a por agua pero doime cuenta qu'hasta Amuesa nun tendremos.

La xente ta tirada en prau con una bona reventada y nun quiero pensar como vien el restu. Así que decido dir corriendo a por agua hasta Amuesa. Pído-y los playeros de trail a Raúl y pégome una carrerina hasta la canal d'Amuesa pa enllenar dos cantimplores.

Pa cuando llego, acababen d'aportar los últimos y taben poniéndose a xintar daqué pa garrar fuercies. Pienso que perfeuto, si nun llegamos a cenar, pues nun se llega, pero ya me dicen que van baxar toos pa Poncebos per Amuesa, ye más... xente del grupu ya tira pa Cabrones pa poder llegar a tiempu de la cena.

Míticu camín dende Amuesa hasta'l H.ou Los Cabrones

Yo quedo cola sensación de que peguéme la paliza de dir a por agua, pa nada. Mis intenciones nun yeren suministrar a los que primeru llegaron, sinon a los últimos pa poder siguir alantre toos, llegando antes, dempués o cuando fuera.

Son les 5 la tarde, había otres 5 hores p'aportar al refuxu, había hores de lluz de sobra. En fín, asina somos los humanos, miramos pal ombligo de nueso lo primero. Yo nun marcho de la boquera de Sabugu hasta que falo con tol mundiu, mientres el restu'l grupu que decide siguir pa Cabrones, ya va pela Cuesta'l Trabe.

Entrugo una y otra vegada, si de verdá van abandonar y sacante dos lesionaos (Carlos y Tito), los demás antes o dempués, diben poder llegar a Cabrones y con lluz de sobra. Solo hai que pensar, lo que camuda'l caminar con un senderu claru hacia un refuxu.

Con unes sensaciones permales y muncha culpabilidá por facer esta canal tan dura, cargándome la Travesera, salgo hacia la Cuesta'l Trabe pa intentar agarrar al grupu. Pero tengo que tornar hasta dos vegaes porque nun alcuentro la mió cantimplora primeru y la cámara dempués.

H.ou Los Cabrones ablucante como siempre

La mala hostia sigue aumentando, ya qu'enriba que voi pol agua, la cual nun la beben los que más atrás veníen y necesitaben, quédome yo ensin agua pa tol ascensu hasta'l refuxu de Cabrones. Póngome en mou carrera de monte, pero con un muertu na espalda y al final de la Cuesta'l Trabe, baxo l'atenta mirada de los cumales de los Cuetos del Trabe, axúntome al restu y minimizáu GM Xuan de la Borrina.

A les 7 y media (con media hora antes de la cena), arribamos dempués de 10 hores y media de ruta al refuxu, anque debemos quitar hora y media perdida nel Cares a la gueta d'Estorez y otro tanto, hasta que finalizamos toos la gafienta Canal de Sabugu.

Los 11,6 km de percorríu y los 2310 m de desnivel positivu acumuláu, nun son nada, ye cansanciu físicu. Pero la toma de males decisiones, fízome mentálmente más dañu que tolos metros durísimos de la canal de Sabugu y eso que tenía una visión sesgada de la rialidá, enterándome más tarde qu'hubo xente que quería xubir y animóse-yos a descender, a sabiendes que cenar nun cenaríen, pero llegar de día ensin problemes.

En resume... día nel monte pa escaecer... y nota mental... les decisiones grupales tómoles yo y les individuales... caún col so cuerpu y coles sos ganes de sofrir. Porque'l sufrimientu, dacuando, amatágase con un bon atapecer, con unes cerveces y con una nueche de descansu nun refuxu... anque nun se cene caliente.

Camudando'l Camín esfrutando del meyor atapecer

2 comentarios:

  1. Creo que después de ver los 2.300m de desnivel en 11km vamos a descartar la opción de acercarnos a Cabrones por esta opción!! Pero bonita seguro que ha sido un rato!!

    ResponderEliminar
  2. Pa mi idega... ye una canal pa facer con mochila d'ataque y non cargando con pesu pa 4 díes. Pero bono, caún ta físicamente como ta y lo mesmu nun ye pa tanto... yo sufrila abondo, paecióme durina como pa más actividaes que nun seyan aportar al refuxu.

    Saludos

    ResponderEliminar