viernes, 25 de agosto de 2017

H.ou Los Cabrones (Cabrales) - H.orcada d'Arenizas - Canal de Dobresengros - Caín (Valdión)

9 de Xunetu de 2017

Track: H.ou Los Cabrones (Cabrales) - H.orcada d'Arenizas - Dobresengros - Caín (Valdión)


Son les 8 y media cuando tamos preparaos pa siguir cola Travesera y tamos preparaos pa continuar namáis que tres miembros: Silvia, Haritz y yo. Durante la nueche, Alberto tamién decide que nun puede siguir por mor de dolores nuna rodiella.

Con esti plan, alcontrámonos con que tenemos tres díes de travesía en grupu pequeñu. Nun soi a alcordame que pasare na asemeyao nos años que llevamos de traveseres, pero bono esto ye lo qu'hai y tenemos bon tiempu hasta la tarde, poro debemos aprovechalo.

Partimos del H.ou Los Cabrones (2039 m)

Despedímonos d'Alberto, qu'abandona anque nun taba previsto y de los otros collacios que xubieron hasta'l refuxu nel día d'ayeri: César, Pangua y Raúl. Con ciertu esmolecimientu, pola mió parte, polo asocedío na anterior xornada salimos caleyando, travesando tol enorme h.ou, hasta entamar la xubida hacia'l colláu que queda pente'l picu Cabrones y les sos aguh.es y l'altu'l H.ou Los Cabrones.

Esti ascensu, valme pa ver que nin les miós pates, nin les de los miós collacios tan pa munches floritures y queden tres díes per delantre, asína que la mió tiesta va desaniciando posibles planes d'ascensión alternatives.


Ascendemos de colláu en colláu hacia la h.orcada d'Arenizas Altas

D'otra miente, entreténgome agüeyando tola colleición de cumales que tengo nesta fastera. Como non, alcuérdome del Picu Los Cabrones y de como aportamos al refuxu pela Canal del Agua. Según vamos avanzando dexando'l H.ou Negru a la nuesa mandrecha, apaecen les aguyes de la Torre Cerredu, les cuales entá tengo pendientes y la gran Torre.

Asína mesmu, cuando descendemos hacia'l H.ou Cerredu, asómense otra retafila de cumales que ficiéramos nuna xornada mui prestosa, hasta qu'aportaremos a la H.orcada d'Arenizas Altas, onde aparte d'abrise dellos paisaxes ablucantes, pararemos a descansar un ratín.

Pasamos peles h.orcaes d'Arenizas pa descender hacia'l H.oyu Grande

Magar del descansu, diremos faciendo la travesía de la h.orcada Alta a la Baxa y pel camín sigo faciendo alcordanza de más ascensiones, ya sea dende'l Picu Urriellu, el Neverón y la Párdida o la Morra y dalgún Campanariu, hasta aportar a la h.orcada Baxa, onde una vegada más, tenemos vistes nueves.

Equí, quedamos ablucaos polo inmensu que ye'l macizu Los Urrieles y lo prestoso que ye dir de h.orcada en h.orcada descubriendo montes a esgaya. Personalmente, quedo un ratín paráu y magar de les semeyes de rigor, alcuérdome especialmente d'esa primer travesera na que llegamos dende Caín per Dobresengros y tovía tuvimos fuercies p'ascender un par de Picos d'Arenizas... que tiempos de mocedá jeje.

Baxando al increyiblu H.oyu Grande... llugar de soledá absoluta

Ensin más, entamamos a descender al H.oyu Grande, intentando nun zapicar pel pedreru y ye que nun pueu dexar de mirar coses que tovía nun conozo. Acolumbro'l restu de las Arenizas hasta la Collada Labrada, paso pol Picu Tesoreru siguiendo hasta la Collada Blanca, pela que tampoco pasé y d'ehí hasta la Torre Blanca, que sigue pendiente.

Ellí, ya entramos nel mundiu del crestéu finu hacia'l Llambrión y más a la mandrecha hasta la Palanca, qu'algamáremos nuna travesera increyíblemente dura y cuando doime cuenta tamos no baxero del H.oyu Grande Cimeru.

Siguimos travesando'l H.oyu Grande hacia la boquera de la canal de Dobresengros

Nesti llugar de soledá absoluta, nun podemos facer otra cosa que caleyar en silenciu, caún colos sos camientos. Bono, en silenciu toos non, Silvia sigue intentando facer alderique con dos montañeros que préstanos enforma la tranquilidá y mirar pa los paisaxes en silenciu.

Con Haritz ye igual que con Fernan, si tenemos dalgo que falar, falamos, pero sinon podemos facer rutes enteres ensin cruciar pallabra, esfrutando igualmente del caleyar, de comentar cuatru caxigalines del paisaxe o d'albidrar cuala ye la meyor opción.

Baxamos Dobresengros hasta topar la borrina la cual protéxenos del calor y del sol

Aportamos a la gargantada del H.oyu Grande Baxeru y oyemos dellos glayíos, viendo xente baxar pelas Cabeza Altas, apuntando na tiesta conocer esti pasu pente les canales de Mueñu y Dobresengros.

Descenderemos un ratín de canal hasta topar una peñona enorme que nos da la solombra xusta pa parar a xintar. Camentamos que ye bon momentu, enantes de metenos dafechu na llinea de borrina qu'asitiase unos 100 m desnivel pembaxo de nueso.

Finamos Dobresengros nel Cares con un bon esfuerzu nes pates

Magar de fartucanos, siguiremos col llargu descensu pela parte más ancha de la canal, hasta metenos nel borrín y xestionar con curiáu'l míticu hombru que nos dará pasu a la parte baxa de la canal. Con estes condiciones, nun debemos andar al debalu, ya qu'enriscase por nun alcontrar el pasu nun ye difícil.

Ensin más, pasamos al tramu más tendíu de Dobresengros, per onde nun tenemos más que caleyar un pelín más relaxaos a lo llargu de la llarguísima baxada hasta alcontrar a les primeres persones en tol día ya a la vera'l ríu Cares.

Con 8 hores y 15 minutines nes pates, con cero llugares nuevos conocíos y munchos planes na tiesta pa prósimes incursiones piquistes, aportamos a l'Albergue de Caín, onde entregámonos al bon facer de les xarres de cerveza pa rehidratar y recuperanos de los 2140 m de desnivel descendíu y de los 12.6 km caleyaos

Camudando'l Camín na redolada de Dobresengros

No hay comentarios:

Publicar un comentario