jueves, 19 de octubre de 2017

Tuíza Riba (L.lena) - Pasada'l Siete - Cuetu Les Cabres - Les Merines

1 d'Ochobre de 2017

Track: Tuíza Riba (L.lena) - Pasada'l Siete - Cuetu Les Cabres - Les Merines


Una vegada más alcontrámonos nel pueblu montañeru astur por definición, al menos na fastera central d'Asturies: Tuíza Riba. Como aportar hasta equí? Pues como siempre, llegamos dende Xixón pela As-66 hasta Campumanes, pa siguir pasando pelos pueblos de Sotiel.lo, Espineo, Los Pontones, Teyeo, Rospaso,Tuíza Baxo y Tuíza Riba.

En Tuíza, magar del almuerzu en Campumanes, preparámonos la xente davezu del Xuan de la Borrina, cada día menos y xente nuevo que vienen a probar como va eso de dir con un grupín como'l nueso de monte.


Partimos de Tuíza Riba (1235 m)

Como ye vezu, salimos de Tuíza Riba y esta vegada garraremos el camín de branu que xube hasta'l Meicín pela Portil.lera. Ya son tantes les vegaes que xubimos que nin siquiera suelo parar a sacar munches semeyes y nel día de güei, vínoseme a la cabeza aquella primer ascensión a los Picos del Fontán.

El camín, con un día tovía queriendo esperezase, faise con tranquilidá, anque a bon ritmu. Llueu del Meicín caún garrará'l so andar y la pindia canal hacia la Forqueta'l Portil.lín va pasando factura a los que fai más tiempu que nun vienen de monte.

Camín a la Forqueta'l Portil.lín

Na Forqueta'l Portil.lín (2070 m) taremos unos venti minutinos abellugaos d'un vientu castrón, hasta qu'axuntámonos toos de nuevu. Toca pasar un pelín de fríu, cosa cola que nun contábemos, pero nel monte un grupu ye tan fuerte como'l más débil nesi día y hai que facer por que tol mundiu tea a gustu y motiváu na ruta.

Poro, esperamos un pocu a que la xente recupérese y vamos dir toos xuntos faciendo la travesía baxo los Portil.linos y penriba de Cuapalacios, col envís de conocer l'oxetivu de Benjamín: La Pasada'l Siete.

Travesía per Cuapalacios hacia la Pasada'l Siete

Nun la conozo y tengo muncho interés tamién, anque ya tengo visto que trátase d'un canalizu de piedra suelto dalgo verticalín, nel que tenemos qu'andar con curiáu pero sin mayores dificultaes, poro aportaremos ún a ún, a la boquera que da accesu a la otra fastera del canalizu.

La verdá ye, que namái que tuvimos que poner les manes en dalgún bloque empotráu y emburriar pel culu a Kíla, pero nun tien mayor dificultá, anque hai qu'andar sollerte de nun tiranos piedres, eso por descontáu.

Trepamos un pelín hasta la Pasada'l Siete

Cola edá y los añinos nel monte, que ya son unos cuantos, voi faciéndome más repunante de lo normal y güei tenemos a un miembru del grupu que ta d'andar pol monte solu y facer delles xataes, con mayor o menor xacíu.

Nesti casu, quería averase hasta'l picu'l Siete, el cual intentara un par de vegaes, como non, per onde nun ye. Asina qu'empobínolo correutamente, anque al pocu ratu ya nun diba per onde yera, ya intento escaecer que tengo un "cagaprieses" al cargu y pa enriba un "atrevíu" que charra con total tranquilidá qu'un día va matase pelos llugares onde se mete.

Baxando de la Pasada'l Siete hacia los Fuechos de la Cabra

Yo, que camiento que nesto del monte, val más tener tanta intuición como condiciones, dedícome a entrenar pa tener les condiciones y la intuición ya va con unu mesmu o sinon la ties, hai que saber dar la vuelta o saber rodeate de bonos montañeros, como'l mió collaciu Fernan qu'a intuición nel monte nun lo gana naide y muncho deprendí con él.

A dicir verdá, nunca entenderé pa qué se quier dir con un grupu de monte, si llueu nun se quier siguir la ruta marcada. Pa eso, siempre será meyor dir solu que tener a la xente pendiente de si te mates o si toca avisar al rescate o si va tocate a tí dir a rescatar.

Caleyamos pelos Fuechos de la Cabra hacia'l Cuetu Les Cabres con paradina a xintar

El casu ye que baxamos de la Pasada'l Siete, descendiendo los típicos cintos d'esta fastera hasta garrar el senderu que vien dende Covarrubia y ya caleyar sele hacia'l nuesu destín: El Cuetu Les Cabres. Antes, pararemos a xintar baxo la so paré norte y dempués despedirémonos de dos miembros del grupu que ya tuvieren abondo y deciden baxar per Covarrubia.

Los demás siguimos dándo-y la vuelta al Cuetu Les Cabres, pa colocanos mirando pa la so arista oeste. Atada a una peña, tengo que dexar a Kíla ya que nun ye un trepada afayaiza pa ella y tendremos tol ascensu col cantar de los lladríos y quexíos de la perrina.

Prestosina trepada al Cuetu Les Cabres

Entrarémos-y como ya dixe pela arista oeste, pa dempués d'unos primeros resaltes pasanos a la cara sur, onde tendremos los pasos más espuestos. Ye la más impresión que la dificultá ya que a la escontra de lo que camentaba, la roca caltiense en bon estáu y podemos asegurar los pasos ensin problemes.

Controlando un puquiñín a la xente, vamos resolviendo tolos tramos, hasta arribar a los 2116 m del Cuetu Les Cabres, cumal non mui ascendíu nel macizu de Penubina, pero que tien un puntu mui prestosu d'ascensión y unes vistes perguapes hacia tola redolada.

Cume nel Cuetu Les Cabres (2116 m)

Dempués d'echar un vistazu a toles vistes, sacar semeyes de grupu ya individual, fadremos el descensu pel mesmu itinerariu y pela mió parte, con ciertes prises, ya que taba dándome aforfugu por mor de la mió perrina lladrando tanto tiempu.

Reunirémonos toos con Kíla y recoyemos les mochiles pa siguir camín hacia l'otru oxetivu a conocer del día: La Senda Les Merines. Esti camín paez ser que servía pa llevar les oveyes dende Altu Terreros hasta Cuapalacios y agora, señalizáu con marques marielles, cada día ye una rutina más transitada pelos montañeros.

Entamamos la sienda Les Merines magar d'un guapu descensu

La primer parte sedrá un cómodu pedreru bien marcáu, que tien de llevanos a una colladina herbosa, onde abrimos les vistes hacia la fastera llionesa del macizu de Penubina. Equí, entamará'l tramu más entretenida del senderu con muncho xube-baxa y la superación d'un par d'espolones rocosos que baxen de la Penubina.

El más guapu tenémoslo al final del senderu, con un pasu llateral per peñona pa salir a una forcadina. Nesta forcada, podemos decidir por siguir hasta l'Altu Terreros o garrar una llerona pa descender hacia'l Meicín.

Senda les Merines marcadina dafechu y mui entretenida

Nós, tiramos llerona abaxo, caún al so ritmu y anque nun ye de les más prestoses que baxé, quitéme un pelín de ganes de volver a correr pel monte, cola baxada a fueu. Una vegada que nos reunimos toos a la vera'l camín que baxa hacia'l Meicín, tan sólo quedaba dexase llevar pelos verdes praos y pindios senderos.

Como siempre, la paradina nel Meicín ye un clásicu y tomar una birra asoleyando un ratín, ye ún d'esos placeres que sólo pueden vivise esfrutando del monte astur. Pa lo demás, como siempre, toca tirar de Mastercard, pero esto ye tolo gratis qu'ún se lo proponga de facer.

Baxada hacia'l Meicín cola calma

Cuando tamos descansaos, siguimos camín de nuevu hacia Tuíza Riba, per camín más que conocío, aportando al pueblu magar de 7 hores y cuartu de ruta, na que percorrimos un total de casi 11 km y superamos un desnivel acumuláu de 1170 m.

En resume, ruta prestosina, de calter alpín con dellos pasos interesantes y que paga la pena conocer... pero sincéramente, nun acabo de volver a esfrutar del monte como antañu y mi grupu nun ta tornando a ser el que yera... dalgo amatagóse nel final de temporada pasáu y nesti tovía nun fuimos a facelo prender... nin con xente nuevo ni cola xente vieyo de siempres.

Camudando'l Camín cola vieya espelurciada

2 comentarios:

  1. Pobre Kila, que frustración ver que no podía subir con vosotros al Cuetu, por cierto, el otro día Víctor del blog pindio-pindio, comentó que los tuizanos hacen las terminaciones en -as y no en -es y que lo correcto es Cuetu Las Cabras. Nosotros no nos metemos porque no sabemos, pero a lo mejor te resulta intesante el dato. Un abrazo, ya volverán esas ganas de monte!!

    ResponderEliminar
    Respuestas
    1. Si, la verdá ye que pa esa fastera de L.lena... suel tener terminación en -as. Erru míu que me dexé llevar por unos mapes que tengo.

      Eliminar