jueves, 4 de noviembre de 2010

Tuíza Riba (L.lena) - Picu Fariñentu

26 de Setiembre de 2010

Track: Tuíza Riba (L.lena) - Picu Fariñentu



Tercer vegada que tornamos al pueblu l.linizu de Tuíza Riba y nun va ser la cabera, ya qu'hai tantes rutes pa les que sirve d'acesu esti pueblín, que camiento que-y garraremos bon cariñu. Asína pues, salimos de Xixón ensín madrugar demasiáu, y garramos l'autovía minera hasta Mieres del Camín, onde siguimos hasta'l pueblu de Campumanes en L.lena.

Ellí xuntámonos p'almorzar con Fernan, que venía de Colombres, y Diego y Pilar, que llegaren por su cuenta 5 minutos enantes que nós, llibrándose d'un autobús enteru de montañeros que pesllaron la posibilidá de pedir dalgo na barra, hasta unos minutos más tarde.

Magar del desesperante café, tiramos pola esgonciada carretera 8 de L.lena (putes obres del Ave) pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin Tuíza Riba, onde pusímonos en plan, p'afrontar con bien de ganes y dalgo de fríu, una ruta na fastera Sureste del Macizu d'Ubina.


Semeya de grupu en Tuíza Riba

Unos minutos enantes de les 10 de la mañana, venmos entamar la ruta xubiendo les primeres rampes nel pueblu de Tuiza Riba (1206 ms), pero esta vegada nun sedrá hacia'l refuxu del Meicín, sinon qu'ascenderemos pelos pindios praos que sirven de falda al picu Güertu los Pioyos, dexando a la nuesa mandrecha'l val.le Las Estacas, y las penas L.lana y Siegalabá.


Entamando a ganar altor sobre Tuíza Riba

Hai que dicir que l'aniciu de la ruta ye lo más duru, poro nun hai que cegase, y garrar un ritmu continuu y qu'adáptese a la nuesa capacidá física y sobretou al estáu nel que temos nel propiu día. Y ye que nun siempre ándase col mesmu xeitu, nin a tol mundiu cuésta-ylu mesmu unos tipos de ruta qu'otros. Nesta ruta y nesti tramu en concretu, se que'l collaciu Carlos pasólu permal, pero cuantayá, que tienmos avezaos al so aguante y tirando de motor diesel, al final aporta a tolos sitios.

La xubida en xeneral, nun tien munchos detalles que dar, ya que más menos diremos alcontrando senderos que crúciense delles vegaes, pero qu'a la fin tienen que dar al pasu más guapu, na Cuenchona, pocu enantes d'arribar al colláu del Bocarón (1881 ms) en un hora y 45 minutinos.


Ese Charly sabiendo sofrir hasta'l Bocarón (1881 ms)

Nesti colláu si la ñebla permítelo, abriránse les vistes a la mandrecha, cola Pena L.lana, Campanariu y Siegalabá, de frente'l val.le'l Retertoriu y l.legu del L.leturbio, cola Pena Ruea al fondu, y a la manzorga, la cresta que finaliza nel picu'l Güertu los Pioyos, y detrás l'oxetivu, el Picu Fariñentu. Aparte, ye'l llugar perfeutu pa xintar dalgo, dá-y a la bébora, y recuperar fuercies, ya qu'agora tamos a un altor potente, y tenemos muncho de l'ascensión algamada.


Nel Güertu los Pioyos hacia'l Fariñentu y Fernan con Pena L.lana y Siegalabá detrás

Darréu, vamos facer tol crestéu que nos fadrá poquín a pocu ganar más altor na gueta del cumal del Picu'l Güertu los Pioyos colos sos 1973 ms. Ellí nun paramos demasiáu, quiciás un pelín pa ver les vistes del Fariñentu y la Pena Ruea, o del cortáu que fai hacia Tuíza, y siguimos camín baxando empobinándonos a la bas del Fariñentu.


Picu Fariñentu y Pena Ruea

Nesti momentu, vamos ascender al picu cruciándolo d'esquierda a drecha, pola parte más yerbosa, que podemos alcontrar. Esto fadrase ensín dificultá, sacante de lo pindio del tarrén, y casi sin danos cuenta taremos n'arista, xustu na salida de la Canalón del Infiernu.


Na cresta del Fariñentu

Asína qu'en media horina, ficimos la baxada del Picu'l Güertu los Pioyos (o Pena de Diego), y tola xubida al nuesu destín, Picu Fariñentu de 2176 ms, nel cual ya con un día espeyáu enforma, relaxámonos, xintamos y descansamos de les 3 horines de caleyar.


Nel cumal del Picu Fariñentu (2176 ms)

Hai que dicir, que'l paisaxe dende esti cumal, ye quiciás el más completu, si queremos acolumbrar cada cima del Macizu d'Ubina. Nun tien desperdiciu, tornar a agüeyar montes pasaos: Cordal de la Mesa, Ubina, Picos del Fontán,... y tolos que réstenme por facer. Y ye que'l Fariñentu fai posición central en tou esti universu de montañes que llucha por ser tan perconocíu como Picos d'Europa. Anque meyor que non verdá,...


Vistes dende'l Fariñentu

Dende esti cumal, como ye vezu en mí, quise facer dalgún piquín más de menos valir, pero que sírveme pa dir tachando, poro baxamos na mesma direición hasta'l Canalón del Infiernu, nel que pasándolo penriba vamos dir parar al traviés d'antigües trincheres al cumal del mesmu nome, Picu'l Canalón del Infiernu (2155 ms). Magar, d'echar un vistazu a esta impresionante canal, a les parés verticales del Fariñentu y un vistazu más a los xoyos de Cueva Palacios, siguimos cola xera de baxada.

Sin muncho más, a los que quédenmos ganes, vamos averanos a otru piquín, el Picu La Fana, nel cuál facemos los dos posibles cumales, quedándonos col primer como más altu, 2027 ms. Metros que sírvenmos de mirador del Puertu Agüeria, Pena Ruea, y embaxo nuesa, de la Canal de las Becerreras, que bon respetu da.


Pasando por L.leturbio hacia'l Bocarón

Darréu baxaremos, hacia'l Val.le de Retertoriu, pa pasar pola braña de L.lerturbio y el so l.legu, y empobinamos hacia'l Bocarón onde garraremos los mesmos pasos en baxada que fai unes hores pusiéranmos en posición d'algamar unos bonos cumales.


Baxando hacia Tuiza Riba onde tomamos dalgo asoleyando

Al final, unes 5 hores y 40 min, ficieron una ruta d'entamu duru pero sele en xeneral, na que percorrimos 10 kms, salvando 1150 ms de desnivel acumuláu. Con ella'l descubrimientu, como siempre, de posteriores visites a esti macizu, y en particular a fasteres más desconocíes pa nós, como'l Puertu Agüeria, esa Pena Ruea o esi Güertu'l Diablu de nome tan atrautivu.


Camudando'l Camín y Ortzamendiren Sua nel Güertu los Pioyos

Nesta ruta ficimos un dosmil del conceyu de L.lena y Quirós: Fariñentu (2176 ms), 2 de Quirós (Canalón del Infiernu (2055 ms), y Fana (2027 ms) y 3 picos pertenecientes al club 58 (Fariñentu, Fana y Güertu los Pioyos (1973 ms))

Ver progresos en: Retos montañeros

9 comentarios:

  1. Ahí quedan marcados nuevos retos que seguro que dentro de poco dejarán de serlo.

    No hay que olvidar una cosa importante de este día, como es el anuncio de la llegada de un nuevo montañero o montañera a engrosar dentro de unos meses las filas de grupo Xuan de la Borrina.
    Zorionak aita.

    ResponderEliminar
  2. Joer, pues ye verdá. Esi pa Simón.

    Norabona dende'l blog tamién collaciu

    ResponderEliminar
  3. Esperemos que salga montuno como el pa.
    Si sal con la aficion de la madre parezme que no faigo carrera de el/ella.

    Gracies collacios

    ResponderEliminar
  4. Una guapa ruta y unas fotos extraordinarias. Menos mal que tuvisteis un día aprovechable cosa que últimamente es todo un lujo. Saludos

    ResponderEliminar
  5. Simón l'afición de la ma, a durmir les mañanes de finde ye mui apreciable, tamién, jaja.

    Como siempre gracies a los 3 pol comentariu

    ResponderEliminar
  6. Dos coses:
    1. El xentiliciu de los habitantes del conceyu L.lena ye conceyón, porque enantes Mieres pertenecía a L.lena y yera un conceyu pergrande. Tamién ye l.linizu, meyor que l.lenizu, por mor de la metafonía n'-u.
    2. *Cherturbio nun esiste. Ye L.leturbio. Tomando esa primer sílaba "L.le" como prefixu de l.legu (llagu). Fina n'-o non n'-u por cuestión de neutro materia. L.leturbio, "l.legu d'agua turbio".

    Ha siguir cola páxina y pa cuándo un llibru?
    Saludos, Bertu.

    ResponderEliminar
  7. Camudaos los detalles que me comentes Bertu.

    Gracies como siempre pola aida toponímica.

    Lo del llibru... pues prestaríame y quiciás debería entamar a pensar nello, jeje. Esti añu qu'entra podría ser un bon añu.

    Un abrazu

    ResponderEliminar
  8. Hai munchos blogs de patiar y retratar que me gusten. Amás si tán escritos na nuesa llingua ye un plus que se-yos amesta.
    Les bones descripciones y perguapes semeyes xunto a esi "plus" fae qu'esti sea de los que más me presten.
    Un saludu.

    ResponderEliminar
    Respuestas
    1. Gracies Arturo... va bien pocu qu'entamé a siguir el to blogue tamién. Bonos paseos y perguapes semeyes les que faes.

      Un abrazu

      Eliminar