lunes, 22 de noviembre de 2010

Llagu La Ercina (Cangues d'Onís) - Picu Llombreras (1er Torre los Cabrones)

7 de Payares de 2010

Track: Llagu La Ercina (Cangues d'Onís) - Picu Llombreras



Hai díes que nun se sabe mui bien como entamar a desplicar una ruta. Simplemente hai vegaes que l'ánimu y les ganes, superan a la cabeza y esto pue tornase peligrosu. La ruta anterior, foi un intentu de facer la Punta Gregoriana, pero dellos pilancos ficieron que quedase nuna ruta alternativa, qu'a la fín, resultó muncho más que satisfactoria.

Una selmana dempués, tábemos con más ganes inda, y camiento qu'un mayor deséu de facer bona montaña, llevónos a meténos en picos, con un temporal asomando'l focicu. Teníemos un ventanucu de tiempu hasta la tarde-nueche, ya intentamos aprovechalu yendo per segunda vegada a la Punta Gregoriana.


Partimos del Campu La Tiese

Como siempre, partimos del aparcaderu del Campu la Tiese, na vega'l Llagu La Ercina de Cangues d'Onís. Pa ello como siempre tenemos el viaxe dende Xixón a Cangues d'Onís, onde desayunamos, y llueu de pasar por Cuadonga xubimos hasta los míticos Llagos.

La primer impresión que tenemos al salir de la furgo, ye de fríu y vientu, poro mudámonos lo más rápidu posible, y ponémonos a caleyar poco dempués de les 9 la mañana. Aún así, el sol rellumaba pente les ñubes y dábanos cierta esperanza, contando con que pola mañana daba pior que pola tarde, hasta que llegáse'l frente gordu pela nueche.


Nel llagu La Ercina (1136 ms)

Sorprendía, ver tantísima augua, ye más dempués d'arrodiar el llagu pela so mandrecha, los nuesos pasos diben dar xubida, pela riega de la vega'l Texu, .... riega que camiento nun ver con augua, y menos con tantísima augua na mio vida.


Xubiendo la Riega la Vega'l Texu

Magar d'esti guapu pasu, tocanos travesar esta vega, estrada d'agua y facer una pequeña ascensión pola Canaleta hasta aportar a otra vegona ablucante, la vega'l Paré. Sinceramente, ye de les vegues más guapes que vi na mio vida, y de momentu, siguiamos a bon pasu y el tiempu, teníanos un puquiñín de respetu.


Vega'l Paré (1305 ms)

Darréu, vamos xubir d'esta vega hasta les cabañes del Tolleyu, onde vemos posibilidaes de resguardase nuna vuelta, pero camentamos que va ser una ruta espress, o lo que ye lo mesmu, nun vamos parar nin pa facer una mexada. Nestos momentos, siguimos xubiendo altor, y la lluvia sele que tábemos aguantando, tórnase en trapinos de ñeve, los cuales, molesten quiciás hasta menos que la propia lluvia.


Primeros trapos que van a más en tou momentu

Al altor de la vega'l Forcáu, llevábemos un hora y media caleyando ya inda nun pescanciábemos onde tábemos metiéndonos, poro siguimos, con cierta tranquilidá y munchos ánimos, caleyando a mui bon ritmu. Hasta equí, hai que dicir, que'l camín yera entreteníu, y la ñeve facíalo más prestosu, pol momentu. Y digo pel momentu, porque nun ratu más, na fonte la Camperona, ya tuvi que poneme l'abrigu (minutu silenciu, pa la mio Nevica, "modelu yonki de los 90", que dende esta ruta pasó a meyor vida, jeje), porque ya taba bien moyáu y calor, calor nun facía precísamente.

Les mios sensaciones ficiéronse correutes dafechu, nos H.oos de Carbanal, onde la proteción que tuvieramos peles vegues, desaparecío bien ceo y dalguna ventada qu'otra, poníate los pelos de punta. Aún así seguíamos, a bon pasu, anque la ñeve entamaba a dificultar el ritmu, y dimos bona cuenta de tramos de camín por Cilluenga, H.ou de las Cuevas,... hasta aportar a la vega d'Aliseda en menos de 3 hores, onde la ñebla, facíase más y más densa, y dábanos a entender que nun díbemos tener esi descansu del tiempu pela tarde.


Tirando hacia la Vega d'Aliseda

Magar de mirar gps, pa orientanos, ya que nun se veía gran cosa, empobinámonos al traviés de les Llombes d'Aliseda, como meyor vamos viendo, colos h.itos, col track del gps,... y lo pocu que nos daba la vista. Dicir, qu'a partir de los H.oos de la Carbanal, el tarrén foise complicando poquín a pocu, pudíendose perder ún, sin teunoloxía, con una facilidá ablucante, poro qu'a naide se-y ocurra nin en branu, metése per esta fastera sin gps.


Poles Llombes d'Aliseda

Nós, con ñeve, ñebla y ciertos momentos de ventisca, nun teníemos toes con nós, y mirábemos el gps, con menores intervalos, de los que suelo facer, pa nun separanos del track nin unos metros siquiera. Con muncha más dificultá, vamos averándonos al colláu Los Tiros, y pa ello, tendremos un pasu, con caídes a ambes manes, qu'ente la ñeve y vientu, merezse facer con tol curiáu del mundiu.


El tema complícase del colláu Los Tiros p'arriba

Aportamos casi a esti colláu, y fuimos metiéndonos pegaos a una arista de la Verdilluenga, pa tar dalgo protexíos de la ya ventisca que teníemos enriba. Nesti momentu, yeramos conscientes, de que'l temporal adelantárase, y que la cosa taba poníendose fea. Dempués de mil miraes al gps, pensamos que nun mos quedaba muncho, asína que decidimos siguir, quiciás impulsaos por Tito, que venía con ganes, y yo tamién aporté tirando p'arriba. Pocos díes vi a Fernan rezagáu, y camiento qu'él veía que taba poníendose mui complexu l'asuntu.


Xubiendo a la Picu Llombreras pol H.orcadino

Con Tito a la tiesta, abriendo buelga, como meyor podía, a bas de pegar pataes a la ñeve, ya inclusu, xubiendo a cuatru pates, yo, Iker y Fernan, algamamos tamién el final d'una canal, pelín h.odía y peligrosa, que diba facenos aportar nel H.orcadino, onde ya, siguiríemos la poca intuición qu'aportaba la nuesa visión, hacia lo qu'a lo lloñe paecía'l cumal de dalgún picu.


Picu Llombreras (2234 ms)

Y asína yera, dempués de 4 hores, esti cumal yera la Picu Llombreras de 2240 ms, qu'a la postre, foi l'únicu del que podemos tar seguros nun día, que taba tornándose a pior si cabía, poro les nueses pescancies al traviés de collaos y cumales, a la gueta de la Punta Gregoriana, aparte d'infructuosa, taba siendo mui peligrosa.

Nestos momentos, la ventisca yera tan fuerte, que la ñeve pinchaba na cara como cristales, y el dolor nos güeyos, facía que caleyásemos, emburriaos pol vientu, tapándonos como podíamos y con una visivilidá reducía d'unos pocos metros tan solo. Nun tuviemos muncho más que falar, pa retiranos lo más apriesa posible, ya que l'únicu que dibemos a facer nestes condiciones ye xuganos la vida, y que yo sepa nun mos paguen per sufrir na montaña.

De xuru que nun ye comparable, pero nestos momentos, entiendes la frustración de dellos montañeros nel himalaya, al quedate a pocos metros del to oxetivu, pero tamién yes a date cuenta, que solo los necios xuéganse la vida por un triunfu efímeru, cuando puedes perder tolos demás triunfos qu'ésta mesma pue proporcionate a lo llargo de los años.

Nun paga la pena, hai que saber rendise y aceutar la derrota, ya que la montaña ye la que déxate xubir o non, y la que te diz: Mira mozu, otru día déxote, pero güei tira pa casa si quies tornar.
Así que ficimos-y casu, y baxamos lo más rápidu que pudimos, al traviés d'un camín del que nun quedaba rastru dengún de la nuesa esistencia per esti macizu, y ye que nuesos pasos de retornu, amosáronmos que'l temporal borrara cualquier buelga fecha por nós.

Hai díes que se disfruta y otros que se sufre na montaña, pero siempre se deprende dalgo. Nesti día, les enseñances foron más que necesaries, ya que la llende ente'l disfrute y el sufrimientu, pue rebasase de sópitu, y hai que saber dase la vuelta pa poder tornar otru día. Paez que deprendí la lleición, porque la selmana siguiente a 1800 ms d'altor la Pena Ruea tamién dixo que pa otru día, y el vientu de 100 km/h, mandábanos a fartanos con un pote castañes deliciosu, en Bárzana.

Casi 8 hores, ensín beber, xintar, mexar,... y sin parar de caleyar, ficieron que'l nuesu esfuerzu, sufrimientu, aguante al fríu, diese col premiu secundariu de la Picu Llombreras, dempués de 18 kms y 1365 ms d'ascensión acumulada. Anque l'únicu premiu qu'importa ye poder tener una tercer oportunidá de dir a pola Punta Gregoriana.


Camudando'l Camín dende l'infiernu xeláu de Picos

Nesta ruta ficimos un dos mil de Cangues d'Onís: Picu Llombreras (2240 ms)

Ver progresos en: Retos montañeros

6 comentarios:

  1. Que merito subir con ese día a una cumbres de más de 2.200 metros otros nos hubieramos dado la vuelta muchisimo antes.

    ResponderEliminar
  2. A la tercera si no es la vencida habrá que volver a por la cuarta, pero tenemos que descubrir el secreto de la punta del Cainejo.
    Un abrazu collaciu.

    ResponderEliminar
  3. Jonatan, nun se si ye méritu o desméritu siguir adelante neses condiciones... pero bono fue lo qu'hubo esi día, esperemos tener meyores díes n'adelante.

    Fernan, nun se si quiero saber na de secretos de nenguna punta de naide, jajaja. Prefiero saber secretos de dalgún furacu más bien, jaja

    Un abrazu

    ResponderEliminar
  4. Ufff menuda ascensión que hicísteis, aunque lo mas provechoso de ella son las acertadas decisiones que tomásteis y los sabios consejos que dejais en la narración para quienes puedan encontrarse en situaciones parecidas y no tengan claro como actuar. Muchas gracias por todo ello y verás como el día que "caiga" la punta Gregoriana, tendreis mucha mas satisfacción por haberlo logrado. Saludos

    ResponderEliminar
  5. Gracies Jose. Si mi poca esperiencia cuntada al traviés d'esti blog val pa que dalguien nun se meta nestos marrones ya paga la pena l'esfuerzu.

    Un abrazu

    ResponderEliminar
  6. De la montaña se aprende cosas buenas y malas,pero hay que saber cuando disfrutar o cuando darse la vuelta.Nos vemos en Euskadi.Un saludo.Tito

    ResponderEliminar