miércoles, 24 de noviembre de 2010

L'Alisu (Cangues d'Onís) - Monte Faes

21 de Payares de 2010

Track: L'Alisu (Cangues d'Onís) - Monte Faes



Domingu pela mañana, llevántome ensín madrugar demasiáu, ya que quedé con Fernan, pa facer dalgo de monte, sele, anque lleváse tola selmana dando un tiempu horrible de lluvia aseguráu al 100%. Y ye que, nun hai que da-y más vueltes, cuando me dicen de salir de monte, dame lo mesmu que faiga sol, lluvia o ñeve, así que cola escusa de devolveme'l piolé y los crampones que me dexara na so furgo, quedamos a les 9 en Lloviu (Ribeseya).

Dicir que'l día anterior nun tuviera na mal, esguilando tola mañana nel roco, y asistiendo a la Axuntaza d'Espeleologos asturianos, nel chigre'l Sabil, en Villanueva (Santu Adrianu). Ellí pude esfrutar de les charres sobre'l Pozo Azul en Burgos (que mal rollu da la buceoespeleloxía), 8 años d'espeleo na fastera norte d'Ubina (quiciás la que más me prestó) y l'ansiáu empate de la Cueva l'Agua de Culiembru col Pozu'l H.itu nel Cornión. Ehí va un enllaz sol tema: Espeleoastur

Como siempre, pa llegar a Lloviu, garré l'autovía del Cantábricu en direición Santander, y ente xarazaes, orbayu y tou tipu de lluvia aporte al desvíu hacia Les Arriondes - Cangues, onde esperé na retonda a qu'arribasen los mios collacios vascos.


Puntu de partida: L'Alisu en Les Roces

Dicir que teníemos preparaes delles rutes facilines pa pasar la mañana, cola total posibilidá de moyáse, así que dexayunamos nun hotel-cafetería-... (puti de xuru pela nueche) de La Vuelta la Ribera, y charramos ensín priesa, Ibán (que nun viera dende Pireneus), Fernan y yo, so la posibilidá meyor pal día, decidiendo que xubir a la Peruyalina, diba tar bien.

Asína que, dexamos el mio coche nel parking, y montamos los trastos na furgo, pa empobinanos al pueblu d'Omedina, namáis pasar Santianes, onde travesaríemos el ríu Seya, el cual taba con una crecida que metía mieu, y namái posar la vista na ponte colgante, pola que teníemos que pasar vemos que ye imposible al tar estrozáu dafechu. La nuesa intención yera crucialo pa entamar la ruta dende'l pueblu de Cueves, pero quedó a les clares que nun yera posible.

La siguiente oción, y más averada a la nuesa posición yera siguir hacia Cangues d'Onís, pasando polos pueblos de Fríes y ya en Cangues, por Llordón y El Llanu de Margolles, pa dempués de Triongu llegar a la retonda, onde siguiremos hacia Cangues d'Onís capital, hasta parar antes del pueblu de Les Roces, más en concretu en L'Alisu, onde alcuéntrase la Renault.


Xubiendo peles pistes hacia la collada Ordial

D'equí (55 ms), garraremos una amplia pista que poquín a pocu baxo la lluvia aportarános a la collada Ordial (300 ms). La pista, anque se bifurque varies vegaes, va dexanos na mesma collada siempre, en la cual tiraremos hacia la manzorga, pa dir averándonos a la cresta'l monte.


Garrando l'arista del monte

Esti camín llevaranos, bordiando la parte cimera'l monte, hasta una curva, onde veremos qu'entama a baxar. Nesi puntu, encaramámonos penriba una muria piedra, y garramos un senderín, qu'a les clares va llevanos penriba'l monte tol tiempu, faciendo la nuesa primer parada nun primer cumal de 421 ms, al que-y puse cima Ordial, por da-y un nome.


Pasando de la primera cima d'Ordial hacia la Cenca

Bien cerquino, avistamos el cumal central del monte Faes, y pa llegar a ellí, tenemos que travesar unos cuantos metros de cotollal pelín repuntantes, sobretou si vas con paragües, chubasqueru, mochila con chubasqueru, y la de su madre...


Nel Cantu la Cenca y nel vértice xeodésicu del monte Faes

Pero qu'a la fin, pónente nel puntu más altu del monte, el Cantu la Cenca de 421 ms, el cual dexarános pasu, un pelín más abaxu al vértice xeodésicu, que-y daba dalgo d'interés a esti monte, que como dicíame un collaciu de Cangues: a eso nomámos-y Cueste, nun ye nin monte.

Pues eso, tamos nel vértice de la cueste, a 405 ms. Que por qué ta'l vértice na parte más baxa del monte, nin idega. Yo dedícome a xubilos, jeje non a poner trastos enriba d'él. En fin, como yera cuando más taba lloviendo, sacamos delles semeyes, y nos baxamos d'ellí lo más ceo posible.


Baxando del Monte Faes

La baxada ficímosla hacia l'otru llau del monte, contando con que garraríamos una pista que bordiara completamente'l monte pela falda y nos dexase nel nuesu puntu de partida, pero nun foi así, ya que nengún camin cruciaba la riega L'Argumal, asína qu'en varios ciszas, el camín depositónos na carretera N-634 pelín enantes del barriu de Samiguel del pueblu de Coviella.


Pasiando por Coviella

Poro, caleyaremos un ratín pel arcén esquierdo, hasta topanos col desvíu a Coviella, el cual tomaremos, pa pasiar seliquino (a estes altures moyanos dábenos lo mesmu, una vegada que tas pingando) polos distintos barrios (Los Centenales, La Podada, El Palaciu, El Cuetu), hasta dar a la carretera otra vegada la cual cruciamos, y garramos la senda que lleva a Cuadonga, hasta tornar a L'Alisu.

En resumen, nun día que pocu más podía facese, caleyamos casi dos hores y media, faciendo 9,6 kms y 612 ms de desnivel acumuláu, pa lo más importante tachar l'últimu vértice xeodésicu que me quedaba en Cangues d'Onís. Esto últimu ye mentira, lo únicu y más importante, yera darse un motivu pa tomar unes cañes dempués nel Chigre'l Corquieu de Ribeseya, con unos bonos collacios, y quedar en que la prósima será n'Euskadi. Así que... ta la prósima.


Camudando'l Camín dende'l Monte Faes


Nesta ruta ficimos un vértice xeodésicu de Cangues d'Onís: Monte Faes (405 ms)
Ver progresos en: Retos montañeros

5 comentarios:

  1. Sacándole todo el jugo al recorrido, hasta parece que hemos hecho una gran ascensión!!!.

    ResponderEliminar
  2. jajaja, ya ves. ye que cuando me pongo a escribir paez que ficimos dalgo interesante y too, jajaja

    ResponderEliminar
  3. Pues di que sí, que ser...ye interesante. Y mas cuando se hace queriéndolo y mas con la buena compañía de los amigos. Gracias por compartirlo y a ver si la próxima hay mejor tiempo....aunque en estos días parezme que nanai. Saludos

    ResponderEliminar
  4. Kaixo Berto.

    Vaya ascensión la nuestra!!No estuvo tan mal como el tiempo lo planteaba,no crees.Las cañas estuvieron bien, pero lo mejor fue la comida que nos pegamos fernan y yo.Todo muy rico pero lo mejor el precio. ja ja ja. Ya te contare.

    Ikusi arte lagun!!!

    ResponderEliminar
  5. Como siempre gracies Jose pol comentariu. Nun hai monte pequeñu o que?, jeje.

    Ya sabía yo, que te diba prestar la xinta Ibán.

    Ikusi arte collaciu

    ResponderEliminar