Las Xanas (Santu Adrianu) - La Mostayal

12 d'Ochobre de 2010

Track: Las Xanas (Santu Adrianu) - La Mostayal

Una perfeuta escusa pa metese una fartura, ye dir de monte tamién, asína que tocaba guetar dalgo que sirviere a los nuesos propósitos. Siempre tuve ganes de tornar a facer el desfiladeru Las Xanas, porque camiento que foi'l primer averamientu al senderismu-montaña que tuve.

Poro, con esta blima, más otres como xubir a la Mostayal dende Pedroveya (pa que nun se quede en poca cosa), que yera día de non trabayar y la meyor de toes, xintar en casa Generosa, tenemos el cestu completu, jeje.

Nel entamu del Desfiladeru de Las Xanas

Dempués d'almorzar tranquilamente en Proaza, únicu llugar onde había dalgo abiertu, namái que vimos que nun llovía tanto, tornamos col coche so los nuesos pasos, hasta Las Xanas nel conceyu vecín de Santu Adrianu. Pa llegar a él, salimos de Xixón pela "Y griega", qu'agora nomaráse "ye", jeje y dempués de facer la ronda d'Uviéu, salimos en direición Grau, pa tomar la salida hacia Trubia, onde siguiremos la carretera AS-228, pasando pelos pueblos de La Vega, Santiagu, San Andrés y Tuñón, p'atopanos col crucie a las Xanas na nuesa esquierda, enantes del pueblu de Villanueva.

Nun pasu típicu del desfiladeru y el pueblu de Villanueva embaxo nuesa

Magar de preparanos en "mou lluvia", aniciamos el camín, unos minutinos enantes de les 10, pa dir ganando altor pola parte más guapa d'esti míticu desfiladeru, esfrutando de los pasos aéreos y afuracaos del camín. La verdá ye que tuviemos suerte cola cantidá d'agua que baxaba pel arroyu, faciendo tola ruta más prestosa, anque les sensaciones de dureza qu'esperimentara la primer vegada que fuera, quedaren bien lloñe de les sensaciones d'anguañu,... ye un paséin... que púsonos na ilesia de Pedroveya nuna hora y diez minutinos más tarde teníemos reserváu pa xintar.

En Pedroveya (562 ms) bien ceo

Darréu, partimos d'esti guapu pueblu de Quirós (segundu conceyu que travesamos) al traviés de pindies pistes de formigón, hasta aportar a una portiella, la cual pasaremos y siguiremos ya per senderu y praos, arrodiando un cantu, pola manzorga, el cual tien na so parte postrera, la braña de Gameu.

Nesti puntu, podemos intentar siguir el camín, que mos llevará al traviés de les cabañes de L'Acebal, al colláu de Pandelaforca, onde crestiaremos sin dificultá hasta la Mostayal (mandrecha) , o pol contrariu tiranos hacia'l Cantu la Vara onde xubiremos travesando dellos xoyos pente senderos hasta dar cola cima (manzorga).

Pangua xubiendo hacia Gameu y Javi pasando ciertos problemes nesti pasu tan pindiu

Pero, si yes un gallu y la ñebla llévate a non tomar les meyores decisiones, tirarás de frente como nós, y caleyarás pela fastera de Gameu, con tranquilidá hasta metete en delles complicaciones de yerba, roca, cotolles,... nun amiestu prestosu a nun poder más, que regalónos una moyadura de les guapes.

Entama'l día a espeyar (abaxo final del desfiladeru Las Xanas)

Menos mal, que cuando mirabes p'abaxo, en plenes trepaes, el día diba abriendo y veíes Pedroveya y el final del desfiladeru, y l'estómagu diba animándote a siguir, porque sabía lo que venía darréu. Así que dempués d'esos pasos dalgo repunantes ya ficimos cumal nos 1308 ms de la Mostayal, ya en plenu conceyu de Morcín. Pedir perdón a Javi que se que lo pasó dalgo mal, ya que'l tema aéreo nun lo lleva bien, jeje.

Nel cumal de la Mostayal (1308 ms)

Que dicir d'esti monte... pues que nun pienso tornar na mio vida, y ye qu'intentes facer un cumal con ilusión y a la fín, alcuéntreste enriba d'él, satisfechu pol bon trabayu, por una xera prestosa y dura, al facela dende Las Xanas, ya que tamos falando de más de 1000 ms de desnivel, y .... enriba'l cumal hai un putu cementeriu.

Siento ser tan duru, pero... quien da'l permisu a naide pa poner enriba d'un monte un altar relixosu d'una persona que morrió. Ye que me paez que nun ye'l sitiu más afayaizu y amás ye horrible, y si caro la xente que-y va velar, pon flores de plásticu, pa que tean esparcies pol monte, pues coyonudu ya...

En seriu, ya ta bien, el monte ye de toos, hai que protexelo, curialu y respetalu, y poner auténticos mamotretos de piedra y cementu o cruces, pa una virxen, muertu o lo que seya, ye facer tolo contrariu. Ye más, esti home morrió por mor, d'un rayu que-y cayó na Mostayal, y de xuru que la mayoría d'ellos caen debíu a los trastos de metal qu'hai en casi toles cumes atrayéndolos.

Baxando hacia Pedroveya

Dempués de 3 hores de caleyar, na cima de la Mostayal, con mala hostia, baxo a ver si una bona fabada xúbeme l'ánimu, así que, esta vegada decidimos baxar pel cantu La Vara, la cúal paez una ascensión más asequible, anque ya nos praos, envede tiranos hacia Gameu, baxamos per dellos caminos na Vara, que dexáronmos nunos praos embarraos enforma, hasta dar cola portiella, que fadríanos garrar a posteriori les pistes de formigón qu'empobinaríanos a Pedroveya de vuelta.

Otres dos hores de baxada, daba con 4 paisanos moyaos, embarraos y sucios, que queríen xintar nun llocal, que quiciás ta perdiendo esi puntu de comida casera pa senderistes, ya que bien de xente, simplemente xube en coche a fartucase ensín siquiera facer el desfiladeru pa garrar fame.
El contraste ente les botes y pantalones embarraos y los vestidinos y chancles de dalguna mocina yera pa partise de risa, menos mal que'l golor de la comida restaba'l golor a gochu nuesu, jaja.

D' otra miente, quitando la basoria nel cumal, la moyadura, el barru, nun garrar el camín correutu, etc,... la ruta ye recomendable al cien por cien, porque tien dureza, vistes (nun bon día), xíntase de viciu, y baxar dempués el desfiladeru con tranquilidá y la barriga enllena, ye de lo más relaxante.

Camudando'l Camín dende la Mostayal (Morcín)

Nesta ruta ficimos la tercer cota del conceyu de Morcín: La Mostayal (1308 ms)Ver progresos en: Retos montañeros