Track: Les Bedules (Ponga) - Recuengu - Zorru - Peloñu
Un añu estrañu esti que tamos viviendo, tanto qu'oblíganos a dexar pa otra la nuesa tradicional travesera per Picos. La idega esti añu, yera camudar esi sen traveseru de refuxu en refuxu y tomar un campu base en Ponga pa facer varies actividaes, lo qu'al final pente pitos y flautes quedónos namái que nun día de monte por falta de participantes.
Aún así, ye d'agradecer y muncho'l tratu, la cena y l'almuerzu del día siguiente nel chigre'l Cascayu, un chigre-tienda-hospedaxe onde xíntase de primera, ñatural, verdures de casa, caza, setes recoyíes per ellos... una pasada.
 |
| Partimos de Les Bedules (1062 m) con un día borrinosu |
Facemos camín pente la borrina hasta'l colláu Caldes (1395 m)
Saldremos pel guapu camín ensin ver res, pasando pel Prautoru, Les Foyaques y el mayáu Llampes, onde empobinámonos hacia'l colláu Caldes, topándonos col cartelu indicaor del ascensu a la Peñe Recuengu, entrándo-y con bien de ganes a les primeres ramples col envís d'intentar acolumbrar dalgo nesta ruta.
Salimos del borrín hacia'l mar de ñubes
A la escontra que n'ascensión pela fastera SO que ficiera va años, la Peñe Recuengu va danos una ascensión cómoda, col borrín xugando con nós, hasta desapaecer xusto al aportar al cumal, amosándonos un de los espeutáculos montunos más guapos: un mar de ñubes de llibru nel oriente astur.
Cumal relaxáu na Peñe Recuengu (1650 m)
Magar del descansu, picando daqué, descendimos pel mesmu camín, demientres-yos cuento aquella ivernal al Recuengu, nel que baxábemos per un camín aparéntemente cenciello, faciendo ábanos al nuesu pasu y con una tensión nel cuerpu que nun se relaxó hasta aportar al colláu Cáldes onde esperábenmos el restu del grupu a Pangua y a mí, que diéranse la vuelta viendo lo abegosu del ascensu n'ivernal.
Tornamos de nuevu al borrín, esta vegada empobinándonos hacia'l picu Zorru
De nuevu nel colláu Cáldes, tornamos a ñavegar pente'l borrín garrando un senderu que tien de llevanos hacia'l colláu Pomerín. Anduvimos y somos a garrar el correutu pa entrar nuna viesca preciosa pela que caleyamos con ciertu toque misteriosu pero de gran belleza.
Del colláu Pomerín restolamos el meyor senderu p'ascender hacia'l colláu Zorru
Aportaremos al colláu Pomerín (1510 m) dende'l que tenemos un par d'opciones p'ascender hacia'l colláu Zorru. Dellos años atrás, diéramos-y la vuelta pela manzorga al Picu Lluengu, entrando per una clara canal, pero esti añu entrámos-y al Zorru más de frente, primeru hacia l'Este, pa dir terraciando hacia l'Oeste hasta aportar al colláu pela mandrecha.
Ascendemos nuna picante trepadina al picu Lluengu
El tarrén pindio, fai que se l'atragante un pocu la xubida a Benjamín y decide descansar, demientres los demás tentamos un ascensu al picu Lluengu, per un canalizu a la manzorga con un toque espuestu que fai qu'encume'l Lluengu yo sólo, hasta qu'al descender alcuéntrome con Sara y Mario qu'algamaron un ascensu más cenciello per otru canalizu, algamando los tres xuntos los 1793 m del picu Lluengu.
Guapes vistes hacia'l siguiente oxetivu como ye'l picu Zorru
Penriba'l mar de ñubes, les vistes son increyibles, poro ascendemos hacia'l Zorru con cierta felicidá anque muncho calor. Benja, considera que nun recuperó del too y fai una traviesa baxo'l Zorru hacia Puertu Sus, onde vamos a alcontranos a la baxada.
Cume nel Pizu Zorru (1839 m)
El restu con Carla a la cabeza, fadremos el cumal, siempre cola vista puesta en Picos y nes cotes más altes de Ponga (Ten y Pileñes). Un descansín más, echando crema pal sol y picando dalgo y tocará dir al alcuentru de Benjamín en Puertu Sus, col envís d'alcontrar un bon descensu pel valle Antiguu hacia la viesca Peloñu.
Descensu per Puertu Sus hacia'l valle Antiguu
L'anéudota del día, vamos tenela nel desaniciu de les piles del mió gps, lo que fizo que tuviera que ñavegar nel maxín pente la borrina, per onde trazara la baxada. Hubo que poner tolos sentíos, pero fuimos garrando siempre'l senderu correutu que nos fizo descender pel valle Antiguu ensín problemes y per un trazáu bien guapu.
Descendemos pel valle Antiguu hacia'l mayáu de Bustantíu
Tan guapu, qu'aportamos al mayáu de Bustantíu, estráu de ganáu, pasando al llau de la so cabaña, pa descender, ya cómodamente per pista, nuna llarga baxada hasta la pista que traviesa tola viesca Peloñu dende Arcenoriu a les Bedules.
De Bustantíu aportamos a la pista de Peloñu
Al altor de la cuenye Miraculos, aportamos a la pista y lloñe d'esfrutar de tan guapu llugar, enxamás yes a saber lo pesáú que pue facese un camín tan llargu per pista, anque seya una fastera tan guapa. Como nota, dicir qu'averámonos a conocer el Roblón de Bustiellu, el cual paga la pena conocer, pero como siempre caleyar per pista quíta-y un puntín a llugares tan increyibles como Peloñu, onde lo meyor ye travesalo en mediu la viesca per senderu o a lo xabaz p'alcontrar requexos ablucantes.
Pasamos per Grancenu con ganes d'aportar a les Bedules
Perpasaremos Grancenu, pente'l borrín como non, perdiéndonos tolo guapo que sabemos que tenemos enfrente (Pica Subes y Sen de los Mulos) y fartos un pocu de caleyar per Mordor, entainamos el pasu p'aportar a Les Bedules magar de 9 hores y pocu de patéu.
En resume, ruta pa mi idega dafechu imprescindible, faciendo dos de los montes más guapos de Ponga y d'Asturies, como non, nos que tenemos que renomar 19.3 km de percorríu y los 1435 m de desnivel acumuláu, ensin escaecer l'agasayu en forma de trepe al Picu Lluengu.
Camudando'l Camín en Peloñu
No hay comentarios:
Publicar un comentario