lunes, 21 de septiembre de 2020

Cordiñanes (Valdión) - Asotín - Colladinas - Cresteríu del Llambrión - Colláu H.ermosu

14 de Xunetu de 2020

Track: Cordiñanes (Valdión) - Asotín - Colladinas - Cresteríu del Llambrión - H.ermosu


Paez mentira, pero ya lloviera dende que nun mos xuntábemos Ana y yo pa da-y duro al monte. De xuru que dende'l crestéu per Peña Manteca, anque tuviéramos planes dempués que tuvieramos que torgar, poro les ganes yeren munches, asina qu'arrancamos como non, pal nuesu campu base en Caín.

Tamos falando de madrugón de los d'alloriar y tiradísima de coche hasta aportar a Cordiñanes, onde preparámonos pa una primer xornada de les que ya tenía ganes col envís de facer tola crestería del Llambrión dende la Torre las Minas del Carbón hasta la Torre del H.ou Grande.

Entama l'aventura en Cordiñanes (865 m)

Nestos camientos andamos demientres arranco'l gps y veo que nun tengo los tracks que llevo preparando dos díes en casa. Mi cara dizlo too y nun sólo eso, el gps alloqueció y tengo desconfiguráu toles opciones, asina que toca tirar de móvil y dir grabando lo que faigamos pa la posterioridá pero como antaño, toca facelo un pocu a vista.

Salimos como postes p'arriba, faciendo'l perconocíu senderu de la Rienda pel que ya nun paramos nin a sacar semeyes, aportando a la vega d'Asotín en pocu más d'una hora, decidiendo facer más kilómetros a mou de calecimientu físicu siguiendo tola canal d'Asotín hasta'l sedu la Padiorna.

Facemos tola canal d'Asotín hasta'l Sedu la Padiorna

La verdá ye que paeciónos bona idega, pero nun mos dimos cuenta de la vueltona que dábemos, anque yendo en plenu alderique so les nueses vides, nin mos dábemos cuenta del patéu y con pocu más, ya tábemos tirando hacia Las Colladinas, onde algamábemos perguapes vistes de Peñes Cih.uentes y del colláu H.ermosu.
 
Decidimos parar un puquiñín, tando en tarrén conocíu, picamos dalgo de frutos secos, que toi con una madalena dende l'almuerzu en Sobrescobiu. Llevamos 4 hores de ruta pa 8 km y ye que Picos ye así, pero esto ya nos va diciendo que'l día va ser llargu y eso que nun entamamos siquiera l'actividá.

Continuamos hacia las Colladinas dando vista al colláu H.ermosu
 
Na cabera de Las Colladinas, enantes de baxar hacia H.ermosu, albidramos camín hacia'l primer oxetivu del día. Arrancamos con xeitu p'arriba siguiendo dalgún h.itu, pero como siempre vamos parando y viendo cual creyemos que ye'l percorríu a siguir.

Per tarrén perentreteníu, vamos travesando yeres, trepando dalguna llambrialina y dando vista hacia les Peñes Cih.uentes, aportaremos a los 2565 m de la Torre Las Minas de Carbón. Nun mos sorprende res, lo guapo d'esti cumal, enmediu d'un mar calizu y crestes qu'aporten al Llambrión dende varios puntos.

Ascendemos per tarrén calizu bien prestosu hasta la Torre las Minas de Carbón (2565 m)

Nun tamos pa perder el tiempu y descendemos pel mesmu llugar, pa facer una travesía en descensu al siguiente finxu del día: La Torre Casiano Prado. Dende las Minas de Carbón, el paré sur de la Casiano Prado acoyona, poro tendremos d'arrodiala pel Este y entrá-y al cumal per un sistema de terraces y canalizos hasta encumar los sos 2621 m.

Crestiamos llambriando hacia'l cumal de la Torre Casiano de Prado (2621 m)

Nel intre, tendremos vistes ya al vértice xeodésicu de la Torre del Llambrión, a tola crestería dende la Torreblanca y al llagu Cimeru, del que paezme que nun viera enxamás. Atopámonos con otru par de montañeros y magar de los saludos, ya nun tendremos que perder la cuerda del crestéu hacia'l Llambrión.

Avanzamos hacia la Torre del Llambrión

Cuando nun tas d'andar pel monte y menos per Picos, cuesta movese con soltura, pero ensin danos cuenta, vamos trepando y destrepando per tarrén rotu de forma segura pero mui apriesa y con pocu más d'esfuerzu plantámonos nos 2650 m de la Torre del Llambrión na qu'al fin pueu asegurar una semeya na so cumera, non como n'ascensión anterior, na que col cansanciu nin miramos si saliéramos na semeya jaja.

Facemos cume na Torre del Llambrión (2650 m)

4 hores d'averamientu al cresteríu y 2 hores y media más hasta la metá del percorríu, taben diciéndonos que díbemos un pocu pillaos, asína que llamamos a los collacios del Albergue de Caín pa decí-yos que llegábemos tarde a cenar, anque como siempre vamos garrando ritmu y contábemos recuperar daqué pel camín.

Vistes increyibles dende la fastera del Llambrión

El día ta increyible y el borrín quier xugar coles lluces de la tarde, faciendo'l paisaxe más prestosu si cabe, anque tamién faciéndonos tar sollerte de que nun-y dea por zarrase. Continuaremos conociendo pasos nuevos, ya que la mió anterior ascensión fueera poles marques marielles y agora averámonos hasta'l Tiru Calleh.u, alcontrándonos quiciás col pasu más complexu del día, un trepe de III+ aprosimáu pa salir d'un canalizu per una llambria, anque dicir que ye un pasu finu, nun ye mui espuestu.

Continuamos crestiando hacia Tiru Calleh.u y les Torres de las Llastrias y H.ou Grande

Algamáu esti pasu, siguimos a la carrera pel crestéu, echándo-y un vistazu dende'l Tiru Calleh.u a dos cotes más, la Torre Las Llastrias y la del H.ou Grande, les cuales mirando la hora, decidimos encumar tamién, ensin más problemes que caleyar per una llerona hasta la del H.ou Grande (2604 m), crestiando per tarrén amestáu de llera y llambria a la de las Llastrias (2612 m), onde damos por finalizáu la crestería.

Finamos el crestéu cola torre del H.ou Grande (2604 m) y Las Llastrias (2612 m)

Nun fai falta dicir, que tuviemos un ratín intentando descubrir dalgún pasu hacia la Palanaca, per otra torre nomada como Peñalara, polos primeros ascensionistes, anque'l tiempu restante de tarde y lluz, mandónos de vuelta al Tiru Calleh.u.

Tengo que dicir, que voi encantáu, ya que toi conociendo pasos nuevos y eso motívame munchísimu, asina que descendemos con curiáu pel tarrén rotu del Tiru Calleh.u, hasta topanos con una cuerda afitada, la cual usamos un pelín pa destrepar un bloque empotráu, ensin perder tiempu con destrepes.

Descendemos per Tiru Calleh.u destrepando y esnalando peles lleres

Salimos del Tiru Calleh.u y cuando creyes que ya ties tol trabayu fechu, alcuéntreste colos últimos ñeveros del H.ou del Llambrión, pelos qu'hai qu'andar finu, finu travesándolos pelos tramos menos inclinaos o metíendose peles ribayes, si nun quier llevar el quemazu y el sustu de la to vida... munchu güeyu con andar en zapatilles y cruciar ñeveros mediu xelaos.

Baxada a fueu pel H.ou del Llambrión hasta Colláu H.ermosu onde refrixeramos con una xarrina

Dende equí, ya garraremos ya lleres, peles qu'esnalamos pa garrar el final de les marques marielles onde baxamos corriendo hacia'l colláu H.ermosu, col envís de tomar una xarrina de cerveza y volver a picar dalgo d'embutíu y frutos secos.

Con 8 hores y media d'actividá a fueu, dámonos un merecíu descansu de media horina, pa darréu facer el descensu pel Argayu Congostu, la Vega d'Asotín y la senda la Rienda en pocu más d'hora y media, lo que nos diz, que pesie al confinamientu nun tamos tan mal de forma jaja.

A la fín, aportaremos a Cordiñanes 10 hores y 45 minutos dempués, con un percorríu de 18 km y faciendo un +/-2335 m de desnivel acumuláu, anque como siempre lo más importante conocer cumales nuevos y esfrutar d'un día de monte cola Ana la cabritina que sigue en plena forma y cola mesma ilusión de salir a pegar xabazaes pel monte de siempre.

Camudando'l Camín na crestería del Llambrión

2 comentarios:

  1. Increyible actividá, Berto. Perguapa. Pa esti branu había idega de facer el Llambrión por les Mines del Carbón, pero paezme que zarrose el tiempu enantes de lo que contábamos. A ver si todavía somos quien a algamalo.
    Un saludu

    ResponderEliminar
    Respuestas
    1. Ya te digo, tenía cosines pendientes y tengo mieu que nun tengamos ya la oportunidá de grandes aventures per Picos jeje. Un abrazu

      Eliminar