Pendones (Casu) - Palombar - Fusu La Muyer - Pandellanza - Congostín

24 de Mayu de 2020

Track: Pendones (Casu) - Palombar - Fusu La Muyer - Pandellanza - Congostín

Segundu finde dempués del confinamientu, nel qu'enmediu de la fase 0 o 1 o yo que sé, pente ponte bien y tate quietu si tas federáu o non tas federáu, de si nel conceyu tuyu si pero nel d'al llau non. El casu ye que plantámonos en Casu de nuevu y axuntámonos Montse y yo pa facer compaña a Pepa y Jose que queríen da-y un tientu al Fusu La Muyer.

Grupín con ganes de patéu postconfinamientu

Pal que nun lo conoza, el Fusu La Muyer ye una preciosa aguya na bas del grandiosu Picu Tiatordos, alcontrándose a mediu camín pente la fastera pongueta y la casina, ye dicir más menos cuesta lo mesmu aportar dende Tarañes o dende Pendones.

Facemos tol clásicu camín travesando la Foz de la Palombar

Nel nuesu casu, Pepa y Jose teníen decidíu dir dende Pendones, así qu'haya xuntámonos nel parking a una hora tranquila y ficimos el camín clásicu hacia la foz de la Palombar, onde como casi siempre, pegaba la solana y corría l'aire más bien pocu.

Esfrutamos d'un día preciosu con mar de ñubes

Travesaremos la Palombar y entamaremos a facer tola travesía dende la mayá Tiatordos penriba la riega los Xeros, pasando pel entamu de la viesca de Pandellanza hasta la baxada hacia Brañadosu. Equí, nun vamos perder tol desnivel, intentando empobinanos correutamente, pente la borrina, hacia'l Fusu La Muyer.

Cuéstanos alcontrar pente'l borrín la máxica aguya del Fusu La Muyer

De sutrucu, nun momentín, ábrese la borrina y somos a pescanciar la cabeza'l Fusu, pudiendo orientanos y garrar una guapa vallina que travesando, a posteriori, una llera, pondríanos penriba de l'aguya, algamando unes vistes increyibles de Picos y de la propia aguya.

Echámos-y un vistacín al percorríu de la ruta

Plantámonos na base pa echar un vistacín a la ruta, la cual tenía vista de la páxina del Maquis, viendo que darréu na parte baxa, esisten un par de parabolts colos que nun contábemos. Pepa y Jóse prepárense, que pa eso son los motivaos cola alpina y Montse y yo sentámonos a fotografiar la vía. El día nun puede tar más prestosu pa sacar semeyes, xugando la borrina con nós, atopándonos momentos de gran belleza con Picos al fondu, demientres Jose va xestionando, metru a metru, el so avance pela vía.

Jose trabayando la vía maxistralmente

Envueltu na máxica borrina, Jose algama la cume de l'aguya, la cual ta equipada con dos argoyes maraviyoses, pa que tanto Pepa como yo, démos-y un peguín en polea hasta'l cumal, pa nun perder más tiempu, ya que l'averamientu hasta'l Fusu, lloñe de ser un paseín, lleva'l so tiempu y más col estáu de forma que tenemos toos dempués del confinamientu jeje.

Detallinos de l'ascensión de Jose

Hai que dicir que paga la pena, ye una actividá bien guapa de monte y esguilada, con una ruta bien protexía polo que pude mirar, anque hai que dicir que'l pasu de V- ye cabrón ya que tamos falando d'una escalada sobre romos y el pasu ye llateral precísamente poro, ye finín, pero como siempre aportar al cumal ye una pasada y les vistes son pa enmarcar.

Abandonamos al Fusu La Muyer y averámonos hasta Pandellanza

De xuru, que dalgún día tornaré pa facela de primeru, pero siempre qu'acompaño a Pepa y Jose, prefiero velos actuar ya que poques cordaes de pareya son tan motivaes cola alpina montuna, buscando aguyes perdíes, torres de roca podre y siempre en terrenu d'aventura ya seya pal macizu de Penubina o pa Picos.

Travesámosla escapando del calorón y baxamos hacia Congostín

Escaeceremos un pelín el Fusu La Muyer y equí entro yo a proponer facer una circular pa que conozan la viesca Pandellanza. la cúal encánta-yos sobremanera por poder caleyar sele a la solombra, teniendo un efeutu relaxaor los soníos d'una viesca na que facía casi 3 meses nos que tan sólo los animales tuvieron esfrutándola.

Completamos la circular hacia Pendones nun día bien guapu de monte

Finamos tola travesía pela viesca y continuaremos la baxada pegaos a la Xerra'l Vallín, pasando pel mayáu Reconcu col envís, como siempre, d'aportar a la preciosa foz de Congostín, que nuna rápida baxada nos dexará nos Valliquinos primeru y más alantre en Rinavea, onde axuntámonos col camín d'ascensu hasta aportar de nuevu a Pendones.

En resume, perfeutu patéu p'ascender esta ablucante aguya, llevándonos un total de de 8 hores y 20 minutinos d'actividá, con un desnivel algamáu de 1160 m nun percorríu de 15,4 km que ye defechu una circular interesante, esguílese la aguya o non... paguen la pena les vistes y los llugares a conocer.

Camudando'l Camín col Fusu La Muyer