Caliao (Casu) - Valle'l Cotu - Peña Rosques - Valle Xulió

16 de Mayu de 2020

Track: Caliao (Casu) - Valle'l Cotu - Peña Rosques - Valle Xulió

Primer finde que con cierta xustificación, los montañeros podíemos tornar al monte fuera del nuesu conceyu, ye dicir, la xustificación yera tar de camping, asina que fuimos pal de Caliao, que nun lo conocíemos y de pasu podíemos tornar al monte, a ver el verde de les viesques, oyer el ruxir del rigu y tomar una botellina sidre colos collacios.

Partimos de Caliao camín de los Arruos

Aportamos a Caliao pa la hora xintar, cola calma y decidimos salir a dar un paseín pelos Arruos alantre, col envís de facer una circular tranquilina pa tornar al camping, a pasar el restu la tarde lo más relaxáu posible.

Garramos camín hasta'l Picón onde entamamos ascensu pel valle'l Cotu

Vamos ensin priesa, caleyando al debalu, ensin mayor esmolecimientu qu'esfrutar de la llibertá de tar nel monte una vegada más. Nun sabemos lo que tenemos, hasta que perdemos esa llibertá, poro volver a pisar un camín de tierra pente la viesca, quiciás más verde que nunca, gracies a la nula acción del home, al empar que les riegues baxen xabaces por mor del desxelu y les lluvies de los últimos díes, ye una auténtica pasada.

Ascenderemos pel Valle'l Cotu conociendo pasín a pasu cada requexu

Perpasaremos les pontes de Riafresnu, Corones y antes d'Agualmayu, n'El Picón, saldremos per un camín a la mandrecha, que tien de llevanos a conocer el valle'l Cotu, pasando per Brañusil, calteniendo un bon camín, embarráu dacuando pero pel qu'avánzase ensin mayores problemes.

Aportamos al colláu Canellu decidiendo xubir hacia la Peña Rosques

El valle'l Cotu sorpréndenos polo guapo, amosándose curiosu entá, con bona actividá ganaera, paeciéndonos que ta faciéndose una pista p'aportar hasta'l colláu Canellu. Nós, vamos siguiendo a tramos la nueva pista y otros el antiguu camín pasando pel Cotu y xustu enantes del colláu Canellu, decidimos Nus y yo, averanos hasta la Peña Rosques, por da-y un pelín d'entidá al paséu.

Xubiendo a la Peña Rosques nuna guapa ascensión ensin nengún tipu de marca

Haritz y Jenny, prefieren esperar y tiramos a pinchu primeru per praos y llueu travesando un preciosu fayéu, per el que nun alcontramos denguna marcha nin fitu nel camín. Así que vamos navegando pente la caliza y les fayes hasta garrar la cresta de la Peña Rosques, faciendo ambos cumales, pero viendo'l que'l primeru, el más guapu y con trepadina incluyía, sedría'l más altu de la Peña Rosques.

Cume na Peña Rosques (1199 m)

Ensin parar muncho más, que pa mirar les vistes hacia Caliao, ya que'l día tien un toque murniu añubáu que quítanos munches vistes, tornamos pela cresta hacia'l fayéu pa descender esta vegada empobinándonos pali pali hacia'l colláu Canellu onde tan esperándonos Haritz y Jenny.

Les vistes de Caliao y la Peña Riegos paguen la pena l'ascensión

La verdá ye que baxamos contentos col cumal de Peña Rosques que ya vamos viendo que va completar una circular bien prestosa, sicasí, tovia quédanos conocer un guapu descensu hacia'l valle Xulió pasando pela braña la Zorera.

Perguapu descensu hacia'l Valle Xulió

Vamos esfrutando del verdor de la primavera na viesca, anque ya vamos teniendo ganes de tornar al camping pa echar una cervecina. Poro, apretamos un pelín el pasu, ya que tenemos un cómodu camín baxo dellos exemplares de faya de bon valir, aportando a la pista del valle Xulió, onde ya tendremos descensu conocíu hacia Caliao.

Garramos la pista que baxa pel valle Xulió hacia Caliao

Con pocu más que dexanos llevar cuesta abaxo, aportamos a Caliao magar de 4 hores y media de ruta a pasu sele, esfrutando de volver a sentir esa ñatura y esa llibertá que perdimos por dos meses. El desnivel a superar namái que fueron unos 600 m d'altor y los casi 11 km de percorríu ficieron lo xusto p'abrir la fame pa la cena al aire llibre nel camping de Caliao.

La prósima más y meyor....

Camudando'l Camín de postencierru en Caliao