10 de Setiembre de 2026
Track: Caín (Valdión) - Cares - Vieya - Quintana - Inabio - Raíz - Ría - Cuesta Duja - Tranvia
Otru día más na contorna de Caín navegando pelos requexos colgaos del Cares y si'l día anterior anduviéremos pela fastera del Cornión, poles canales de la Raya y Culiembru, esta vegada teníemos l'envís de tornar a visitar pasos de los Urrieles, poro nun mos quedaba otra que patear una vegada más la sienda'l Cares, lo que ya entamaba a dar una pereza estrema.
Güei perdíemos a Carlos, que llevantárase malín del estómagu y prefirió quedar por Caín de tranqui, asina que saldremos a patear Sara, Mario y yo, caleyando una vegada más Cares alantre, alcontrándonos un día más, con muncha xente foriata y ye qu'alloriamos cola cantidá de senderistes que fae'l Cares y sobretou d'europeos durante díes pente selmana.
Nós vamos a lo nueso, cruciándonos colos primeros qu'intenten aportar a Caín, parando dacuando a echar dalguna güeyada a canales que queremos descubrir o antiguos tramos del camín d'antaño del Cares que pasaba pela parte del Cornión, menos conocíu que'l de la fastera los Urrieles, que ficimos completu delles vegaes y que pude enllazar el tramu que me faltaba nos primeros díes per Caín d'esti añu, col pasu a Cámara pel Puntedo dende Casielles.
Siguimos sienda alantre, echando una güeyada a unes armadures pel Cantu Cerezales, pente les canales de Trea y Sollambriu perdiendo dalgo de tiempu en conocer dalgún mayáu antiguu y descendemos ensin más, hasta la cabaña la Sota pa siguir camín hasta la Puente Vieya, descendiendo pel camín derrabáu nestos tiempos, hasta esti máxicu llugar que ya la Puente Vieya, onde tocará ascender pel Pandu Culiembru, hasta la Quintana.
En la Quintana tendremos varies opciones pa empobinanos hacia la canal de Ría, pudiendo ascender per Piedrabellida y escoyendo cualesquier de los h.orcaos Turonero (Baxeru o Cimeru) p'acceder a Ría, pero quería enseñá-yos a los compañeros el Sedu Inabio, asina que vamos averanos dende Quintana hasta'l colláu Impividre, onde arranca esti ablucante pasu, con cayíes perimportantes hacia la canal de Raíz.
Fadremos esti pasu, espeutacular, pero sin dificultá, salvo llevar bien los pasos con ambiente y entraremos na canal de Raíz, faciendo los primeros pasos pela mandrecha la canal, ascendiendo esta pindia canal parándonos un segundu a sacar una semeya al sedu Inabio, porque casi nin somos a pescanciar per onde baxamos y na parte cimera de la canal, pasámonos hacia la manzorga la canal, onde alcontramos meyor senderu, xustu nel empate onde saldría'l pasu del sedu Inabio Cimero.
Con pocu más d'esfuerzu, aselando'l desnivel de la canal, aportando al colláu Ventaniella, llugar increyible con unes vistes brutales de tola canal de Ría y del entronque cola canal del Agua, nun pudiendo otra cosa, que parar un ratín a descansar y esfrutar d'esti alloriante llugar. Dende equí, descendemos un pelín hacia la canal y diremos siguiendo dellos h.itos pela faldera esquierda de la canal, acolumbrando les distintes entraes dende Piedrabellida pelos H.orcaos Turoneros, parando a la solombra d'unes fayes a reconducir los nuesos oxetivos, nel Pasadizu la Riega, puntu nel que cruciamos la riega de la canal de Ría.
La nuesa idega yera conocer las Moh.osas y baxar Cuesta Duh.a, pero'l tiempu per estos llugares pasa bien ceo, tenemos a Carlos sólo tol día per Caín y Mario tien que colar de vuelta a casa, asina que falamos de lo que podría allargase la ruta y decidimos acortar desviándonos hacia'l monte Cuebre, otru d'esos requexos increyibles de la contorna de Ría, que va danos pasu, pel so preciosu senderu al colláu Cuebre, pasu d'entrada a la enorme Cuesta Duja.
Los collacios van encantaos, nun conocen nengún d'estos pasos y ta paeciéndo-yos una maraviya, anque yo tengo pasáu varies vegaes per esta fastera y quédome un pelin más gachu, al llevar varios díes ensin algamar los oxetivos que tenía marcaos, pero bueno, ver como esfruten de cada llugar que conocen nuevu, préstame pola vida y como ye vezu na Cuesta Duja, convído-yos a xintar nel collaín del Descansu o las Mueldas, coles sos grandes vistes de tol Cornión.
Xintaremos ya con más calma al abortar los nuesos oxetivos y dempués de la xinta, entamamos a caleyar per Cuesta Duja hasta'l colláu del Pardo, onde entamamos el descensu primeru per varies envueltes de senderu, teniendo cuidáu na parte alta de nun salinos a la esquierda, hacia'l Tellosu nuna envuelta zarrada y dempués pel clásicu barrenáu que ya sácanos hacia la parte baxa del Pardo, onde atopamos el senderu bastante reventáu hacia'l Robledal.
Dende'l Robledal, descenderemos la canal de Trescámara hasta l'enllaz que vien dende la Cueva Cámara pela Tarugada y ya per tarrén andáu unos pocos díes enantes, siguiremos per guapísimos senderos colgaos hacia la Tranvia, na que debolamos hacia la H.uente Prieta, faciendo la clásica envuelta pa salir pelín más alantre en direición al Puente Los Rebecos, onde garramos sienda del Cares hasta Caín una vegada más.
Con esti día terminamos delles xornaes de pateos per Caín, conociendo llugares nuevos y otros vieyos conocíos, pero paecióme importante reseñar esta circular, que fice varies vegaes en travesía o como accesu a grandes canales, pero que paezme interesante de facer por si mesma, ya que los sos 11,5 km de percorríu, con un desnivel acumuláu de +/- 940 m, bien paga la pena nes 7 hores y 55 minutos de ruta, anque tuviéremos entreteníos en conocer algunes coses que nun relato na entrada.
No hay comentarios:
Publicar un comentario