Caín (Valdión) - Cares - La Raya - Peñón d'Ostón - Culiembru

9 de Setiembre de 2026 

Track: Caín (Valdión) - Cares - La Raya - Peñón d'Ostón - Culiembru

Alborecemos con un día borrinosu, dempués de les tormentes del día anterior, nel que tuviemos qu'acortar la ruta per Yerbas Altas y anque quedáramos bien a gustu col percorríu, güei teníemos ganes de meter más desnivel pal cuerpu, asína qu'una vegada más, teníemos l'envís de percorrer la senda'l Cares p'averanos a otra canal que nun conozco, como ye la de las Avareras.

Quedamos 4 compañeros, llueu de la marcha de Montse nesta mañana, caleyando'l Cares atopándonos con muncha más xente de lo esperáu, pa un miércoles de Setiembre, pero la foriatada nun entiende de folixes y nun paramos de saludar xente, que mui al nuesu pesar, vienen más abrigaos de lo que nos diba prestar. 

Una vegada más puntu de partida en Caín (460 m)

Pasaremos les canales de Culiembru y la Raya ensin moyanos, pero avanzamos unos cientos de metros más y la ñube nortiega astur, ta metida y nos toca, con un orpín finu pero moyaor, asina como con un borrín gafu na canal que queremos conocer.

Abellugámonos un ratín, pa pensar que facer, hasta poniendo enriba la mesa, tornar y salir más al sur hacia'l valle de Valdión a facer algo, pero según tornamos so los nuesos pasos, falamos que nengún, sacante de mí, conoz la canal de la Raya, asina que decido facer la ruta na direición contraria de va unos años que ficiera Culiembru a Ostón y baxar pela Raya.

Entamamos ascensu pela Canal de la Raya dende'l Cares

Abandonaremos el Cares y arrancaremos fuerte pela canal de la Raya, pelín argayada nos primeros pasos pela riega, pero siguíendose perbien el trazáu durante unos cien metros de desnivel, teniendo que salir a la manzorga del encaxonamientu anicial, ya que continuar la canal faise abegosu na parte cimera onde empindiase y tómase de broza y la Llambria que pieslla la Raya ye tarrén de muncha cayía de peñes, lo que ye peligrosu, como pudimos acolumbrar dende la Concha.

Saldremos hacia la Concha la Raya dende la canal

Saldremos pues hacia la Llosa la Concha la Raya, a la qu'aportamos per un pequeñu sedu de piedra, pente espineres, continuando hacia l'espolón que zarra la riega La Paloma, a la manzorga, continuando dempués pel monte L'Ardinal, una pequeña encinera, que tien de dir sacándonos hacia los praos de Valdelafuente, onde atopamos restos de los incendios del Cares, siguiendo per tarrén amestáu de peña y praos, hacia'l puertu d'Ostón.

Ascendemos al Peñón d'Ostón (1066 m) increyible mirador

Entraremos nos puertos, atopando los primeros rastros de cabañes ya desaniciaes, dándonos cuenta de la enormidá del puertu d'Ostón, onde vivíase antaño, non sólo brañar, sinon vivir tol añu, decidiéndonos a ascender al Peñón d'Ostón, llugar de grandes vistes, qu'aparte de danos una ascensión entretenida, ufreznos l'allugamientu perfeutu, al solín recién salíu, p'acolumbrar milenta llugares del Cares dende los sos 1066 m y poder xintar relaxaos.

Baxamos del Peñón d'Ostón a la mayada homónima pa garrar la entrada a Culiembru

Llueu de la xinta, descenderemos del Peñón hasta la mayada d'Ostón, dando al pie de les cabañes cimeres del puertu, crucie de caminos onde garramos la entrada a la mítica canal de Culiembru o de salida hacia Vega Maor, con alternatives hacia Los Llagos de Cuadonga o Vega d'Ariu por exemplu. Nós entraremos a la canal de Culiembru, nesos primeros pasos más encaxonaes, volviendo una vegada más a esfrutar de les armadures de los pastores de Picos, que son una auténtica maraviya.

Descensu de Culiembru hacia la Cueva Posadoriu

Continuamos canal abaxo, ya por camín de tierra percómodu, hasta aportar a les entraes de les canales de la Texa y Robriella, dándome la vuelta y entreteniéndome un ratín mirando pa elles pa posibles incursiones hacia la Cabeza La Llambria, demientres los compañeros aporten hasta mi posición, onde los convido a xubir a la cueva Posadoriu, llugar de pastoréu, que bien paga la pena conocer.

Tornamos al Cares pel final de Culiembre pa siguir hasta Caín nuna tarde soleyera

Dende la cueva Posadoriu, fadremos a bon ritmu ya tol restu la canal de Culiembru, adelantando a dellos montañeros, quedándonos na parte baxa, a echar un vistazu al Escaleru de Culiembru, que preferimos dexar pa otru día, aportando finalmente al Cares, que percorreremos una vegada más, nel intre cola tarde soleyera y una temperatura estupenda pa caminar y dir restolando posibles requexos a conocer a un llau y otru d'esta maraviya de la ñatura.

En resume, otra ruta asumible pa montañeros con esperiencia media, pudiendo conocer más canales y requexos del Cares, como son Culiembru y la Raya, superando un desnivel acumuláu de +/- 880 m, nun percorríu de 13,7 km, siendo mui asemeyada la distancia dende Poncebos o Caín nun total de 6 hores y 40 minutinos.

Camudando'l Camín pel "pueblu" d'Ostón y sus canales