Vegacervera (Gordón)

1 d'Agostu de 2021

Finde llionés, faciendo la última visita a les foces de Vegacervera, onde aparte de víes d'alpina de gran calidá hai dellos seutores de deportiva. Paez mentira, que magar de tantos años esguilando per Asturies y Llión, nun m'averase enxamás hasta Vegacervera a trepar.

El casu ye qu'arrimámonos hasta ellí, ya ensin yemes del día anterior, xubiendo hasta'l seutor Belvedere, onde aparte d'alcontrar un montón de xente, metímonos a probar dalgo curtiu, ya qu'entá pegaba la solana como pa facer víes más llargues al sol.

Parés cimeros de Vegacervera onde asítiense los seutores

Cola motivación escosa a estes altures del finde, Anna metióse a montar Lolita Nights (6c), de bloque y dalgo sobada, que fice al flash non sin meter una bona apretada en dellos pasos. Más tarde, metíme nun 6b+ a la manzorga por probar daqué más y llevéme'l bofetón llionés, con un pasu de placa que nun lleí na bien y pringada.

Aún así, entá tenía otru pasu de techu más enriba, que pa 6b+, va ser que nun me paeció, pero bono, cada visita a Llión ye colar cola sensación de nun movese y de tener que retomar la esguilada de nuevu y facese a la peculiar caliza llionesa.

Camudando'l Camín dende Vegacervera

Vegacervera
Croquis de la escuela d'escalada de la escuela de Vegacervera, por mor de InfoEscalada Gracies y col so permisu.  

-----------------------------------------------------------------------------

Geras (Gordón)

27 de Xunu de 2021 

Pues nun contábemos con ello, pero sí que-y dimos una nueva oportunidá la escuela de Geras. La verdá ye que tábemos a gustu pel pueblu y dempués de la visita a la escuela de La Boyeriza, decidimos tornar a la de Geras al alcuentru d'un reconcilie escalador.

Una vegada más, l'ayuntamientu de Gordón, fizo gran trabayu pa marcar munches rutes nel so conceyu y al igual que na Boyeriza, poro alcontramos info montuna y de la esguilada na foz del Palanco, que ye onde asítiase la escuelina.

Perguapa info nel pueblu de Geras de Gordón

Aportaremos al paré, cola esperiencia de que nun podemos ser mui optimistes, en cuanto a los graos onde podemos metenos, ya que tamos en Llión y siempre llevamos una hostia de realidá. Miramos croquis y tiramos pa Tus Ojos (6a) nel qu'entra Anna y nun ve collor pa salir de la segunda chapa n'adelantre.

 

Tiro yo y más de lo mesmu, soi a aportar a la 5, pegándome unos pires pela mandrecha brutales, onde ya la cabeza me diz hasta equí y llego a cadena, acerando y matámdome chapa tras chapa. Anna, col envís de facese a la escalada, da-y un pegue en polea y nin con eses la encadena, colgando en munchos pasos, alloriando coles pinces romes, fisures ciegues y pies en ris... durísimu ye pocu dicir. 

 

 

Una vegada más, l'averamientu al seutor ye un agradable paseín

Casi pensamos colar d'ellí y tirar pa Llombera, pero decidimos movernos del muru de fisures horrendes, a la manzorga, onde topamos un 6a+ (Lobezno), con dalgo más de cantu y endiedráu, pudiendo facelo a vista, garrando un pocu d'aliendu con estes escueles de la redolada de Geras.

Cola mesma, magar d'enchufarla Anna tamién, viendo que comparte con un 6c (Oso), móntala al baxar y algamo l'encadene tamién a vista, yendo ella detrás tamién y llevándosela, quedando los dos con una sensación de nun entender nada nel murín de les víes pente la 18 y 21.

Terrible esguilada nel "6a" de Tus Ojos na foz del Palanco

Al menos, colamos d'ellí, con otres sensaciones y con ganes de tomar una cervecina nuna terraza ya que pa les 3 nun se paraba de calor per ellí, pesie a que soplaba l'airín y les temperatures suponíense non mui altes pa la dómina l'añu. 

 

Como siempre, la esguilada ye lo de menos, siendo muncho más importante esfrutar de pasar el finde de furgonetéu coles perrones, conocer guapos llugares, pueblos onde tar a gustu... eso ye lo único importante nesta vida.

 

Xena camudando'l so camín

Geras (Gordón)

Croquis de la escuela de Geras, por mor de Los Cuatro Valles. Gracies y col so permisu.

-------------------------------------------------------------------------------------------- 

La Boyeriza (Gordón)

26 de Xunu de 2021

Finde nel que teníemos ganes d'escapar del mal tiempu astur, asina que miramos pa Llión y topámonos con poques probabilidaes de lluvia y unes temperatures moderaes pa lo que suel tar pela zona. Poro, decidimos ensin dubiar tirar pa la fastera de Gordón y más en concretu, pa les escueles más averaes a Geras.

Va unos años, ya tuviera nes escueles de Geras y Beberino, tastiando un pelín la so estraña caliza y escalada. La verdá ye que cuando vas a Llión hai que camudar el xeitu d'escalar y apretar, por facese a la escuela ya intentar esfrutar na medida de lo posible.

Cartelu d'información na foz de la Boyeriza

 

Echamos un vistazu a la guía y vemos una escuelina nueva, anque ya sintiera d'ella nesi mesmu finde y vemos que tien solombra a partir de la 1. D'esta miente, tomamos un almuerzu tardíu, mercamos dalgo nel super de la Pola y vamos hacia la Boyeriza con tola calma.

 

Aparcamos nel apartaderu de la carretera y topámonos con un cartelu, con tola info de les rutes de monte d'esta fastera y de la propia escuela. Facemos el curtiu anque guapu accesu y aportamos a la foz de la Boyeriza onde topamos con muries a dambos llaos del camín y del rigu.

Perguapu y curtiu accesu hasta la foz de la Boyeriza

Vemos la orientación y estráñanos lo que pon la guía, asina que dempués de falar con dos conocíos de la escalada asturiana, facemos un intentu de xubir hacia los seutores más altos a la mandrecha la foz según xubimos, pero la solana, fainos desistir y vamos hacia los seutores d'enfrente onde al menos tenemos solombra pa les perrines al pie de vía.

Un 6c+ cabrón enforma, que nun somos a encadenar nengunu de los dos en dos pegues, fainos pensar, qu'habrá que volver, pero sin sol, porque nun hai quien pare. Al menos, el rigu al llau presta, refrescamos un pocu y vamos hasta Geras al terracéu, dexando una visitina más seria pa otra vegada.

Topámonos col Puntu y Bertín fuxendo del mal tiempu astur

Llombera (Gordón)

29 de Xunetu de 2018

Finalizamos el finde d'escalada llionesa, tornando a una escuela que fai dos años, prestáranos enforma. Nun sabía de l'apertura d'otros dos seutores que dan vuelta a la peña, pudiendo tener varies orientaciones pa esfrutar d'una escalada a la solombra nos meses de branu.

Ensin madrugar demasiáu, más bien na, meyor dicho. Desperezámonos en Geras y magar del almuerzu, siguimos viaxe hacia la Pola Gordón, lléndonos hasta Llombera, onde aparcaremos y garraremos agua pa xubir hasta'l paré cimeru. 

Ana probando un sestu mui guapín

Tuviemos la suerte d'alcontranos con xente conocedor de la escuela y pudieron pasame una reseña de les nueves víes abiertes nos seutores a la solombra. Hasta ellí nos fuimos, intentando aprovechar lo máximu posible enantes de qu'entrase'l sol a facer protagonismu.


Un par de sextinos llargucos ye pa lo que nos dió tiempu, comprobando como les víes son buenes, pero la roca ye dalgo feble y queda muncho por sanear y romper. Si a esto sumamos, un cartelu de prohibición por añeramientu que nun diz de cuando a cuando ye la prohibición, pues acoyonamos un pelín y decidimos colar.

Tastiando la roca d'esti nuevu seutor

Pa cuando pasamos de nuevu pel seutor cimeru, decidimos baxar hasta'l pueblu de Llombera a tomar el vermú porque nun se paraba de calor. Nun digo na, de cómo entraben les clares al solete y de la xinta que nos metimos a la solombra de los portones de la furgo.

Hasta una señora siesta, tuvimos tiempu d'echar, ya que yera imposible dafechu, xubir a trepar de nuevu col calor que facía. A última hora de la tarde, cuando baxó'l calor, diónos por xubir un ratín hasta'l seutor pa facer unes cuantes víes.

Pie de vía cómodu pa esguilar cola calma

La verdá ye que dió pa muncho, anque fuesen namás que dos hores escases, ficimos unes 6 o 7 víes de plaquina cenciella. Lo máximu que treparíemos sedría un 6a probáblemente, pero prestó pola vida y quitamos un pelín esi picor, ya que la mañana quedara pelín curtia.


Jose fue más allá aún y se ventiló toles plaquines del seutor, ya que Pepa taba zángana y nun-y apetecía trepar. La verdá ye qu'esta escuelina ye bien guapa y camiento que paga la pena facer más visites y ponese en serio a trepar gradinos más duros.

Momentu siesteru con Kíla

Llombera

Croquis modificaos de Llombera por mor de Infoescalada. Gracies y col so permisu.

---------------------------------------------------------

Beberino (Gordón)

28 de Xunetu de 2018

Cuando coláramos pol colar en Geras, tuviéramos cola mayor de les calmes tomando'l vermú, nun de los chigres del pueblu, apalancaos na terraza'l chigre como si nun hubiera mañana, siendo ún d'esos momentos en que tas tan a gustu que nun quies que pase'l tiempu.

Aún así, decidimos meneanos hasta otra escuela, contando con buscar dalgo onde la solombra nos dexara intentar esguilar dalgo más. Nun teníemos mui claru, si Beberino sedría un opción bona pero al menos, conoceríemos otra escuela d'escalada más.

Merendando a la espera de que baxase'l sol

D'esta miente, salimos de Geras en direición la Pola Gordón, parando dellos kilómetros enantes nel crucie pal pueblu de Beberino. Dende ellí, pudimos ver la pirámide que ye la escuela d'escalada y pudimos comprobar como'l solo pegaba con fuercia tovía.

Coles mesmes y aprovechando que teníemos qu'esperar por Ana que diba xunise al grupu pal finde, buscando dalgo de sombra, sacamos les meses y merendamos cola calma demientres tomábemos una birra a la espera de poder trepar.

Ablucante paré'l de Beberino

Cuando sentimos que'l calor diba baxando, garramos los trastos y empobinámonos canal arriba hacia'l pie de vía de la muria de Beberino. Namái aportar al paré, daste cuenta que pel momentu, nun ta la muria tolo aprovechada que pudiera y que la roca supera en calidá a la de Geras con muncho.

Por mor, de lo tarde qu'entra la solombra nel paré, nun mos dió muncho tiempo a trepar, pero al menos probamos un par de viuques cencielles a la manzorga del diedru que separa'l paré en dos seutorinos.

Noah atenta a la xugada nel pie de vía

Paezme que yeren un cuartu y un quintu pa calecer yemes y dempués metíme nun 6b llargu preciosu, un pelín suciu, pero con gran calidá na roca. Una pena, que nun pudiésemos tar más tiempu esguilando, porque viendo los croquis y les plaques, esta escuela si paga la pena otra visitina, asína que tornaremos de xuru.

Beberino (Gordón)

Croquis modificaos por mi de la escuela de Geras, por mor de Los Cuatro Valles. Gracies y col so permisu.

La Pola (Gordón)

2 de Xunetu de 2016

Segundu fin de selmana qu'escapamos de camping en branu. Esta vegada escoyimos la Pola Gordón de campu base y pude lleváme a Kíla, lo cuál fué una doble satisfacción. El vienres dempués de currar salíemos d'Asturies con mal tiempu y hasta Vil.lamanín nun meyoraba un res.

Plaqueando na Pola Gordón demientres aguántase de calor

Una cañina n'Ezequiel y ya cola tarde repunantuca tiramos pal camping y entre pitos y flautes de montar tiendes y demás, ya nun mos dió tiempu nin a dir a trepar nin na pol estilu. Eso sí, dar un pirulín pel pueblu y tomar daqué durante la tarde-nuechu nun mos lo quitó naide.

Mui entreteníes toles plaquines

Al día siguiente de mañana, almuerzu y como taba por llegar della xente (Haritz, Noe y Wifre...) quedamos nuna pequeña escuelina qu'hai penriba d'un pinar na mesma Pola Gordón. Serán unes doce víes separtaes en dos paños de roca, pero pa pasar medíu día o así ye más que perfeuta.

Guapu'l sitiu, soleyeru y pa pasar otra mañanina

El estilu, pues de placa llionesa y graos cenciellos ensin pasar de 6a+. De mañanina, tuviemos Zori, Richar y yo, nel pañu de roca más a la manzorga faciendo les víes d'una n'una, Richar y yo y Zori, dándo bona cuenta de dalguna vía de primera que ye lo importante.

Acampada brutal nel camping de Pola Gordón

A les 3 y media aproximáu de la tarde... nun había quien parar de calor y colamos d'ellí pa la piscina del camping como ta mandáu. Nun too va ser tar engoláu nun paré, pudiendo dase un bañu na piscina de los de restallu... eso sí, de nueche fresquino, fresquino ta l'ambiente na Pola Gordón... tanto que los dueños del camping agasáyente con unes mantines pa por si acasu jeje.

La Pola Gordón

Croquis modificaos de la Pola Gordón por mor de Pura Escalada Asturias. Gracies y col so permisu.