lunes, 15 de octubre de 2018

Vidrieros (Montaña Palentina) - Pico Curavacas

16 de Xunetu 2018

Track: Vidrieros (Montaña Palentina) - Pico Curavacas


Tercer día de la nuesa Travesera, siendo'l nuesu oxetivu l'otru gran nomáu picu palentín: El Curavacas. Si'l día anterior esfrutáremos como neños, cola ascensión pela arista Este del Espigüete, esta vegada la idega yera conocer la ruta normal pel Callejo Grande y facer tol cresteríu pa descender pela fastera oeste.

Como siempre, de lo que se pretende a lo que se puede facer hai una llarga tirada. Nesti casu, averarémonos hasta'l pueblu vecín de Vidrieros dende'l campu base en Triollo y ya de camín nel coche, vamos viendo la típica boina nel Curavacas.

Que ye la boína del Curavacas? Pues como n'otros montes solitarios y de calter compositivu más complexo que los típicos calizos, suelen atraer les ñubes, la truena y el rayu. Poro, nun ye estrañu tar al solín en Vidrieros y tener la ñube metída enriba'l cumal del Curavacas.

Dalgo asemeyáu, pasóme na mió ascensión al Moncayo años atrás, onde tuviera tolos tipos de meteo nuna sóla xornada, dende un fríu estremu pa ser Agostu baxo la ñube del Moncayo, hasta un calor infernal pela tarde formándose tormentes a última hora.

Siguimos camín pel valle de Cabriles

La ruta hacia'l Curavacas nun tien pérdida denguna, ya que nun da a engaños, viendo'l nuesu oxetivu dende casi los primeros pasos, namás salir de Vidrieros. Fadrémoslu pel camín de Valdenievas, hasta la Pontoncilla, onde empobinarémonos hacia'l valle de Cabriles, el cual na so primer parte, sedrá a la vera de la la riega que-y da nome.

De primeres per pista, pasaremos a tomar un senderín, hasta salir a la parte más ancha del valle, onde caleyando pente la yerba, diremos albidrando cual va ser el menú del día, pa esta ascensión... una enorme llerona de regodones cayíos dende'l Curavacas.

Plantámonos enfrente del Curavacas teniendo una enorme pedrera de menú

La verdá ye que viendo'l plan, nun paez mui motivante l'ascensión, pero por dalgún motivu voi caleyando atrayíu pelos collores qu'acolumbro hacia arriba. L'amiestu del cielu azul col blancu de les ñubes y el verde y prietu de les peñes del Curavacas, dan un toque estrañísimu al montaxe visual.

Quiciás esa atracción hacia lo desconocíu, hacia un tipu de peña que nun tamos avezaos a pisar, seya lo que nos faiga avanzar, ya que montañéramente falando, ascender per una llera nun aporta más, que tener el físicu suficiente pa nun fundir un pasu p'alantre y dos p'atrás.

Empobinámonos hacia'l Callejo Grande

Menos mal, que cuando aportamos a les primeres envueltes, baxo los torruxones que van cayendo del Curavacas, el camín faise menos inciertu y podemos meter una marcha más al ritmu. Al empar, la ñube allúgase dafechu nel monte y el Nuberu palentín diznos que les vistes van ser más bien escoses dende equí hasta'l cumal.

Personalmente, dióme por entrenar un pocu y viendo que nun hai perda posible al menos na primer parte del Callejo Grande, dióme por metéme un pelín de caña, pa ver si díbemos garrando forma, ya que pasáremos un par de meses con una condición non mui bona de pesu y poro de forma física.

Superamos dellos pasos pente torruxones de peña prieto

Ensin más, tiro p'arriba fuerte, siguiéndome nun entamu Haritz y Ana, pero finalmente pasen un pocu de mí, ya que cuando pongo ritmu carrera soi un pelín bestia. Les que nun se quedaron atrás en dengún momentu, fueron Kíla y Noah qu'acompañáronme nel mió camín hacia los requexos mordorianos del Curavacas.

Na parte superior, paré un pelín, al equivocame na salida hacia'l cresteríu y tuve que dar marcha atrás escapando del vacíu hacia la cara norte. A la vuelta al bon camín, ya llegaba Ana, siguiendo l'ascensión xuntos coles perrines y faciendo'l restu del cenciellu crestéu con calma hasta los 2522 m del Curavacas.

Cume nel picu Curavacas (2522 m)

Nel cumal, sorpreses nenguna, casi cero vistes, metíos dientro de la ñube, pero sorprendióme munchísimu la cantidá de robezos que taben abellugaos na escarpada paré sur, ensin esmolecese cola nuesa presencia, anque la de Kíla fuera amenazante y poro tuviera qu'atala al vértice xeodésicu y un ratín.

Pali, pali, fueron llegando tol restu del grupu, tanto astur como vasco hasta que pudimos cellebrar el cumal toos xuntos. Magar de picar cuatru frutos secos y beber dalgo, la ñube, qu'esnalaba pente'l cresteríu, díxonos a les clares que nun yera'l día de siguir con aventures deciendo descender de nuevu pel mesmu Callejo Grande.



La meteo oblíganos a desistir de crestiar y toca retirada pel Callejo Grande

Sin mayores novedaes, decidimos baxar pocu tol grupu hacia los pasos más téunicos d'entrada a l'arista final y magar de pasar tol mundiu, les perrines ficieron los trepes y ya entamamos la baxada n'envueltes pente'l borrín y los torruxones y aguyes prietes del Curavacas.

Saliendo de la parte más encaxonada, caún garró'l so ritmu y los astures con ganes de quitar la pedrera d'enmediu, baxamos corriendo como chiflaos peles meyores riegues de regdones, hasta aportar a los praos baxeros onde nos reunimos.

Baxamos hasta'l valle Cabriles y vuelta hacia Vidrieros

Viendo que'l grupu vascu venía cola calma, decidimos siguir pista alantre hacia'l pueblu de Vidrieros, con un güeyu mirando pa les ñubes prietes que paecían tener ganes d'echar dalgo d'agua. A la fín, pudimos aportar al pueblín ensin problemes y sentanos na terraza d'enfrente al aparcaderu, onde portáronse xenial con nós y pudimos planiar la posterior parrillada.

En resume, monte distintu, non demasiáu guapu y que déxame un tastu planu, anque soi a reconocer que na dómina ivernal tien que camudar y muncho. A nós, costónos un total de 5 hores y 25 min, xubir y baxar, con un percorríu de 9,95 km y desnivel positivu de 1183 m.

Camudando'l Camín en Mordor... o el Curavacas

No hay comentarios:

Publicar un comentario