viernes, 19 de octubre de 2018

Llánaves (Tierra La Reina) - Peña Prieta

17 de Xunetu 2018

Track: Llánaves (Tierra La Reina) - Peña Prieta


Dacuando, vas facer monte con unes precondiciones estrañes o cuanto menos, non tolo motivantes que debieren ser. Oyera falar de la Peña Prieta, que si yera una llomba, que si l'accesu yera feu, que si tal que si cual... y al final, hai que patealo y conocelo pa xulgar correutamente.

A dicir verdá, como nun esperaba gran cosa, esta ruta que ficimos prestóme enforma, y ye que tengo claro, que soi un montañeru d'ampliu espectru, que-y gusta por igual los grandes desniveles y cumales complexos de Picos, les kilometraes nos grandes valles nel cordal cantábricu y les pequeñes rutes per viesques y foces de la fastera central asturiana.

Semeya de grupu en Llánaves (1400 m)

Tamos na estaya final de la Travesera 2017 - 2018 y siendo sinceros, otros años, diríamos coles fuercies mui xustes ya, pero ta siendo mui seliquina y vamos facer el mayor númberu de kilómetros n'ascensión a la Peña Prieta.

Saldremos de Llánaves, lo de la reina afórromelo que soi republicanu jeje. El camín ye claru y n'ascensu per una cómoda pista qu'empobínase a la vera'l rigu Naranco. Ensin perda denguna, diremos charrando animósamente hacia la Vega Naranco, onde aparte d'alcontrase'l refuxu del grupu montaña Tajahierro, tenemos una concentración de ganáu vacunu descomanada.

Xubimos pel Valle Naranco hacia les mayada de la Vega Naranco

Travesaremos la enorme vega, intentando nun molestar a les vaques y a los xatos, casi recién ñacíos, col envís de facer delles envueltes de xuba, que tien de depositanos nel boquerón de Bobias. Dende esti colláu  daremos vista al picu Cuartas y Lomas y tamién podríemos entamar una ascensión a Peña Prieta, pasando pel Altu del Cubil de Can.

Ascendemos al Boquerón de Bobias y pasamos al valle de Lechada

Nun ye la nuesa intención, asína que baxaremos al alcuentru de la pista que vien per tol valle de Lechada dende Portilla. Tanto nesti valle como nel del Naranco, el verdor, les enormes mayaes y l'amplitú de los valles son una costante, dalgo clásicu nel cordal cantábricu y qu'aseméyase muncho al Pirinéu.

Xubida hacia'l Hoyo Empedrado siguiendo hacia'l Tres Provincias

Pero onde vien esi toque al Pirinéu de la ruta, fue al final del valle de Lechada, cuando entramos nel hoyo Empedrado, alcontrándonos con una pequeña llaguna glaciar, que sería l'antesala de lo que pa mí tuvo más importancia nesta ruta: les llagunes de Fuentes Carrionas.

Pa ello, ascenderemos a pinchu dende'l Empedrado hacia'l picu Tres Provincias (2499 m), más menos per onde meyor se puede y ellí tendremos eses increyibles vistes hacia la llaguna de Fuentes Carrionas.

Pasamos pel Tres Provincias e Infierno con vistes a Fuentes Carrionas

El día que nun acabó d'abrir del tou, déxanos un pocu tiesos nel cumal esperando polos demás, pero les vistes compénselu enforma. Reagrupados, siguiremos camín ya pela cómoda arista hacia'l picu Infierno (2537 m), puntu más altu de Palencia, anque a los palentinos, présta-yos más dicir que ye'l Curavacas (2524 m) por mor de tar enteru na provincia.

Con pocu más que caleyar pela pedrera que ye esta arista, daremos preste tamién a la Peña Prieta (2539 m) oxetivu final de la ruta. Prietu n'asturianu ye negru y si ya podemos velo nel cambiu de collor de la peña dende l'Inferno a la Prieta... la cara norte, que corta a pinchu hacia los puertos de Ríofrio tien de ser amenazante como mínimu.

Cume de Peña Prieta (2539 m)

Taremos un bon ratu nel cumal, xintando cola calma y yo nun pueu parar de mirar pa la llaguna que baxa hacia los Pozos de los Altares. Nun tengo track y nun sé si la cubeta vierte l'agua per un tabayón o si nos va dexar baxar, pero tengo ganes de conocelo.

Fernan tien les sos reticencies ya que teníemos pensáu baxar pel Cubil de Can, pero convénzolu y tirámonos abaxo pela pedrera Ana y yo, que vamos conociéndonos nel monte un puquiñín y vamos del mesmu palu dafechu.

Facemos una perguapa baxada hacia los Pozos de los Altares

Al final, descubrimientu total!!. Que baxada más guapa de la llaguna superior de los Altares, hacia les demás, pegaos a la riega y con un collores ablucantes pente'l verdor y l'azul de les llagunes. Si la d'arriba ye guapa, les de la parte baxa del valle son increyibles... menudu requexu guapu.

Asina que totalmente relaxaos y esfrutando del espectáculu plantámonos na baxera de los Pozos de los Altares, onde como albidraba teníemos una sorpresa más: la cara norte de la Peña Prieta. Ana y yo, quedamos embobaos, ye lo que tien la vena alpinística, que vimos como travesaba un diedro enorme tola fastera norte, así como posibles corredores... que como non, con restolar pela rede, vese que son clásiques ivernales.

Esfrutamos cola vista a la norte de Peña Prieta y coles llagunes glaciares de los Altares

Sin más, dexamos esos sueños alpinísticos nel maxín y seguimos avanzando buscando una salida tranquila de la cubeta glaciar que nos faiga, non baxar demasiáu hacia los puertos de Riofrío. Alcontrarémosla faldiando les cinches que nos ufrez el Cubil de Can y siguiremos pela parte alta del valle de Riofrío col envís d'aportar al colláu del Robadorio.

Una vegada que tamos en Robadorio tenemos dos opciones: baxar pela vallina de la riega Majarriba o pasarnos hacia la de Valpriego. De primeres entamamos baxando hacia Majarriba y a la fin tan sólo siguimos per esta vallina Ana y yo, siguiendo'l restu del grupu penriba del Guadañal hacia Valpriego.

Baxaremos pela mayada d'Arriba hacia'l valle Naranco pa descender hacia Llánaves

Xuntarémonos toos, llueu de pasar pela mayada d'Arriba nel nuesu casu, nes cercaníes del refuxu del Tajahierro y tan sólo debemos siguir de nuevu tol valle del Naranco alantre hacia Llánaves, faciéndolo esta vegada pela manzorga'l rigu, conociendo la otra fastera del Naranco.

En resume, ruta a mi mou de ver, de patear sin mayores dificultaes, con vistes bien guapes, mayaes enormes, valles llarguísimos, llagunes precioses y montes de fastera sur seliquina pero con amplísimes vistes, poro, mui encomendable de facer.

Los datos como siempre sirven de referencia asina que dígovos que fueron casi 8 hores de ruta nes que percorrimos casi 20 km y un desnivel acumuláu positivu y negativu de 1415 m aproximádamente, lo que nun vos tien de quitar de conocela.

Camudando'l Camín en Fuentes Carrionas

No hay comentarios:

Publicar un comentario