3 d'Ochobre de 2026
Track: La Malva (Somiedu) - Castru - Pineda - La Forcá - La Mochá - Montrondiu - Aguinu - La Pola
Dempués de casi un mesín descansando de patiar pel monte, nel que'l grupu siguió saliendo pola so cuenta, tornamos al monte a conocer una fastera de Somiedu que tenía pendiente, como ye la contorna del pueblu de Pineda, poro prepraramos pa la ocasión, una circular que va tener el puntu de partida nel area recreativa de la Malva, dellos kilómetros enantes de la Pola, capital del conceyu y que tendrá'l so puntu más altu, na Mochada.
Pocu dempues de les 9 la mañana tamos preparaos pa salir a caleyar, dempués de la típicu infructuosa queda p'almorzar nesti valle, cosa perdifícil dempués del pieslle del hotel rural Cela en Balmonte, onde siempre teníemos la parada obligatoria. Sicasí, fuimos a algamar al menos un cafetín y una madalena y dempués de preparanos, salimos del aparcaderu al entamu del PR (pequeñu percorríu) de Castru, que nun conocía y que va amosanos llugares increyibles.
Los primeros pasos fadrémoslos penriba d'instalaciones de la central de la Malva, pel tarrén tapecíu de fueya recién cayida y bien ceo pasaremos per llugares qu'a los escaladores nos faen alloquecer, con cueves desplomaes y dellos parés verticales, too ello per un camín anchu y qu'en dellos puntos nos dará vistes al banzáu de la Malva, superando dellos collaínos hasta aportar al Sierro, puntu nel que tendremos un acusáu descensu hacia Castru.
Fadrémoslo con calma, esfrutando de les enormes cabañes de la Braña Campizos, echando un vistazu a delles ruines nel nuesu caminar, hasta abandonar la baxada a Castru, siguiendo penriba'l pueblu, per camín bien guapu tamién, hacia Pineda, siempre baxo exemplares de milenta árboles de munchísimos años y ye que dende que salimos de la Malva, tol camín hasta Pineda ye una pasada y paezme dafechu encomendable esti PR de Castru, anque nós nun baxásemos hasta'l pueblu.
Entraremos en Pineda cruciando la riega homónima, pasando per dellos antiguos molinos y caleyaremos cuesta riba, pel pindiu pueblu, dando fama al so nome, peles caleyes hormigonaes saliendo a la parte alta onde siguiremos el cursu de la riega Pineda, nun tramu pelín más difícil de siguir, pa metemos en monte baxo que va dir llevándonos per siendes marcaes hacia l'Altu los Carabuetos, saliéndonos un pelín más alantre na Forcada.
El día nun acompaña pero la ruta ta siendo montuna y prestosa, teniendo la suerte de poder acolumbrar nun momentu tol valle de Trapa, quedándome con ganes de conocelu pa otra ocasión, ya que nos siguiremos pente la borrina, per tol cordal, hacia la collada Aguinu, echando tamién un güeyu al valle de Pineda, que tenía pensáu conocer, pero desistí al tener la sensación de valle xabaz y col borrín nun yera la meyor opción.
Continuaremos xerra alantre hacia la col.lada Aguinu, puntu onde podríemos tamién ascender al Altu Vildéu, que conocemos d'una guapa ruta va años dende Aguinu, pero nós entamaremos crestéu cenciellu con tramos de pisar cuarcita, encumando lo primeru el picu los Carbachinos, pa descender un pelín a lo postreru faciendo la xubida final a Altu La Mochada de 1503 m, oxetivu del día y llugar de descansu y xinta durante unos minutinos.
La verdá ye que-y tenía ganes a esti monte, sobretou por lleer dalgunes descripciones nel llibru de Victor "Orbayu" pero tamién, porque tuvimos viéndolo dende la nuesa ruta pela xerra Palombera y como non dende'l Vildéu, como ya comentara. El casu ye que quedamos coles ganes de tener vistes de tola redolada, pero hasta'l momentu, la ruta taba prestándonos muncho a tolos compañeros.
Magar del descansu, tornaremos so los nuesos pasos desviándonos enantes de los Carbachinos hacia l'arista Este de la Mochada, pela que baxaremos durante dellos metros pa dempués empobinanos hacia'l fayéu de Montrodiu, que sincerámente nun dexa indiferente, pudiendo esnalar pente les fueyes de los árboles ensin esmolecenos por siguir dengún senderu, namás que dexándonos cayer per esti espeutáculu de la ñatura.
Nun tengo munchu que comentar, ya que son momentos d'intentar sacar dalguna semeya curiosa y esfrutar simplemente de caleyar pela viesca atopádonos pequeños requexos increyiubles con bloques de caliza vieya, pente fayes enormes, texos escondíos y en xeneral un llugar, esti fayéu de Montrodiu, que bien paga la pena conocer y que ye una pena, como pudimos ver al aportar a la Braña Montrodiu, que ya tien pocu usu los praos averaos y pocu accesu en xeneral al monte, poro na parte baxa fue onde más tomáu lu alcontramos pa salir a los caminos hacia Aguinu.
Saldremos pembaxu de la braña Montrodiu y pasaremos per un llugar ablucante, ya que mirando les llínees de desnivel tamos nun pasu colgáu, con un muru brutal enriba nuesa y con otru pembaxu que cae a plombu hacia la riega d'Aguinu. Lo dicho, perguapu esti pasu, que ya va dir empobinándonos al pueblu d'Aguinu que conocemos perbien, de la ruta al Vildéu y pel que pasaremos enantes d'ascender per carretera hasta'l mirador d'Aguinu, onde tendremos vistes hacia Palombera al frente, hacia la Mochada de la que venimos y hacia la capital del conceyu somedanu, La Pola.
Dende equí, ya decidiéramos n'Aguinu nun buscar pasos raros hacia la Malva y baxamos per carretera cola calma hasta La Pola, siguiendo dempués carretera alantre hasta la La Malva, parándonos nel barrancu de la riega d'Aguinu, onde tenemos una guapa poza y un tabayón, confirmando que nun teníemos baxada cenciella pela riega, anque creyemos qu'a la manzorga de la riega tendríemos pasu hasta la Malva pembaxo d'un paredón que bien pudiera ser una gran escuela d'escalada.
En resume, ruta na que la meteo nun mos dexó esfrutar de les vistes, pero que'l percorríu de 18,5 km ye una delicia montañera, teniendo que superar un desnivel acumuláu de +/- 1190 m nun total de 7 hores, ganándonos con creces les cerveces de dempués na Pola.


No hay comentarios:
Publicar un comentario