2 d'Avientu de 2023
Finde raruno no meteorolóxicu, con muncha inestabilidá, poro buscamos rutes curties en ventanes de tiempu y siguir "tachando" vértices xeodésicos de conceyos asturianos. Nesti casu, tenía pendiente conocer el Cuitu Moros, como últimu vértice que quedábame del conceyu d'Ayer, un conceyu nel que tantes bones rutes tenemos feches.
Sicasí, lo averao al pueblu mineru de Morea, quiciabes nunca fizo mui atrautiva esta cume, asina que fue quedando nel tinteru hasta güei. Animosos como siempre, Benjamín y Carlos serán los collacios del grupu qu'apuntáronse al pateú, llueu del almuerzu de rigor en Morea.
Averámonos en coche hasta un aparcaderu nel barriu de la Conforcá, preparamos les mochiles, intentando calmar los nervios de Kíla y Ares y salimos caleyando teniendo que travesar un segundín la carretera que va pa Nembra y aína garraremos el camín del percorríu Les Fuentes, bien marcáu al entamu la pista, xunto a les cases de Vidayos.
En malpenes diez minutos, nos que cruciámonos con dellos pasiantes ayeranos pre-vermú, alcontraremos a la manzorga un cartelín qu'indícanos l'ascensión al Cuitu Moros, la que vamos tomar y descubrir un camín bien guapu, alcontrándonos muries y cabañes bien conservaes, sorprendiéndonos tando tan cerca d'un pueblu tan grande como Morea.
Vamos esfrutando del camín munchísimu, alcontrando dellos exemplares de castañales tremendes, que fueron a sobrevivir de milagru de los grandes incendios del final del branu. Tamién, tócanos xugar coles capes ya qu'a tramos pasamos friu, otros el camín ponse pindio sudando la gota y los menos, vien una ñube tirándonos un orbayu pa colar al pocu tiempu, en definitiva, día repunante enforma.
Saldremos de la viesca con cierta pena y entraremos a la parte alta del monte, ya con vexetación típica de felechu y cotoya baxa, pero sin dengún problema ya que'l senderu ta perbien marcáu, dando a entender qu'esta ascensión ye clásica entre los ayeranos y paezme que munchos corredores de monte, tamién desendolquen los sos entrenos pel Cuitu Moros.
Dexaremos de llau les antenes, asitiaes na fastera norte del cuitu y facemos el tramu final, baxo un orbayu insistente hasta aportar a los 716 m del Cuitu Moros, últimu vértice del conceyu ayerán que me quedaba y que nel intre, paecióme una ascensión guapa y sacante la vista de Morea, tenemos antes nós, los valles de los rigos Ayer y Nigru y el propiu cumal ye dafechu bien curiosu, sacante de mierdes de cruces, belenes, altares y demás hestories qu'a la xente-y da por poner nos montes.
El día tórnase gafu, asina qu'escapamos del cumal llueu de la semeya de rigor y continuaremos pel cordal del Mayaín, hasta los praos de la Yana Fernando, onde ya garramos una cómoda pista que va llevanos hasta Los Eros, onde ya tocará comer asfaltu y formigón pasando de barriu en barriu hasta'l Cabanón, onde empatamos col percorríu Les Fuentes.
Ya nel PR, siguiremos les sos marques pasando pelos llugares de Güertomuro, Pedreo, La Maraviya y Güeria onde ya empatamos col camín d'entamu d'ascensu al Cuitu Moros. Como yera d'esperar, tou esti entreteníu paséu, sedrá penriba'l riu Nigru, pudiendo observar un pocu'l desaniciu astur de les cuenques mineres onde malpenes un poques cases tan remocicaes de segunda vivienda y mui poques queden de vivienda habitual.
Nestos camientos, facemos el tramu final de Güeria hasta l'aparcaderu xustu enantes de que vuelva a llover fuerte cerrando esta ruta mañanera de 3 hores nes que ficimos un percorríu de 8,5 km con un desnivel +/- 420 m pa terminar conociendo este últimu vértice del conceyu ayerán que faltaba.
No hay comentarios:
Publicar un comentario