26 de Payares de 2023
Track: Tuña (Tinéu) - Fraxeirúa - L.lamas del Mouru (Cangas del Narcea) - Picu Canalón - El Payarón
Continuamos cola temporada del GM Xuan de la Borrina y como siguimos intentando recuperar dalgo la cadera, hai qu'andar buscando rutes non demasiáu dures, asina que tuve restolando posibles llugares nuevos a conocer y como non, tenemos al conceyu de Tinéu un pelín escaecíu y alcontré nel valle de Tuña, la fastera perfeuta pa dir de monte.
Fai dellos años, ya tuviéremos per ellí, pero siguiéramos valle alantre cola idega d'ascender al techu de Tinéu, Pena Filera, dende'l pueblín de L'Azorera, más alantre de Xinestaza, onde tuviemos oportunidá de cruciar la fana en vehículu, quedando un pocu alucionaos col fenómenu xeolóxicu del esbarrumbe de la pena la Fana.
Como siempre, el grupu anda siempre nel equilibriu total de xente y na mañana perdemos a tres miembros por diversos motivos, quedándos tres persones namás, anque por suerte, nuevos compañeros averáronse hasta Tuña, pa esfrutar una vegada más d'una ruta trazada a mapa dafechu, col envís d'ascender el picu'l Canalón, pero sobretou, cola idega de percorrer y conocer el valle del rigu Faxeirúa.
Sacaremos la semeya de salida, xunto al bustu del General Riego
ñacíu en Tuña y que puso fin al absolutismu monárquicu, entamando a
caleyar col himnu de Riego na mente, demientres vamos desdexando les
munches pistes marcaes de BTT, p'averanos hacia'l rigu Fraxeirúa, tomando
la so pista al pie d'una pequeña área recreativa.
Fadremos la primera parte del rigu pela mandrecha, hasta pocu más alantre de la mecedura cola riega L'Esperón onde pasaremos a la manzorga'l rigu, ensin abandonar esta vera tol restu'l camín. Siempre diremos per ampliu camín, destacando la belleza del valle, con viesca autóutonu de castañales y carbayu, anque veamos na parte alta los horrendos pinos de les reforestaciones d'antaño.
Siguiremos camín alantre, esfrutando de llugares de gran belleza, ya seya viendo los paredones de cuarcita de los Franxones o tramos nos que'l rigu baxa con gran fuercia, atopando dellos tabayones y saltos, hasta dar con un tramu bien guapu na mecedura de la riega'l Brañuelu. Nel intre, el camín desaparecerá y tiraremos de siendes menos transitaes, anque enantes podríemos desvianos per pista n'ascensu hacia'l Buxeiru y baxar de nuevu per pista hasta la ponte que va pasanos a la otra vera'l riu.
Nós bregaremos un pelín, alternando camín más marcáu, con siendes a la vera'l riu menos transitaes y dalgún tramu per caxes de canales d'agua, hasta aportar a un puntu del rigu onde deberíemos cruciar, pero'l nivel d'agua failo imposible, asina que salimos monte a traviés en pindiu ascensu hasta dar cola pista (casi autopista) que vien dende'l pueblu Tabladiel.lu.
Na pista quitamos ropa, ya que'l sol pega con fuercia y anque saliéramos a 5 graos de Tuña, nestes dos hores de travesía pel guapu rigu de Fraxeirúa, ya calecimos de sobra y quedamos tan a gustu col camín fechu, que lo que venga ya danos igual. Asina que pocu impórtanos caleyar per pistona, n'ascensu, pente restos de feos pinares, sicasí vemos como carbayos y fayes van recuperando tarrén, dando vista na parte alta del camín al siguiente oxetivu como ye'l pueblu de L.lamas del Mouru.
Col últimu tramu asfaltáu al xuntase la pista a una carretera que vien dende Tuña, aportaremos a L.lamas del Mouru, perconocíu pola so Cerámica Prieta y pol palaciu de los Sierra, parando media horina a vistar el palaciu y xintar dalgo, enantes de siguir camín pel barriu del Mouru, hasta las Penas del Capellán, onde alcuéntrense dellos túmulos funerarios y l'entamu nuesu al oxetivu montuno del día: Las Penas del Canalón.
Llueu d'echar un vistazu a los túmulos, onde pocu hai que rascar, garraremos la enorme y pelín cansina llomba que tien de llevanos penriba'l Cerráu hasta'l puntu más altu de las Penas del Canalón de 946 m, onde asítitase'l vértice xeodésicu y tendremos un bon mirador de la xerra Manteiga a un llau y al otru de la capital del conceyu de Tinéu cola so xerra enriba y el so puntu más altu, las Penas del Miru'l Touru, qu'entá tengo pendiente como monte cimeru asturianu.
La verdá ye que tenemos gran necesidá de movemos más per estos llares porque cuéstanos distinguir montes del suroccidente. Llevamos 4 hores de patéu y el pinchín ficímoslu en L.lamas del Mouru, asina qu'entamamos descensu per pista a tramos y otros per cortafueos, hasta un puntu onde liámonos ya que taba dalgo tomáu el camín y metímonos una vegada más a l'aventura per un guapu fayéu, alcontrando sienda hasta salir al col.láu el Pardiel.lu, onde facemos un pequeñu ascensu hasta'l Payarón (717 m).
Del Payarón, descenderemos per cortafueos hasta la pista-carretera que vien dende la Silva, percorriendo'l valle de Santianes y al final de la pista tendremos la posibilidá de siguir la pista aportando a Tuña per Castañéu o echanos unes rises siguiendo de frente, garrando'l circuitu de descensu de BTT, esfrutando de los saltos, trialeres y curves peraltaes peles que baxen estos alloriaos.
Dicir que nun ye cenciello, qu'hai tramos nos qu'hai qu'aidase de los árboles pa destrepar dellos saltos, ya que la pendiente ye xabaz en munchos de los tramos, pero bono, entramos a echar unes rises y la verdá que fue un final mui divertíu pa completar esta ruta de 15,7 km de percorríu, con +/- 785 m de desnivel acumuláu que fuimos a completar nun total de 6 hores.
No hay comentarios:
Publicar un comentario