28 de Xineru de 2024
Track: L.levinco (Ayer) - Xerra de Pel.luno
Otru día d'esti iviernu atípicu ensin ñeve, anque albidro que va ser la tónica nos años que queden per delantre. Asina que decidimos dir a cotes baxes, porque pa pisar la tristura nos altos, preferimos tocar caliza y trepar un pocu, asina que viniéronseme a la tiesta, esos guapos cumales penriba de la escuela d'escalada de Pel.luno.
Vamos xuntanos un bon garrapiellu xente, con primer ruta col grupu de Carlos, que vien col so perrín Nico y tamién de Maite, qu'acompaña a Carla, que facía munchu tiempu que nun venía col grupu. D'esti xeitu, vamos facer la decena de persones col restu xente más avezada a venir con nós de monte.
Quedaremos toos nel pueblu ayerán de L.levinco, onde almorzaremos nel chigre y dexaremos los coches, pa preparanos y entamar a caleyar peles cais del pueblín hacia la parte alta, pudiendo travesar peles cais o xubir un pelín pela carretera en direición a la cantera y ya garrar una pista a la manzorga que déxenos nos praos de la Pandiel.la.
Na Pandiel.la tocará tirar de pata y calecer músculos ascendiendo per pindiu camín hasta atopar col cruce pa la sienda'l Reguerón, onde despedímonos d'un paisanu de L.levinco qu'acompañónos charrando un ratín, pa siguir pela guapa sienda armada, que va facenos entrar nel preciosu valle del Reguerón pente les peñes de Traveséu y Castru, pasando peles cabañes de L'Esprón hasta la fonte la Guariza.
Dende la fonte, camudamos el sen hacia la mandrecha pa xubir per una vallina hacia la Yana'l Navalcol.léu, un guapu mayáu baxo los verticales parés de la Peña'l Castru. Pali, pali, diremos aportando tol grupu hasta la Yana y vamos ser cuatru alloriaos los que vamos bregar cola broza p'ascender hasta esta peña de 995 m.
La verdá ye que la fastera qu'escoyimos pa xubir a esta peña nun ye la más afayaiza y diría que dende'l barriu Cima de Pel.luno, tenemos una preciosidá de camín armáu, que baxo'l guapu L'Ercu La Vieya, fadríanos entrar pela fastera suroeste de la peña, munchu más amable en cuanto yerba y peña y non, pente escayos y rosales silvestres que nos amargaron l'ascensión.
Con una bona escayada enriba, descendemos a Navalcol.léu y vamos axuntanos al grupu pelín enriba del mayáu de la Guariza pa garrar un bon senderu hacia la xerra, non sin antes despedinos de Benjamín, que nun ta mui allá físicamente y va desviase hacia Palmayín pa descender a L.levinco. Nós, diremos ganando altor per un senderu pente la peña, hasta algamar el crestéu final hacia'l Piquín de la Mota (1215 m).
Na primera forcadina pre-crestéu final, tendremos al fin, vistes de la enorme muria de la Penamea, así como de tolos montes que faen llende pente Ayer, Llaviana y Sobrescobiu (Penes Negres, Forcá, Colladina, Cuchu, Aberrugues...). Tamién, pondrémonos en marcha crestéu alantre, pudiendo esfrutar d'una divertida ascensión hasta esos 1215 m del Piquín de la Mota.
Una vegada qu'ascendemos al Piquín de la Mota y viendo lo resquiebráu de la cresta, dellos collacios que van con perros, deciden descender a la faldera la xerra y el restu, siguiremos divirtiéndonos trepando y destrepando per tola crestería, con dalgún pasín dalgo espuesto, pero siempre con cierta proteición y con posibilidá de separase del vacíu hacia la col.lada Pel.luno.
Terminaremos la crestería del Piquín de la Mota, teniendo una baxadina hacia la col.lada Pel.luno, alcontrándonos con marques marielles de percorríuo nel pasu la Mozqueta, que va devolvenos de nuevu hacia'l calizu, faciendo ascensión pente pequeños trepes hacia'l picu Formosu, puntu de más altor del día colos sos 1274 m.
Fadremos semeya de rigor y descenderemos per tarrén cenciellu hasta la siguiente collada, onde tan esperándonos el restu del grupu y aprovechamos el solín pa descansar de les 4 hores de ruta, parando a xintar y charrando con tola calma al abellugu d'un paré, que quítanos del vientu molestu que llevamos sofriendo tol día.
Llueu de la xinta, siguiremos ya en descensu hacia la Vega Llau, desviándonos unos pocos hasta un cumal norte del Formosu, faciendo una trepada direuta al cumal Rubén y yo, pa baxar dempués pela arista hacia l'oeste, onde ya empatamos senderu con Pepa y Mario y siguimos en descensu hacia Espina, xuntándonos al fin tol grupu que llegara hasta la Vega Llau.
Con un alderique relaxáu, diremos descendiendo per Fresnucu, Vaúes, Truncu, echando una güeyada a les cabañes unes en meyor estáu qu'otres y parando en dalguna fonte a beber como la de Foyaneza, hasta dexar la pista que baxa a Escuyu, tomando'l desvíu a la manzorga, hacia la col.lá Pandu, onde voi dexar a los collacios siguir hacia L.levinco, mientres baxo a conocer el camín que baxa hacia'l pueblu de Vega.
Primeru per senderu pegáu a un prau y llueu descendiendo per una guapa viesca, onde saco ensin querer a dellos venaos vamos aportar a la riega de Foyaneza que va llevanos hasta'l pueblu de Vega, onde conozo'l so preciosu palaciu, enantes de tomar la pista que sal hacia'l cementeriu ya que nun paséu tranquilu penriba la carretera va llevame a la fin hacia L.levinco.
En resume, guapa ruta mui completa con guapos caminos, brañes y mayaos amestáu a cumales y crestes calices con trepes y dalgo d'aventura, como non con vistes de los más guapos montes ayeranos, nun total de 12.5 km, con un desnivel acumuláu de +/-910 m nun total de 6 hores y media de ruta bien entretenida.
No hay comentarios:
Publicar un comentario