Pel.luno (Ayer)

13 de Xineru de 2024

Dempués de la visita a Oceano sin Límite nel primer día del 2024, dimos una vuelta de tuerca y decidimos conocer dalguno de los seutores nuevos qu'apaecen na guía de Roca Verde, viendo'l seutor de L'Ercu la Vieya, con una imaxen positiva, por mor de la variedá de graos, pa un día na que la meteo diba tar un pelín repunante, así que rodar diba veninos bien a tol grupu.

 

Camín guapu y tranquilu hacia L'Ercu la Vieya

P'allá que nos fuimos entós, aparcando esta vegada nel Barrio Cima de Pel.luno, baxo les indicaciones d'un amable vecín que cuéntanos delles hestories, sola nueva masificación montañera que sufren y al pocu de caleyar con tolos trastos ya vamos equivacaos y otra vecina entrúganos pa onde vamos y empobinanos correutamente con una amabilidá, que sorpréndenos, namorándonos esti pueblu y la so xente.

 

Revisamos vía a vía tol pié de vía de L'Ercu la Vieya

Esfrutaremos del patéu hacia L'Ercu La Vieya con una parte final preciosa de camín empedráu que saldría hacia la Peña'l Castro. Nós, xustu enantes de les últimes envueltes salímonos a la mandrecha, viendo los primeros bordillos equipaos, quedando un pelín ablucaos, pol seutor qu'escoyimos pa pasar el día, nun teniendo claro si gastariemos chapes dengún de nosotros nesos bordillos.

 

Damos unos peguinos pente ñube y ñube cayendo cuatru gotes

Daremos un vistazu a tol seutor, yendo hasta L'Ercu, interesándonos poles víes más llargues, nun teniendo mala pinta dos 6bs llargos dalgo apartaos, echando una güeyada a un 7a a la mandrecha llarguísimu, que direutamente desesperanzónos pa col seutor en xeneral, pola mala pinta de la roca, asina que volvimos a les víes centrales, onde más cómodu yera'l pie de vía y decidimos dar unos peguinos por pasar el día, pero desencantaos pa col seutor.

 

Les vistes dende'l seutor lo meyor ensin dubia

Al final ficimos unes tres víes, pente ñube y ñube que tiraba dalgu d'orbayu, faciendo un 6a+ (Calcetu Solís) bastante feete y con dalgún pire innecesariu y llueu ameyoraron les de la manzorga, con meyor roca, paecíendonos 6b (Calcetu de Yamba (6c nos croquis)), más guapa saliéndose hacia Lluna d'Ochobre, pa nun facer un pasu ranciu del 6a+ y pa terminar Lluna d'Ochobre, que si pudiera rondar el 6b+ pero bastante suave, eso sí mui guapa.

En resume, seutor bastante malo, con poca continuidá de roca, bordillos y en xeneral un pañu non mui afayaizu, que nun pasaba na si quedaba ensin equipar, viendo los murazos qu'hai más altos a la mandrecha, nes muries que cierren los praos de Pel.luno en direición a la collada.

-----------------------------------------------------------------------------------------------------------------

31 d'Avientu de 2023

Pues más de 6 años que nun me pasaba por Pel.luno, pero como tamos echando un gabitu a Lau y Suco, pa que puedan esguilar colos neños, tamos averándonos los últimos tiempos a seutores onde nun haya munchu patéu y seyan cómodos a la hora de trepar y de tar nel pié de vía, asina que con un día de vientu gafu, decidimos dir hasta Pel.luno p'abelluganos nel seutor de Oceano Sin Límite, baxo los sos parés.

 

Vistes de los montes d'Ayer peláu de ñeve a fin d'añu

L'aciertu fue plenu y pasamos un día de nuechevieya bien guapu, relaxaos al sol y probando un par de víes ya que yéremos cuatru y ye'l pior de los númberos, turnándonos col bebé como más o menos podíemos y aprovechando que Sandra nun conocía la escuela, metímos-y nel marrón de montar Sex Museum (6b) pa que Lau pudiese dar un par de pegues en polea.

 

Sandra apretando en toles víes que probó ya fuera 6b o 7a jeje

Dempués del pegue de Sandra al 6b nel qu'allorió cola dureza, metíme yo a montar Pirómanos (7a), que nun la tenía ya que rompiérame una presa, va años, cayendo y entramos a ver si salía poniendo cintes, redescubriendo la so placa inicial, guapísima nun teniendo na que ver con Sex Museum y pringándola perdiendo l'equilibriu nun pasu tuntu, llueu d'un chapaxe cardiacu na cuarta.

 

Maia esguilando fino pelos sestos de Oceano sin Límite

Terminé montándola, volviendo a esfrutar de lo divertía y variada que ye esta vía, metiéndose dempués, tanto Suco como Sandra, turnándonos el restu del curtiu día, dándo-y un gran segundu pegue Sandra cayendo nel últimu movimientu y faciéndola yo, al segundu, nun pegue mui disfrutáu, anque apretando na parte final a dicir verdá.

Vista del muru cimeru de la escuela de Pel.luno

Tamos nel últimu día del añu y pa cuando metióse'l sol tres de la paré, la temperatura nun yera pa siguir pel seutor, asina que tuvimos un pegue últimu de Lau, qu'encadenó en polea Sex Museum con muncha llucha y desmontamos lo más aína posible tol chiringuitu pa baxar hasta L.levinco al chigre, onde pudimos brindar pol fin d'añu.

-----------------------------------------------------------------------------------------------------------------

7 d'Avientu de 2017

De güei nun añu... eso paez que faigo con dalgunes escueles. Paez imposible, pero si póngome a repasar los llugares nos que tuve esguilando, actualizo entraes del blog, miro les feches y alcuéntrome con que casi xustu un añu que nun paso per esta escuela.

La escalada?... como siempre, dura como un cuernu, pero les vistes increyibles y esti añu, que la ñeve venía dende bien ceo, los montes ayeranos taben preciosos. Nun ye una escuela que me preste muncho, por mor de lo bloqueru del entamu de les víes, pero'l paisaxe namora.

Pocu más que dicir... la escuela con meyores vistes nel centru d'Asturies

No deportivo, como siempre, dedicámonos a facer unes cuantes víes ensín mayores oxetivos que facer unos metrinos dempués d'unos cuantos díes de mal tiempu. Entamamos por Sex Laura (6a+) y la so variante (6b) pa dir metiéndonos en materia.

Día de munchu fríu pero al sol aguantábase bien

Llueu, siguimos con Olor natural (6b), siempre echando un vistazu a la manzorga, onde alcuéntrase'l Desplumadero, un 7a+ que tengo pendiente de probar y con bona pinta y a lo cabero encadenamos tamién Soplanucas, un 6c bastante perrete.

Al final, fue un bon día, sacando toles víes a vista y quedando con bon tastu na boca, poro, abriguéme y dediquéme a facer semeyes y ver trepar a los compañeros. Dacuando, una retirada a tiempu, ye una victoria.

Pel.luno
Croquis modificaos por mi de la escuela d'escalada de Pel.luno, por mor de Piratas Free. Gracies y col so permisu.

-----------------------------------------------------------------------------------------------------------------

5, 10 d'Avientu de 2016

Andamos pela puente d'Avientu d'escuela en escuela, con un tiempu que mete mieu y un par de díes decidimos tirar pa la fastera ayerana y pa la so escuela más conocía: Pel.luno. Toles vegaes qu'anduviera esguilando nella tuviera pa los Bloques y ya diba siendo hora de dir al paré cimeru.

Dende'l pueblu vese aina qu'aquello tien de ser una llocura por mor de la cantidá de víes equipaes y por dalgo-y llamen Oceano Sin Límite al seutor más baxo, porque abarca tola estensión de la muria que lo mesmu llega hasta los 400 m de llargura.

Ablucante'l seutor principal de Pel.luno

El primer día xuntámonos Haritz, Marie y yo, a los que súmense Vicen, Conchi y Celso que nun veía cuantayá, por mor d'una llesión de rodiella del guah.e esquiando, de la que ta totalmente recuperáu, pero vaya mala suerte a esa edá, con toles coses guapes que dómina: esquí, surf, escalada...

Entamamos polos quintinos de la manzorga y alcuéntrome qu'hai una reunión robada en Paradise, así qu'apúntome a la llibreta pa mercar material. Dicir qu'estes cosines, nun son gratis, la xente-yos pon del so dineru na mayoría los casos, asína que nun seáis tan fios de puta y respetái lo que ye pal bien de toos.

Marie apretando y yo con cuidadín col pié... nun vaya fadiame más

Equí hasta los quintinos son duros y ye qu'hai qu'apretar en toes, colo que mui cómodu nun toi col dolor del pié, asína que toca tomalo con calma y trepar lo que se pueda pero sin forzar. Vicen y Haritz, van sacando lo que-yos dexa la cabeza y el físicu y Marie va a su bola mientres l'aseguramos.

La máquina alemana, mira la llibreta, escueye, apunta y dispara, enchufando tolo que se-y pon per delantre. Da gusto vela trepar, con un grau tan asentáu, col que métese ensin mieu no que considera que debería sacar a vista y así lo fai con 6b+, 6c y siempre apretando y siempre motivada... un placer.

Reencuentru con Vicen y Marie a lo suyo... vaya titana

Al día siguiente, vamos preparaos más pa trabayar que pa trepar y dempués de tar tamién en Oceano Sin Límite, esguilando un par de quintinos, punxímonos a montar una reunión del V defenestráu per dalgún anormal.

Kíla esfrutando del paisaxe

Perdimos más tiempu que la hostia, porque nun había manera roscar bien el bolt, pero al final, fuimos a ello, a guelpe de maza (piedra) hasta que'l bolt esistente garró la rosca y apretó en condiciones la nueva chapa con argoya.

Nes vies cencielles de Oceano Sin Límite

Llueu disfrutamos d'unos cuantos 6a+, dalguno mui, mui potente y prestosu como Truhán y otros pelín más gafos, con pasos llargos de placa nos qu'hai qu'andar finu de pies. Fadríemos otres tres víes, quedando con ganes de meteme en graos más apretones porque la pinta de les víes son brutales, pero el pié nun me daba pa más... apoyos duros y sufrir dolor.

Xintáremos con calma y decidimos xubir a acabar el trabayu, hasta'l seutor Janis, que yo nun conocía y que dalguien marchara tamién con una reunión que facía imposible d'escalar tres víes de 6a. Paez ser que siempre-yos da por robar nos graos facilinos... ya podíen andar quitando descuelgues nos octavos.

Seutor Janis... guapu, guapu tamién

En fin, magar de trepar la vía con too colgando, reunión, llave y demás, a pesar del pasu bloqueru, aportamos a la reu y pudimos trabayar cola calma y dexar una reunión de cadena con argoya estupenda, pal usu y disfrute de tol mundiu y del mió bolsiellu... asína que nun vos pille robando perende que lo mesmu zampáis la llave del 10.

Hala... a trepar y a respetar

-----------------------------------------------------------------------------------------------------------------

10 d'Ochobre de 2016

Día de vacas nel que Richar, Zori y yo recoyemos a Marie, un compi alemana que nos últimos tiempos apúntase a un bombardéu con nós y tiramos pa Pel.luno a asoleyar un pelín. El resultáu pues nun pudo ser meyor, delles víes repeties con cierta facilidá nun de los bloques de Pel.luno y finar el trabayu.

Cual yera, pues dexar equipada un reunión pa que pudiérense facer curiosino un 6b (Show Blues) y la so collacia de la mandrecha (6a) a la que tamién-y faltaba una primer chapa que tamién ta repuesta, asína qu'a disfrutalo y a nun tocar los coyones robando material, hostia!!!

2 de Xunu de 2016

Entamaba casi'l branu y vien esi horariu de branu tan naguáu por mí que déxame na dimposición de poder esguilar peles tardes y dame un nivel de felicidá perimportante. Ye a la escontra del mes d'Ochobre nel que saliendo más tarde del tayu y la lluz escapándose adulces día tres días... voi amurniándome hacia l'iviernu ensín remediu.

Aún así, préstame facer alcordanza d'aquellos díes nos que salía corriendo del trabayu y quedaba con Richar, nesti casu en Morea, onde taba trabayando él. D'esti xeitu, ún de los díes averámonos hasta Pel.lunos, ún de les escueles más guapes d'Asturies.

Hai que dicir que tovía nun m'arimé a los seutores principales y siempre tuve arrequexáu nos bloques, onde nunca hai naide. Que sé yo, maníes d'ún. Préstame esguilar tranquilu y en solitariu y siempre acabo nos escueles menos conocíes faciendo lo que me peta.

Contábemos con volver más d'un día, pero al segundu que pasamos per ellí, punxose a tronar y nun pudimos facer namás que colar d'ellí lo antes posible. Amás tenía mercáu, un par d'argoyes pa igüar un descuelgue y dalguna chapa robada que taba fadiando una vía bien curiosa.

No deportivu, pues aquel día, entre que Richar ficiese unes cuantes víes pa conocer aquello y que tampoco teníemos tol tiempu del mundiu entamando a trepar sobre les 6, pues fice un 6b mui guapu (Show Blues) y un 6a bastante cabrón nel bloque D.

Tamién probé Tormenta Pasajera, un 6c estrañísimu, con cortes na roca en toles direiciones nel que cuesta movese munchísimu. Nun fuí a encadenalu, pero prestóme muncho y quedé con ganes de tornar per ellí pa volver a intentalo.

La próxima vegada más...

-----------------------------------------------------------------------------------------------------------------

16 de Mayu de 2015
 
Facía tiempu que nun veníemos hasta Pel.luno a esguilar, ya que de monte tuviéramos va bien poco. Nos últimos tiempos, andamos buscando sitios onde'l pié de vía, seya cómodu pa que Darío pueda tar a sus anchas penriba les colchonetes y que meyor que los bloques de Pel.luno pa ello.

Asina que vamos hasta ellí, colocándonos como siempre nel pié de vía de los bloques más visitaos, qu'anque taba la yerba llargo, el sitiu sigue siendo inmeyorable p'acampar tranquilamente y esguilar con tranquilidá.

Probando los cuartos-quintos de los bloques de Pel.luno

Dende que fuéramos la primer vegada, volvimos a dá-y con calma a esos cuartos, que nos últimos croquis sacaos en dellos llibros ya vienen toos de V o V+ sinon toi equivocáu. Veólo más axustáu a la rialidá y dificultá de les dos víes en cuestión.

D'esta mena, Pau y Sonia fueron a faceles en polea y Gus magar d'un pegue de prueba apretó sacándoles de primeru ensin mayores problemes. Yo dediqueme a descansar, tomar el sol y llueu saqué los trastos d'equipar que por suerte tenía per ellí y metíme nun 6a a la mandrecha del bloque que tenía ensín probar ya que faltaba la primer chapa.

Cola chapa puesta por mí, llave en manu, fice tola vía a vista, esfrutándola ya que ye bien guapa, con pasinos de ñapeo y la parte cimera más de fuerza hasta salir a la reunión, la cual ta como non, desapaecía, robada de xuru... teniendo que fiame d'una chapa namás pa facer travesía hasta la siguiente reunión a la manzorga.

Dos nuevos 6a y 6a+ a vista pal bolsiellu... ambos mui buenos

Son coses que nunca entenderé, cual ye'l motivu de que gustándote la escalada, dedíqueste a desmontar y robar reuniones, chapes... poniendo en peligru al restu de la comunidá escaladora. El casu ye que diba dexar la primer chapa pal restu'l mundiu, pero viendo que taba ensin reunión decidí que na próxima visita diría con dos chapes con argoya pa dexar al menos reunión y la primer chapa montada tamién.

Pa completar el día, enantes de colar a tomar unes cerveces al pueblu, fice a vista tamién el 6a+ d'esti bloque... mui mui guapu, nel que tuve qu'apretar en dalgun pasín, pero ensin escesos. Con esta vía, namái que quédame'l 6b qu'aprovechando la siguiente visita pa dexar dalgo de material nestos bloques, meteré-y un tientu col envís d'encadenalo tamién.


Pel.luno
Croquis modificaos por mi de la escuela d'escalada de Pel.luno, por mor de Piratas Free. Gracies y col so permisu.

-----------------------------------------------------------------------------------------------------------------

2 de Marzu de 2013

Segundu día en Pel.luno, venimos dafechu picaos con esta escuela, poro les ganes d'apretar son abondes. Acompáñenmos Rebe y Pangua, que tienen ganes d'esparcer tamién y como-yos díximos que'l sitiu ye bien guapu allá que xúnense.

Faciendo un 6a a vista ñaperu enforma

Llegamos pelín tarde a Pel.luno y otra vegada que vamos dir a los bloques, ya que paez ser que quedáronmos unes cuentes pendientes. Lo primeru dempués calecer deos nos IV's y que Pangua comprobase tamién, que vaya tela colos cuartos, foi dir a pol 6a de la mandrecha d'estos, "Huye de Mí".

Pangua metíendo-y un pegue cola cuerda penriba

La verdá ye que metime a él, con pocu xeitu de facelu a vista, asína que fui chapa a chapa pela vía, tomándomelo con más calma de lo normal en mí. Finalmente, pocu a pocu, acabamos chapando la cadena y quedándome un tastu a vía, guapa, guapa, de ñapes y d'usar bien los pies p'algamala.

Y Kíla y Rebe esfrutando del día estupendo que facía

Tanto foi así, que díxe-yos a Pangua y Pau, que probásenla cola cuerda penriba, esfrutando tamién ellos de la vía y aportando hasta la cadena, con dalgún descansín qu'otru. La verdá, ye que foi'l día de facer intentos en top rope, ya que dempués de xintar, tanto Pangua como Pau, diben meté-y a los IV's de primeru pero vino xente a esguilar y cedímos-yos les víes, ya que dalgunos diben ponese un arnés per primer vegada.

Pau apretando duru nel 6a y aportando a la cadena en toprope

Asína que con pocu más, que tar tiraos tomando'l sol, xugando con Kíla y esfrutando del paisaxe, púseme a echar un vistazu víes d'otros bloques desechando delles, por tar equipaos con spits, faltá-yos chapes y direutamente tar dafechu por reequipar.

Kíla esfrutando del paisaxe

De les que podíen facese, metime n'otru 6a al llau de Visita inesperada que ficiera l'otru día y como ya dixe, viniendo con ganes d'apretar, suelen salir a vista, estes víes tipu salida d'un techu y placa dempués. Eso sí, estos dos 6a's del bloque A, tienen dos parabolts pal techu y llueu, hasta la reunión, hai un par d'espits que paecen tener pocu tiempu y sumáu a lo fácil del restu la vía, paguen la pena d'apretar nelles.

Dándo-y a un 6a a vista con salida d'un techu y placa cenciella pa finar

Nun quisieron quedase atrás, Pau y Pangua y tuvieron prebando la salida unes cuantes vegaes, hasta que decidimos que yera hora de baxar a tomar unes mahous y ver un pocu'l Barça-Mandril, anque tábase meyor na terraza viendo'l partíu... poro más bien de poco enterámosnos.

Pangua y Pau a la preba'l mesmu 6a

La próxima más... y meyor espero.

-----------------------------------------------------------------------------------------------------------------

 
Hestoria na escuela de Pel.luno

La hestoria nuesa nesta escuela ye bien reciente, de Febreru de 2013. Va bien pocu que mercara'l nuevu llibru d'Escalada n'Asturies y restolando pente les munchísimes escueles que nun conocemos, non por nun tener ganes de conoceles, sinon por nun tener grau nin p'arrimanos per ellí, jeje, topámonos con Pel.luno.

Vistes dende Pel.luno de la Forcá y el Cuchu

Realmente, ya la conocíemos, pero por dalgún motivu nunca nun fuimos per ellí y eso que nun ta más lloñe de Xixón qu'otres como'l L.lano en Quirós. Lo dicho, restolando pel llibru, vimos que yera una escuela grandísima y que tenía hasta IV's y V's.

Xustu lo que necesitábemos pa dempués d'unos mesinos ensín tocar roca. Y ye que nun ye lo mesmu, tar dándo-y tol día nel roco Llugones, que metese na paré y nun ser a atopar dengún agarre afayaizu pa siguir esguilando, ya que toos paecen malos. 

Preparándonos pa facer les primeres víes

Pues na, tiramos p'allá cola perrina y vamos a facer víes como llocos. Salimos de Xixón, pela minera alantre, pa siguir pela As-66 hasta Mieres del Camín y en direición L.lena, salímonos pal corredor del Ayer pa percorrer la As 112, pasando polos siguientes pueblos nel nuesu camín: Morea, L'Escuyu, Los Estrul.lones y Cabanaquinta, onde tomaremos la carreterina que xube al pueblu de Pel.luno.

El pueblu ye una auténtica pasada. Ta nun de los llugares más prestosos d'Asturies, na faldera Peña Mea, con vistes a la Forcá y Cuchu al oriente, hacia montes más baxos d'Ayer (Renorios y Altu La Teyera al suroeste) y si siguimos la mirada valle alantre, les últimes muries serán la fastera del Nogales, dafechu ñevada nesta dómina l'añu.

Sector principal dende los bloques

Aparcamos delantre'l chigre'l pueblu y al pocu de xubir per una carretera ya vemos toles muries del seutor principal, que cayen dende la Peña Castru. La verdá ye que'l sitiu ye perguapu, pero nós tenemos intención de dir a otra fastera nomada como los Bloques, que tan a 10 minutinos del pueblu a lo más.

Los bloques son unes peñones, que salen d'enmediu la carretera que va pal Barrocima de Pel.luno y aportamos a ellos, pasando al travíes d'un par de portielles per una sienda. Alcordáivos de dexar tou bien llimpiu, piesllar les portielles y esfrutar d'un pie de vía como pocos nos que tuvimos.

Echando un vistazu a les víes demientres Kíla descansa

Y eso foi lo que ficimos, esfrutar del pie de vía, ya que les víes diéronmos una fostia a man abierta. Tuviemos prebando los dos IV+ y si tas avezáu a la graduación d'Otura o'l propiu L.lano, pues llevate una bona sorpresa.

Lo meyor, ye amestá-y mediu gradín más a la cotación de los croquis y asína nun lleves sorpreses y sobretou venir con enfotu y ganes d'apretar si quies encadenar dalguna vía. Al final, aparte d'estos dos IV+? a vista nel bloque B, salieron un V+ n'otru bloque a la manzorga (D) del "d'iniciación" al que tuve que meté-y dos pegues... manda coyones y tamién, nel bloque A, cayó un 6a (Visita inesperada) a la segunda tamién... lo que ye nun tener la tiesta motivada.

Kíla pente gatos y cuerdes

Polo demás, Pau, alcontróse con una escuela a la qu'hai que venir con toles ganes del mundiu pa sacar dalgo y tamién con tola confianza pa dir primera, cosa qu'últimamente a pesar de tar más fuerte que nunca ta costándo-y de facer. 

Hai que dicir, que los IV's tienen unos entamos que dexen garrar confianza nula, poro toca siguir entrenando y faciéndose poquin a pocu coles víes d'esta escuela tan increyible, qu'anque nun seyamos a facer tolo que nos prestaría, al menos dános un llugar nel que pasar el día de luxu.

Escuela de Pel.luno dende'l pueblu

Asína ye que dempués, d'apretar y conocer la escuela, baxamos a tomar unes cerveces nel chigre'l pueblu y eses si qu'entren na terraza fácil, fácil y non como les víes, jeje.