21 de Xineru de 2024
Track: Altu'l Mazucu (Llanes) - Llosa Biango - Picu La Valleya - Las Camperas
Cuantayá tenía pendiente conocer la Llosa Biango, pero fueron pasando los años, fuimos conociendo munchos requexos de Cuera, faciendo toles cotes más importantes (Peñeblanca, Torbina, Lliñu...) pero col pasu'l tiempu escaecimos esti valle asitiáu pente Cuera y una especie de precordal nomáu polos llaniscos como'l Risque.
Tenía idega pal finde d'averame hasta la Babia a conocer nuevos montes, pero les insufribles temperatures baxo cero hasta'l mediudía, facía pelín peligrosu conducir hasta Llión y aprovechando que tenía preparada la ruta a Biango y col día perfríu pero soleyeru y guapísimu fuimos hasta'l valle de Caldueñu aportando al Altu'l Mazucu pelín pasaes les diez de la mañana.
Aparcamos el coche y abrigámonos enforma, pa salir per pista formigonada hacia la solombra'l Cuera, sofriendo un fríu que nin caleyando cuesta riba somos a quitar hasta qu'aportamos al colláu Rubiera, onde esfrutaremos d'un pelín de sol y na Pasada, garraremos un prestosu senderu a media faldera, qu'empobinarános a conocer tol valle Biango.
El valle ye guapísimu, vemos cabañes y praos en bon estáu perende ya seya pa Los Corros, como les del Valle Altu, pero les temperatures baxo cero, faen que nun apeteza muncho averase a conocer brañes, así que siguiremos esti camín empedráu preciosu, que nun descensu sele, va dir averándonos hacia la Llosa Biango.
Continuaremos camín, a tramos al sol, a tramos a la solombra, lo que fai que temos tol tiempu quitando y poniendo ropa, baxando un pelín hacia'l fondu'l valle, travesando llugares bien guapos pente cabañes y árboles col verdor del mofu y senderos que percuerren al llau de les muries de praos bien cuidaos.
Fadremos el tramu final hacia la Llosa y agora sí, entramos na enorme vega Biango y cuando digo enorme, ye porque nun conozo otra vega d'estes dimensiones, viniéndome a la tiesta, Camayor en Somiedu o Comeya en Picos, pero nesti día xelaú, paez qu'entramos na estepa siberiana, pudiendo esfrutrar d'un paséu penriba de la yerba xelada, los rigos xelaos, les llagunes xelaes.... quedando ablucaos col paisaxe.
Pesie al fríu intensu, pasiamos alloriaos col llugar, restolando pente los pequeños h.oos, una entrada al verdaderu sumideru nel que desapaez casi tol agua, hasta la xurdidera 4 kms alantre nel ñacimientu de la riega'l Bolugu, alcontrándolo al par d'un árbol que sobrevive pente kilos d'arena, que la riega espulsa dende les profundidaes cuando'l caudal d'agua supera a les cavidaes de la fondura.
Nós entraremos colos frontales un ratín pela cueva d'entrada , pudiendo escuchar a lo fondo la corriente'l rigu somorgiáu, impresionando bastante a dicir verdá, asína que viendo lo arenoso del tarrén nun quisimos baxar más y necesitábemos volver a sentir el calor del sol en partes del cuerpu, asina que salimos de la cueva y cruciamos tola vegona xelada hasta atopar el maraviyosu solín xunto a unos caballos que pastien tranquilamente.
Dende equí, quitaremos delles capes de ropa, al par de la entrada les cabañes de les Picoretes y diremos restolando senderu pela pindia vallina que tien de sacanos a la fastera Los Collaos. Por suerte, nun tenemos munchos problemes y diremos de claro en claro, ganándo-y tarrén a la vallina ensin escayanos muncho hasta la collada más amplia, con bebederu pa los caballos onde entramos ya nel típicu tarrén calizu del Cuera.
Como bonos conocedores d'estos tarrenes, nun debemos dexar de llau, los posibles y claro senderos que faen los animales, poro dende'l colláu garraremos sienda en direición oeste y siguirémosla ensin problemes, pasando per una primer cota ensin nome, p'averanos de secute hasta'l cumal del picu Saldelapiedra (726 m), que tenía un accesu cómodu, pero como su nome diz, un cumal pelín incómodu jeje.
Saldremos de la piedra y cláramente vamos empobinanos al cumal más altu del Risque, esti pre-Cuera nel que nos alcontramos, faciendo un descensu per senderu hasta'l valle, per onde pasa'l Camín a Biango, faciendo l'ascensu siempre per tarrén de yerba y caliza, encumando'l Picu La Valleya (762 m) y ganando unes increyibles vistes de tola costa llanisca.
Agora sí, vamos tomanos con calma'l día, esfrutando de xintar al sol, de les vistes a la xelada Llosa Biango, del Cuera Occidental cola Pica Torbina enfrente y sobretou de la mar Cantábrica, intentando aldovinar que pueblos tamos viendo, ya que somos pocu costeros, siendo d'Oriente a Occidente (Llanes, Pó, Celoriu, Barru y Niembru).
Magar del descansu nesti guapu y pocu visitáu cumal, vamos descender hacia'l norte, col envís d'empatar con un senderu que vien dende los Collaos y ya baxaremos per una amplia vallina hacia'l H.ou La Raíz, onde decidiremos salir a la mandrecha per un claru camín que va llevanos nun primer momentu a una cabaña y que siguiremos pa bordiar un xerru y salir a ún de los llugares más guapos del Risque, el Bih.orcu de Parres, una braña con cabañes y llaguna con vistes a la mar, que dexónos ablucaos dafechu.
Con esta increyible vuelta al xerru pel Bih.orcu siguiremos camín a tramos pelín tomaos, hasta l'entamu de Las Camperas, una enorme vallina na qu'alcontraremos dellos cierres de praos y cabañes, costando algamar un camín continuo, faciendo tramos de sienda clara, zarrándose a praos y teniendo finalmente que bordiar el más grande d'ellos pela so parte alta, hasta dar vista al Altu'l Mazucu, cola Corona Cantiellu como fondu de semeya.
Dende la parte alta de Las Camperas, ya alcontraremos un camín más cenciellu que va dir averándonos hacia l'Altu'l Mazucu, terminando así una circular maraviyosa, nuna contorna a la que teníemos munches ganes de volver y siendo sinceros, la ruta sorprendiónos mui gratamente, conociendo la Llosa Biango que taba espeutacular xelada, pero tamién, el nuesu patéu pel Risque fue tan guapu como divertíu.
En resume, ruta mui recomendable que llevónos durante pocu menos de 6 hores a percorrer tarrén calizu tan típicu del Oriente, con 12,6 km de percorríu y un desnivel acumuláu de +/- 650 m, poro sacante del tarrén quebrapates, nun ye una circular dura.
No hay comentarios:
Publicar un comentario