11 de Xunetu de 2026
Track: Brez (Llébana) - Canal de Lechuglales - Morra - Silla Caballu - Canal d'Arredondas
Dempués del primer día de ruta pela tarde al Picu Jano, venía ún de los platos fuertes d'esta Travesera Picos 2025 - 2026 como yera l'ascensión a la cota más alta del macizu Oriental, pero claro, nel GM Xuan de la Borrina, nun díbemos facelo cenciellu dende'l H.itu d'Escarandi, sinon que queríemos conocer la Canal de Lechugales y baxar pela d'Arrendondas, canal a la que-y tenía munches ganes.
Les previsiones yeren de munchu calor, asina que les alarmes na casa rural y nes furgos, sonó a les 6 de la mañana, ya que teníemos la intención d'entamar a caleyar a les 7. Asina que con un apixote perimportante, vamos preparándonos los almuerzos, la mochila y la xinta, intentando despertar a base de cafés infernales, que yeren de salir corriendo al bañu ún tres d'otru.
Con too preparáu y una mañana fresquina pel momentu, tamos a les 7 la mañana preparaos pa caleyar y facémoslo saliendo, cola mochila enllena de xinta y agua (unos 4 litros por tiesta), asina que con esi pesu, entamamos a caleyar peles cais de Brez hacia la parte alta del pueblu onde vamos garrar la pista formigonada que llévanos hacia los ivernales de Rojes.
Continuamos pela pista, baxo la borrina mañanera hsta los praos de Sandoblo, onde salímonos de la pista y garramos el senderu baxo la canal del Ranchón, continuando con un cómodu ascensu hacia la entrada de la canal de Lechugales, perdiéndonos el senderu superior pelín tomáu, teniendo qu'aportar a la parte baxa de la riega de Piedras Negras, ya con tola canal enfrente de los nuesos güeyos, llueu d'hora y media dende Brez.
El día abre dafechu y tenemos el mar de ñubes nos valles y la enorme canal de Lechugales enfrente nueso, a la que tantes ganes-y tien tol grupu y yo tamién, ya qu'anque ya la conocía, ficiérala con borrina y nin viera na, nin la disfrutara, ya que tuvieremos vien d'hores moyaos xubiendo per ella, casi con cierta desesperación pol mal día que sofriéremos daquella.
Nun ye'l casu, tenemos tola canal abierta pal grupu y esfrutamos xubiendo caún al so ritmu, hasta pudiendo tomar distintes opciones, anque los primeros pasos diéramoslos pela propia riega de Piedras Negras, hasta la parte superior onde xuntámonos colos senderos que vienen de les travieses de Somajía y ya entama la navegación, sobretou na parte más herbosa de la canal, onde llibraremos dalgun resalte pindiu colos grupos pelín dixebraos.
Sedrá la última vegada que nos separemos nun pasu, pero ye que tenía alcordanza de xubir pel pindiu canalizu y Rubén y yo tiramos de frente, mientres que'l restu del grupu bordió per tarrén más herbosu, hasta salir toos xuntos un pelín más arriba, ya entrando na faza superior de la canal, onde la yerba va finando pa pasar al típicu tarrén calizu de Picos de lleres y llambries.
El grupu sigue animáu y personalmente voi perentreteníu, mirando les distintes salides de Lechugales hacia cumales de la nuesa mandrecha de la fastera del Mermeju La Tabla y al llau contrariu hacia'l Prau Contés. La verdá ye que yo voi a lo mío trazando rutes, del planeta Pucavi como solemos dicir y la canal pocu a pocu va pasando y la verdá ye que la voi esfrutando muncho, sobretou porque aportamos casi al final, cuando va entranos el sol, asina que l'aciertu fue total col madrugón.
El grupu continua a bon ritmu, anque entren dalgunes dudes na llera final, onde yo alcuérdome de pasar per un canalizu pa salir a la parte alta, anque los tracks que llevamos pasen al llau d'una enorme torca, faciendo una travesía dende la nuesa posición pa salir penriba la torca y continuar per pedrera resbariosa baxo los parés de la Morra, aportando a la h.orcada Lechugales (2390 m), llueu de pocu más de 5 hores d'ascensión.
Descansamos unos minutinos, nos que Carlos decide que ya tuvo abondo y queda esperando na h.orcada y el restu del grupu, dempués de ver l'espectáculu de dalgunos "montañeros" que nun saben per onde anden dando voces y tirando piedres, esperamos que relaxe'l tema y averámonos a la cercana Morra, onde vemos que nun queda naide intentándola y metémonos na trepada, atopándonos una bona pulidez de la peña, anque xúbese sin mayor problema, si tamos preparaos pa ello por supuestu.
Tócame guiyar dende riba un pelín les preses a usar y ún tres d'otru aportamos a los 2444 m de la Morra Lechugales, con tola visión del macizu central enfrente nueso. Con esto, completamos los 1685 m de desnivel direutu dende Brez y ante les voces d'otru grupu, entainamos a baxar de la Morra, lo que facemos con seguridá, indicando a los compañeros, los pies escondíos pal destrepe, ya que tien un pocu desplome y cuesta velos.
Aportamos toos a la base sin dengún problema porteando un pocu el destrepe y vamos al alcuentro de Carlos, que ta esperándonos, garrando les mochiles llueu d'un traguín d'agua col envís d'averanos hasta la Silla Caballu, a la que xubimos disfrutando de la so arista, siempre con esi ambientín aéreu de Picos, arribando hasta los 2438 m, onde tamos dafechu sólos y felices pa tomar un descansu y xintar a gustu sin xente.
Magar de la xinta na Silla Caballu, decidimos que toca entamar el descensu, ya que son les 2 de la tarde y paez que'l calor va xubiendo y quédanos una llarga baxada. Comento con Pepa, que podemos baxar hacia la parte baxera de la Silla y empatar col H.oyu Evangelista y tirámonos a ello, garrando una canal llerosa xusto nel mediu na Silla que va dir llevándonos hacia'l camín mineru, con un pocu de navegación cenciella.
Una vegada que tamos nel camín mineru, seguirémoslu unos pocos metros y aína toca navegar pela baxera del H.oyu Evangelista que tien que dir sacándonos hacia'l H.oyu La Fuente Arredondas, tramu llarguísimu, nel que nun hai un meyor camín, simplemente la esperiencia en Picos, te diz cuando cruciar una llera, pasar meyor per una llambria o salir a esquierda o drecha, dependiendo del momentu, clavándolu perfeutamente hasta la Fuente Las Arredondas, onde refrescamos la cara y a la fín, pocu más abaxo empatamos col camín de la canal de Las Arredondas.
La verdá ye que los ánimos van xustos, ya que'l tramu del Evangelista hasta Arredondas, fízosenos llargu y nin tan siquiera tener al fin camín, fai descansar los pies, que lleven munches hores d'apretar na caliza tanto pa xubir como pa baxar. Fadremos los traviesos más amplios y enfocamos una solombra baxo la Porra Malluengu, tirándonos a ella, pa descansar unos minutos y quitar piedres nos playeros, falando ya de baxar caún al so ritmu ya que vamos cansaos toos y ya nun tenemos perda nenguna.
Llueu del mini descansu a la solombra, garraremos ya camín nel que vamos garrando ritmu rápidu Rubén, Marcos y yo, quedando con más calma Carlos y Mario, que lleven los pies un pocu tocaos, mientres que Pepa, métese caña pa pillanos y tuvo un resbarión nun tramu argayáu cerca de la entrada hacia'l colláu d'Untuje de Lon.
Falamos polo walkies esmolecíos por Pepa que venía pisándonos los talones y ya col sustu, diciéndonos que mancóse na muñeca, baxamos vueltes y descendemos más tranquilos hasta Brez, faciéndonse pelín llargu esti tramu final pol calor que superaba los 30 graos con amplitú y cuanto más baxábemos peor sensación térmica teníemos.
A la fin, vamos aportando tol grupu a Brez esperándonos delantre la fonte pa refrescar los pies y tando en contactu pelos walkies, terminamos esti segundu día de Travesera Picos con un percorríu de 17,15 km, nel que superamos un desnivel acumuláu de +/- 1730 m nun total de 10 hores y 40 minutos de disfrute na so mayor parte, anque necesito conocer con más calma esa canal de Las Arredondas que tan bien amuésanos Victor (Pucavi) nes sos entraes.
No hay comentarios:
Publicar un comentario