Cuevas (Ayer) - Riopinos - Picón de las Rubias - El Gumial

1 d'Ochobre de 2022

Track: Cuevas (Ayer) - Riopinos - Picón de las Rubias - El Gumial

Entamábemos temporada montañera, tardía llueu de que nun saliese alantre la xuntanza n'Euzkadi, averándonos hasta Cuevas n'Ayer, onde nun va munchu tiempu pasáremos dellos díes esguilando y mui rellacionáu nos últimos tiempos col monte astur, gracies a les campañes publicitarias d'Agua de Cuevas.

El tema yera, que tábemos con ganes de tornar de monte per esta fastera, ya que personalmente tenía un par de valles por conocer y la última vegada que tuviéramos, ficiéramos un bon día de monte ascendiendo tol val.le Melera, hasta la Peña Pandos o Peña Melera.

Partimos de Cuevas (772 m) nel conceyu ayerán

Encomiéndovos a dexar el coche nel aparcaderu del llau del merenderu de Cuevas (onde entama la ruta hacia'l Gumial) y non como nós, onde l'area recreativa, ya que caleyamos per carretera de más. Aún así, dicir que de nueche tuviemos cenando perbien nel merenderu, asina que tomar dalgo al terminar nesti restaurante ya ye un motivu más pa esta ruta.

Averámonos hacia'l valle de Riopinos dempués d'un pateín per carretera y pista

Saldremos caleyando carretera alantre, pa llueu d'unos 600 m, tomar al fin una pista que fadrános pasar al llau de les cabañes d'El Carrozal, pa empatar xustu dempués de la cabera, un senderín que va dir metiéndonos nuna de les viesques más guapes, xabaces y sorprendentes de les últimes rutes.

Continuamos camín hacia la Varera onde entamará'l tarrén abegosu

Caleyaremos pel senderu, travesando una guapa ponte que crucia la riega Riopinos y adentrarémonos nun fayéu, qu'en varies envueltes tienen que dir empobinándonos a les cabañes de la Varera. Hasta equí, el camín ye claru y l'alderique so lo guapo del camín ye la tónica del día, pero bien ceo tendremos qu'entamar a restolar les siendes con munchu procuru.

Decidimos siguir el cursu de la riega per llugares dafechu increyibles

Al llau de la cabera cabaña el camín debería siguir alantre pero tando tapecíu enforma, tuviemos que siguir pegaos a una muria, pa entrar per un prau y travesalo hasta tornar a garrar el antiguu camín, el cual nun perderemos durante bon tiempu, siempre a la mandrecha de la riega, pudiendo esfrutar de paisaxes de gran belleza.

Continuamos la llucha por intentar siguir los más apegaos a la riega Riopinos posible

Aportaremos al crucie cola vallina que xube hacia'l colláu los Gallos, equí una riada argayó tolos árboles de la mecedura les riegues, teniendo qu'ascender un pelín hacia la vallina, pa tonar a baxar hacia la riega pa siguir caleyando, pela viesca tapecida de mugor y enllena de llugares casi máxicos con pequeños tabayones a cada pasu.

Toca salir de la viesca pa lluchar coles urcies hasta'l mayéu Riopinos

Dempués d'esta aventurina siguiendo'l cursu la riega Riopinos, ésta encañónase y la viesca zárrase, teniendo que salir a la fastera drecha, onde alcontremos el senderu que sigue'l valle, pero como non, alcuéntrase zarráu y toca bregar coles urcies (escobones) hasta aportar a la parte alta, onde baxo un tabayón, fadremos les últimes envueltes hasta la cabaña del mayéu Riopinos.

Nel intre, dóime cuenta, que na llucha coles escobes, cayóseme'l GPS del bolsiellu onde siempre lu llevo y por muncho que buscamos, faise una xera imposible, asina que xubo de nuevu hasta la cabaña y xinto'l bocata despidiéndome de mi fiel compañeru d'aventures montunes.

Siguimos valle alantre hacia la Collá Riopinos onde les vistes son ablucantes

Con 4 hores de camín, ensin contar cola búsqueda del GPS, decidimos continuar valle alantre, ya que va tiempu que vimos la imposibilidá o más bien, el sentíu común, fízonos ver que siendo tantos, bregar per llugares como la cresta dende los Garabixos a la Cabritera nun yera una opción factible y con conocer tol valle teníemos una ruta más que potente.

D'esti xeitu, recuperáu un pelín de fuercies de la media hora llarga de búsqueda y pérdida de desnivel con la posterior ganancia, continuamos tol grupu valle alantre col envís, d'ascender hacia la collá Riopinos, onde aparte de poder descansar otru pocu, parte del grupu, algamamos les vistes necesaries pa completar la ruta como ye debío.

Ascendemos a la gueta de grandes vistes dende'l Picos de las Rubias

Estes vistes, completarémosles un pequeñu grupín, que paeciónos bona idega, xubir hasta'l cercanu Picón de las Rubias (1963), un auténticu mirador de tol valle qu'ascendimos, el de Riopinos, como de tola baxada pel valle d'El Gumial, el cuál entá nun conocía y al que-y teníemos munches ganes.

Picón de las Rubias (1963 m), cota másima de la ruta

Con tol conceyu d'Ayer a la vista, sobretou con tol valle del riu Braña delantre, despedímonos de cotes cercanes qu'arródienmos como la Pena Reonda, Noales y Xexa, el picu Torres y tola so redolada, asina como de los montes qu'arrodien la Cruz de los Ríos, con tan bones alcordances nos traen y baxamos a la carrera pa intentar ganá-yos tarrén al restu del grupu que ya fuera empobinándose hacia'l Gumial.

Baxamos hacia'l valle d'El Gumial nun día preciosu de monte

Baxaremos entós, de la collá Riopinos y faldiaremos baxo la silueta del picu Noales, pa siguir camín hacia'l mayéu Fuente Riba, onde pali pali, fuimos ganándo-y tarrén a los collacios, xuntándonos toos de nuevu baxo les imponentes solombres de los Castel.lones y del nomáu Picu L'Osu, con tamién alcordances de muncha aventura ivernal.

Baxamos alégremente hasta'l Gumial onde permitímonos otru descansu

Col grupu relaxáu, tan sólo tuviemos que dexanos cayer valle abaxo ya con un marcada PR, hasta la nomada braña d'El Gumial, perguapu llugar nel que caltiénense en bon estáu les cabañes y onde da gustu sentase a charrar un ratín esfrutando del increyible paisaxe.

   Descensu pel monte La Llana pente tabayones y un verdor de primera

Per camín bono, la baxada faise aína, parando en los milenta llugares que vamos acolumbrando y ye que si ye guapu'l valle de Riopinos, más xabaz quiciás, la riega del Gumial da abellugu a una viesca máxica, onde una vegada más, la fueya cayío y el mufu, son les alfombres más guapes pa tapecer esti requexu.

Salimos del valle d'El Gumial pa siguir pel ríu Braña abaxo hasta Cuevas

Col sentir de fin de ruta, vamos perezósamente descendiendo hasta'l ríu Braña, onde per pista de tierra, siguiremos al empar de la carretera hasta enllazar col entamu de la nuesa ruta, caleyando esta vegada hasta'l merenderu de Cuevas, onde paramos a tomar unes cerveces y despedinos ya que dalgunos pensamos quedar a esguilar al día siguiente na escuela d'escalada del pueblu.

Tramín de carretera hasta Cuevas colos parés d'esguilada al fondu

En resume, ruta que por mor de lo abegoso del caleyar pel valle de Riopinos, tuviemos que camudar sobre la marcha, saliéndonos una circular de 18 km y +/-1255 m de desnivel acumuláu, que túvonos bien entreteníos nes casi 9 hores de camín. 

A dicir verdá, si'l camín per Riopinos tuviera pelín menos tomáu, sedría una circular de llibru nel conceyu d'Ayer, que tou montañeru o senderista, pesie al desnivel y kilometraxe, debería tener nel so bolsiellu, aún así, encomiendo a aventurase y conocer estos dos valles, ya que paguen la pena.

Camudando'l Camín pel valle Riopinos