Cuevas (Ayer)

2 d'Ochobre de 2022

Dempués de la ruta pela redolada de Cuevas del día anterior, ascendiendo al Picón de las Rubias, al día siguiente averámonos enantes de que'l sol pegase fuerte, hasta'l seutor de la Fuente, onde ya esguiláramos va dellos añinos, faciendo un par de 6b/+ durinos pero mui guapos.

Nathalia apretando duro nes víes de la Fuente

 

Tamién, daquella probáramos Merci Cata, vía que según onde mirásemos salía de 6c o 6c+. Esta vegada, sufríeramos la so dureza Suco y yo, alloriando un pocu, de nuevu, con que la vía fuese sólo 6c/+, nun sacándola nin de broma al primer pegue nengún de los dos.

 

Perguapu llugar la escuela ayerana de Cuevas

 

Magar de parar un ratín a xintar cuando más pegaba la solana, tornamos a últimes hores de la tarde, ya a la solombra y con meyor tactu, pa dar otru pegue al corte totalmente pa encadenala, quedándome claro, como vien na última guía de Escalada en la Cordillera, que más bien ye 7a esta vía.

Cuevas
 
Croquis modificaos por mi de la escuela d'escalada de Cuevas. Gracies y col so permisu. 

-----------------------------------------------------------------------------------------------

13, 14, 15 d'Agostu de 2022

Dempués de casi dos años con ganes de volver a Cuevas, pero que siempre por una cosa u otra nun mos decidíemos a arrancar hasta esta escuela, aprovechando un puente y que taben per ellí dellos collacios, conocedores de la escuela, nun hubo dubia y plantámonos el sábadu pela mañana con ganes de trepar.

Veníemos d'otros dos díes esguilando per Morcín, asina que tomámoslo con calma, almorzando en Felechosa, aportando al aparcaderu de Cuevas un pelín dempués de la 1 la tarde. Ellí alcontramos a tol equipín del Pulga, pudiendo conocer a grandes escaladores y meyores persones, coles que pasamos tres díes estupendos.

Pateín pelín llargu pero prestosu a la solombra del fayéu del Val.le Melera

Nun sólo nosotros, pasamos tres díes xeniales, sinon que Kíla, esfrutó como una titana los baños nel rigu Braña y l'accesu pela viesca hasta'l seutor, ya que la fueya, el prestosu camín que ya conocíemos d'ascender a Pena Melera y la solombra nel pié de vía yeren perfeutos pa pasar unes tardes fanátiques d'esguilada.

 

El primer día, dedicámonos a rodar un pocu pa facenos cola roca, faciendo dellos sestos de gran calidá, pente'l 6b y el 6c, destacando sobre tou El Home del Bosque (6b) y Mar de Huecos (6c). Al día siguiente, llueu d'una cena furgonetera estupenda y delles birres tranquiles nel apartaderu, tornamos a xubir hasta'l Bosque, centrándonos nun 7a perencomendáu como ye Fuentes de Invierno, que ya probara Anna'l día anterior.

Santos gustándose nuna vía de calentar

Llueu d'una pringada un pocu tonta nel primer pegue, pudimos facela al segundu, esfrutando tola vía munchísimu y llevándosela tamién al segundu del día Anna, colo que ya baxamos encantaos hasta les furgonetes pa meter un pocu les piés nel rigu y dir cenar hasta'l cercanu merenderu de Cuevas.

L'últimu día, otra vegada tocó la xubida llarga pero guapa hasta'l Bosque, onde ya tol mundiu tenía claru los sos proyeutos del día. Nós, ya echáremos la vista nun 7a+ (Celeste) con un pintón brutal, anque por otru llau ver al Pulga y Juanín probar víes de chorrera, taben poniéndonos los dientes mui llargos.

Juanín probando un 7b+ atómicu

Aún así, entramos a la Celeste, tocándole'l turnu a Anna de montar, pegándose una aventura xabaz, quedándose a falta d'una cinta ya qu'había un pire pa matase. Llueu de munchu llucha, xubí yo, yendo encadenando a vista, poniendo esa cinta, pero llegando petáu, nun me quise xugar el vuelu y aceré, pa mirar bien como facelo ensin matase.

Al siguiente pegue ya salió ensin problemes, dándome cuenta que nestos graos voi perbien y que tendremos que continuar apretando nos proyeutos, pero que bien sienta, baxar un pocu'l nivel y facer munches víes nueves y conocer seutores nuevos, resultando un finde de díez con tola xente que coincidimos.

 

-----------------------------------------------------------------------------------------------

6 de Setiembre de 2019

Rápida visita a esta escuela ayerana de la que siempre tuve bones referencies, pero que quiciás, por tar más enfotaos n'escalar nel valle'l Trubia, cuéstanos decidinos a visitar. La verdá ye que tenía pasáu per ella en pateos montunos, cuando ficimos una guapa circular a la Peña Melera, anque nesti casu fuera percorriendo tol seutor del Bosque.

Esta vegada, acerquéme hasta'l seutor de la Fuente con Anna, una collacia cola que llevo compartiendo cuerda tol branu teniendo munchísimes xornaes de pegues y rises, nos seutores más clásicos de la fastera central d'Asturies.

Paré del seutor la Fuente

La paradina en Cuevas yera col envís de pasar un finde pa Llión, coincidiendo'l col puente del día d'Asturies, colo que pa dir a la fastera de Boñar, parar nesta escuela díbanos de luxu. Anna ya conocía la escuela, asina que vinimos a tiru fechu hasta la Fuente, onde ficimos los duros 6b de Forfait y Clandestina.

Tamién probamos Merci Cata, un 6c, más bien 6c+ increyíblemente bono, la pena fue qu'echósenos la nueche y nun mos dió tiempu a encadenalo porque la vía ye guapa enforma. Anque, hai que facese a la escalada, ya que los planos y preses romes ye'l calter cimeru del tipu d'escalada.