viernes, 7 de octubre de 2022

Trail Macizu d'Ubiña (L.lena)

10 de Setiembre de 2022

Track: Trail Macizu d'Ubiña (L.lena)

Web del Trail: Trail Macizu d'Ubiña

Clasificaciones: Clasificaciones 2022 

Tornábemos a les carreres llueu d'una selmana esguilando per Cantabria, poro, nin siquiera salí a correr nos últimos quince díes. El casu ye, que tanto en Ramales como en Miera, nun tuviemos grandes averamientos a los seutores, asina que la comodidá y la relaxación escaladora, yera tol mió entrenu dende los pateos montunos de la Travesera 2022.

Kíla a la espera de la salida en Tuíza Riba

Sicasí, yeren más les ganes, asina que plantámonos en Tuíza Riba, acompañándome Anna y Kíla que diben xubir hasta'l Meicín a ver un pocu l'ambiente de la carrera. Tamién, tuve la suerte de compartir parte de la carrera con Illán, que ya facía tiempu que nun mos veíemos.
Entamu de carrera allegre como siempre nesta carrera

Como siempre ambientazu nel pueblu y salida rápida peles sos cais, pa empobinanos hacia la collá'l Visu, nesi tramu tan carauterísticu de xubides y llaneos nos que cuesta garrar un ritmu curiosu. Ya dende primeres, nun soi a siguir a Illán y a tramos voi descolgándome y otros recupero hasta que na baxada de la collada'l Trave, baxo los piés, del picu Tapinón, nun pueu caltener el ritmu, ensin matame coles mios zapatilles feches polvu.

La rapidísima baxada de la Forqueta al Meicín

Llueu na xubida al Fariñentu, soi a garrar un bon ritmu, teniéndolo a vista siempre, pa descender con meyor xeitu y facer tol tramu del Prau L'Albu y la travesera pelos Camisos mui fuerte, pero na vuelta al descensu dende la Forqueta'l Portil.lín y el Meicín, tuve que baxar reteniendo muncho pa nun resbariar y llegué petáu enforma al avituallamientu del Meicín, onde pude saludar a Kíla y Anna que taben per ellí encantaes col ambiente de la carrera.

Tramu final perduro como siempre na xubida al Puertu Cerreos

Como siempre quedaba la otra gran xubida de la carrera, sacando la del Fariñentu hasta'l Puertu Cerreos y como non, fízoseme bola, nun alcontrando nin ritmu nin piernes, asina qu'aportamos a lo más altu, bastante cansáu y ya con muncho calor, que fadría que la baxada nun fuera nin muncho menos tolo allegre que diba gustame.

Aportaremos a meta nel puestu 59 y con pocu más de 4 hores, que camiento meyorables, asina que la prósima de xuru que participaré intentando baxar de les 4 hores y yendo un pelín más entrenáu. Como siempre, la espicha final, con cañeru incluyíu fue una pasada, anque tardase en poder meter dalgo pal cuerpu, por mor del calor final na carrera.

Increyible día de trail pel macizu de Penubina

 -------------------------------------------------------------------------------

26 de Xunu de 2016

Track: Trail Macizu d'Ubiña (L.lena)

Web del Trail: Trail Macizu d'Ubiña

Clasificaciones: Clasificaciones 2016  

Dempués de la Pisada'l Diantre, casi teníemos decidíu nun correr más por esta temporada, ya que 6 carreres paecíenmos abondes, pero como siempre, ye ver un percorríu, estudialu y ver que pícate'l niki otra vegada pa correr y conocer dalgún tarrén más.

Y que coño, si ye nel macizu de Penaubina como pa non apuntase, eso sí, los 21,2 km y los 4200 de desnivel acumuláu, decíanos que diba ser una xera complicada. Aún así, allá fuimos dempués de nun entrenar casi nada dende'l trail colungués.

Baxando del Fariñentu pente'l borrín

Personalmente, fuí a la carrera con poques hores durmíes y pelín de resaca y ye qu'estes feches son percomplicaes y siempre hai tarrén pa liala y más de sábadu pal domingu. Asina qu'entamé con tranquilidá corriendo al ritmu de Gus y Alberto, pa dir espabilando adulces.

Pa cuando aportamos a la base del Fariñentu, el mió hermanu ya nun daba pa muncho más ritmu, así que ralentizamos l'ascensu un montón y la baxada pal Meicín tampoco ye que la ficiésemos a fueu, notábase la falta d'actividá y que'l tarrén montuno yera duro.

Cruzámonos con collacios de la carrerina

Ya na baxada pal Meicín, nun m'alcontraba mui allá y lo poco que piqué nel avituallamientu casi me fai devolver. Entre eso y dellos escalofríos esperando a qu'arrancásemos de nuevu decidí tirar sólu p'alantre a ver si moviéndome diba alcontrádome un pelín meyor.

Col entrar en calor xubiendo en las Rubias, entamé a garrar puxu y fuí pasando xente y xente, que quedaben ablucaos col ritmu que llevaba, coroné al empar qu'un collaciu l.lenizu col que tuviera en Cerreos va pocu y pensé en facer el restu la carrera con él.

Más tramos de descensu

Pero nun yera a siguime, asína que siguí corriendo un tramu preciosu dende'l Puertu Cerreos, al Puertu Mieres y baxar hacia Braña L.luenga y la Portil.lera. Tol tramu fícelu ensín caleyar, tol tiempu a bon ritmu corriendo y asína fuí pasando xente y alcontrándome cada vegada meyor.

Pa cuando aporté a la meta, llegué cola sensación d'esfrutar nesta segunda parte de la carrera, casi más qu'en toles demás y ye qu'esto del trail ta mui bien dir en grupu, pero o putees o puteente col ritmu.

Entramos a meta... dempués d'una llarga carrera

Como non, magar de pasalu mal, bien, poneme malu (por mor de la resaca) y d'acabar como un titán, tocaba metese una fartura de les d'órdagu y pa eso que meyor que tornar a Casa Ana en Les Felgueres al igual que ficiéramos dempués d'una mañanera a Penubina.

Aparte de danos de xintar increyible, pudimos tar nuna sobremesa relaxada nel prau xugando a la pelota con Darío, hasta reposar cola calma la fabada y el corderu que taba como ya dixi de restallu.

Y dempués.... la fartura como non....

1 comentario:

  1. Cuidado con los tobillos, que es muy peligroso correr por el monte.

    Un abrazu¡

    ResponderEliminar