miércoles, 28 de septiembre de 2022

Ramales (Cantabria)

Del 3 al 6 de Setiembre de 2022

Tornábemos dende va dellos meses a facer un viaxe escalador, pero viendo'l nivel de precios de combustible, decidimos nun dir tan lloñe como otres vegaes averándonos hasta la vecina Cantabria, onde teníemos a un guía de luxu, como yera Santos, que viviera per estes tierres unos años atrás.

D'esti xeitu, los primeros díes de vacaciones díbemos averanos hasta Ramales, onde munches fueron les hestories de dureza escaladora per estos llares, asina que díbemos preparaos pa nun encadenar res, pero nun díbemos tan preparaos pa tar tan a gustu y que nos tratasen tan bien.

Anna y Nuria esguilando nel Camino

El primer día, aportamos nun día ñublu de tarde, llueu de pasar per Santander a ver a Xena y tiramos direutos al Camino, seutor que como'l so nome indica, tien una averamientu de 5 min de bon camín, dende'l qu'aseguramos demientres vemos pasar bicicletes, corredores de monte, andarines, espeleos, ferrateros...

El nivel d'actividá d'esti pueblu en cuanto al monte ye impresionante y día tres día pudimos dir comprobándolo ya que nun sólo los findes había actividá, sinon que'l restu la selmana siempre alcontrabes xente faciendo actividá y ye que cuando tan bien feches les coses nótase, como los cartelos con tres percorríos pa correnderos y ciclistes de monte.

Pared del Eco y Cueva Mur... un llugar preciosu y enllenu d'actividá

No qu'a la esguilada refierse, pues como yera d'esperar llevamos dalgún palín qu'otru apretando increyible, pa facer un 6c+ a vista, pero mui, mui increyible y nel restu de díes nel Camino, tan sólo pude llevame un par de 6b+, mui, mui buenos pero duretes tamién.

La verdá, que gustónos muncho la escalada, pero hai que facese como too, dexando les yemes probando Maneras de Vivir (7a) con una pasu finu y cabrón, que nun pude facer, ya que siempre la montaba apriesa poniendo cintes y nun tenía tiempu pa da-y un segundu pegue, poro quedóme pa prau, pudiendo facela Anna nun pegue épicu totalmente, a plena solana, nel últimu día d'esguilada per Ramales. 

Les poces del ríu Asón... fuera la combinación perfeuta pal mediudía

Y ye que los díes pasaron madrugando un pocu pa trepar nel Camino pela mañana y parada pa dir al area recreativa de Cubilla al llau del ríu Asón, onde la primer nueche los collacios cántabros, ficiéronmos una paella y el segundu día a la hora la xinta, teníemos cuscus enantes de xubir de nuevu a conocer Cueva Mur.

Cueva Mur, fue otro de los seutores que visitamos, pero sacante de lo guapo del llugar, cola paré del Eco embaxo nueso, la escalada nun mos dió más en comparanza col Camino. Pero bono, pasamos la tarde de nuevu entre collacios y esi día, averámonos hasta otru sitiu onde poder durmir, na vecina llocalidá vasca de Lanestosa.

Santos remenbrando antigües víes ya encadenaes

Por últimu, quiciás el día de más rises, fue'l que tuviemos esguilando en la Cueva los Gitanos, una covacha de víes de desplome y bon cantu, qu'anque sólo probamos un 7a (Padre Black & Decker), tuvimos que da-y tres pegues caún, por puru entrenamientu y rises, ya que tan sólo'l Pulga fue capaz de facela. 

Apretando nel desplome de la Cueva Los Gitanos

Lloñe d'eso y del pegue final míu, nel que saliendo a cadena patinóme un pie y volátil al cantu, la verdá ye que paeciónos un seutor divertíu, físicu que pocu tenía que ver col Camino y menos aún cola escalada rara de Cueva Mur.

Pringando arriba'l tou un 7a físicu de Cueva Los Gitanos

Esi mesmu día, cuando terminamos la escalada tuviemos tomando'l vermú con Nuria per Ramales, pa más tarde tornar como non hasta les poces del ríu Asón, onde pudimos pegar otru bañu espeutacular colos perros y ya más tarde, dempués de facer la compra, pudimos esfrutar d'una parrillada en casa de Manu y Nuria, lo que fue ya un final perfeutu pa los díes d'escalada y rises per Ramales.

Anna apretando en dellos sétimos de Ramales

Al día siguiente, tan sólo dibemos a esguilar de mañana, col envís, como ya comenté, d'intentar encadenar el 7a del Camino, llevándoselo Anna al segundu pegue y con tramos de solana, teniendo que trabayar la vía, con un tactu que nun quería nin imaxinámelo.

Con este pegue maraviyosu, xintamos daqué, pegamos otru bañín y decidimos continuar a otru valle al que teníemos munches ganes de conocer, como ye'l valle del Ríu Miera, en plenu coral de los valles pasiegos cántabros... toa una aventura estos valles.

Camudando'l Camín col Pulga... el nuesu guía particular de Cantabria
 
Ramales
 
Croquis  de la escuela d'escalada de Ramales. Gracies y col so permisu.
 
-----------------------------------------------------------------------------------------------

No hay comentarios:

Publicar un comentario