martes, 25 de octubre de 2022

Margalef de Montsant (Tarragona)

Del 8 al 15 d'Ochobre de 2022

Dempués del gran viaxe per Margalef y Camarasa del añu pasáu, tol mundiu tenía ganes de repetir, asina que nun lo pensamos dos vegaes y reservamos pa la mesma fecha nel camping, aportando'l sábadu a mediudía, xustu dempués de que cayera una esbastiada fina, poro con ciertes duldes, aparcamos nel Pantá de Margalef y fuimos dar un paséu pelos seutores más averaos a la Catedral y a dar un peguín a Can Reginos que ya lu conocíemos del añu pasáu.

Primer día lluviosu de paséu pela Catedral y dando un peguín en Can Regino

Con más ganes de facer campu base qu'otra cosa, tiramos pal camping y organizámonos pa cenar en comuña y brindar pol entamu de vacaciones. Al día, siguiente, con tola motivación, al menos la que nos queda dempués d'un branu enllenu de díes de proyeutar y con pocos resultaos positivos, fuimos a conocer unos seutores desconocíos pa nós, como yeren Reggae, Super Reggae, Culample y Racó de L'Eura, qu'a la postre darienmos munches hores de pegues fanáticos.

Culample fué'l seutor onde más fanatismu tuviemos nun par de díes

Nesti seutor, lo más destacáu fue l'encadene d'Anna a un 7a+ y la pasión de tolos collacios colos sos proyeutos, caún nel so grau y ye que les víes yeren perbones, destacando pela mió parte otru 7a+/b, increyíblemente bono, que nun pude llevame al final, pesie a dar un par de pegues curiosos, compartiendo vía con Suco un día y con Anna a la siguiente visita.

Por suerte... tuviemos un día ñubláu pa facer una visita a Espadelles

Dempués del intentu del añu pasáu, por conocer Can Verdures, esta vegada si pudimos trepar un día enteru ellí, combinándolo con Can Pesafigues y anque tábemos falando d'un día pela selmana, el pequeñu pie de vía, fizo que tuviéramos pelín incómodos por mor de tola tropa escaladora que xuntóse allí, pero al menos, pudimos llevanos pal bolsu Carn d'Olla, un 7a mui fanáticu y una clásica del seutor.

Pegues de tolos collores en los distintos seutores d'Espadelles

Otru de los grandes díes, fue la visita nun día d'amenacia tormentose hasta Espadelles onde tuviemos probando dalguna sestín curiosu de chimenea, esguilando en víes más cencielles pa facer metros y apretando na parte final del día nel final del Racó d'Espadelles, onde taba esperándome Franja de Ponent, un 7a clásicu d'esti seutor, nel que lesionárame na primer vista a Margalef dellos años atrás.

Encadenando Franja de Ponent... una vieya conocida que tenía pendiente

Esta vegada, intenté dar un pegue "a vista", porque lesionárame nel bloque d'abaxo así que con tola vía per delantre, plantémene nel últimu pasu duru antes del reposu, pero nun fui a sacar la mano con fuercia. Lo más divertíu del día, sacante de que la encadenase al segundu pegue, fue la oportunidá de meter un flash a Suco que cayó tamién nel últimu movimientu duru y que Mario la probase, ya que yera una vía de fuerza-resistencia que nun le venía na mal.

Esfrutando de la roca y los furacos de Margalef

Otru par de díes, ficimos una visita hasta Can Dit Gros y Can Dit Xit, al ver que Can Regino estaba imposible de xente. Estes coses suelen rallar un pelín, ya que nun tamos avezaos a les masificaciones en seutores n'Asturies, pero sien tan grande, a nada que te mueves pel mesmu muru un pelín, acabes esguilando sólo como nos pasó'l primer día que fuimos hasta Can Dit Xit.

Más momentos de les vacaciones en Margalef

Nun sólo fue trepar casi sólos, sinon qu'amás alcontramos víes bien guapes en tolos graos, pudiendo esfrutar Mario d'encadenar poniendo cintes un par de víes y Nathalie y Lau alcontraron un 6c+ de diedru nel que proyeutar, el cual tuve la oportunidá de facer y yera realmente bono, al igual que Figaflower, un 7a qu'intenté a vista, teniendo que quedar l'encadene pal segundu pegue.

Pegues fanáticos na roca catalana

La verdá ye que según fueron pasando los díes, fui garrando más forma, pero na que ver col añu anterior, nel que venía descansáu y non fechu polvu de proyeutar tol branu. De toes formes, lo importante nestos viaxes, ye esfrutar de la escalada con collacios, de xestionar la visita a seutores, onde podamos trepar toos, ya seyan sestos, sétimos u octavos.

Esfrutando per Espadelles d'una clásica del Racó

Finalmente, el caberu día d'esguilada, tovía intenté un pegue a un 7a+ a vista cayéndome nel techu final, como yera d'esperar y ye que la vía, que ya tenía mirada en Can Dit Gros, con un bloque casi nel metru 30 en plenu techu, nun yera la meyor opcion, pero yera'l cartuchu que me quedaba y había qu'intentalo.

L'añu que vien, tornaremos? Ya se verá, el sitiu ye inmeyorable, tamos a gustu nel camping, ficimos una organización de cenes, birréu y chigréu casi perfeutu, asina que nun seré yo quien diga de camudar de llugar de viaxe pal añu que vien... dacuando tar a gustu ye más importante que la propia esguilada.

Momentos imprescindibles post esguilaes
 
Margalef (Seutores visitaos)
 
Croquis modificaos por mi de la escuela d'escalada de Margalef, por mor de En La Vertical. Gracies y col so permisu.
 --------------------------------------------------------------

Del 9 al 13 d'Ochobre de 2021

Había munches ganes de viaxe d'esguilada y munches ganes de tornar a Margalef. Los últimos años, siempre centráramonos en Rodellar y tocaba tirar pa la meca de la dificultá mundial a garrar furacos y esfrutar de la so escalada, caún nel so nivel claro ta, dexaremos los novenos pa otru viaxe jeje.

Llevaba varies selmanes entrenando, ficiera la selmana de descansu de rigor y mis planes diben en facer toles víes posibles a vista a la gueta de mi primer 7a+ a vista. Poro, los graos nos que diba meteme yeren pente'l 6c y el 7a+, enxamás engorilándome con nada más duro.

Mítica entrada al pueblu... meca de la escalada en Catalunya y nel mundiu

Como siempre, al final, la escalada ye'l finxu so lo que fáense'l restu de planes, pero lo más importante ye la xente cola que compartir un viaxe y nun yeremos pocos la verdá. Per un llau, salíemos de vienres tarde en manada varies furgos con Orlando y Luca, Suco, Lau y Maia, Xavi y Nathalie, Mario, Anna y yo.

Aportaríemos a Margalef de sábadu pela mañana, onde esperábenmos los "borbones" Ani y Rubén, que llevaben mes y mediu vacaciones perende de furgonetéu, asína como Nati que tamién adelantara viaxe'l vienres pola previsión de poques places nel camping.

Tornando al enorme paré d'Espadelles magar de 3 años

Dar les gracies a Xavi, que tuvo la idega de reservar 15 díes enantes y eso valiónos pa tar bien a gustu nel camping de Margalef, teniendo claro que por 7 euros aprox, paga la pena nun tener que mover trastos a cada momentu que sales a esguilar, asina que tener tu parcela tol viaxe ye un puntu a favor.

Esa mesma tarde de llegada, salimos pa Punta Espadelles a "rodar" un pocu, alcontrándonos el seutor a la solombra pero petáu de xente, cosa normal un sábadu. Aún así, garramos un tramín de roca pa nós y pude facer La Baldada (6c) pa calecer deos y al segundu pegue llevéme'l primer sétimu del viaxe :Els Meteorolegs (7a).

Apretando l'equipu en dellos momentos del viaxe

La tarde diera pa muncho y la motivada yera grande, dalgunu pasóse de vueltes como Xavi, que nun sé nin cuantes víes tuvo faciendo y lluchando. Al dia siguiente, domingu, intentáremos dir hasta Can Verdures, pero'l nivel de pete del seutor, fízonos escapar hasta Ca La Marta, onde pasamos el restu del día, metíendome a probar Phaloides, un 7a finísimu y pelín de vieya escuela, que tuve qu'esperar al segundu pegue pa encadenalo.
 
Enantes de marchar, aprovechando que Orlando y Luca teníen montáu Mañolita, metí-y un pegue pa ver que tal díbemos con una vía recomendada a vista. El resultáu fue bien positivu y pude encadenala, esfrutándola un montón, quedándome claro qu'escoyendo una migayina les víes, Margalef yera una escuela perfeuta pa dir a vista.

Averámonos a conocer el seutor de Ca La Marta con guapes vistes del Pantá de Margalef

El tercer día, díbemos visitar con muncha menos xente pelos seutores, Can Regino y Can Dit Gros, quiciás, los parés onde más a gustu tuvimos en tol viaxe d'escalada. Equí fice cordada con Xavi y tuviéramos moviéndonos pente ambos seutores pa dar pegues a les víes que más nos llamáben.

Pa "calecer", enchufamos los dos a vista El Jardinero Fiel (7a) otru rutón en Can Regino y quedara con ganes de meté-y un intentu a vista a la so compañera a la mandrecha, pero al aportar a Can Dit Gros p'asegurar a Xavi, alcontréme con otru 7a (Indian Holidays) que namoróme pol percorríu de más de 30 metros, faciéndolo poniendo cintes completando un día de llibru.


Vuelos, entraes picantones... pa tolos gustos

La chispa diba terminándose, asina que decidía tomarme un día descansu, dando un pateín pela zona con Mario, Anna y Almu, una collacia madrileña d'Anna cola que compartimos díes d'escalada, cenes y birres artesanes.

Porque esa ye otra, anque ficimos tolos almuerzos de furgo, organizaos en dellos grupinos, siempre al terminar les birres en conxuntu, les visites a Margalef Beer (nuevu proyeutu de birra artesano) y dalguna hamburguesa qu'otra nel food truck del camping foron la tónica del viaxe, ye dicir, facer los que nos apetecía a cada momentu, tanto pa escalar como pal tiempu de descansu.


Munchos momentos de rises, cerveces y tar a gustu del camping de Margalef

Como ya dixe'l cansanciu diba notándose, poro díbemos pensando en continuar viaxe hacia otres escueles de Tarragona o incluso Lleida, pero toos queríemos tener otru día per Espadelles asína que madrugamos pa dar un paséu con Xavi per tol muru d'Espadelles, acabando nel Racó, onde quedárame pendiente un 6c bien guapu, Guirlache, del anterior viaxe, que fice poniendo cintes... como camuda l'estáu físicu de va 3 años p'acá.

Encadene al flash de Hattori Hanzo (7a+)
 
De tarde, tornaríemos hasta la Punta Espadelles onde muncha dexara pendiente cosines, personalmente, dexárame Hattori Hanzo, un 7a+ que dende'l primer día quedé con ganes de da-y a vista. Seguía col mió particular oxetivu del 7a+ a vista, pero tuvo que flasheame esta vía Xavi, viendo que diba mui petáu y dudaba nun tramu, teniendo que lluchala enforma, como puede vese nel vidiu d'arriba... otru rutón qu'esfruté munchísimu pa terminar la estancia en Margalef.

Los perretes que tuvieron un viaxe brutal baxo la cámara d'Ani

Al día siguiente, decidiéramos colar de Margalef ya intentar camudar l'estilu d'escalada cola idega de poder siguir aprovechando'l restu la selmana. El grupu diba dixebrase, colando unos p'Asturies de vuelta, otros quedándose per Tarragona pa visitar delles escueles y otros tantos coláremos pa Camarasa en Lleida onde pasamos varios díes más de rises y escalada más plaquera.

Un placer xente, mil gracies pol viaxe y facer un grupu tan prestosu. Tornaremos a Margalef, dende esti viaxe, mi escuela favorita pa esfrutar de víes a vista y d'un ambiente tranquilu y relaxáu nel camping y pueblu.

Margalef (Seutores visitaos)
 
Croquis modificaos por mi de la escuela d'escalada de Margalef, por mor de En La Vertical. Gracies y col so permisu.

 --------------------------------------------------------------

Del 24 al 29 de Marzu de 2018

Bono, pues como en delles empreses y nun estáu laicu se supón, oblíguenmos a garrar díes por fiestes relixoses, tocaba aprovechalos y como non, un viaxín d'escalada ye lo que más presta magar d'un iviernu gafu de meteo n'Asturies.

Magar de dar munches vueltes y aldericar sobre cual yera'l meyor destín, cuntando con que nun daben bon tiempu pa casi dengún llugar, decidimos metenos la xatada de furgo hasta'l parque del Montsant en Tarragona.

Espertamos nel aparcaderu del Pantà de Margalef

Nesti parque hai delles escueles conocíes, pero nun sé si polo míticu de los últimos años, prestábanos conocer Margalef. Y ye que falando de víes de gran dificultá, quiciás Margalef ye de les escueles que más escaladores profesionales suel visitar y a los prubinos tamién préstanos conocer, anque seya dende baxo, delles víes nomaes, como Demencia Senil, col míticu videu d'Iker Pou.

Aportamos per ellí, el sábadu 24 totalmente de nueche, dempués d'un viaxe con calma de milenta hores, metiéndonos hacia'l Pantá de Margalef onde sabíemos qu'habia aparcaeros pa pernocta. A la hora que llegamos, metímonos al sobre ensin dudalo, esperando que'l día siguiente llevantárase con solete.
 
La llarga muria d'Espadelles centró la nuesa atención casi tolos díes

Tamos na selmana anterior a la selmana santa y la verdá ye que nun hai muncha xente, poro se ta bien y prepares almuerzu mañaneru con una tranquilidá total. Pela zona, andaben Cedric Lachat, Nina Caprez.. y Lolo y Kíla, a los que se-y la suda quien tea... van saludar a tol mundiu.

Magar del almuerzu, salimos del aparcaderu, dempués de pagar la primada correspondiente, queriendo conocer un pocu más el pueblu y tomar otru café, nel meyor sitiu de Margalef, Ca Velnet, el cual convertiríase nel nuesu campu base particular.

Ablucante ver a Javi moviéndose cenciello pelos desplomes

Col pueblu perconocíu, decidimos entamar xubir al seutor d'Espadelles, una muria de cientos de metros d'estensión, anque non munchos metros d'altor. La verdá ye qu'a lo llargo d'Espadelles, tenemos graos pa tolos gustos, pero Vane y yo, pal primer día decidimos visitar pa calentar el Totxo d'Espadelles y llueu la Punta Espadelles.

El Totxo ye un sectorín feu de placa tumbada, que facese a los furacos nun mos vino mal del too, anque tampoco ye pa repetir. Llueu arimámonos a la Punta Espadelles onde hai unos graos vien prestósos pente 6a+ y el 7b, marchando con 6b víes a vista hasta 6c que sumaes a otres 3 nel Totxo, facíen un primer día más que perfeutu pa pillá-y el puntín a la roca.

Ye de recibu echar un vistacín a mítiques víes como Demencia Senil
 
Esa tarde, averábase hasta Margalef tamién Montse, y muncho más de nueche Javi y Olaya, que tuvieren aventura pa salir de la Hermida, por mor de les ñevaes. Así qu'al día siguiente tamién decidimos xubir hasta Espadelles pa que la xente pudiera esfrutar d'esti guapu llugar.

Por suerte, el sol saliera y pudimos esfrutar d'un día bien prestosu d'escalada, ya que n'Asturies nun viéramos el sol dende cuantayá. Esta vegada tuviemos pegándonos tola mañana nel Racó d'Espadelles onde quédome con dos víes increyibles, Setareb (6c) y la so compañera a la manzorga, la cual siempre taba ocupada y nun pude rematala.

Faciéndose a los furacos de Margalef

Los demás díes fuimos turnando visites a Espadelles, con visites a seutores na otra fastera, sobretou nel supuestu día de descansu, onde dimos un paseín a conocer la Catedral al otru llau del barrancu, onde malpenes dí un peguin a un 6c perinteresante que pringué nel pasu.

Como siempre, nestos viaxes suelo dir baxando intensidá y ye qu'a vegaes nun sabemos controlar les fuercies y el día que vémonos bien, apretamos con tantes ganes qu'andamos penando'l restu de los díes, dexando varies víes ensin encadenar a pesar de tar a un pegue del encadene.

Visitamos otros seutores buscando solombra o sol dependiendo del día

Al menos, nesti viaxe de total disfrute y bon ambiente, quedéme col encadene de mi primer 7a (Que pasa neng!) al primer pegue nel Racó d'Espadelles. Al marxe de lo pocu importante d'esta nota, la vía en sí, ye una preciosidá con un bloque inicial y una placa vertical de furacos mui prestosa.

Al igual que nel primer seutor del Racó, la so hermana xemela de la manzorga yera tamién una gran vía, anque pa mi idega'l bloque salía más duro d'un bideu, mancándome nel antebrazu al salir tan fuerte de bloque.

Despedímonos de Margalef hasta la próxima vegada

Xustu esti día, nel que manquéme nel antebrazu, decidí dexar d'escalar y colar pal mió pueblu a pasar el restu de les vacaciones. Yera dalgo que tenía na tiesta, pero dexaba abiertu hasta cuando diba tar trepando, lo cual fue un total aciertu ya qu'al día siguiente tuvieron un día perfrío en Margalef y el restu del grupu tamién decidió abandonar tierres catalanes.

Al igual qu'esi viaxe a Rodellar, que ficiera l'añu pasáu, tengo claro que marcho de Margalef con munches ganes de volver, pol sitiu que ye bien guapu tamién, quiciás non tanto a nivel de pueblu, pero si que'l barrancu pagaba la pena y la xente del pueblu agradecía pol turismu escalador tamién.

Tornarem...

No hay comentarios:

Publicar un comentario