25 d'Ochobre de 2025
Track: Entepenes (Ayer) - San Xulián - Cueva L'Ablanu - Peña Solengues - Valdeveneru
Dempués de la ruta dende la Polavieya al Cualnegro, apeteciónos tornar pel conceyu d'Ayer una vegada más, yéndonos nesti día hasta Entepenes, onde tantes vegaes viéremos la foz d'entrada al valle de San Xulián y como nun lo conocíemos, preparamos una rutina pa sacar alantre nun día bastante murniu y con toques amenazantes a lluvia.
Asina que magar del almuerzu en Mieres, tiramos hasta'l valle d'Ayer y pelín dempués de les 10 de la mañana, tábemos preparaos, pa entamar a caleyar a la entrada de la foz de San Xulián. Sacamos semeya al llau del rigu y entamamos a caleyar cómodamente pente guapos paredones valle alantre, hasta dir algamando vistes a les Peñes Negres, previu a la nomada Penamea.
El camín ye ampliu y sin mayores novedaes plantámonos na capiya de San Xulián, pa siguir ya cruciando'l rigu y entamando una ascensión más pindia, por bon camín pasando pelos praos de la Corrá y Bandalende, onde vamos desvianos, primeru pela parte alta a la gueta de la Cueva L'Ablanu, comentando que pesie a nun alcontrar camín direutu na ida, si que pasamos per llugares bien guapos de la riega Peñalba que pocu más abaxo axúntase col San Xulián.
Non, sin bregar un pocu y navegar pela riega Peñalba, atopamos senderu y llibrando dalguna espinera y ablanu qu'otru atopamos la Cueva L'Ablanu, onde vamos tener ún de los momentos máxicos de la ruta y ye que lo que paecía un aviru de cabres, con cierre ganaeru, va amosanos nel so interior una ayalga de la ñatura, cola que taremos un bon ratín esfrutando.
Colamos d'ellí encantaos, llueu d'esfrutar de les sos formes creaes col pasu los años y l'agua, teniendo claro que pagó la pena encontrar la Cueva L'Ablanu y esta vegada, atopamos un senderín que va sacanos a un prau en Bandalende, viendo dende'l propiu camín, na portiella del prau, la cueva enfrente nuesa a la otra faldera'l monte.
Ensin más, siguimos camín alantre, pasando per Trespandu, La Boza y el L.lamargón, p'averanos a les cabañes de la Roble primeru y dempués a la Penota, onde baxaremos un pelín pa tomar un camín per un guapu fayéu hasta la Col.ladiel.la Cuartes, onde ya toca buscar ascensión al cordal de la Roble, siendo la Peña Solengues, el puntu más altu del cordal.
De camín hacia la peña caliza de Solengues, alcontrámonos con unos montañeros que descienden, cruciando cuatru pallabres sola meteo ya que nun tenemos claro si llibraremos la lluvia y tiramos entainando, hacia'l primer cumal, el oriental, de la peña Solengues, al qu'accedemos ensin dengún problema.
Encumábenos los 1244 m del cumal oriental y vemos que nun ye mui aptu pa los perrinos el ocidental, quedándose Vane abaxo con ellos, xubiendo per un tarrén de cuchilles calices hasta los 1245 m d'esta cume de la Peña Solengues. Ensin más, col día amenazante baxamos con Vane de nuevu y facemos travesía pembaxo del cresteríu, con ganes de buscar un sitín onde xintar.
Alcontramos un mayaín y col banduyu enllenu, continuamos faldéu baxo'l cordal y facemos una apuesta arriesgada xubiendo al picu Naval, entrándo-y pela so faza oriental, con una trepada vertical d'amiestu de yerba y peña, teniendo llueu crestéu llargu hasta los 1239 del so puntu más altu. Dende riba, vemos que pudiéramos tener descensu más cenciellu pola faza sur, pero vemos dende'l norte que vien la lluvia y decidimos baxar pel mesmu puntu, col destrepe espuestu, que superamos ensin problemes.
A salvo en tierra firma, apuramos camín abaxo dexando'l cordal de la Roble enriba nuesa, onde tendremos que buscanos un pelín la vida, ya qu'alcontramos un pelín tomaos los caminos, dando una revuelta a la manzorga per una viesca baxa, pa tornar a la mandrecha y aportar a los praos de la Felguerina, bien curiaos y con una muria preciosa que llévanos a la parte baxa del crestón de la Roble.
Dende estos praos siguiremos un senderu en descensu que más tarde fainos xubir hacia una forcadina, onde atopamos pasu de nuevu hacia'l valle de Peñalba pel que xubiéramos. El senderu baxo la peña y fayéu, vese preciosu y ENCOMIENDO TORNAR AL VALLE DE PEÑALBA Y SAN XULIÁN per este pasu tan guapu.
Nós, quisimos descender pel monte Valdeveneru viendo que los mapes marcaben varios caminos y alcontrámonos con un descensu aceptable, per senderu hacia un camín con una caxa impresionante que venía dende la Felguerina, dando vuelta pel interior del valle, pero que vimos como morría pocu dempués nun de los praos de Fresneru, perdiendo la ilusión d'una baxada tranquila hasta'l pueblu.
Nel intre, alcontrámonos con una baxada cansina y abegosa, na que topamos senderos que perdimos al pocu o tenía continuidá de cabaña en cabaña namás, tocádonos saltar dalguna sebe de prau en prau, hasta salir a la parte alta de les cases d'Entepenes pa continuar per carretera hasta los coches, onde falando con un paisanu qu'entrugónos como taba esa parte del monte confirmando tamién que taba perdíu dafechu, que meyor siguir per bon camín hasta Col.lanzo, pero eso ye comese muncha tirada de carretera.
En resume, casi que meyor baxar de nuevu pel valle San Xulián o metese a l'aventura como nós, pero eso caún ye caún. El casu ye que completamos esta guapa circular al cordal de la Roble, con un percorríu de 12 km, un desnivel acumuláu de +/-850 m en 6 hores y 20 min, nos que conocimos una cueva preciosa y trepamos a dellos cumales calizos como ye la Peña Solengues.
No hay comentarios:
Publicar un comentario