Porrimán (Morcín)

12 de Xunetu de 2023

Pasaron unos mesinos dende la última visita productiva a la Vallina Baxu que ye'l nome verdaderu d'esti seutor d'escalada, pero bono, como suel pasar o los equipadores enfótense en conocer los nomes tradicionales de los parés o terminen por garrar cualesquier nome estúpido, anque siendo correutos, al menos nesti casu, garróse'l nome del pueblu.

El tema ye que probara va un tiempu Alpinismo de Salón, el 7b a la manzorga'l seutor, dándo-y un bon segundu pegue n'aquel día, pero como andamos liaos pel Cantu La Sierra, nun tornáramos a la Vallina Baxu y lo más cerca que tuviera fuera na ruta que ficiéramos nesa redolada: La Puente (Morcín) - Planéu - Monte Frechura - Robles - Porrimán.

Kíla apostada na balconada del seutor Porrimán

Ayeri, viendo'l día ñublu que teníemos, averámonos hasta ellí, Santos y yo, cola idega de camudar un pelín l'estilu d'escalada, metíendome yo n'Alpinismo de Salón y na so variante, Baja Temeraria, que tamién saldrá de 7b, más corta, pero quiciás dalgo más desplomada.

Por suerte, llueu de montala y dar un segundu pegue pelín raru, cayendo onde nun debía, pude encadenala al tercer pegue, pegando un bon reposu dempués del bloque más durín y garrando un ritmu d'escalada curiosu na parte de resis de la vía, quedándome con ganes de probar el prósimu día la so variante que Santos casi fae al segundu pegue.

----------------------------------------------------------------------------------- 

18 d'Abril de 2023

Esti añu, colos proyeutos ya centraos pa la temporada de primavera-branu, sobretou nel Callexón d'Otura y na Cualladrona, tener un seutor nuevu como ye Porrimán, con una bayura de víes de sétimu grau enorme, ye una auténtica ayalga, tanto pa continuar xubiendo nivel, como pa confirmar y asentar el 7b/+ nun grau qu'entame a salir más cómodamente, durante esta temporada.

Sicasí, tovía nun probé dengún 7b nesti seutor, ya que teniendo seutor nuevu, préstame dir pali pali, tachando d'abaxo p'arriba, asina que tenía probada d'otru día sueltu, Proa Norte, un 7a+ mui a bloque con un pasu mui marcáu nun techu, que l'anterior vegada nun fuera a encadenar y que nesta ocasión, cola compaña de Rubén a los mandos, ficiéramos los dos nuna tarde mui provechosa.

Dellos escaladores (Lito, Silvia) nes distintes víes de Porrimán

Tovía tuviera va unos díes col collaciu Santos, nuna tarde na que veníemos reventaos de dos día anteriores apretando y aportamos al seutor, ensin tener una idega clara de pa onde díbemos metenos. Decidímonos por un proyeutu que sabíemos que saldría 7a+, lo que nun contábemos yera colo sucio de la vía y con una equipación que nun mos prestó nin media, aportando a cadena y desmontando por mor, de nun xuganos un mal vuelu y mancanos intentando encadenala.

Rubén echando un güeyu a la vía demientres Silvia afronta'l pasu clave

----------------------------------------------------------------------------

Finales del 2022

Morcín continúa espoxigando, en cuanto a les actividaes montañeres, tan sólo hai que ver la cantidá de coches cualesquier día na Collá, onde entama la mítica ascensión al macizu del Monsacru, tanto de montañeros como de corredores, ya que tenemos varies opciones circulares per tol macizu, según queramos facer más o menos kms o más o menos desnivel.

Vistes del Monsacru dende la bóveda de Porrimán

Asina que tenemos per un llau, un conceyu con muerte cerebral industrial, onde la mina pieslló va bona y malpenes queden negocios hosteleros, ganadería y les empreses asitiaes nel polígonu d'Argame y el restu son xubilaciones y cases vacíes, poro'l sentir de la xente morciniega ye de poca vida, siendo esti repunte deportista y montañeru pel valle de Riosa perimportante y los paisanos del llugar venlo a les clares, entrugándonos pelos pieslles d'escueles pol añeramientu.

Xavi faciendo un dos los 6cs durinos del seutor

Nós, llevantamos los hombros, camentando que si la xente los pueblos, ven con bonos güeyos a los deportes de monte que dan vida a los chigres y en particular a los escaladores, ya qu'enllenen les terraces enantes y dempués de l'actividá, paezme que debemos movilizanos y protestar por regulaciones inxustificaes como ye la de la utre, que ye la que más meses aféutanos y la que menos sentíu tién, ya qu'esti ave, nun tien dengún reparu en convivir colos escaladores y amás ta tan n'espoxigue la so población, como les escueles nueves que van abriéndose pel conceyu.

Encadenando'l primer sétimu de Porrimán con Viento de Cara (7a+)

 

Nesti sen, tuve nunes cuantes ocasiones a finales d'esti añu, trepando y conociendo'l seutor de Porrimán, una auténtica ayalga pal sétimu grau mediu-altu, con casi toles sos víes nesti intervalu, poro tampoco ye un seutor pa tolos públicos. Lo guapu del llugar, aparte del sitiu, ye la variedá de los agarres, con romos, chorrera, regletes planes, pinchudes, tacos... cada vía ye un mundu, asina que mil gracies a los equipadores, qu'al igual que na Cualladrona, ufrecen otru xuguete nuevu col so trabayu, perres y tiempu.

De lo pocu que probé, un par de 6c+ tan duru l'unu como l'otru y un 7a+ (Viento en Cara), quédome con esta última, la cuál pude encadenar va pocos díes, entrándome ganes de contalo per equí nuna breve reseña, dando valor al conceyu de Morcín y denunciando una vegada más, los pieslles ensin xacíu d'otres escueles morciniegues, que tan tarazando un futuru pa esti valle de Riosa, onde la escalada deportiva podría ser tou un referente turísticu.

Kíla esfrutando del seutor y de les vistes