9 de Payares de 2025
Track: La Pola (Somiedu) - Urria - Palombera - Redibobia - Veigas - La Malva
Munches ganes tenía de tornar per Somiedu, pero nos últimos tiempos nun alcontraba una ruta diérame pie a ello, sicasí, siempre tenía na tiesta dalgo tan cenciellu n'entamu, como yera, ensin más, da-y la vuelta a la xerra de Palombera, un cordal enmediu de los valles de Saliencia y el Val.le, poro asitiada nuna fastera increyible del parque natura.
Pa ello, vamos animamos namái que tres presones del grupu, poro quedamos en Balmonte, pa echar un cafetín y tiramos hasta la capital del conceyu somedanu, na Pola, dende onde per primer vegada, vamos salir de monte, lloñe d'aquel Desafíu Somiedu que ficiera nel 2022, cuando ya diba tando'l cadril drechu nes últimes.
Preparamos mochila y saldremos, nun día más bien fríu, pente les cais de la Pola pa garrar camín qu'ataya hasta la carretera qu'empobínase hacia'l Val.le, percorriendo dellos metros en cuesta, hasta salir a la manzorga onde garraremos l'antiguu y recién desbrozáu camín que tien de llevanos hacia'l pueblu d'Urria.
Esfrutando d'esti guapu camín y con vistes hacia val.le de Sousas y penriba al cordal de Peñalba, que conociéremos nuna increyible ruta dende'l Coutu va dellos años, pasando pel picu Gúa y L'Altu, vamos dir a bon ritmu hasta acolumbrar les primeres muries del cordal de Palombera so les cases d'Urria.
Travesaremos el pueblín, parándonos a echar una güeyada a los guapos horros teitaos y continuamos pel camín qu'empobínase hacia'l Val.le, desviándonos a la manzorga per otru ampliu camín que va llevanos hacia la mayada de Bustiel.lu, onde atoparemos la so guapa fonte pa continuar hacia les muries de la xerra de Palombera, siempre per senderu de monte baxo, ensin mayores problemes pa dir ganando desnivel.
La nuesa vista, ta ensin dubia puesta nel cumal de la Palombera, pero vamos pali pali y la llínea que nos llama con fuercia descomanada ye una evidente canal, penriba d'una pirámide caliza, poro averámonos hasta l'afloramientu calizu, tomando la decisión de bordialo pela mandrecha, algamando dempués una vira perfeuta colgada penriba la pirámide, que va llevanos pembaxo de delles peñes d'esi color carauterísticu del calizu somedanu mariellu, hasta la parte baxa de la canal de "Bustiel.lu".
Superada esta primer navegada pela canal, aportamos al altor d'unes guapes cueves, a los que nun mos arrimamos por falta de tiempu, viendo que la escoyeta d'entrar a la canal pela mandrecha fue correuta y agora namái tendremos que siguir dellos senderos que van dexanos avanzar y superar la mayor parte del desnivel de la canal, pasando pembaxo de formes calices de gran guapura.
La parte alta de la canal, enantes d'entrar a la boquera de la canal, tendremos los tramos más pindios y menos pisaos, pero ya de cara a continuar la ruta, acolumbramos un prestosu senderu colgáu que conoceremos a posteriori. D'esti xeitu, aportaremos con dalguna pinchada de la cotoya baxa a la boquera, teniendo enfrente nueso un paraxe únicu, de la típica xerra somedana llana no cimero, pero amuriada per tola so contorna con grandes muries calices y unes vistes brutales, destancando'l Cornón ñeváu.
Dicir que la fastera norte de la xerra Palombera ye "restrinxida" poro, vamos dir pel cresteríu más averáu al sur, navegando cenciello pente mayaos bien guapos y dalguna llombina hasta qu'averámonos a lo cimero del cordal, onde entraremos nun de los llugares más caóticos que percorrí enxamás, entrando en viesques d'ensueñu, enmediu d'enormes bloques cayios dende nun se sabe onde y torques tapecíes de mofu tan fondes, que nun queremos nin per un instante pensar en cayer o tener un accidente.
Dicir que nun recomiendo siguir esti tramu de track d'ida dende la boquera la canal hasta'l cumal de la Palombera, ya que pa percorrer malpenes 500 m en llínea reuta echamos casi una hora, afitando nuna peña un cumal sur, col envís de si nun alcontrábemos pasu hacia'l más altu, dexalo pa prau, pero a la fin, alcontramos un destrepe de la peña y aportamos per una viesca más amable, hasta una collada que diónos pasu a los 1635 m del cumal de la Palombera.
Ensin más, paramos lo xusto pa sacar una semeya y salimos d'ellí, pero esta vegada averámonos de vuelta a la canal y pesie a pisar un pelín más de tarrén "restrinxíu" nun vamos facer el fatu y salimos de la collada per una preciosa viesca con rastru de senderu y dalgún requexu de cuentu de Tolkien hasta salir a tarrén afayaizu pa parar a xintar sentaos nunes peñes.
Pararemos dalgo más de diez minutinos na xinta y tardaremos pocu más de media hora en tar de nuevu na boquera la canal, poro, nótese la diferencia. Sicasí, la cuestión ye si pisar un pelín más o menos esi tarrén "restrinxíu", p'ascender a esti guapu cumal somedanu, páganos la pena o non. Nós, tenémoslo claro, viendo'l nivel d'espoxigue y recuperación de la fauna osera n'Asturies, paezme pelín neciu siguir con estes restricciones d'años atrás, anque toca dicir que la mayoría de la zona de Palombera ye xabaz enforma y nun ye pa tol mundiu.
El casu ye que descendemos la parte alta la canal y como teníemos na tiesta, alcontramos esi senderu colgáu, que va dir llevándonos per sedos bien prestosos de colláu en colláu hasta dar viste al Val.le, quedándonos prendaos de toles vistes dende cumales como Valdecuélabre, La Franca, La Pena L.lana o más al fondu, tola muria de Pena Orniz o los míticos Albos piesllando'l Val.le.
Con cierta pena, abandonamos nuestru senderu colgáu y baxamos a las Veigas del Pando, onde ya garramos la pista que xube a l'antena y per camín tranquilu, vamos empobinándonos cuesta baxo hacia la foz de Ridibobia, que percorriera en non sin munchu sufrimientu na carrera somedana, en sentíu contrariu, no que sería la cabera xubida de la carrera, enantes d'aportar a Urria y a la meta na Pola.
Esfrutaremos d'esti camín más tranquilu, siempre col color de la seronda tardía na viesca y el ruxir del rigu de compaña, como non, echando un vistazu hacia Palombera, la qu'amuésanos a les clares que ye un llugar especial, xabaz y pieslláu pal humanu, pero d'una forma ñatural, casi animal, pero ensin imposiciones esternes a la propia ñatura.
Aportaremos a la mecedura del rigu La Bobia cola riega la L.lamera, que visitáremos nes distintes rutes al Tarambicu dende Veigas o dende'l Val.le per Mostachéu entrando pocu dempués a tramu asfaltáu y a la carretera del val.le Saliencia, que tendremos que percorrer durante dos kilómetros y mediu pasando per Veigas, onde si fuésemos bien de tiempu, podríemos parar a tomar cervecina nel chigre.
Como nun vamos mui sobraos d'hores y nun sabemos lo que nos espera per delantre, continuamos camín, hasta cruciar una guapa ponte sol rigu Saliencia, con tabayón y poza pal branu nun llugar guapísimu y garramos un ampliu camín, que va percorrer tola faldera baxa de la xerra Palombera, pembaxo de tolos llugares xabaces d'esti cordal que tantos llugares increyibles debe allugar.
A bon ritmu percorreremos el guapu camín pente Veigas y la Pola, teniendo dalguna revuelta con xubida, aportando en media hora a la fastera de la Malva, onde topámonos col ablucante canal d'agua que baxa dende'l Cintu al banzáu y con vistes a la Mochada enfrente nuesu, pa continuar en baxada hasta enllazar col camín accesible que vien dende la Pola.
El restu de patéu ya sedrá tranquilamente, llueu de facer la parte desconocía entainando, por si teníemos dalguna torga, diremos echando una güeyada a los distintos cartelos y miradores del camín, sobretou investigando la foz d'Aguinu, por si yera transitable pa una posible ruta que tenía na tiesta y con pocu más, aportaremos de nuevu a la Pola per esti camín tan transitable y cómodu pa tol mundiu.
En resume, completamos la circular a Palombera, con un total de 20,5 km con un desnivel acumuláu de +/- 1100 m nun total de 7 hores y 15 min, pudiendo variar esta ruta sin xubir a la Peña Palombera, pa nun andar xugando coles llendes restrinxíes del parque, pero eso ya, como siempre ye la escoyeta personal.
No hay comentarios:
Publicar un comentario