Val.le (Somiedu) - Mostachéu - Las Cruces - Tarambicu - L.lamera

21 de Marzu de 2021

Track: Val.le (Somiedu) - Mostachéu - Las Cruces - Tarambicu - L.lamera

Hai díes, nos qu'alboreces y ya sabes que va salir redonda la ruta. El día ta fríu en Xixón y la nuesa idega ye tirar a Somiedu, onde tará más friu tovía,. Según garres la furgoneta, ya atopes esi cielu azul de xelada mañanera y de día soleyeru pel monte, vas entrando en calorín según vas conduciendo y el picor d'una gran xornada de monte afáyate y alcuéntreste esfrutando de cada curva de la carretera.

Recoyes compañeros, tomes un cafetín en Balmonte y continues hasta'l Val.le, onde axúnteste col restu'l grupu, faciendo un segundu cafetín nel pueblu enantes d'entamar a caleyar. Preparámonos y salimos caleyando peles cais del Val.le, hasta'l barriu de L'Auteiru, onde garramos un camín ganaderu y vamos a por una evidente rampla penriba les cases del barriu.

Partimos como tantes vegaes del pueblu somedán del Val.le (1244 m)

La nuesa idega ye conocer l'accesu a la boca Mostachéu y llueu sobre la marcha percorrer tol cordal del Tarambicu que ya conociéramos dellos años atrás. Ye lo guapu d'Asturies, del mió país, un día tas nel oriente esfrutando de la llocura cabriega en Peñamellera y otru plánteste nel Occidente pa esfrutar del paisaxe somedanu.

Caleyamos nesti increyible día soleyeru hacia la Boca Mostachéu

Vamos garrando altor pelos Fontaninos, siempre per un marcáu senderu y la ropa va desapaeciendo de los nuesos cuerpos al empar. El día ta frescu, pero'l sol va caleciendo músculos y lo pindio del tarrén tamién aporta lo suyo, demientres paramos a alendar y a esfrutar de los cumales ñevaos d'enfrente... como la Pena L.lana, La Franca, Valdecuélabre, La Salgada...

Aportamos a la Boca Mostachéu pa continuar ascensu a la Pena la Xerra'l Robezu

Esfrutándo munchísimu de les envueltes del senderu, aportamos a la Boca Mostachéu, onde otru pequeñu mundiu somedán ábrese ante nós. Paramos, reunificamos y entamamos l'ascensión al monte que tenemos a la nuesa manzorga, nomáu la Pena La Xerra'l Robezu, anque en dellos mapes, atópase tamién como Pena La Estaca o Pena'l Cuetu... coses de la toponimia.

Facemos cumal na Pena La Xerra'l Robezu (1793 m)

L'ascensu, facémoslo per tarrén cenciello, siguiendo delles traces de senderu y evitando los tramos de ñeve más duro, alcontrándonos xelu, pero llibrando bien hasta los 1793 m de la Pena la Xerra'l Robezu, qu'amuésanos vistes a tol Val.le, acolumbrándose al fondu Los Albos, tola muria de Pena Orniz y tol cordal del Tarambicu que vamos percorrer.

Descendemos a los L.lanos de Mostachéu

Malpenes paramos 5 minutinos y baxamos un pelín más al oriente, pa nun topar ñeve tan duro, descendiendo hasta los L.lanos de Mostachéu, llugar onde entamaremos el siguiente ascensu hasta L'Altu Las Cruces per una evidente canal.

Ascendemos hacia l'Altu Las Cruces

A bon ritmu, continuamos hasta l'Altu, onde'l Picu Las Cruces recíbenos con una preciosa y evidente placa de ñeve duro p'aportar al so cumal. El resultáu ye que dos compañeres prefieren descender hacia Vegarrionda y el restu vamos abrir buelga a guelpe de punterazo cola bota, hasta algamar los 1796 m del picu Las Cruces.

Cumal del Picu Las Cruces (1796 m)

Con cuidadín, nos tramos más espuestos, voi faciendo les travesíes de peña en peña, pasando a la parte alta, onde tenemos más yerba y el xelu nun tien tanta presencia. Kíla, como siempre, va de risa penriba la ñeve, casi corriendo demientres los inútiles humanos andamos sollertes de nun resbariar p'abaxo.

Baxamos dende Las Crucies hacia la Vegarrionda

Contentos pola guapa ascensión, vamos descender hacia'l occidente, pa ganar una vallina con vistes hacia la Veiga  y L.laguna de Fuentes. Magar d'un tramín herbosu y cenciellu, vamos entrar na parte final nun marabayu de roca y ñeve, esfrutando de pasos penriba de ñeveros, pontes de ñeve, aguyes de roca... una maraviyosa llocura de parque d'atracciones hasta axuntanos tol grupu de nuevu en Vegarrionda.

Baxamos hacia Vegarrionda pa siguir hacia la Veiga Fuentes

Dende Vegarrionda, pasaremos ya a la parte tranquila de la ruta, onde ya podremos avanzar a bon pasu, pero non por ello menos guapa, travesando hacia la Veiga Fuentes, un llugar bien guapu que ya descubriéramos va años, echando una siestina a la vera la L.laguna Fuentes.

Increyibles vistes pasando pela veiga la L.laguna

Daquella, baxáremos penriba la L.laguna nuna amplia envuelta pela cuesta Las Duernas, pero esta vegada vamos travesar tola veiga y ascender pegaos a les peñes de los Bernaldeos, saliendo per una vallina a Los Estacos, una amplia collada con vistes al Picu'l Tarambicu.

Facemos travesía pelos Estacos hacia'l Tarambicu

Equí, aparte de descender un pelín hacia una fondigonada pa llibrar la travesía per ñeve más duro, tengo qu'animar al grupu p'ascender al picu'l Tarambicu, prometíendo-yos que les vistes pagaben la pena. La verdá ye que veíase más lloñe pero a un ritmín d'apertura de buelga mui curiosu, plantámonos en menos de media horina nel cumal de 1916 m del Tarambicu.

Encumamos el picu'l Tarambicu (1916 m)

 

Les vistes son d'otru mundiu, teniendo una circular enorme y ñevada ante nós, topándonos con más vieyos conocíos como les peñes de Michu o Prieta o la xerra Los Bigaros, asina como tol macizu de Penubina, coles fasteres más xabaces de los Picos del Fontán o de la propia Penubina.

Descendemos hacia Las Bustariegas

Descenderemos un pelín a xintar, dándonos un merecíu descansu magar de 4 hores de ruta, pa continuar
pela fastera más oriental del cordal, siempre echando una güeyadina hacia los puertos de Rodrigueru, los cuales tenía ganes de conocer, pero veo que nun ye demasiáu atrautivu, con tanto monte baxo y les brañes esistentes mui desaniciaes nel intre.

Continuamos camín travesando'l cordal con vistes a Rodrigueru y el val.le de Saliencia

Poro nun vamos perder munchu tiempu y continuaremos sele pel Bustil.lu, percorriendo'l restu del cordal, hasta asomar el focicu, penriba del val.le de L.lamera, oxetivu pa la nuesa baxada. L'anterior vegada aportáremos dende la Veiga Fuentes per Vegarrionda a la guapa braña de Campos de Bobia, pero esta vegada vamos descender a pinchu hasta'l Cantu Bobia, onde empatamos col camín que descenderá hacia la Braña de L.lamera.

Baxada a pinchu hacia'l val.le de L.lamera

Ensin mayores problemes, qu'esfrutar del bon camín hacia L.lamera, conoceremos la braña y daremos vista al tabayón de Augameixa que tien bon caudal, anque les semeyes nun amuesen lo guapu del saltu. Dexaremos atrás la L.lamera, faciéndose pelín pesada la baxada per pista formigonada y de sópitu vamos alcontranos col pasu de Redibobia, pente la L.lamera y el Val.le.

Conocemos la foz de Redigobia enllazando hasta'l Val.le siempre n'ascensu

Esti pasu, nun ye otra cosa qu'un bon camín carreteru que traviesa la foz del rigu Bobia pero que pa la desesperación de les nueses patuques tien un ascensu d'unos 300 m de desnivel. Menos mal que'l llugar ye preciosu y l'arribada al Val.le ye ablucante col sol rellumando tolos cumales ñevaos.

En resume, ruta imprescindible, con milenta variantes, cumales, vegues a conocer per tol cordal, saliéndonos el nuesu percorríu nun total de 17.8 km, con un ascensu acumuláu de 1430 m nes 7 hores y media de total esfrute somedán.

Camudando'l Camín nel Val.le de Somiedu