24 d'Ochobre de 2025
Track: Avilés (Avilés) - Costa de Castrillón - Altu'l Pravianu - El Prau'l Marqués (Castrillón) - Piarnu - Miranda (Avilés)
Dempués de la selmana anterior onde salíemos de ruta costera en BTT pela fastera occidental de Gozón, esta vegada vamos empatar les costes d'Avilés y Castrillón col envís, de tornar pelos sos altos, tachando ambos techos de conceyu, dando-y d'esta mena un bon repasu a ambos conceyos tanto na costa como nel so interior.
Pa ello, aportaremos al aparcaderu del centru Niemeyer n'Avilés, so les diez y media la mañana, preparándonos de mochilles, dalgo de xinta y les bicicletes, cruciando la ría d'Avilés y saliendo pel paséu "marítimu", a tramos pela carretera y otros pela acera, hasta metenos nel muelle de Raíces, onde vamos caleyando hasta aportar a San Xuan, onde averámonos hasta la punta'l Gallu pa ver el faru San Xuan, onde tuviéramos va una selmana.
Dende equí meterémonos pela sienda pente les dunes que va paralela a les
sableres de San Xuan y L'Espartal, averándonos pali pali a la población
costera más importante de Castrillón, como ye Salinas, pudiendo
continuar pel paséu a ritmu seliquino, pa nun molestar a los caleyantes y
tamién pa esfrutar de tan guapes vistes que llevamos teniendo nesti
primer tramu seliquino de ruta costera.
Saldremos de Salinas continuando hacia'l túnel d'Arnáu, travesándolo apriesa y saliendo a la so guapa sablera, pasando al llau de la mina y tomando'l primer entepechu perserio saliendo de la mina pela senda norte hacia los cantiles d'Arnáu, que llevarános penriba los parés y bloques d'esguilada, hacia la rasa que tien de facenos desdender al pueblu costeru de Santa María.
Travesaremos la bocana del rigu La Ferrería na sablera de Santa María y tocará pegar un bon achuchón en xubida hacia la punta Llada, pasando al llau del camping, continuando n'ascensu hacia la punta L'Escayu, llanenando un pocu hasta baxar a la sablera de Baínas, pa continuar otra vegada n'ascensu hacia les cases de Llinares, onde tendremos un tramín de quebrapates de rasa-sablera pasando per Munielles y el Cordial, parando pocu dempués nel mirador de Vidrias, onde paramos a picar daqué.
Con grandes vistes hacia'l Cabu Peñes y tola costa de Castrillón y Gozón, descansamos unos minutos, pa continuar darréu a la fin llaneando un pocu pela rasa penriba la islla La Deva, hasta dar col finxu xeodésicu del Sablón, pasu previu a la baxada hacia'l sablón de Bayas, al que descenderemos per camín perdivertíu na primer parte, teniendo que portiar la bici nuna trialera pente cotoyes, hasta algamar ún de los paseos en bici más prestosos d'Asturies penriba la sablera de Bayas.
Travesaremos pelín más de la metá de Bayas, entrando nel conceyu de Sotu'l Barcu y saliéndonos pel valle del rigu Ranón, parroquia a la qu'entraremos pel barriu de Carbayal, siguiendo pela As-318 hasta Figueras, onde pocu más alantre escaparemos de la carretera pa metenos per pistes de tierra, siguiendo dellos finxos del camín de Santiagu , averándonos al monte la Granda, xustu enantes de descender a L'Altu'l Pravianu, onde travesaremos l'autovía'l Cantábricu.
Llueu de travesar l'autovía saldremos a la parroquia de la Corrada, pasando per Folgueras, La Corrada y La Ferrería, onde atopamos un perguapu centru social ya en xubida hasta'l Carbaín, onde tendremos una baxada llarga hasta'l ríu la Ferrería, onde entamaremos un puertu hacia'l nuesu oxetivu como ye l'Altu'l Prau'l Marqués na xerra de Pulide.
La verdá ye que tuvimos que tomalo con calma, porque fue una llarga xubida pa lo que tamos avezaos a facer en BTT, pegando una primer parte de más desnivel hasta Sombréu, na faldera la xerra Pulide, continuando picando dalgo menos, hasta entrar de nuevu nel conceyu de Castrillón al altor del pueblu de Pulide, faciendo la cabera revuelta hacia la parte alta, onde atopamos el finxu xeodésicu del Prau'l Marqués a 438 m.
Tamos nel techu de Castrillón, dientro la xerra Pulide, cordal n'arba pente los conceyos de Sotu'l Barcu, Castrillón, Candamu ya Illas, anque nel intre namás interesános esti puntu de 438 m, anque non podemos colar ensin dar un paséu pela guapa area recreativa hasta la faza más nortiega na que tendremos vistes de la costa de Castrillón, Sotu'l Barcu y Muros.
Dende l'altu, garraremos un camín hacia'l noreste pel qu'entainaremos a descender hasta la braña de Buxande, pa continuar per carretera cruciando'l rigu Raíces hasta'l valle, per onde pasaremos per varios barrios de la guapa parroquia de Piarnu, la cual dexaremos pa garrar la carretera hacia la Cruz d'Illas, en pelín d'ascensu hasta entrar nel conceyu d'Avilés, averándonos hasta la urbanización de L'Alfaraz, onde asítiase'l finxu xeodésicu de la parroquia de Miranda y techu del conceyu d'Avilés con 127 m.
Coles mesmes baxaremos pel Pelame, hacia'l monte Vallín penriba la Carrionina, travesándolo enteru, viendo qu'erróneamente nun ye techu d'Avilés, como pon en dalgún mapa modernu de Google, escaecíendolu dafechu, pa descender per L'Aceba, hacia los parques de la Madalena y la Ferrera, tornando de nuevu hacia la ría d'Avilés cola vista puesta nel aparcaderu del Niemeyer, onde tenemos la furgoneta y el nuesu puntu final de ruta.
En resume, perguapa circular, conociendo tola costa d'Avilés y Castrillón, enantes de sufrir un pelín hasta lo más altu de Castrillón, siendo munchu más seliquina la vuelta hacia Avilés, completando un total de 53,3 km de percorríu, con un desnivel acumuláu de +/- 1020 m nun total de 5 hores y 50 minutos de pedalaes.
No hay comentarios:
Publicar un comentario