martes, 18 de mayo de 2021

Col.lanzo (Ayer) - Pinganón del Caideru

16 de Mayu de 2021

Track: Col.lanzo (Ayer) - Pinganón del Caideru


Finde gafu no meteorolóxicu, pero teníemos ruta programada y yera la vuelta de Benjamín, tras el parón pandémicu, asina qu'una vegada que taba vacunáu, había que salir a dar un pateín y conocer dalguna cosina nueva.

Nesi sen, dióme por dir a conocer el Pinganón del Caideru, poro preparamos varies opciones y plantámonos el domingu a les 9 la mañana en Col.lanzo, nel conceyu d'Ayer. Anímense Montse y Jorge, aportando al grupu yo les dos perrones: Kíla y Xena y la mió cansada presencia.

Semeyina nel Texu de Santibanes

El día ta murniu, pero paez que va aguantar, asina que salimos tranquilamente de Col.lanzo caleyando pela carretera primeru hacia Santiabanes de la Fuente, onde facemos semeya de rigor col texu y siguimos carretera hasta'l pueblín de la Fuente, con pocu espaciu d'apartaderu polo que dexar los coches en Col.lanzo ye la meyor opción.
Siguimos de la Fuente per pista hacia la Melendrera y Pandián

De primeres, tendremos pista de formigón, mui pindia y pesada, pero al altor de la Melendrera tornarase de tierra y con más revueltes dirá faciéndonos avanzar hacia Pandián. La humedá del día y una temperatura agradable fainos pasar calor pero'l verdor de la vexetación nesta primavera fai peragradable'l caleyar.

Continuaremos camín peles cabañes de Patateru y Carricia hacia'l Caideru

Nuna charra distentida, vamos pasando llugares bien guapos, nun camín más tranquilu pa lo que tamos avezaos nel GM Xuan de la Borrina, poniéndonos en dalgo más d'hora y media de camín na cabaña que d'accesu hacia'l Pinganón del Caideru.

Senderín hacia'l Pinganón del Caideru
 
Pasaremos de la pista a garrar un senderín al llau d'un enorme pláganu y al pocu ya podemos sentir la cayida d'agua del Pinganón del Caideru. Aportaremos al tabayón y sorprende muncho lo guapu del llugar cola cayida d'agua pente dos peñones enormes... guapu enforma.

Pinganón del Caideru

La mayor parte de la xente, suel dar la vuelta pel mesmu sitiu o continuar ruta hacia cotes más altes como el Cuetu Santibanes o Cuetu Cuchu pero'l día nun ta pa ello y vamos ser seliquinos pa la primer ruta de Benjamín, así que continuamos per un senderín dende'l Pinganón hacia'l Preu'l Monte penriba del Cotu Saliencia.
 
Continuamos ruta hacia'l Preu'l Monte y Penducarril

Nun son les pistes de xubida, pero vamos siguiendo'l senderín con cierta comodidá, teniendo dalgún tramín más cerráu hasta salir al Preu'l Monte, onde garramos un camín con bona caxa qu'empobinarános a les Cabañes de Penducarril.

El verdor de la primavera presente en tolos caminos que vamos conociendo

Nestes cabañes hai varies opciones y liámonos un pocu, pero lo meyor ye garrar el camín a la manzorga de les cabañes y baxar hasta una amplísima pista que vien dende l'otru llau del valle Yanos. Una vegada que garramos esta pista, ya tendremos un cómodu caleyar en llanéu y dalgo de xubida pasando pel Preu'l Riu y el Vachín hasta aportar en xubida a Llanafermos.

Les vistes hacia'l picu L.lamas llámenmos l'atención munchísimu demientres facemos camín

Demientres caleyamos llámanos l'atención la vista del Picu L.lamas na fastera del valle de Ruayer, al cual va tocái visita a nun tardar. En Llanafermos, tenemos que tar atentos de nun continuar pela pista en xubida hacia Pandián y ya entamaremos la baxada final pasando al llau d'una cabaña per un guapu camín pel qu'algamaremos la pista de xubida xustu en L'Escalar.

Tramu final dende Llanafermos hasta la Fuente cola variante del camín hacia L'Escalar

Dende equí, ya fadremos de nuevu, la pista de baxada hacia la Fuente lo menos penosu posible y perpasaremos de nuevu'l pueblín, el miraor de la Pandie.la, onde esta vegada ensin borrina paramos un segundu y carretera hasta Col.lanzo onde finalizamos esti pateín mañaneru.

En resume, ruta mañanera pa conocer esti hermosu llugar como ye'l Caideru, faciendo un pocu de patuca nos sos 12.8 km de percorríu, con un desnivel positivu acumuláu de 700 m y una duración garrando los caminos correutamente que nun debería llegar a les 4 hores.

Camudando'l Camín con Benjamín tornando al monte

No hay comentarios:

Publicar un comentario