Track: Arenas (Cabrales) - La Trenosa (Cabrales)
Munches vegaes cuando facemos esnalar el maxín en suaños o sobre un mapa, formamos na nuesa mente una ruta increyible, sobretou si tenemos la posibilidá de facer una travesía. Esto suel pasar casi siempre na Travesera y esti añu los dos puntos a xuntar yera'l pueblu d'Arenas en Cabrales y el refuxu de la Trenosa.
D'esta miente, tracé'l percorríu de la ruta, per bones siendes como ye la senda Caoru hasta Tielve, contando llueu con una parte más abegosa nel traviesu de la Peñe Maín. Así, sol mapa paecía una ruta de lo más prestosa, ensin albidrar realmente cuala diba ser la dureza a superar, anque nos preparativos pa la ruta ya camentaba la kilometrada y sobretou un desnivel descomanáu.
Entamamos en dos grupos n'Arenas (147 m)
D'esti xeitu, presentámonos a almorzar n'Arenas, faciendo tol grupu'l camín davezu dende Xixón pela autovía'l Cantábricu hasta Posada. Llueu tomaríen direición a Cabrales al traviés del Altu de H.ortigueru, pa llueu baxar a los pueblos de Canales, Carreña, Poo y a la fin Arenas, onde alcuéntrense nel almuerzu con Fernan y Bittor que veníen de Colombres y con Pau y conmigo que tábemos dende'l día anterior nel pueblu.
Pasando unos venti minutinos de les 8 la mañana, entamamos a caleyar el grupu de muyeres del Xuan de la Borrina, con Charly, Dani y yo, demientres el restu'l grupu diba dexar los coches a Poncebos pa les distintes retiraes de la Travesera.
Ascendemos per Caoru hacia la mah.ada de Tambrín en Portudera
Adelantámonos unos minutos, ya que sabemos que los paisanos diben garranos durante l'ascensu hacia'l cordal de Portudera. Amás, asina vamos garrando calecer nes pates pali pali, travesando'l canal d'agua que vien de Poncebos upándonos hacia'l colláu Castiellu.
Más menos nesti colláu Castiellu (405 m) axuntámonos tol grupu (12 montañeros) y entamaremos una xuba ensin descansu, per munchos retreites, hacia la mah.ada de Tambrín primeru y dempués al colláu Tambrín (978 m).
Travesamos Portudera hacia les cotes más altes del cordal
El día dende los primeros minutos pinta calurosu, pero en tol ascensu a Tambrín, tenemos unes ñubes fines que tapecen el sol y bien que lu agradecemos. De les vistes nel entamu de Caoru hacia'l pueblu d'Arenas y cordales más costeros como'l de H.uanrrobre o Cuera, pasaremos a centranos nel verdor de los milenta pastos de Portudera.
En Tambrín xubiremos hacia la Vega'l Carmelo, pa baxar un pelín hacia'l Vau Las Cuerras, onde alcontrarémonos con una bona fonte, onde recargar d'agua, ya que'l día tórnase cada hora más sofocante.
Dende'l Vau Las Cuerras, ascenderemos pel Cayetón hacia'l puntu más altu de la Sienda Caoru, nel colláu Posadoriu (1230 m), pasando penriba del perguapu mayáu de Tordín y llugar onde tendremos les vistes tan deseyaes por munchos del grupu, ya qu'apaecerán los tres macizos en tola so grandura, destacando como non el central col "xefe" nel centru la semeya.
Aportamos al colláu Posadoriu ascendiendo a la Cabeza Blanca (1389 m)
Tando en Posadoriu, nun m'aguanto y escápome con Richar hasta la Cabeza Blanca, que tien l'honor de ser la cota más alta de tola xerra Portudera, anque hai que dicir que nin muncho menos ye'l cumal más guapu, sacante de la vista sol mayáu de Tordín, poro destacaremos pa otra visita a Portudera los cumales xabaces de la fastera occidental (L'Aliga, L'Ariscu Sonllanu, Crimienda...)
Dexamos la Cabeza Blanca, colos sos 1389 m coronaos per una especie de canastes a mou d'antenes y un garrapiellu de mosquitos repunantes, pa facer el descensu hacia Tielve, intentando recortar a los collacios del grupu el tiempu perdíu nesti ascensu.
Descendemos hacia Tielve pasando pela braña de Valfríu
Pa ello, aprovecharemos que'l restu'l grupu va facer una envuelta mayor hacia la cruz del Entreh.anu y nós tirarémonos per un sedín nas Conchas de Tordín, col envís d'enllazar col restu'l grupu na braña de Valfríu onde caltiense bona parte de les cabañes en mui bon estáu.
Ensín mayores problemes, sacante dalgún pasu nel que perdemos los senderos y toca travesar dalgún felechal, garramos al restu'l grupu pa facer un descensu más llargu de lo qu'apetez dende Valfríu hasta Tielve, onde tocaba pegase un descansu merecíu con xinta y cerveza bien fría.
Dicir que na mió cabeza barruntaba'l llegar fuera de control como los ciclistes, jeje. Y ye que dende la parte alta de Portudera, mirar el reló taba siendo una costante, calculando los tiempos y cómo díbemos p'aportar a la cena nel refuxu.
Aselamos en Tielve refrescándonos enantes de retomar la ruta hacia Maín
A les dos en puntu tábemos en Tielve, tomando una cerveza lo más fría posible y picando dalgo na terraza d'un chigre qu'amáblemente dexónos xintar los bocatas ellí, si dexábemos too como taba. Así son los cabraliegos, xente serio, pero atentos pa colos montañeros.
Amás, sabíen lo que veníemos sufriendo a estes hores con un calor qu'aplastaba. Lo normal, magar de 6 hores de ruta ye tocar a so fín, xintar y pa casina, pero nel intre, en Tielve, entamaba otra ruta prácticamente, defechu teníemos que superar más menos el mesmu desnivel acumuláu que ya llevábemos nes pates y esti superaba los mil metros.
Media horina de descansu cola xinta y siguimos alantre, viendo que les cares van siendo de cansanciu. El mió esmolecimientu va a más, ya que les ramples hacia'l mayáu de Vierru, son infernales y el sol aprieta enforma, confirmando que vamos dir pillaos de tiempu y vamos a sufrir munchísimu pa travesar la Peñe Maín.
Sufriremos col calor nel ascensu a Vierru
Aún así, la xente sigue alantre, nun queda otra, y esfrutamos de les vistes del imponente Cuetu Vierru, el cual perpasámoslo pela so manzorga, escucando per onde puede tener ascensión y la dificultá d'esta y viendo que pela so cara sur ya dafechu imposible ya que desploma que mete mieu.
De les pistes hacia'l Vierru y les campes del mayáu, siguiremos camín alantre hacia la fondura del monte l'Arandanera, onde toparémonos con ún de los tramos más repunantes de superar, ya que los ablanos tapecerán el senderu a siguir y mermarán les nueses fuercies nuna dura llucha.
Aportaremos al colláu La Mesa ascendiendo dempués a la Cabecina Quemada
Saliendo d'esta ablanera, alcanzaremos un par de colladines continees, les de Las Cuerrias d'Abaxu y Arriba, pa salir de la borrina que metiérase na viesca, hacia'l colláu la Mesa, onde tendremos perguapes vistes del macizu d'Ándara.
Equí, Natalia, Zori y Pau, deciden que ya tuvo bien y con razón, decidiendo descender poquín a pocu y obviar l'ascensión a la Cabecina Quemada onde alcuéntrase'l vértice xeodésicu de la Peñe Maín. De primeres, decido quedar con elles, pero al final garren mi GPS y xubo a la carrera detrás del restu del grupu pa encumar el puntu más altu de la Peñe Maín.
No más alto de la Peñe Maín (1613 m)
Les vistes hacia'l Central... nun hai que describiles, ya que cualesquier montañeru sabe qu'un de los meyores y más cercanos miradores del Picu y tola redolada alcuéntrase nesta peñe de calter ganaderu, la cual regálanos un pocu d'aliendu nun día de cansanciu total pa tol mundiu.
Dende equí... baxaremos al alcuentru de les moces, que fueron descendiendo llueu de descansar un pocu ya que físicamente y mentalmente vamos toos derrotaos. Na baxada de la Cabecina Quemada, liarémonos un pocu y tendremos que restolar pente los h.oos Los Moscadorios la ruta correuta pa empatar col senderu bonu.
Descensu de la Peñe Maín hacia la Robre pasando per La Sotarraña
Una vegada que tamos bien asitiaos, aportamos a un crucie de siendes y nun alarde de bona orientación, métome per onde nun ye y lloñe de recortar tiempu por nun arrodiar nel accesu a la mah.ada de Soterraña, metémonos per una vallina que da pasu a un tramu abegosu siendes perdíes con un descensu más pindio hacia la última cabaña de la Soterraña.
Los ánimos nun tan pa munches flores y acabo de sumar una muezca más al grupu, poro pelín cabreáu guío al grupu al traviés del pequeñu y guapu canalizu que baxa hacia la Robre, adelantándose Fernan p'avisar al guarda del refuxu de que tamos en camín.
Paez mentira, pero los mios camientos tan cumpliéndose y son pasaes les 7 y media de la tarde. Equí, ya tengo en mente que da igual, nun se puede apurar a naide... la ruta ta siendo escesiva y de lo únicu que se trata ye d'aportar al refu y cenar cuando seya y lo que seya... anque toca tirar de lo que llevamos nes mochiles.
Garraremos el camín hacia la Trenosa pente la borrina
De la Robre, garraremos la pista clásica hacia'l aparcaderu de la Fuente'l Monte, baxo'l colláu de Pandébano, onde entamaremos la más penosa de les xubides del día hacia'l refuxu de la Trenosa. Dicir que sí esti entepechu pela Vega les Cuerres, fué'l remate pa munchos de nós, que llegamos na llende física y mental al refuxu.
Dar les gracies a tolos collacios del GM Xuan de la Borrina, pol inmensu esfuerzu nesta primer estaya de la Travesera 2014 - 2015, qu'a lo postrero dexó tocaos a gran parte del grupu pal restu de la Travesera.
En resume.... durísima ruta que llevónos a conocer dos de les xerres baxes n'altor pero altes en belleza del macizu central y de calter cláramente ganaderu: Portudera y Peñe Maín. Los datos nun pueden ser más amoladores con 22 km de percorríu en 12 hores nes que tuvimos que superar casi 2500 m de desnivel acumuláu positivu.
Una xatada en toda regla... lo dicho xente... sois los meyores... anque protesteis.. jejeje.
Camudando'l Camín en fasteres ganaderes de Picos
No hay comentarios:
Publicar un comentario