miércoles, 28 de noviembre de 2018

Áliva (Camaleñu) - Paredón d'Albu - Moñetas - Peñe Castil - Terenosa (Cabrales)

7 de Setiembre de 2018

Track: Áliva (Camaleñu) - Paredón d'Albu - Moñetas - Peñe Castil - Terenosa (Cabrales)



Magar de dos díes cola meteo repunante enforma, alborecemos nel hotel-refuxu d'Áliva con un día espléndidu nel que'l sol rellumaba nun cielu azul, que como non, aumenta les ganes de facer otra xornada de monte de restallu.

Necesitábemos calecer pa siguir alantre cola circular, ya qu'ayeri llegábemos pingando, siendo ya cuatru les estayes de patéu per Picos y la musculatura sufre más con condiciones más gafes. Poro, esti sol, esti calorín mañaneru y ponese a almorzar como xabalís mirando pal calizu cada vegada más seco, ye una auténtica inyección de fuercia y motivación pa lo que teníemos per delantre.

Quiciábes, ye la estaya más dura, penriba'l mapa, xunto cola que teníemos planiada p'ascender a colláu H.ermosu, asína qu'entamamos con un caleyar sele, col envís de calecer patuques baxando pela Llomba'l Toru hacia'l meyor puntu pa cruciar el ríu Duh.e.

A la fin salimos con un día soleyeru d'Áliva (1668 m)
Una vegada que tamos nel macizu Los Urrieles, entamaremos a ascender con calma, pela canal que va a les antigües mines de la Marta Navarra. Esta amplia canal, alcuéntrase pente los espolones que caen del cuetu H.uan la Cuadra y del Paredón d'Albu.

Nun tengo visto munchos tracks d'ascensiones, dende equí, hacia'l cordal de H.uan la Cuadra, pero sé de bona tinta qu'al menos accesu dende la h.orcada Los Glayos tenemos, ya que va dellos años baxáremos per ellí dempués d'ascender polas Moñetas a L'Escamelláu.

D'otramiente, la idega ye pasar pente'l Paredón y el Cuetu, asina que sin referencies vamos ascender per onde meyor vamos viendo, alcontrando un senderín cómodu una vegada que nos metemos dafechu na canal, que paez venir dende más al sur que dende la nuesa entrada dende'l Duh.e.

Calecemos pates p'ascender hacia'l cordal de H.uan La Cuadra

Nun ye un terrenu difícil, pindio abondo, pero tan sólo hai que dir negociando la xubida lo más amañosa posible, hasta la parte alta onde la canal va zarrándose y tenemos que dir superando delles terraces con dalguna trepada cenciella.

La parte más guapa, la tendremos nun par de vires y na trepada final hacia l'hombru SO del Paredón d'Albu, onde aportaremos a un guapu mirador so L'Escamelláu y teniendo tres d'él tola faza E del macizu d'Ándara dende'l Boru hasta'l Cortés pasando peles cotes más altes del H.ierru y Morra Llechugales.

Negociamos la canal hasta'l final con dalgún trepe prestosín

Va un ratín que'l borrín anda xugando con nós, esnalando arriba y abaxo, dándonos a entender que nun vamos tener esi día tan afayaizu pa los nuesos intereses. Poro, nun perdemos tiempu, trepamos un paré pelín vertical y accedemos al cumal del Paredón d'Albu de 2129 m, faciendo unos 800 m de desnivel direutos dende'l Duh.e.

Les pates, nun quintu día per Picos, ya van fines, fines y pesie al mochilón que llevamos enriba, tamos permotivaos pa lo que nos queda per delantre. La idega, ye travesar tol valle Las Moñetas y acceder a la Peñe Castil pela fastera Sur, siendo esti un plan apetecible pa cualesquier montañeru que se precie y nós, con borrín o sin él, vamos dir a por ello o al menos intentalo.

Magar d'unes duldes d'aniciu so la manera de descender del Paredón, decidimos crestiar hacia'l colláu col cuetu H.uan La Cuadra. La primer parte sedrá perguapa con pasinos dalgo aéreos hasta aportar a una llambria na que tendremos un destrepe pelín finu, pero que faise bien pa dempués baxar un pocu hacia'l norte y siguir hasta los 2064 m del colláu.

Cume nel Paredón d'Albu (2129 m)

Dende riba, ya albidráremos una especie de senderu que nos diba facer pasar penriba l'espolón que baxa hacia'l Pozu Las Moñetas. Esto díba permitinos nun perder tanto altor y percorrer un trazáu que ficimos casi ensin querer al mesmu tiempu, Ana y yo, sólo con quedanos mirando pa tol valle.

Ye más, quedamos paraos penriba l'espolón y dimos como finxu de referencia una morra con un calter especial, por mor de tener el cumal herbosu y la so paré sur con un manchón prietu encováu. Paez un tontería, pero dir sin track nesta fastera tan caótica, fai que tengas que marcate delles referencies y non perdeles y más cuando'l borrín anda xuguetón.

A l'aventura nel valle Las Moñetas

Asina lo fadremos, faciendo la baxada siguiendo'l senderu penriba l'espolón y llueu siguiremos delles traces de pasu de robezos que van dexanos nel H.ou Sin Tierra, onde decidimos parar un ratín y picar dalgo ya que van hores de patéu y la necesidá de xintar ye grande.

El borrín sigue a lo suyo, poníendolo difícil, pero tamos xusto onde teníemos pensáu. Ye peragradable compartir xornaes de monte con una compañera como Ana, enxamás hai dubia con ella, dexa facer a un alloriáu del monte como yo y si tien d'aportar al alderique de per onde tiramos... aporta claridá y ánimu pa siguir siempre alantre.

Travesaremos el H.ou Sin Tierra y entamaremos una ascensión que tien de llevanos a bordiar la nuesa morra pela manzorga. Si echáis un vistazu a dalgún mapa, esta morra ye una cota de 2065 m que d'accesu al H.ou L'Arena.

Vamos dando vista al oxetivu del día... la sur de Peñe Castil

Como teníemos na tiesta, namás qu'arrimámonos a la pedrera d'ascensu hacia la morra, vamos alcontrando terrenu pisáu, quedando los dos como diciendo que vaya güeyu gastamos jeje. D'equí p'alantre siguimos esfrutando de la travesía y ascensión penriba la morra, ya con munches ganes de dar vista al nuesu oxetivu.

La xugada saliónos perfeuta y tamos xusto nuna gargantada que separa el h.ou L'Arena del H.ou Los Machos, lo que permítenos crestiar penriba d'ella y nun tener que descender a dengún de los dos h.oos, dándonos muncha tranquilidá de nun facer más metros de desnivel.

Nun pueu parar de mirar a la enorme llera y ñeveru que ye la canal sur de Peñe Castil. Toi casi nerviosu, ya que facía tiempu que tenía ganes de conocer esta ascensión, poro salimos como tiros hacia la canal, demientres el borrín sigue a lo suyo, dándo-y un toque máxicu a metese per un llugar desconocíu pa la cordada.

Garramos el canalón sur d'accesu a la Peñe Castil

Aportamos a la canal y vemos que la primer parte sedrá tranquilina, yendo penriba de bloques de grandes dimensiones, llibrando'l ñeveru pela mandrecha hasta qu'aportamos a la estrechez de la canal, onde la piedra disminuye de tamaño y toca facer tracción nos palos tirando de tola fuercia que va quedándonos.

El final de la canal enantes de zarrase, tien ciertu peligru ya que la paré de la mandrecha ta podre y tamos xustu nuna bolera, poro intentamos nun agarranos a denguna presa y tiramos más de pierna hasta topanos con dos opciones.

Tanteamos una primera que mirando pal gps, llevaríanos a una llambria trepable que daría pasu a ganar l'arista O, la cual bon borrín nun ye mui aconseyable, poro paeznos más atrautiva y afayaiza, la trepada a la mandrecha per un canalizu dalgo vertical.

Trepamos pel canalizu superior pa dar a l'arista sur

Guardamos los palos y entamamos les sucesives trepaes, cada vegada más divertíes. Miro p'abaxo pa controlar que tou va bien y sólo soi a ver una sorrisa de felicidá d'Ana. La collacia va pasándolo xenial, asína que siguimos falando animósamente demientres facemos una preciosa vira arrodiaos por aguyes calices y llambries verticales per tolos llaos.

Que veamos, solo tenemos una salida, acabar la vira a la mandrecha y enllazar con un canalizu superior qu'amuésanos un final feliz pa esta pequeña aventura. Treparemos a bon ritmu, siempre sollertes a nun tirar piedres ya que tamos nun tarrén alpinu mui rotu y cuando dámonos cuenta, aportamos a la crestería final que da pasu hacia'l cumal de la Peñe Castil.

Los caberos pasos pela aérea crestería ye como un pequeñu agasayu más de la Peñe Castil y cuando aportamos al cumal d'esta peñe tantes vegaes ascendía, ye como si fuera la primer vegada que tuviéramos nos sos 2444 m.

Cume pela fastera Sur na Peñe Castil (2444 m)

Nel intre, tomen más fuercia que nunca y tol xacíu del mundiu, pallabres como "Lo importante nun ye ascender un monte, sinon como lu ascendemos". El cómo ye lo importante y trazar una ruta sobre'l mapa y facela realidá, dempués de llevar otros cuatru díes patiando per Picos, con mal tiempu, moyándonos, llibrando les rutes a bas de tirar de planes B o C y que güei, al fin, pudieramos facer lo que teníemos nel maxín, suple tolo demás.

Sincéramente, fué emocionante, camiento que poques vegaes me prestó tantísimo preparar y facer una ruta. La compi ta feliz, nun para de riise y casi echa una llarimina de felicidá, yo nun sé bien por qué, emociónome un pocu... supongo qu'esto ye sintir el monte y esfrutalo con tola plenitú posible.

Un resol prestosu, anímase a compartir con nós estos minutos de relaxación y felicidá, sentaos na caliza, esfrutando del esfuerzu físicu fechu, del percorríu increyible, de les 7 hores d'actividá que llevamos enriba... de la fame que ta entrándonos...fame... y son les 5 de la tarde... a correr que nun llegamos a la cena.

Baxada pelas Moñas hacia la Terenosa

Recuperaos un pocu, garramos los mochilones de nuevu y entama una baxada corriendo de la Peñe Castil. Paez mentira que con casi 5 díes de patéu, seyamos a baxar a fueu con un armariu empotráu a les espaldes, tando na h.orcada Cambureru en 20 minutinos esautos.

Dende equí, entá quédanos tol míticu bordeu a la cabeza Los Tortorios y las Moñas arribando a la mayada Las Moñas, totalmente envueltos pel borrín, que nesti casu tien a bien, orpinar y ún día más facer, que lleguemos a la Terenosa moyaos pa nun variar.

Poques vegaes sabe tan bien una cerveza nun refuxu, l'actividá pagara la pena y quiciás quitábanos esi mal tastu de los dos díes anteriores, nos que tuviéramos que camudar los planes. Aparte, esperábanos un refuxu vacíu pa los dos, cola agradable compaña de Eva y la increyible cena (patates a la rioxana y codillu... ablucante dafechu) que nos dexara preparada Emilio.... Mil gracies a los dos.

En resume... percorríu 100% Picos, duro, con sus 1435 m d'ascensión y 1800 m de descensu nun trazáu preciosu de 14,8 km que llevónos un total de 9 hores y 10 minutinos... y too ello aderezáu con trepes, navegación y munches fasteres nueves de Picos que conocimos.... una auténtica pasada.

Camudando'l Camín esfrutando nos Urrieles

No hay comentarios:

Publicar un comentario