martes, 13 de noviembre de 2018

Vega d'Ariu (Onís) - Oliseda - Tiru La Llera - Mesones - Caín (Valdión)

4 de Setiembre de 2018

Track: Vega d'Ariu (Onís) - Oliseda - Tiru La Llera - Mesones - Caín (Valdión)


Alborecemos na Vega d'Ariu, a la qu'accedimos pela pocu transitada canal de Sollambriu y magar d'una nueche aguantando a Ana dando vueltes ensin xacíu dientro'l sacu, paez que garro'l suañu cuando'l día quier esperezase ya, lo que suel dame una rabia tremenda.

Tamos na segunda estaya d'esti viaxe montuno per Picos y descansar ye necesariu, tema complexu col revolvín al llau, jeje. Menos mal que tuvimos un bon almuerzu, más bien de restallu, con café asgaya pa despertar. Mil gracies a los collacios del refuxu de Vega d'Ariu, porque de verdá que la cena fue una pasada y l'almuerzu con esi pan y esa miel casero ye como pa nun salir al monte con ganes.

Con ganes salimos del refuxu y con ganes punxímonos el plumes, porque vaya rasca que facía. Ya nel día anterior, viéramos como amurniaba, pocu a pocu, un día de calorín prestosu y esta mañana tenémosla fresca, anque camentamos que la meteo tien de dir meyorando col pasu de les hores.

Salimos de la Vega d'Ariu (1636 m)

El menú de güei, pues nun ye otru que completar dalgunos de los cumales qu'arrodien el H.oon d'Oliseda. Ya son munches les vegaes que movime per esta fastera y pocu tengo más por conocer, pero siempre hai dalgo más a lo que trepar, así que de xuru que vamos a esfrutar.

Como siempre, salir de Vega d'Ariu hacia la llocura caliza d'Aliseda nun ye mui d'agradu con un día con ñubes baxes. Sicasí, confiamos na meteo y na nuesa esperiencia y saldremos "como siempre" per onde meyor vamos viendo hacia la Boca del H.oon d'Oliseda.

Pueu dicir con tola sabiduría de los años pel monte, que nunca fice'l mesmu percorríu per esta fastera jaja. Ye tremendu'l llaberintu calizu, siendo esta vegada la que más averáu a les falderes del Cuvicente ascendí hacia a la Boca del H.oon, anque tamién podemos dir más averaos al Picu Gustureru, teniendo de xuru que tener una bona orientación y saber cual ye'l nuesu destín.

Nun día murniu enforma empobinánomos hacia la Boca del H.oon

El día sigue xugando con nós, orpinando a tramos y otros de sol, anque pa cuando aportamos a los 1867 m de la Boca del H.oon, pinta qu'al final tendremos un día afayaizu. Una paradina pa picar dalgo y saludar a un par de collacios como la Peñeblanca y la Robriza y cunto-y la película a Ana de les mios intenciones.

Trazamos cola vista cual sedrá l'itinerariu más evidente y despedímonos del macizu central qu'asoma penriba la boquera de la canal de la H.errera, pa faldiar lo más arriba posible pente lo fondero del H.oon d'Oliseda y los parés que baxen dende la Verdilluenga, que va dellos añinos que ficiéramos nuna Travesera preciosa.

Pali pali, ensin parar de charrar, vamos ganando camín pente les llambries y pedreres, siempre cola vista puesta nel nuesu destín que nun ye otru que la collada Llombreras, pero nesti casu el nuesu envís ye meté-y un tientu a la Cabeza Llombreras y salir hacia les Torres de los Cabrones dende la h.orcada pente medies.

Bordiamos tol h.ou d'Oliseda hacia la cabeza Llombreras (2180 m)

De la que vamos avanzando hacia la Cabeza Llombreras, paez que va tar la cosa complicadina, pero cuando vamos aportando a la h.orcada pente la Cabeza y la primer Torre de los Cabrones, vemos una vira herbosa aceptable pa poder ascendela.

Sabiendo que ye factible, decidimos parar a comer dalgo y tomar el solín, pa cuando tamos calecíos abordar l'ascensión namás que col gps y el móvil d'Ana, que díes más tarde xugáranos una mala pasada perdiendo casi toles semeyes d'estos díes.

Asína que colos 2180 m del cumal de la Cabeza Llombreras, guapa aguya y mirador de la Robriza, baxo los nuesos pies, colamos ensin posterior semeya de cume, pero con una prestosa trepada, anque hai que dicir que munchu curiáu col estáu podre de la roca y el patiu de la evidente vira herbosa.

Ascendemos hacia les Torres de los Cabrones (2281 m)

Una vegada que nos quitamos un pelín el respetu nes trepaes como cordada y viendo que movémonos ensin problemes, paez que relaxámonos o al menos, yo reláxome, ya que siempre toi al tanto de la xente y presta muncho tar seguro de los movimientos que fai'l to compañeru.

Pondremos la mochilona de nuevu y vamos reconocer, otra vegada nel mió casu, tolos cumales de les Torres de los Cabrones, les cuales siempre danme alcordanza d'una primer vegada qu'intentamos la Punta Gregoriana en plena ivernada y na que tuviemos que retiranos pola fuerte ventisca.

Nesti día, ficimos tolos cumales: picu Llombreras (2232 m), Torre Los Cabrones (2247 m), Punta Gregoriana (2261 m) y la Torreblanca de los Cabrones (2281 m) más bien de paséu, esfrutando ensin más d'un guapu crestear y averámonos hasta otru pequeñu cumal que quedábame por conocer a la so vera, como ye'l Porru la Capilla (2248 m), enantes de dir al oxetivu final.

Siguimos crestiando hacia'l nuesu oxetivu del día: el Tiru la Llera

Oxetivu final, que siempre taba como na llibretina de pendientes y nun ye otru que'l Tiru La Llera o Aguya de Miguel. Pa ello, malpenes tendremos de descender unos pocos metros hasta la h.orcada Miguel y ellí tendremos de frente una mola con varios canalizos que conviden a ascender ensin más hestories.

Nós, dexaremos les mochiles nel vivac de la h.orcada y daremos vuelta a la aguya Miguel pa entra-y un pelín pel suroeste, escoyendo un canalizu fondu a la manzorga del torruxón de más altor. Casi corriendo, con más ganes de trepes, averámonos a hacia l'entamu de les fostilidaes y en pocu más que dar sofitu a les manes alcontrámonos col pasín del ascensu.

Nun ye difícil pero hai que restolar bien pa garrar les preses adecuaes y taremos na parte cimera del canalizu, onde pasámonos al de la mandrecha que tien un calter más rotu y tendremos que tar sollertes de nun tirar peñes nel nuesu esguilar.

Cume nel Tiru La Llera (2288 m)


Como guah.es trepando a árbol aportamos a los 2288 m del Tiru la Llera o Aguya Miguel, qu'amosará unes belles vistes del central, pel que xueguen les ñubes, cosa que nun mos presta ya que la previsión pal siguiente día ye mala enforma.

Con esos encamientos, quédome mirando pa la Piedralluenga, comentando la xugada con Ana, ya que paez que'l segundu cumal pinta espuestu y con roca podre como poco. Ya teníemos decidíu que nun díbemos finar el percorríu atacando la Piedralluenga, ya que púnxose nel calendariu del GM Xuan de la Borrina pa la temporada siguiente, asína que vamos ser respetuosos pel momentu, jeje.

Nun cumal tan pequeñu, nun queda otra qu'entamar el descensu, sollertes a les peñes sueltes y sobretou agüeyando les preses pal destrepe clave de descensu al canalizu del mediu. Ensin problemes, alcontrámonos no baxo del canalizu y corremos casi hacia'l vivac onde espéranos un merecíu picotéu a bas de barrines enerxétiques y una cecina que saliónos un pocu ranciuca, jaja.

Descendemos de la h.orcada Miguel hacia Mesones

Casi 6 hores de ruta dende que saliéremos de la Vega d'Ariu y agora, viendo les posibilidaes del día, les nueses posibilidaes físiques y los díes que quedaben per delantre, decidimos nun buscar más planes alternativos y ye que la mochila pa 6 díes pesa y muncho, poro toca cuidar el físicu.

Nun damos más vueltes, tan sólo intentamos aldovinar per onde puede percorrer travesíes dende la canal de la H.errera y Mesones, ya que personalmente tenía na tiesta un par de siendes que deberíen servir pa enllazar dambes canales.

D'esta vegada nun va ser y baxaremos dende la h.orcada Miguel hacia la canal de Mesones pel h.ou Tres Piedralluenga, al igual que ficiéramos na primer Travesera de los Borrinos. Daquella, casi tolos miembros del grupu diben tocaos y ye qu'en casi diez años dalgunos fuimos faciendo callu pel monte y paez mentira, tamos más vieyos, pero más fuertes físicamente y muncho más avezaos a andar pelos maraviyosos Picos.

Facemos la mítica ya canal de Mesones hasta Caín

De la canal de Mesones pocu que dicir, ya que ye defechu la mió primer canal de Picos que percorrí y téngo-y un ciñu mui especial. Simplemente, déxome llevar pela amplia parte cimera y esfrutando enormemente pasando pela mayada y el posterior sedu de Mesones, siempre tan espeutacular.

Na parte baxa, vemos un escosu tabayón de la riega la Pasada, onde en día de calor, pues hasta duchate un pelín, cosa que nos vien a la cabeza por mor de sentinos llimpios, ya que na Vega d'Ariu nin siquiera refrescanos na fonte, teniendo la poca agua que calteníen pa beber.

A la fín, con casi 10 hores de camín, aportábemos pelín cansaos a Caín, ún de los llugares onde más me presta aportar en travesíes, sinon el que más. La xarra cerveza, la duchina calentina y la perbona cena fueron bonos premios pa los 15 km de percorríu, 1015 m de desnivel positivu y los 2170 m de negativu que dacuando ye hasta pior entá.

Camudando'l Camín dende'l Cornión más xabaz

No hay comentarios:

Publicar un comentario