13 de Xunetu de 2024
Track: Cordiñanes (Valdión) - Asotín - Solano - Rabicu - Llaz - Colláu H.ermosu (Valdión)
Dempués de la cena y durmir en Santa Marina en Valdión, tol grupu teníemos que movenos hasta Cordiñanes, pa continuar cola Travesera Picos d'esta temporada y teníemos per delantre, dos díes de monte pela fastera'l colláu H.ermosu, con una primer estaya que diba llevanos a esti guapu llugar, per senderos colgaos non aptos pa xente con vértigu, teniéndome defechu dalgo esmolecíu, ya que yéremos en grupu curiosu pa movenos per estos pericuetos.
Ensin priesa, magar del almuerzu calmáu nes furgonetes, averámonos hasta Cordiñanes, onde preparamos tol material de vivac, embutiéndolo como pudimos na mochila y pocu dempués de les 10 de la mañana, entamábemos a caleyar con un día fresquín pero soleyeru, no que vien a ser una temperatura perfeuta p'andar pelos Picos.
Dempués del día anterior, ensin vistes n'ascensión al Escañu, alborecíemos con borrina baxa, que fuera esnidiando durante la mañana, dándonos vistes al seutor de la Bermeya nel Cornión, nos primeros pasos pela senda la Rienda, lo que prometía que díbemos tener un día bien guapu pa facer monte.
Munchos de los collacios, nunca xubieran pela Rienda, asina que diben encantaos col senderu colgáu, senderu que la primer vegada que percorriera, nun tenía dengún seguru, nin cuerdes, nin cadenes, asina que mientres comentábemos estes hestories, calecíemos músculos y díbemos acolumbrando tola redolada de picos, canales y pasos que teníemos enfrente.
Siguiremos ascendiendo, travesando'l fayéu d'Asotín y tol camín a la vera del enorme argayu que cae dende la faldera'l Frieru y aportaremos a la vega d'Asotín, llueu d'una hora y media de camín. Como non, fadremos un descansu pa reagrupar a la xente, esfrutando d'ún de los llugares más guapos de Picos, onde a la fín, la borrina desapaez y déxanos agüeyar la guapa canal d'Asotín y tola nuesa xubida hacia'l colláu Solano.
Magar del pequeñu descansu, entamaremos ascensión al colláu Solano baxo l'atenta mirada de la Pica d'Asotín, que ya ascendiera va un tiempín, hasta algamar los 1622 m del colláu, onde vamos aportando a paso sele, ya que les mochiles enllenes de trastos de vivac, nun faen que'l ritmu seya demasiáu gayoleru.
Sicasí, vamos ensin priesa, ya qu'interesa qu'a partir d'esti puntu, la xente vaya sollerte a cada pasu, asina que paramos otros minutos, sobretou pa esfrutar de les vistes hacia'l Cornión cola omnipresente Torresanta y partir d'equí, póngome'l primeru pa guiyar a tol grupu ya intentar que vayan lo más tranquilos posible.
La senda'l Rabicu conociérala viniendo dende'l sedu La Garcia va dellos años y volver a percorrela con tol grupu paezme increyible, faciendo los primeros pasos en descensu y cola vista puesta al percorríu colgáu que más alantre tendremos con una muria vertical enriba nuesa, que caen dende la faldera la Torre'l Llaz.
El senderu, dalgo tomáu pola broza, nos primeros metros de descensu, llueu d'una primavera perhúmeda, entrará nel pasu llateral colgáu onde ya la caliza fai actu de presencia, siendo más cenciellu de siguir, avisando al grupu d'andar finu ya que la cayida hacia la riega Mermeh.u, nun ye broma, poro dir atentos ye más que necesariu.
Al final d'esti tramín espuestu, tendremos un destrepe per un canalizu, con bonos agarres y ya saldremos a tarrén menos aéreu, averándonos a la riega Mermeh.u, onde nun pueu facer otra cosa que parame a buscar un posible pasu hacia les travieses del Llaz tamién per esta amplia canal, que paez zarrase con toles muries verticales de la parte alta.
Travesaremos dalguna llera pel camín y diremos viendo'l cantu que separa la riega Mermeh.u de la Garcia, onde tomáremos salida n'aquella ocasión, decidiendo descansar un pelín llueu de más d'una hora de Senda'l Rabicu.
Dende equí, con vistes brutales de Valdión, vamos picar dalgo y nun pueu
parar de mirar hacia la parte alta, pa siguir cola mirada l'enllaz
pente dambes siendes, ya que les travieses del Llaz,
ficiérales en descensu hacia Mueñu cuantayá, pero empatar estos dos
senderos yera l'oxetivu del día y paezme que l'únicu puntu feble nes
muries ye una riega que baxa dende Les Torres del H.ou la Llera.
Magar del descansu, ponémonos en marcha de nuevu, col envís de dir ganando desnivel per una vallina, pero siempre terraceando pelo más cenciellu, ya que tampoco vemos grandes traces de sienda, hasta dir averándonos pocu a pocu a esa boquera de la riega onde deberíemos tener accesu hacia les travieses del Llaz.
La mió sorpresa sedrá, cuando ya cerquina la entrada del pasu, atopamos na riega un cordín colgando d'un par de parabolts bastante nuevos, dando a entender que ye un pasu más usáu de lo que camentábemos. El casu ye qu'en secu, llibrase ensin problemes la entrada a la riega, pero en moyáu pudiera ser mal sitiu pa resbariar y cayer.
El restu la primer parte la riega, asciéndense bien llambriando en dalgun tramín y poniendo les manes n'otros y saldremos d'élla pela manzorga per tarrén bastante pisáu, saliéndonos a posteriori hacia la manzorga per un evidente canalizu pisáu, onde atopamos de nuevu una cuerda afitada, ya que tamos nun tarrén vertical y podría venir estupendamente sobretou si baxamos envede xubir.
Dende equí, hacia la salida a les travieses del Llaz, nun debemos descuidanos polo vertical del tarrén y la cantidá de piedres sueltes, pero ya nun tendremos más dificultaes. Na base de les Torres del H.ou La Llera, atoparemos un bon rebañu de cabres, lo que faime pensar si les cuerdes tan puestes pol cabreru o tan usándose p'actividaes de monte.
Dellos tragos d'agua y tamos preparaos pa continuar peles travieses del Llaz, pero alcontrámonos cola dulda de si xubir un pedreru pa siguir una vira alta baxo les muries de les Torres o garrar un evidente senderín en baxada que déxanos nun canalizu vertical ascendente.
Llueu de mirar otres posibilidaes, trepo'l canalizu y atopo una cuerda afitada d'una ponte roca, con non mui bona pinta y xustu na salida un senderu bien marcáu de les travieses. Nun me presta res tanta xente trepando, asina que decidimos esguilar en pareyes y tol grupu va trepando con curiáu de nun tirar piedres, saliendo ensin mayores problemes al senderu.
Párome a falar col grupu cuando tamos toos a salvo y nun soi a pescanciar si yera meyor penriba o si la cuerda dexa a les clares que yera por onde fuimos nós, anque alcuérdome de destrepar esi canalizu. Pocos minutos de tranquilidá y tengo que correr p'alantre que Pepa y Mario nun ven el siguiente pasu llateral, asina qu'asómome per una llambria y veo un h.itu nuna collaína, poro, ponémonos de nuevu a movenos, d'ún en ún nesti casu, superando'l pasu y saliendo a la collaína onde tomamos aliendu al fin.
Dende equí, les travieses sedrán más amplies y podremos dir charrando más animádamente, esfrutando de la verticalidá d'esta fastera, pero con pasos más seguros y divertíos con grandes vistes del Cornión. Comentar que va años, tamién en xunetu, tuviéramos que travesar el Llaz (neveru xeláu enmediu les travieses) y yera un pasu pelín espuestu a resbariones y nestos años va desapaeciendo perpasando la llera ensin problemes.
Con tol grupu envueltu na gayola montañera, de facer actividaes así bien prestoses y potentes, vamos tener que descansar unos minutos que tenemos a Marcos con un pocu de baxona d'azucre y cuando siéntese recuperáu, continuamos al fin hacia la cabera atracción del día, una llerona colgada sol vacíu, que ye más espeutacular qu'otra cosa, ya que namái ye caleyar ensin más, hasta l'últimu coldu onde tamos ya na colladina cola Torre'l Llaz.
Dende equí, una pequeña trepadina per una llambria fina y poner les
manes pocu más y ya taremos tol grupu faciendo cumal nos 2151 m de
la Torre'l Llaz, onde festexamos esta rutona, sacamos milenta semeyes pa
tolos llaos y personalmente, soi a tomar aliendu al fin, ya qu'enxamás
llevara a un grupu tan grande per llugares enllenos de desventíos.
Da-yos les gracies a tolos compañeros del GM Xuan de la Borrina, que fueron conscientes de la ruta, d'onde tábemos metíos y anduvieron atentos a tolos que-yos diba diciendo, dexándose guiyar y faciéndolo perfácil, anque tuviésemos dalgun tramín de tensión adicional, por mor de tanta xente moviéndose a la mesma vegada.
No personal, tornar a Picos cola cadera pa cambiar y pasalo podre una vegada más, dióme munches fuercies pa siguir sufriendo dolores con tal de tar pel monte y como siempre, anque fuese un pequeñu tramu d'enllaz pente les travieses del Rabicu y el Llaz, lo que nun conocía, valióme más que cualesquier cumal de Picos.
El restu, como ye vezu, estupendo, coles birres na mesa'l refuxu a la espera de la cena, bien rica como siempre y l'atapecer nel colláu H.ermosu, onde había xente como poques vegaes viera, dalgo que debe ser mui normal nestos años. Sicasí, echo en falta esos tiempos de monte, nos que la xente venía de facer rutes curioses, en travesía dende sabe onde y non xubir por xubir a H.ermosu pa les semeyes, el posturéu, llantar la tienda pal vivac, trayer perros a Picos, montándose una romería de la virxe... nun sé, taré faciéndome vieyu y repunante pa los nuevos tiempos.
En resume, la meyor, más guapa, más montañera y más aventurera manera d'ascender al colláu H.ermosu ensin dubia, fízonos tar perentretenios durante unes 8 hores, salvando un desnivel positivu de 1750 m nun percorríu de 8,5 km.
No hay comentarios:
Publicar un comentario