14 de Xunetu de 2024
Track: Colláu H.ermosu (Valdión) - Llambrión - Colladinas - Llagu Baxeru - Asotín - Cordiñanes (Valdión)
Tercer día de Travesera Picos, espertando nel colláu H.ermosu, onde teníemos apallabráu almuerzu, asina qu'averámonos al refuxu y llueu de ponenos finos con tolos esistente na mesa, tornaremos al vivac pa recoyer tolos trastos cola calma, poniéndonos en marcha so les 9 y media la mañana, col oxetivu claru: La Torre'l Llambrión.
Tamos nel últimu día del finde, teniendo munchos integrantes del grupu que tienen qu'abandonar pa trabayar al día siguiente, asína que la idega ye xubir y baxar peles "marques marielles", ensin cresteríes, pa que tengan tiempu de sobra a baxar, nun llegar mui tarde a casa y ver la final del mundial de fútbol, ensin atropellos.
El grandiosu día anterior peles Travieses del Rabicu y Llaz, pasó factura y Vane llevantóse con dolor nel cadril, asina que va quedar nel refuxu a la espera de que baxemos, acompañada por Sara, la so hermana, demientres que los demás, salimos colos mochilones hacia'l H.ou del Llambrión, onde podremos dexales, tres d'una piedra dalgo escondíes, pa facer un ascensu llixeru.
Col día pelín frescu, según vamos xubiendo, alcuérdome de nun llevar dalgo más de ropa, esperando que l'esfuerzu y los trepes vayan caleciendo, asina que tiro a ritmu, probando una vegada mi maltrechu cadril, respondiendo perfeutamente, poniéndonos a la entrada de les "marques marielles" en 50 minutinos dende'l refuxu.
Cola vista puesta nel primer canalizu, reagrupamos y entramos bien pegaínos, garrando un ritmu trepaor altu, antes les quexes de Mario "cántabru", que diba pelín floxu de forma. Ensin mayores problemes avanzaremos pente canalizos y lleres, hasta entranos les duldes porque les marques, llévenmos a un trepe per un espolón dalgo vertical.
Facémoslo, ensin tener alcordanza de tal pasu y salimos a la parte media, onde les vistes hacia'l Cornión y tol valle de Valdión son increyibles. Pali, pali vamos tirando arriba a bon ritmu hasta aportar al míticu pasu llateral, onde Mario "gallegu" nun se vé confiáu y decide esperanos abaxo con bon criteriu y muncha responsabilidá pela so parte.
Si dalgo deprendí de Fernan y de los años que llevo pel monte, ye a nun animar de más a la xente, sinon lo ven claro, porque llueu la baxada puede ser pior y alcontrate con un marrón de verdá pa baxar a dalguien bloqueáu. Asina, que siguimos el restu del grupu pel pasu, más espeutacular que difícil, pa salir a la parte alta, onde siguiremos llambrieando con vistes hacia la Torre La Palanca y al Torre Cerredu a lo fonderu.
Unos más finos nos trepes y otros con más duldes, averámonos a la parte final onde ya les llambries améstense a tramos de calizu pelín más rotu y lleres, que van ponenos nuna llambrialina final que da pasu al cumal de la Torre'l Llambrión (2642 m), onde algamaremos vistes del macizu los Urrieles y la felicidá d'un ascensu más, el terceru, a esti guapísimu cumal.
Tolos del grupu anduvieron más espabilaos, llevando dalgo de ropa, demientres toi pegáu a la roca al sol, xeláu de friu, asina qu'entaíno les semeyes postureres y échome abaxo, anque ceo dícenme qu'espere que nun tol mundiu va tan seguru, sicasí tengo na tiesta a Mario esperándonos a metá del monte y quiero aportar hasta él lo antes posible, pa quedame tranquilu.
.jpg)
Fadremos tol grupu, el pasu llateral en baxada casi meyor que pa xubir y aportamos hasta onde quedara Mario, nun viéndolo, teniendo que baxar más, p'alcontralo al solín esperándonos, lo que dióme tranquilidá ya que destrepara un canalizu pindiu sin problemes hasta'l sol, dando a entender que taba recuperáu y ye que la cabeza ye'l músculu más importante nel monte y la escalada.
Tamos en comunicación con Sara y Vane pelos walkies, poro pa cuando aportamos al senderu las Colladinas, ya taben ellí esperándonos, onde xintaremos, beberemos agua y despedirémonos de Diego, Marcos, Sari y Vane, que baxarán pel Argayu Congostu, mientres que los demás, diremos a la gueta d'una baxada pel Llagu Baxeru o al Sedu La Padiorna, en casu de que nun lo veamos claro.
Xubiremos a las Colladinas al solín, abellugaos del vientu n'altura, pasando hasta calor, pa descender hacia'l Llagu Cimeru, al qu'avérome a conocer o eso creo, demientres Pepa restola la baxada hacia'l Baxeru y pa cuando vuelvo, tan emprendiendo camín hacia'l sedu La Padiorna, faciéndome señales de que nun lo ven claro.
Como yera lo únicu "nuevu" que tenia'l día pa mín, tiré a buscar la baxada en solitariu, viendo la vira colgada sol llagu Baxeru mui clara, alcontrándome tramos de senderu de rebezos, teniendo un par de puntos bastante espuestos, nos que tuve que dir con curiáu, ya que la cayida hacia'l llagu ye descomanada.
Nesti casu, dicir que'l dichu de "nun hai atayu ensin trabayu" ye xustificáu, teniendo un destrepe vertical con cayida llarga, enantes de garrar la última vira que fué dexándome perpasáu'l llagu, anque enantes del descensu final, tuve que travesar dos llambries espuestes, pa baxar ya per tarrén más favoratible hasta'l propiu llagu, onde con una pequeña travesía penriba púnxome ya a metá de la canal d'Asotín.
Na canal d'Asotín, casi allegre por nun baxar a tol grupu per esti atayu, miré p'arriba calculando qu'al restu de compañeros llevábalos una hora y media lo menos, avisándolos de que diba baxar y entainé canal abaxo corriendo hasta la vega d'Asotín, onde esperé media horina a ver si baxaba l'otru grupu, terminando por cansar y baxando apriesa hasta Cordiñanes, onde tenía la furgo con xinta y bebida, pa una llarga pero cómoda espera.
En resume, día bien guapu de monte, repitiendo ascensión al Llambrión y baxando per una vira pente los llagos Cimeru y Baxeru, que paecióme pocu usada y viendo lo espuestu de dalgún tramu, entiéndolo perfeutamente. 7 hores de percorríu, con dalguna llarga parada esperando a los grupos, llevóme facer los 11,5 km de percorríu con un desnivel positivu de 875 m y negativu de 2075 m a la carrera, alcordándome de los bonos tiempos de corredor montuno.
No hay comentarios:
Publicar un comentario