Travesera Picos 2023 - 2024

 Del 12 al 17 de Xunetu de 2024

Tornamos a les Traveseres de Picos, dempués de la mió lesión de cadera, que dexóme facer bien pocu l'añu pasáu, asina qu'esti añu cola decisión ya tomada d'operame, tiré p'alantre y volví a preparar dellos díes per Picos y dir viendo como diba respondiendo la cadera y si tenía que reventar pues que reventase pel monte.

Tornamos a Valdión con tola gana del mundiu

Una vegada más, escapo un pelín de los masificaos Picos d'Europa asturianos (Asturies, Llión, Cantabria) averándonos a la fastera llionesa, onde tenemos un ambiente más relaxáu que la foriatada que ye a trayer Asturies, colos Llagos y el Cares, como fonte de desesperación pa los que siempre movímonos con llibertá y amamos estos montes.

Restolando llugares nuevos a conocer per Sayambre

Asina que centrámonos nes comarques de Valdión y Sayambre como fastera a percorrer y preparamos hasta 6 díes de pateos variaos, con munches opciones distintes por si'l cuerpu nun daba pa más o si a los compañeros se-yos facía demasiáu dalguna ruta, quedándonos unos díes de monte bien guapos, con un par de díes con pernocta en vivac y los demás díes baxando a la furgo a descansar, cenando estupéndamente tolos díes, ya fuera en Santa Marina na Ardilla Real o nos distintos chigres de Sayambre en Sotu y Oseya.

Animosos entamamos de vienres tarde per tierres valdeoneses
 

El primer día, aparte del viaxe hasta Valdión, díbemos xuntanos Pepa, Sara y Rubén pa facer l'ascensión al Escañu, monte na llende llionesa-cántabra con unes vistes descomanaes de los tres macizos de Picos, dándonos tiempu a completar la ruta, en condiciones pelín gafes, pa baxar hasta Santa Marina, onde esperábenmos tol restu del grupu (Vane, Sari, Diego, Marcos y los dos Marios, el "gallegu" de ñacimientu y el "cántabru" d'adopción.

Increyible ruta p'acceder al Colláu H.ermosu onde vivaqueamos

El sábadu tol grupu diba esfrutar d'eses rutes que presténme tanto, percorriendo un par de travieses imprescindibles pa los amantes del Piquismu, como ye la senda'l Rabicu y les travieses del Llaz, que punxeron el toque picante a la Travesera d'esti añu, metiéndome en dalgún momentu, una carga de tensión y responsabilidá, por ver que los díez integrantes del grupu movíerense bien pelos distintos pasos y desventíos.

 Siempre ambientazu nel atapecer nel colláu H.ermosu

Llueu de les tiranteces pa garrar sitiu nos vivacs, con Mario, alias el pandilleru corveranu, como másimu esponente del quinquismu vivaqueru jaja, tuviemos una relaxada tarde de birres, cena estupenda nel refuxu y el míticu atapecer, con bien de xente asitiada en tolos requexos d'esti hermosu llugar.

 Cume nel Llambrión nuna ascensión picantona

Al día siguiente, tocaba facer l'ascensión al Llambrión, primera pa dalgunos de nós, na que tuvimos ya les primeres baxes, con Vane (tocada de la cadera) y Sara que quedóse a acompañar a la so hermana, pa descender tol grupu per distintos llugares, Argayu Congostu, pa los qu'abandonaben la travesera (Sari, Diego, Marcos y Vane), Colladinas y Asotín pa los Marios, Sara y Pepa y l'atayu con trabayu y riesgu pa min pel llagu Baxeru, que fízome acortar casi dos hores de ruta.

Segundu día cenando estupéndamente na Ardilla Real

Esa nueche tornamos a Santa Marina los supervivientes, pa duchanos, cenar maraviyósamente per segunda vegada y ver la final de la Eurocopa, con emoción y muncha birra, asina qu'al día siguiente, tocaba llevantase con resaquina fina pa terminar almorzando en Posada, onde despedímonos de Pepa, lesionada d'un cuadriceps na baxada per Asotín.

 Averámonos hasta la llende del parque de Picos pa conocer el cordal del Pármede

Esi día, facíemos la transición de Valdión a Sayambre, parando a conocer el cordal del Pármede, nuna preciosa ruta que diba dexanos dempués, a Mario "gallegu" y a mí sólos per Sayambre, pasando la tarde despidiéndonos de los collacios en Oseya, pa dir hasta Sotu onde fadríemos campu base nel increyible aparcaderu y cenando na Pasqualina, una food track nuna contorna perguapa y percuriada.

 Mario últimu compañeru de la Travesera  esfrutando del meyor mirador del conceyu

Magar d'una nueche tranquilísima en Sotu, fadríemos una preciosa circular per Vegabañu, ascendiendo a la Cotorra, qu'entá nun conocía y paecióme un mirador increyible del Cornión y de tol conceyu sayambriegu, namorándonme una vegada más tolos fayeos de la redolada y l'allugamientu del refuxu de Vegabañu onde echáremos una cervecina con una mustadiella como compaña.

Despedímonos de la Travesera Picos dende Oseya de Sayambre

Pa finalizar, al día siguiente, llueu de cenar una chuleta n'Oseya como un paisanu, diba pegame en solitariu una ruta-carrera hasta la Pica Ten, otru monte perinteresante del conceyu Sayambre, que sorprendióme poles vistes de los Beyos y pola guapa circular, averándome pela senda Arcedianu y baxando hasta Oseya de nuevu, pela redolada de la riega Fonseya, piesllando seyes díes de monte de gran valir.

Como siempre, vamos dexar unos datos a mou resumen y les correspondientes entraes del blog:

Estaya 1: El Santu (Tierra La Reina) - Puerma - L' Escañu - Mostayal

Duración: 3 hores y  40 min
Llonxitú: 9,3 km
Ascensu: 735 m
Descensu: 735 m

Estaya 2: Cordiñanes (Valdión) - Asotín - Solano - Rabicu - Llaz - Colláu H.ermosu (Valdión)

Duración: 8 hores
Llonxitú: 8,5 km
Ascensu: 1750 m
Descensu: 525 m

Estaya 3: Colláu H.ermosu (Valdión) - Torre'l Llambrión - Colladinas - Llagu Baxeru - Asotín - Cordiñanes (Valdión)

Duración: 7 hores
Llonxitú: 11,5 km
Ascensu: 875 m
Descensu: 2075 m

Estaya 4: Retuerto (Valdeburón) - Cordal de Pármede

Duración: 6 hores
Llonxitú: 13 km
Ascensu: 940 m
Descensu: 940 m

Estaya 5: 

Duración: - hores
Llonxitú: - km
Ascensu: - m
Descensu: - m

Estaya 6: 

Duración: - hores
Llonxitú: - km
Ascensu: - m
Descensu: - m

Totales:
 
Duración: - hores
Llonxitú: - km
Ascensu: - m
Descensu:  m