Sotu (Sayambre) - Barcinera - La Cotorra - Vegabañu

16 de Xunetu de 2024

Track: Sotu (Sayambre) - Barcinera - La Cotorra - Vegabañu

Quintu día de pateos na Travesera Picos de 2023-2024, baxando ya'l pistón, que'l cuerpu va diciendo que toca dir pensando na retirada pa casa. Sicasí, tovía tengo compañía con Mario, decidiendo dar un paseín pela redolada de Vegabañu, de la que nun conoz res Mario y sé bien, que-y va prestar esfrutar de les viesques de la contorna.

Partimos de Sotu (905 m) en Sayambre

Asina, que llueu d'un bon almuerzu na furgo, preparámonos con calma y salimos pel pueblu de Sotu, travesando les sos cais hasta la parte alta, onde entamaremos siguiendo les indicaciones del PR de la H.ocica, empobinándonos hacia la faldera de la Peña Beza, onde nun debemos perder el camín cimeru, ya que los senderos de la parte alta, tan pelín tomaos y nun paga la pena nesta dómina del añu, andar bregando de más.

Facemos camín sele col borrín xugando pelos montes sayambriegos

Poro, en Valdelosciegos, garraremos el camín de la madrecha que va llevanos hacia les cabañes de Llagubeñu, onde esfrutaremos de les vistes a Beza enriba nuesa, enantes de metenos de nuevu na fondura de la viesca, siempre nun cómodu ascensu hasta aportar al puertu Barcinera, onde tendríemos baxada hacia'l Dobra que daría pasu a rutes más potentes pela redolada.

Dende Barcinera siguimos hacia'l monte La Cotorra

Nós, que desdexamos hasta la posibilidá de conocer el Traveséu de Beza por pura galbana, vamos caleyar per pista dende Barcinera, direición Vegabañu, pa desvianos nuna clara montonera h.itos hacia'l monte La Cotorra, monte cimeru de Picos, que va danos un preciosu ascensu pente'l fayéu, siempre con una marcada sienda hasta la so parte alta onde descúbrese de vexetación pa dar pasu al grandiosu mirador que ye esti pequeñu monte.

 

Facemos ascensu al meyor mirador de Sayambre colos 1525 m de La Cotorra

El llugar ye imprescindible, con vistes a tola muria Suroeste del Cornión, cola Torresanta, siempre al frente, pero tamién a tola viesca qu'envuelve'l rigu Dobra, paeciéndome un llugar dafechu máxicu, onde sentase a esfrutar simplemente d'esta fastera de Picos, onde tantes bones rutes pude facer y les qu'espero siguir faciendo descubriendo nuevos requexos.

 

Descendemos de la Cotorra per una vallina hacia'l Dobra

Llueu d'un ratín, comentándo-y a Mario, tolos llugares pelos que tuviera nesta fastera, decidimos baxar del cumal y desviámonos a la manzorga per una vallina col envís de descender direutos hacia'l Dobra y dar un pateín a la par del rigu, descubriendo dalgún guapu requexu pa dar un bañín, pa salir cuesta riba hacia'l camín que vien dende'l Frade hacia Vegabañu, onde como non, paramos un ratín a echar una cervecina y esfrutar del paisaxe.

 

Salimos dende'l Dobra hacia la mayada Vegabañu

Cola compañía de les refuxeres y d'una mustadiella qu'andaba pel refuxu, tomaremos la birra y decidimos dir baxando ya que Mario, quería volver ya pa la civilización. El descensu fadrémoslu, como siempre, per pistes y siendes en perbon estáu, baxo'l frescor de les fayes y garrando tolos atayos qu'alcontramos hasta garrar el camín final pela Cabada y el Piqueru, hasta entrar pela parte alta a Sotu, parando nel chigre del hostal, onde había dalgo d'ambiente.

 

Terminamos ruta de nuevu en Sotu descendiendo peles viesques

En resume, ruta tranquilina pela contorna de Vegabañu, con un percorríu de 12,4 km y +/-720 m de desnivel fechos en 5 hores de muncha calma montañera, con grandes paraes nel cumal de la Cotorra y Vegabañu, poro ye perfeuta pa una mañanera ya incluso, una tarde de vienres pa dase más caña los siguientes díes.