viernes, 12 de julio de 2019

Caín (Valdión) - Canal de Ría - H.ou Los Cabrones - Piedrabellida

23 Marzu de 2019

Track: Caín (Valdión) - Canal de Ría - H.ou Los Cabrones - Piedrabellida


Son les 7 y media de la mañana y ya va alboreciendo nel nuesu campu base particular en Caín. Dende esti pueblín valdoniegu, de munchos raigaños asturianos ya que la conexión pente Cabrales y Valdión ye evidente, salieron munches de les grandes actividaes que ficimos Ana y yo.

Nos últimos tiempos, tan sólo ella ta siendo capaz de sacar esa vena montañera que tengo amatagada pola escalada deportiva, les lesiones y el zanganismu de nun querer entrenar en condiciones pa facer xataes pel monte.

La última burrada dende Caín, lleváranos a descender corriendo mil metros de desnivel pela canal del Mueñu pa llegar a cenar, magar d'ascender per Arzón y Dobresengros a la Torre La Celada. Pero esta vegada tamos n'otru xeitu dafechu. Tamos tovía na dómina ivernal y camudamos el gris de la peña y el verdi de la yerba pol gris y blancu d'esa mesma peña y la ñeve.

Como siempre, unes cañes, son el plan afayaizu de cualesquier día pela selmana, pa que salguen planes de monte, pero esta vegada yera dalgo que tenía na tiesta dende cuantayá, yera dalgo que me llamaba dende que ficiera con Fernan la Canal del Agua.

Campu base particular en Caín (459 m)

La del Agua, nun ye más qu'un ramal que dixébrase de la canal cimera que xube dende'l propiu rigu Cares hasta'l so final na collada L'Agua y esta canal, ye la de Ría, transitable n'ivernal o con material d'alpina pa superar dalgunos de los resaltes que caltién.

Atrás quedaron los nervios y el llarguísimu viaxe de vienres hasta Caín, nel qu'Ana maréase na nuechi y nun ye nin a cenar mediánamente nin tampoco descansar. De la que voi conduciendo, nos altos previos a descender a Valdión, soi a ver ñeve al llau de la carretera y la mió mente va pensando que sedrá lo meyor pal día siguiente.

La nueche pasa dándo-y vueltes a la tiesta cola loxística, hasta que me quedo sopa fonderamente, descansando abondo. Almorzamos cola calma, casi más de la que debemos y somos a salir a la cai a les 7 la mañana, pudiendo ver que nun queda tanta ñeve como pensamos.

Per un llau, positivu, porque nun vamos tener que facer tantu esfuerzu de camín a la canal de Ría y pel otru, negativu, porque nun sabemos lo que vamos alcontrar na propia canal en forma de resaltes. Llevo planes A, B y C, posibles escapatories preparaes nel GPS pero la única conclusión que facemos pela mañana ye nun llevar les botes de ñeve puestes dende Caín, asina que playeros de trail y vamos a ver que pasa.

Facemos tol camín hacia la canal de Ría pelín nerviosos

A lo postreru, esta decisión va marcar dafechu'l resultáu de l'actividá, que los dos sabemos va ser llarga, mui llarga, colo qu'arrancamos de Caín hacia la canal de Ría, deseyosos de dir garrando ritmu, al traviés del camín clásicu pel Cares hasta la Ponte Bolín, H.uente Prieta, la Tranvia, Cuesta Duh.a, collada'l Cuebre y baxada a la canal de Ría que ya ficiéramos va unos años nuna Travesera.

Daquella tardáremos unes 2 hores y cuartu n'aportar a Ría, esta vegada tamos no fonderu la canal en 1 y cuartu, lo que significa que fuimos como aviones, conscientes de que salimos pertarde de Caín. Aún así, nun fue que nun fuésemos esfrutando del camín, comentando la xugada, los posibles planes alternativos, el maraviyosu día que gastamos güei.

Tamos a 840 m d'altor, recién baxaos de Cuesta Duh.a, qu'andará pelos 1020 m nel so puntu más altu, poro ya perdimos uno de los planes B o C, que yera conocer lo alto de la canal de Recidroñu, poro nel intre, siguimos col plan A y toca ascender en zapatilles de trail, que tan furrulando de luxu, hasta l'entronque cola Canal del Agua.

Les botes de monte, Ana llévales dientru la mochila y yo colgando ataes con un cordín jeje, esto ye así, los que somos precarios, andamos con estes hestories. Siguimos xubiendo per sienda más menos conocida y vamos averándonos al nuesu destín, el cual faise esperar hasta la dixebra de canales, onde dende un altu, somos a ver una sucia llingua de ñeve que paez tener continuidá.

Entramos na llingua de ñeve alcontrándonos col primer resalte y superándolo con dellos problemes

Nun mos lo pensamos nin un momentu, superamos un hombru herbosu y baxamos hacia la canal, onde al pié d'ella, preparámonos poniendo bota de ñeve, crampones y sacamos los piolés a pasear, dando pasu a conocer un suañu que tenía dende cuantayá.

Les cares d'emoción yeren como de neños viendo'l regalín de reis, al menos, camentábemos, vamos tener la oportunidá d'intentalo. Atrás dexamos, la posible escapatoria pela canal de las Moh.osas que tendremos de conocer n'otra aventura de les nueses y tamos al fin en plena actividá, entamando a caleyar pela encaxonada canal, sintiéndonos perpequeños enmediu d'esta enorme y pindia canal arrodiada per altísimos parés qu'amuesen a les clares que nun vamos tener retirada cenciella.

Aportamos al primer resalte, qu'alcontrámoslo pelín baxu de ñeve, entamando a trepar n'amestáu per una llambria rotísima, siendo lo más finu posible y usando les piques de los crampones, sedré a superar el primer escalón quedando a la espera de qu'Ana faiga lo mesmu.

Sigue los mios pasos, quedando pelín en precariu y cuando saca una mano salvadora a un cantu, esti ruempe y veo a Ana baxar esnidiando pela roca hacia'l ñeveru, siendo capaz de dase la vuelta como un gatu, enantes de volar y saltar al ñeveru piolé en man por si resbariase al cayer.

Avanzamos agora con seguridá dexando pa prau otra posible escapatoria

Col coral al corte, falamos fondu pa ver si ta too bien y el resultáu ye un guante rotu, la mala hostia de siempre aumentada y un pelín de raspiada pel cuerpu. Digo que quede ehí, que voi siguir solu pa ver si'l ñeveru tien continuidá o vamos metenos nun marrón infernal de tarrén amestáu, siendo d'esta miente una clara retirada ya que nun venimos a matanos.

Sigo trepando per un espolón rocosu y rotu y salgo a la continuidá del ñeveru viendo que dempués d'un coldu la cosa pinta bien. Baxo pel ñeveru y oblígola a trepar la llambria ensin crampones, faime casu, quítalos y supera'l resalte y tol espolón ensin problemes.

Baxamos vueltes xuntos, demientres vuelve a poner crampones, bebemos y picamos dalgo y dedicimos que si lo vemos chungo, media vuelta y pa otra sedrá. Por suerte, el tema meyora munchísimu y vamos abriendo buelga esfrutando de cada pisada colos crampones.

Tomamos aliendu agora que ya tenemos el camín bien enfiláu

La ñeve sucio desapaez y el color tórnase nun blancu perfeutu con tonos azulaos del xelu, lo que nos fai avanzar apriesa, superando otru resalte, esta vegada con una capa fina de ñeve que fai que nun tengamos que lluchar colos crampones escontra la llambria qu'oculta baxo los pocos centímetros de ñeve.

Vamos esfrutando a tope, felices, paez increyible como pasamos del sustu nel primer resalte a escaecer por completu que siguimos nuna canal onde si tenemos dalgún problema, la escapada diba ser bien fodía y xustu, la última salida casi que contemplábemos, sedría saliéndonos hacia la Torre La Parada y posterior baxada hacia Cuesta Duh.a, terrenu d'aventura que nun conocemos defechu.

Pararemos a tomar aliendu, falando d'esa posible opción, pero'l ramal de la manzorga que ye'l nuesu destín, ye tan atrautivu que nun pensamos más qu'en siguir ascendiendo y conociendo cada requexu, cada resalte y cada aguya d'esta canal de Ría que pa mí, ye una auténtica ayalga ivernal y la Magic Line de los Picos.

Aportamos al caberu problema seriu col bloque empotráu

Col pasu'l tiempu, lo pindiu del terrenu y la tensión del entamu la canal, fai que note ciertes molesties en forma de calambres. Poro, turnámonos n'apertura de buelga y toma'l relevu Ana, entrando nuna estrechez ablucante de la canal onde'l xelu, cuelga de los parés y l'azul de la ñeve ye casi a lluchar col del cielu.

Son momentos de gran belleza n'actividá, onde cada pasu, ye más guapu que l'anterior, hasta qu'acolumbramos a pocos metros, lo que se supón que ye la cabera dificultá del día, que nun ye otra qu'un bloque empotráu que debemos llibrar pela mandrecha.

Ana, con piolés téunicos sedrá la que lleve la delantera, avanzando con pasu firme cola travesía per tarrén xeláu y superando'l bloque, fozando nel xelu feble pel que pembaxo cuerre un rigu d'agua. Ye un pasu téunicu, que con más ñeve fadríase cenciello, pero col estáu col que lo alcontramos, tornóse nun pasu pelín complexu nel que nun podemos tener fallu, ya que la canal ta casi nel so puntu más pindio y un fallu y vamos hasta'l Cares.

Superamos el bloque empotráu non sin lluchar un pocu y siguimos

Hai vegaes nel monte que'l material aída y pa un pasu así yera necesariu. Dempués de sacar les semeyes de rigor a Ana, fué mi turnu y nun yera a salir con seguridá con mi piolé clásicu y un bastón, jaja, asina que pasóme l'otru piolé y p'arriba que salimos dempués de clavar con xeitu'l piolé nel pocu xelu que nun fendía por mor del desxelu.

Les semeyes a la salida d'esti bloque son d'alloriar y como ya dixe, podemos apreciar la cayida pal fondu del Cares y lo llarga y vertical que ye esta canal de Ría. Magar d'esti pasu, la canal toma un relaxu en cuanto a dificultaes pero non en cuanto a desnivel ya que ponse tiesa enforma y nun debemos perder la tensión nin un momentu.

Vidiu onde apréciase lo pindiu del terrenu per onde nos movemos

P'amuesa, tomándonos un descansu enantes d'entrar al sol, vimos como la solombra nos protexía d'otru peligru nes ivernales, el desxelu na parte alta de la canal. Tenía'l piolé claváu y taba echando un triagu d'agua y un bloque de xelu baxó esnalando dende riba d'un paré acertando al mió piolé y faciéndolo baxar decenes de metros hasta que paró.

Nel vidiu d'arriba, aparte de poder contemplar la belleza y verticalidá de la canal, Ana venía de recoyer el mió piolé, únicu preséu que tenía pa salir d'esta canal con seguridá. Tamos falando d'una actividá brutal pola so belleza, pero tamién durísima no físico y comprometida al cien por cien pola falta d'escapatories.

Dempués, d'esti otru pequeñu sustu, vamos entrar na fastera soleyera final de la canal, onde sacante de los resaltes, tendremos la mayor continuidá de tarrén pindio, siendo este tan fuerte, que nun alcontrábemos onde parar pa poder xintar dalgo y beber ya que la barra d'enerxía taba nos mínimos.

Caberos metros pa finar este brutal esfuerzu que ya la canal de Ría

Alcontremos un abellugu trepando a un hombru, a malpenes 100 m de desnivel sol final de la canal, pero ya nun dábemos más, había que parar a xintar daqué. Nun metru cuadráu sentámonos, xintamos daqué y decídimos a afrontar los caberos metros dixebrándose la canal nun par de canalizos escoyendo'l de más a la manzorga.

Les últimes ramples cola ñeve más blanda, sedrán con un pelín más d'esfuerzu, pero la satisfacción pola seguridá de que vamos cumplir esti pequeñu sueñu ya ye total, colo que cada pasu ye dafechu emotivu hasta algamar los 2146 m de la collada l'Agua, final de la Magic Line de los Urrieles.

La Collada L'Agua, mi llugar favoritu de los Picos pa ver los atapeceres, ye'l final a l'actividá más potente que ficiera enxamás n'ivernal. Nun quiero falar de datos téunicos, nun sabría graduar los resaltes, nin los pasos amestaos de xelu y roca, nin siquiera d'inclinaciones de la canal en sus distintes partes.

Aportamos a la collada L'Agua onde'l sentir de l'actividá toma tola fondura

Sólo quiero falar del compromisu de metese en Ría, de superar pasu a pasu, de tener controlaes les posibles escapatories, del esfuerzu de superar 1850 m de desnivel direutu encaxonaos nesta canal, de la ilusión cola que dimos cada pasu... eso ye lo importante.

Son les 3 de la tarde, atrás quedaron 7 hores y media d'ascensión y d'esfuerzu y de belleza por iguales. Agora toca llamar al Albergue de Caín y decir que tamos bien, qu'aportaremos de nueche al pueblu, pero que salió too bien y con una hora d'adelantu, les 4, sol tiempu que tenía pensáu como hora llende pa nun pasalo mal con nueche zarrau enmediu Picos.

Sacamos mil semeyes, ye una pasada tar equí en plena soledá de los Picos ñevaos. Si aportar hasta'l H.ou Los Cabrones pela ruta normal bien paga la pena, tar nesti llugar dempués de facer la canal de Ría lo magnifica too dafechu.

Paisaxe ablucante dende la collada L'Agua (2146 m)

Son sensaciones particulares, pero ye como si tolos cumales que nos arrodien se rindiesen un pelín ante nós. Como si los Dobresengros, el picu los Cabrones y les sos aguyes, el Neverón d'Urriellu, las Areneras y Albos y los Cuetos del Trabe nos saludasen y nos dixesen tornái per equí cuando queráis, vos lo merecéis ensin dubia.

Con pena, despedímonos de la collada l'Agua y paramos nel refuxu de Cabrones a sentanos un segundu, picar dalgo y tastiar el dulzor de la victoria, esi dulzor de ser los dos testerones enforma, d'empeñanos en facer esta actividá y d'esfrutala dende que salimos de Caín ensin saber si podriemos facer dalgo hasta'l refuxu de Cabrones, onde muncha xente daría por termináu'l día.

Pero Ana y yo, nun somos así, si'l físicu nos dá, preferimos aprovechanos d'ello y descender nel día de nuevu al nuesu campu base preferíu, Caín. Asina lo fadremos, desdexando la opción de baxar per Dobresengros ya que se nos diba fuera d'horariu de seguridá.

Descendemos dende'l H.ou Los Cabrones hacia Amuesa

D'esta miente, dediciremos baxar hasta Amuesa y acortar per Piedrabellida pa dempués facer el Cares de vuelta. A ello nos ponemos, albidrando qu'esto nun acabó nin muncho menos, pero cola tranquilidá de qu'algamamos l'oxetivu, vamos siguiendo la buelga fecha per unos inquilinos del refuxu colos que cruciamos cuatru pallabres escases.

Ensin mayores problemes, avanzamos aína hasta'l pasu de la cuerda afitada, onde tenemos qu'andar sollertes ya qu'esta ta enterrada pente la ñeve y el xelu, costando muncho sacala hasta dar a la pindia rampla que nos llevaría a la travesía baxo los cuetos del Trabe.

Equí, tendremos que descender d'espaldes y aún así, resbalizaré teniendo que tirar d'autodetención por fiame de más baxando de llau, jaja. Si flipara con Ana, que moviérase increyible cuando'l incidente nel primer resalte, agora ella queda flipando conmigo cola tranquilidá cola que me dexé baxar pel ñeveru hasta que decidir parar col piolé.

Empobinámonos a Piedrabellida lo más apriesa posible

Perpasáu esti puntu, la buelga pierde desnivel y descenderemos a bon pasu hacia la cuesta'l Trabe, onde la ñeve va dexando pasu a la yerba, amosando la pérdida de desnivel. Cuando aportamos a Amuesa, el sol ya tien ganes de dir acostándose y déxanos malpenes una horina y media pa descender tolo posible per Piedrabellida.

Quitaremos los crampones al fin y daremos zapatu hacia'l colláu Cerredu, onde embocaremos Pidrabellida, la cual baxamos a un ritmu increyible, garrando na faza central un suciu ñeveru que con bota dura, danos muncha velocidá nel descensu.

Col atapecer, aportamos al mayáu de la Quintana, fin de la canal de Piedrabellida y decidimos sentanos na yerba a descansar, quitar les botes y xintar lo que nos queda nes mochiles. Tamos pelín fundios a estos altores del día y ya danos igual tar más tiempu col frontal que menos, asína que tomámoslo con calma, ponemos los playeros de trail y entamamos de nuevu a descender pel Pandu Culiembru hasta'l Cares cruciando pela puente Vieya de nueche zarrao.

Baxada a fueu de Piedrabellida corriendo escontra la nueche pa facer el Cares

Ascenderemos a la senda'l Cares cola lluz de los frontales y tendremos per delantre una horina y media de patéu hasta Caín, esfrutando del Cares, de nueche, col frontal, ensin xente nin masificáu, camentando a lo meyor que fueron los meyores pasos que dí pel Cares na mió vida.

La nueche tien un puntu brutal, vas atento a cada ruiu, a cada envuelta que das sol vacíu, intentando imaxinar en que puntu tas de la sienda. Vamos más que contentos y nun sé bien, d'onde sacamos les fuercies pa llevar el ritmu que llevamos, ya que paez qu'acabamos de salir de Poncebos nun día cualquiera d'actividá de Picos.

L'aciertu de llevar dos tipos de calzáu fué total, fue'l cambiu entre dir reventáu de pies caleyando pel Cares o dir casi descansando pali pali. Nun sabemos nin les hores que llevamos d'actividá, casi nun queremos nin mirar el reló, simplemente esfrutamos de caleyar pel monte y de siguir faciendo planes futuros, ya que tenemos claro que somos igual de xabalís nel monte, jaja.

 El Cares de nueche tien un puntu diferente... mui prestosu

Pasaremos el banzáu del Cares como única lluz del camín y empobinarémonos con una fame y sede xabaz al albergue. Cuando nos ven aportar, entrúguenmos con una sorrisa que tal nos fué, pero ya saben que venimos reventaos pero felices.

Nel intre, ya sólo quedábanos rehidratanos, una llarga ducha d'agua caliente y cenar como burrinos pa intentar recuperanos d'esta auténtica paliza, que nos llevó a cumplir esi sueñu d'ascender la canal de Ría, faciendo un total de 13 hores y media d'actividá, percorriendo 21 km y superando un desnivel positivu y negativu de 2855 m.

Dar les gracies fonderes a Ana, que ye capaz de sacar lo meyor de mí nel monte, de faceme esfrutar, lluchar y esforzame a tope siempre y lo que ye más complicáu, de que tenga ganes d'imaxinar, d'investigar, de trazar nueves rutes y lo pior de too, de dir con ella colos niveles de repunancia que manexa, jajaja.

De xuru que dalguna xabazada más somos a facer nel futuru...

Camudando'l Camín nel paraisu alpín astur

No hay comentarios:

Publicar un comentario