Valdepráu (Ribas de Sil) - Val.le - La Pandiel.la - Bustatán - Valle Estremeiro

20 de Marzu de 2026 

Track: Valdepráu (Ribas de Sil) - Val.le - La Moroquina - Bustatán - Valle Estremeiro

Finde especial, nel que nos arrimamos al suroccidente astur, pente les tierres del Sil ya Ibias y como siempre, queremos apurar la tarde del vienres pa tachar dalgún monte que tengo na llibreta. Poro, conducimos Carlos, Rubén y yo, hasta Ribas del Sil, y más en concretu a Valdepráu, onde ya ficiéramos va dellos años un ruta perguapa al Miru y al Veigardón.

Partimos del pueblu de Valdepráu (1130 m)

Esta vegada, vamos col envís de conocer otru Monte Cimeru Astur como ye'l Bustatán, poro tendremos qu'averanos xusto al cordal d'enfrente del Miru y Veigardón, saliendo a caleyar con munches duldes de la cantidá de ñeve que tendremos na parte alta, anque danos por xugánosla y salimos en playeros y pantalón curtiu por mor del calor que facía a la hora de partir.

Ascendemos pel Val.le hacia'l colláu de Valdepráu

Son les 3 de la tarde cuando dexamos les cais de Valdepráu, llueu d'aparcar cómodamente nel parque del pueblu y garramos una pista que tien de llevanos hacia la riega'l Val.le, ascendiendo per guapu camín, onde alcontramos un xabalí descabezáu nos primeros tramos, pa llueu esfrutar de la riega a la nuesa mandrecha y na parte alta de los primeros pasos pela ñeve, lo qu'entama a facenos pensar que fuimos mui optimistes col nuesu atuendu montañeru del día.

Esfrutamos del solín demientres caleyamos a tramos con ñeve pela Moroquina

Llueu de los primeros metros abriendo buelga hacia la boquera del valle, decidimos salir pente un fayéu mozu, a la manzorga, pa evitar la ñeve acumulada nel colláu Valdepráu, siendo d'esti xeitu como evitamos moyar los pies entrando ya al cordal, onde vamos avanzando llibrando ensin ñeve, per bon senderu pente les urcies, algamando pali pali vistes hacia los cordales de Xistréu y la Robeza que ficiéramos en circular, colos montes cimeros del Valdeiglesia y el Catoute.

Continuamos pel Carqueixal y la Pandiel.la hacia l'arista sur del Bustatán

Diremos pasando pela Moroquina o el Carqueixal nel nuesu camín hacia la fastera de la Pandiel.la, onde asítiase una cabaña/refuxu, viendo con esmolecimientu como una ñube prieta y fonda, ponse a raya nel cielu, como si quisiera hasta ñevar, quedándonos la previsión de día tranquilu, nun gran interrogante, sicasí, siguimos avanzando y viendo la cantidá de ñeve hacia la Pandiel.la, decidimos atacar el cumal pela arista Sur, ensin visitar la cabaña.

Una ñubona prieta amenaza'l tramu final hasta'l cumal del picu Bustatán

Por suerte, alcontrámonos la arista Sur con un estáu de ñeve impecable pa nun fundise, ya que ya tocáranos bregar dalgo pente urcies, pedreru y ñeve, pudiendo xubir en playeros abriendo buelga hasta'l cumal de 1925 m, siempre cola ñubona prieta enriba nuesa amanzante y un vientu xeláu, que nun mos dexa esfrutar d'esti guapu monte nin de les sos vistes.

Cumal del Picu Bustatán (1925 m)

Facemos semeya de rigor, demientres ponse a cayer les primeres gotes d'agua-ñeve, faciéndonos pasar fríu, poro toca meter capes y entamamos a descender pela arista Oeste, agüeyando les distintes posibilidaes pa la baxada, viendo que la cantidá de ñeve cayida nun mos dexa decidir con claridá cual ye'l nuesu destín, sicasí, siguimos pela arista un tramu hasta que decidimos tirar hacia'l valle Estremeiro, a la manzorga l'arista.

Descendemos pela arista NO decidiéndonos a aventuranos pel valle Estremeiro

Otra opción, sedría siguir tola arista NO hasta'l puertu Valdepráu, pero llueu de bregar penriba les urcies, ensin tener visión por mor de la ñevada de posibles caminos, tirámonos a la ñeve del Valle Estremeiro pa poder descender más apriesa. Asina lo ficimos y baxamos desnivel ensin más problemes que dexar de sentir los pies, al meter les pates hasta la rodiella, pero eso ye culpa nuesa dafechu. 

Saldremos de la ñeve, pasándonos a una llerona cuarcítica, pela qu'intentamos calecer los pies y de secute, entraremos nun fayéu vieyu, pel que navegaremos a un llau y a otru de la riega, según veamos más afayaizu o menos, descendiendo na mayor parte pela fastera esquierda, casi hasta'l final, ya que la fastera drecha ye broza dafechu, imposible de travesar.

Bregamos na parte final del Estremeiro pa salir al camín que vien del colláu Sanantón

Dicir que cuando garramos la referencia de la riega pal descensu, pesie a lo pindio, faise entreteníu, alcontrando llugares bien xabaces y guapos pela viesca, hasta la parte baxa, onde atopamos rastru de senderu a la vera drecha de la riega, dexándonos ya nel tramu final del valle Estremeiro, onde tenemos que buscar salir pente les urcies a la mandrecha pa enllazar col camín que baxa del colláu Sanantón.

Una cosa ye la teoría y otra cosa ye que díbemos pelín xustos de lluz y perdimos esa ocasión d'alcontrar pasu cómodu nel final del valle, perdiendo'l rastru de senderu y terminamos por travesar penriba la riega, avanzando pente les urcies, teniendo momentos de nin pisar en tierra firme, hasta dar col camín que percorre tol valle de Valdepráu.

Caleyamos coles últimes lluces pel Valdepráu, pasando pela braña Susañe

A la fin, saliendo del Valle Estremeiro, ya podemos caleyar con calma, sabiendo que'l camín ye cómodu, anque tenemos que travesar dos riegues moyándonos hasta la rodiella, anque ya nos daba igual, ya que peor ye'l fríu nos pies de la ñeve en playeros, que l'agua frío de les riegues. Too esto, coles últimes lluces, pasamos pela braña de Susañe pa entrar a Valdepráu de nuevu, dellos minutos tres de les 8 la tarde, cola lluz de les faroles en pueblu.

En resume, guapa circular al picu Bustatán, que pudimos esfrutar a medies, por mor de la meteo repunante, del orbayu que moyónos y fízonos baxar apriesa, nun pudiendo restolar los meyores pasos a baxar dende'l Bustatán al Valdepráu. A nós, tocónos bregar un pocu, pero ye lo que nos presta, durante 5 hores y 15, con un desnivel acumuláu de +/- 785 m nun percorríu de 12,6 km.

Camudando'l Camín per Ribas de Sil