A Estierna (Ibias) - As Mestas - Moredina - Tesu Mular - Os L.lagos

21 de Marzu de 2026 

Track: A Estierna (Ibias) - As Mestas - Moredina - Tesu Mular - Os L.lagos

Continuamos col finde pel Suroccidente, siendo de sábadu la ruta más importante, cola idega de xuntar un par de cumales cimeros d'esta fastera como ye'l Tesu Mular y la Pena Rogueira, poro preparámonos pal retu con tolos preseos ivernales, ya que'l día anterior pudimos comprobar l'estáu del monte y nun pensábemos facer el tuntu, otra vegada en pantalón curtiu y playerinos, como col Bustatán.

Magar del almuerzu na casa rural en Cabual.les, averámonos hasta'l conceyu d'Ibias, onde visitamos el pueblín d'A Estierna, puntu de partida, aparcando al llau del nucleo rural Tixileiro, garraremos agua y entamaremos a caleyar pelin antes de les 10 de la mañana, ya que camentábemos tener un día llargu de monte.

Partimos del pueblu d'A Estierna (800 m) n'Ibias

Fadremos semeya de salida al llau del cartelu del percorríu hasta les l.lagunes d'A Estierna y entamaremos a caleyar pel pindiu camín, costándonos un pocu pillar ritmu, ya qu'al menos los del día anterior, nel Bustatán, tenemos más carga de pates de lo camentáu. Sicasí, el camín ye claru y caún al so ritmu vamos aportando al colláu Baisán, onde tendremos per delantre un tramu de llanéu y baxada hacia la braña Moreda.

Fadrémoslo apriesa, echando una güeyada hacia tol cordal de Moreda, intentando aldovinar cuales son los cumales a los tenemos intención d'atacar y ye que nel suroccidente, cuéstanos enforma orientanos, ya que ye una fastera menos trabayada pol grupu, lo que tamién aporta un nivel de motivación importante pa siguir conociendo Asturies. 

 

Camín percómodu anque pindiu hacia la braña de Moreda

Dexamos atrás les muries y lo pocu que queda de la braña Moreda y baxamos hacia la riega As Mestas, buscándonos la vida como podemos pa travesala ensin moyanos, continuando de secute'l camín, per una guapa viesca, con un camín cómodu de caleyar, anque con ciertu desnivel, hasta aportar a la braña d'Abaxo onde travesaremos la riega que baxa dende las l.lagunas, nun tramu de verdor ablucante.

 

Esfrutamos de les viesques y la ñeve pela fastera de riega las Mestas

Nun tamos garrando los ritmos camentaos pa la ruta que tenemos preparada y pa enriba, nun crucie penriba la braña, salímonos pel Porronéu per una traviesa hacia'l val.le Moreda, dándonos cuenta pelín tarde del erru, decidiendo non dar la vuelta, ya que tuviéramos ya un tramu de bregada pela ñeve y dar la vuelta diba ser desesperante, asina que miramos mapa y decidimos facer l'ascensión pel altu La Moredina.

 

Nos salimos pel Porronéu hacia'l valle de Moreda bregando n'ascensión hacia'l cordal

A los pocos minutos de tomar la decisión, nun mos arrepentimos nin media, porque'l valle ye una preciosidá, poro continuamos l'ascensión intentando restolar la sienda baxo la ñeve, anque na mayor parte, tiramos d'orientación y abrimos buelga pelos ñeveros, siempre cola vista puesta nel Altu La Moredina (1680 m) que fízose de rogar, quemándonos bien de fuercies hasta l'arribada.

Aportamos al Altu la Moredina non sin esfuerciu abriendo buelga

Dende la Moredina, dexamos atrás al picu homónimu, bien guapu tamién y ponemos tol xacíu nel oxetivu cimeru del día, el Tesu Mular, que nel intre yéramos a acolumbrar, pero namái que l'entamu de la so arista Este, poro intentamos apretar el pasu, hasta qu'atopamos de nuevu un enorme ñeveru pel que vamos abriendo buelga de nuevu, faciendo baxar la barrina d'enerxía unos puntos más.

Una auténtica maraviya l'ascensión dende l'Altu La Moredina con pasinos prestosos

L'ascensión ta siendo perguapa y vamos esfrutándola a tope, pero nun ta siendo tan cenciella, teniendo que navegar l'arista pa evitar los pasos más espuestos cola ñeve, controlando a los collacios que suelen pasalo un pelín pior nestos tramos, anque van portándose y a la fin, sacante de dalgun pasín concretu, el restu son rises, sacar semeyes y esfrutar l'arista del Tesu Mular dafechu.

La parte cimera, asela n'esposición y dificultá y alcontrámonos con unes vistes increyibles demientres caleyamos pela llana cimera hasta los 1892 m d'esti auténticu montañón que ye'l Tesu Mular. Les cuatru hores d'ascensión, colócanos nuna disposición complicada, ya que son les 2 de la tarde y nun pueu parar d'agüeyar los siguientes cumales que siguen el cordal hasta Pena Rogueira, toos ellos con más ñeve si cabe que'l qu'acabamos d'encumar. 

Encumamos el Tesu Mular (1892 m) monte ablucante dafechu

Nun hai muncho que dicir, falámoslo mediu minutu y decidimos que vamos xintar el bocadiellu y descender per Os L.lagos dexando'l techu d'Ibias pa otra vegada. Tampoco aida saber que Vane y Sara, quedaron soles ascendiendo hasta Os L.lagos y anque tamos en contautu colos walkies, nun presta separar el grupu, asina que descender y nun allargar la ruta de más ye lo más sensatu. 

Col banduyu enllenu, col sandwich y demás guarreríes que sólo permítense nel monte, entamamos el descensu pela arista Oeste, hasta aportar al Pie Mular, boquera de salida de la cubeta glaciar d'Os L.lagos. Según diba baxando ya tenía puesta la vista na l.lagúa de Riba, xelada nesta dómina l'añu y que facíame albidrar que pudiéramos tener dalgún tramu complexu per esta faza norte. 

Descensu téunicu del Pie Mular hacia Os L.laos d'A Estierna

Como siempre, trazo cola mirada un descensu factible y vamos baxando pegaínos, abriendo buelga hasta que tenemos una travesía d'esquierdes onde l'estáu de la ñeve, fai que dalgunos usen crampones, mientres que'l restu, facemos la traviesa a bas de tallar escalones a punteraes, salvando ensin problemes la envuelta, pa empobinanos sin fallu hacia un ñeverón soleyeru, pel que báxase ensin dificultá.

Brutalmente guapos Os L.laos nuna baxada pelín téunica ivernal

Pasáu los tramos más téunicos, dedicámonos a sacar semeyes nel descensu hacia la l.lagúa de Riba que nun puede tar más guapa col agua xeláu. Pararemos al so pie, a quitar capes de ropa y a guardar preseos ivernales y pasamos al llau de la L.lagúa Baxa, garrando tol camín anegáu pol desagüe ivernal de les dos l.lagunes, anque a estos altores, pocu impórtanos moyanos un pelín más.

Baxamos dende Os L.laos hacia les brañes d'Arriba y d'Abaxo d'A Estierna

Con pocu más qu'esfrutar de les vistes y de dalgún saltu d'agua qu'otru arribaremos a la Braña d'Abaxo, onde desviarámonos delles hores atrás y encarrilaremos de nuevu tol camín de vuelta hacia'l pueblu d'A Estierna, faciéndose a dicir verdá, llargu y pelín penosu col calor que facía a estes hores.

A les 5 la tarde, aportáremos de nuevu al pueblu d'A Estierna, con hores de lluz entá, pero non tantes pal percorríu preparáu, asina que contentos cola ruta, mudámonos de ropa ensin priesa, antes de dir a tomar dalgo al Tixileiro. Dicir que la circular del Tesu Mular, pudiera quedar meyor ascendiendo tol valle L.leirosu dende Trabáu, hasta la Moredina pa continuar hasta'l Tesu, pero a nós ye lo que nos tocó facer teniendo preparada una ruta más ambiciosa.

En resume, ascensión al Tesu Mular dende A Estierna, nun total de 7 hores y 20 minutos, con un percorríu de 15,5 km y una desnivel acumuláu de +/- 1205 m, quedándonos con munches ganes de conocer tolos montes de la redolada.

 

Camudando'l Camín pela guapura de les fuentes del Narcea