Caracena (Tierras del Burgo) - Valderromán - Manzanares - La Calera

2 d'Abril de 2026 

Track: Caracena (Tierras del Burgo) - Valderromán - Manzanares - La Calera

Díes de descansu en Selmana Santa per Soria, como tolos años, yendo con ganes de facer actividá, poro dempués del viaxe del miércoles, pal xueves santu ya teníemos preparáu un pateín pela redolada de las Tierras del Burgo y más en concretu, per Caracena, onde ya pasáremos en dalguna ruta conociendo la so guapa Hoz y en bici cuando aportáremos dende Tiermes, siendo puntu interesante a conocer, pol so castillu y pueblu.

Xusto falábemos de les rutes en bici, Miguel y yo, cuando arribamos a Caracena, onde aparcamos na parte baxa del pueblu, viendo que tenemos un montón de cartelos nuevos, asina como un aparcaderu bien guapu, informámonos de que tenemos un circuitu de gravel pa esta fastera sur de Soria, faciendo en parte, aquella ruta que completáremos va dellos años.

Partimos de Caracena (1064 m) en Tierras del Burgo

Quedámonos cola copla del circuitu pa bici gravel y preparámonos pa salir, faciéndolo pela mandrecha del barrancu de Las Gargantas, anque otra opción sedría salir pueblu arriba, visitándolo con calma y pasando pel castillu de Caracena, pero esta vegada, queríemos visitar un sabinar o carrascal, poro esta vegada, el nuesu caminar sedrá pela mandrecha'l barrancu, siguiendo tramos de senderín y otros de camín d'accesu a dellos campos de cultivu.

Salimos caleyando pela vera esquierda del barranco de Las Gargantas

Dicir que la nuesa ruta taba plantiada penriba'l mapa, pero alcontrámonos con que lo que marcaba como camín, con una carretera, asina que decidimos caleyar pel filu'l barrancu, pasando por tramos de tarrén de pastoréu bovín como la cerrada'l Cuento, enantes d'entrar nel sabinar, onde esfrutamos d'exemplares increyibles, hasta'l más nomáu, la Carrasca de Valderrómán, qu'alcontramos pelín esgonciada pel pasu los años, ensin dos rames pergrandes que fundieron nos últimos tiempos.

Siguimos per tierres de pastoréu hasta conocer la carrasquera de Valderromán

Dende la Carrasca, continuamos camín, hasta empatar cola pista que vien dende la otra vera del barrancu, atopando los cartelos del Celtigravel soriano, cruciando la carretera "inesistente" pa siguir per camín hasta la entrada al pueblu de Valderromán, el cual cruciamos cola calma charrando col dalgún paisanu y averándonos pali pali al Val que tien de llevanos hacia'l rigu Manzanares, cañón que queremos conocer nesta ruta.

Travesamos Valderromán pa metenos pel barranco del Val hacia'l de Manzanares

Saldremos del pueblu, pudiendo escoyer pista pela manzorga de la riega seca del Val o senderín pela so mandrecha, decidiendo siguir pegaos al calce, siendo tarrén clásicu sorianu, pero perguapu d'andar con dalgun exemplear de sabina potente y entama a vese dalgo de caliza per ambes fasteres del cañón. Aportaremo a la mecedura del Val col Manzanares, saludando a dellos caminantes xusto nel final d'una dehesa y ya entramos nel "cañón" del Manzanares col camín pegáu al rigu, amosándonos munchos llugares da gran valir senderista.

Perguapu senderu y bien curiáu al llau del rio Manzanares

La verdá ye que vamos esfrutando muncho del caminar apriesa, pero los dos vémoslo tan corrible que casi danos pena nun tar un pocu finos y entrenaos pa facer esta ruta corriendo. Sicasí, como digo, esti barrancu tien llugares que paguen la pena, travesando la riega un par de vegaes, per pontes bien curiaes, averándonos al pocu, al pueblu de Hoz de Arriba, onde entamaríemos l'ascensu hacia'l monte La Calera.

Salimos dende Hoz de Arriba hacia monte de la Calera

Pa ello cruciaremos otra ponte, al par de los güertes del pueblu y garraremos una pindia vallina, na que paez qu'hubo actividá minera, d'ehi del nome de la Calera, siguiendo los restos de senderu que vamos alcontrando, cola vista puesta nuna cabaña na cumera'l monte onde entramos nun pequeñu llaberintu de peñes calices bien guapes, que anímenmos a siguir hasta'l vértice xeodésicu de la Calera de 1194 m d'altor.

Facemos cumal nel monte la Calera (1194 m)

Con tol trabayu fechu y la hora de comer pasándosenos, sacamos la semeya de rigor, dende esti mirador ablucante sol pueblu de Hoz de Arriba y del cañón percorríu y continuaremos ruta, bordiando los campos semaos pela manzorga, col envís d'enllazar dalgo más alantre nun camín que va dir llevándonos hasta'l camín de Caracena, que vien dende'l pueblu de Hoz de Abajo, siguiendo ya esti camín ensin mayores problemes.

Tornamos hacia Caracena per cañadas de ganáu bovino

El ritmu ya ye de nun perder nin un minutu y entainamos pelos caminos hasta aportar al Chaparral onde somos a dar vista de nuevu a Caracena, xusto penriba del barrancu Los Cotos, el cual llibraremos nun par d'envueltes pela manzorga pa descender hasta la parte baxa de Caracena onde finamos la ruta.

En resume, ruta senderista guapa, prefiriendo conocer el Sabinar, anque quedaría perfeuta tamién siguiendo'l trazu del Celtigravel pel castillu hasta Valderromán, pa completar esti percorríu de 17 km, con un desnivel acumuláu de +/- 345 m nun total de 3 hores y 50 minutos, mui recortables si fuéramos en mou corredor o en bici monte, llibrando la Calera y xubiendo dende Hoz de Abajo a la parte alta... opciones pa tolos gustos.

Tornamos a Caracena dando-y vista dende'l Chaparral