La Matosa (Piloña) - Les Cuerries - Argumosu - Les Cabañes - Pandacéu - La Praduela

16 d'Avientu de 2023

Track: La Matosa (Piloña) - Les Cuerries - Argumosu - Les Cabañes - Pandacéu - La Praduela

Última ruta oficial del GM Xuan de la Borrina del 2023 y facía tiempu que nun preparaba una ruta, penriba'l mapa, tan sólo por conocer una fastera en concretu, sin un monte nomáu como oxetivu. Como non, mi conceyu preferíu pa conocer foces, riegues, valles ye Piloña, esi conceyu maltratáu montañeramente falando por ser vecín de conceyos más "clásicos" montañeros como Ponga o Casu, sicasí, somos unos auténticos namoraos de Piloña pa facer monte y la variedá y cantidá de rutes feches pol grupu son una amuesa clara d'esti amor.

Nesti casu, vamos volver dempués d'unos añinos al valle del rigu Color, que ya conociéramos en parte cola ascensión al Picu Priede o al Picu Torre, pero que faltábame conocer tol valle alantre hacia Les Vízcares que ye una fastera dafechu increyible, lloñe de cualesquier población y mui xabaz dientro d'Asturies.

 

Salimos dende La Matosa (315 m) en Piloña

Pa ello, como na ruta al Picu Torre vamos salir dende'l pueblín de la Matosa, asitiáu nun preciosu colláu, con vistes a los valles del rigu Color a un llau y del Tendi al otru. Aparcaremos na parte alta del pueblu, onde hai bon sitiu pa ello y baxaremos en direición norte, con vistes al Picu Priede, pa salir a la manzorga abandonando'l solín mañaneru y entrando nuna baxada hacia'l rigu Color, onde les temperatures baxen hasta los cero graos, teniendo qu'abriganos con tolo que llevamos na mochila.

 

El paséu pela pista del rigu Color ye una maraviya pa los sentíos

La pista, dafechu transitable per coches, da accesu a tol valle del rigu Color, hasta Les Cuerries, onde termínase nun aparcaderu disponible pa toles cabañes, xustu n'amestaura de toles riegues que formen el rigu Color. Nós, diremos caleyando sele, charrando, esfrutando de tol paséu, dacuando pegaos al rigu y otres mui penriba d'esti, conociendo a cada pasu, mayaos y brañes, como L'Ortigal, La Cerezal o Los Carriles, alcontrando delles cabañes, que nos llamen poderósamente l'atención.

 

Esfrutamos d'una calidá de patéu increyible conociendo requexos bien guapos del rigu Color

En pocu más d'una hora de patéu seliquino taremos al final de la pista, onde en realidá entamaba l'aventura, ya que nun tenía referencies d'ascensiones pelos valles de la redolada hacia'l nuesu destín, asina qu'al llau de la cabera cabaña, xustu averáu a la ponte qu'empobínase hacia'l valle contrariu d'Obenes, que siguiría hacia'l Niañu, nós vamos metenos nel valle Argumosu, ya que la idega de siguir rigu alantre ye dafechu imposible nesta dómina l'añu.

 

Entamamos a ascender pel valle Argumosu algamando vista a foces increyibles

Asina que garraremos un claru senderín penriba la cabaña, va faciendo pindies envueltes penriba la Peña Espadañal, pa na collada homónima, garrar un camín a media faldera, dándonos vista a dos peñes que llamen l'atención como son los picos Barovena y La Vela, qu'encierren dos foces qu'amiesten nel rigu Color, siendo la de la mandrecha la Foceyu y que nun queremos facer otra cosa que conoceles pal branu.

 

Prestoses vistes hacia La Vela y el Niañu detrás mientres avanzamos pel valle Argumosu

Bordiaremos entós, una parte del ampliu valle Argumosu, llibrando la so parte central enllena de cotoyes, anque salen senderos penmediu y vamos escoyer l'ascensu pela fastera drecha, siempre siguiendo traces de senderu per una increyible viesca y siempre cerquina del monte baxo qu'enantes nomamos, hasta un puntu, onde pegámonos a los parés que dividen Argumosu del siguiente valle, el de Fuentes.

 

Salímonos al cantu pente'l valle Argumosu y el de Fuentes algamando'l mayáu de Fuentes

Nesti puntu, tendremos dos opciones, averanos a la fastera central del valle d'Argumosu, evitando la típica viesca estrada d'antiguos argayos que fae que l'avance seya mui abegosu, pente rames y peñes o albidrar la salida hacia la cresta col valle Les Fuentes, guiyándonos nos mapes pola cabaña del mayáu Les Fuentes, alcontrando por suerte, un preciosu y pindiu pasu, que faénos salir al mayáu y al sol, siendo este un puntu máxicu de la ruta.

 

Continuamos ruta ya del mayáu Les Fuentes hacia'l Picu Les Cabañes

Equí daremos un bon descansu, esfrutando de les vistes, del sitiu y de lo maraviyoso que ye metese al monte a investigar y sacar rutes nueves. Daremos el descansu merecíu, esfrutando d'esta fastera tan perdida na cara norte del picu Les Vízcares, entamaremos un tranquilu ascensu, ya per tola arista pente les valles pa dir ganando tarrén al nuesu oxetivu, que yera un primer llugar el cuetu Ordiales y a lo postrero, el picu Les Cabañes, puntu más alto del día con 1003 m.

 

Aportamos al picu Les Cabañes (1003 m) llugar de vistes brutales

Pali, pali, diremos llegando toos al cumal del picu Les Cabañes, llueu del pasu per Ordiales y agora si, con casi 4 hores de ruta, pararemos a xintar con calma y dexaremos a Benjamín descansar tolo necesario, ya que tuvo un baxón fuerte d'azucar y aparte d'echar un pigacín, tuviemos a la espera de que la xinta-y recuperase pa continuar col descensu.

 

Grupu al completu nel picu Les Cabañes con grandes vistes del oriente astur

Una vegada que descansamos, esfrutando de les vistes del macizu occidental de Los Picos y desgranamos valle a valle y cumal tres cumal que somos a ver dende Les Cabañes, entamamos el descensu hacia la collada de Pandacéu, teniendo un guapu descensu pela fastera Este del picu, hasta dar direutamente a la primer cabaña del mayáu, onde ya garreremos la pista que tien de facenos descender hacia la Matosa de nuevu.

 

Descendemos a Pandacéu garrando ya la cómoda pista que tien de baxanos hacia la Matosa

Falaremos un ratín colos ganaderos que taben recoyendo unos caballos y llueu d'alloriar cola visión de la pista que xube pela faza norte del Cuniu y que suponemos enllazará cola collada Moandi, garramos con calma pasu tranquilu, pa dir descendiendo per delles brañes, como Ogabia o Llamoncéu, onde paramos un segundu a echar un vistazu a la Peña'l Fresnéu y al valle del rigu Tendi que llega hasta la collada Tresdesierru, quedándome apuntada tamién pa conocer.

 

Baxada relaxada per llugares tan guapos como la Praduela hasta les primeres cases La Canal

Col trabayu fechu y munches idegues na tiesta, sumáu a que nun m'alcontrara mal del too de la cadera, facemos camín allegres y despreocupaos, prestándonos muncho tola visión hacia la costa, col Sueve en primer planu y más hacia l'oriente tol Cuera, asina como dellos mayaos de gran valir, como la Praduela, dende onde tamién atopamos una baxada bien guapa hacia'l rigu Color.

 

Facemos los últimos metros con vistes al Picu Priede col Sueve per detrás

Coles últimes lluces del día, facemos un par d'envueltes de la pista y ya entramos nes primeres cases de La Canal, que ya dará pasu al traviés d'asfaltu a los caberos metros hacia la Matosa, pasando peles cases de Canturriba y Cantubaxu enantes d'aportar al coche y zarrar este guapa circular.

En resume, ruta d'aventura na ascensión pel valle Argumosu, pero que podemos facer con calma al tener tanto un entamu como un final, cenciellos per pista, faciendo un total de 6 hores y 15 minutos, que pa la dómina ivernal ye más que perfeutu, con un percorríu de 13,5 km y un desnivel acumuláu de +/- 810 m.

 

Camudando'l Camín pela increyible Piloña