3 d'Avientu de 2023
Seguimos con un finde mui inestable no meteorolóxicu y si ayeri tábemos pel conceyu d'Ayer, faciendo'l Cuitu Moros con Benjamín y Carlos, esta vegada díbemos desplazar al grupu hasta la llende pente los conceyos de Tinéu y Valdés, y más en concretu, hasta l'Altu d'Aristébanu.
L'aventura d'aportar dende'l centru d'Asturies, hasta Aristébanu, llevóme a percorrer carreteres peles que nunca pasara, sobretou descubriendo la N-634 dende la Espina a Brieves, que llevóme per llugares que paecen ya escaecíos nel tiempu, quedándome bien claro, qu'al suroccidente o mediuoccidente astur tenémoslu dafechu abandonáu.
Dempués d'un cafetín pa desestresar del viaxe, salimos fuera, poniendo casi tola ropa que tenemos ya que'l día ta ventosu y frescu, cosa que nun esperábemos, porque na realidá yera güei, el meyor día del finde y entamamos a caleyar, per asfaltu siguiendo'l cartelu del pueblín de Brañascardén, hasta aportar al Chanu la Piniel.la, onde tenemos la primer visión del parque eólicu que llantaron nos últimos años na xerra L'Estoupu.
Asina que vamos garrando desnivel, pela pista construyía pa dar mantenimientu al parque, quedándome claro que tengo qu'actualizame nel occidente, ya que tolos cordales estrozaos pelos parques eólicos, son defechu más atrautivos pa facer en bici de monte que caleyando, ya que pues aportar a la cumera práuticamente cola bici y puédese percorrer casi cordales enteros ensin munchu esfuerzu.
Nós, patiaremos hasta la base, nel campu L'Estoupu bordiando el picu Sorrapiu y garraremos un senderu na fastera Este, pa xubir a pinchu hasta los 848 m del picu L'Estoupu algamando delles vistes a tola mariña valdesana, a montes de Cuideiru con molinos na xerra Los Vientos, de Navia con más molinos en Panondres y a montes más estraos de molinos como los de Villayón en Carondio, quedándonos la llonxana y llimpia visión de tol cordal cantábricu ñeváu de Somiedu y Cangas del Narcea.
Nestos camientos, sobre l'estrozu mediuambiental y la contaminación visual de la xeneración eólica, aporten el picu, dellos montañeros más, qu'amáblemente sáquenmos una semeyina y viendo la negrura que vien pel occidente, decidimos descender apriesa hacia Brañanueva, onde alcontrámonos un cartelu falando del pasáu mineru d'oru nestos cordales, tresformaos anguaño nel oru enerxéticu de los parques.
Fadremos l'últimu esfuerzu xubiendo al picu Couzragu (772 m) y xustu a la baxada la Bobia L'Aguila onde entamaríemos l'ascensión al Capiel.la Martín, la ñube entra con fuercia, orbayando enforma y con vientu, lo que sumáu a la visión eólica y qu'a esti monte ya lo ascendiéramos va unos años dende Busecu, decidimos garrar un senderín de primeres pa siguir hacia una pista que va llevanos n'envueltes hacia Candanéu.
Pasaremos al llau de les últimes cases de Candanéu y siguiremos per pista pel monte los Gordos p'ascender la L.lomba L'Adradón hasta la cabecera del Val.le Los Musqueiros, cola riega con abundancia d'agua pa facer la cabera envuelta penriba de Brañascardén y descender pela pista asfaltada hasta Aristébanu zarrando la circular.
En resume, cordal desfechu por mor de los eólicos qu'intentamos percorrer, quedándonos namái que col oxetivu cimeru del día, L'Estoupu, vértice xeodésicu de Valdés, saliéndonos una rutina mañanera de 3 hores y media de duración, con 12 km de percorríu y un desnivel acumuláu de +/- 580 m que permitiónos baxar a Navelgas a xintar.
No hay comentarios:
Publicar un comentario