Lludeña (Piloña) - Picu Incós

4 de Febreru de 2023

Track: Lludeña (Piloña) - Picu Incós

Día de carrera col Cayón Trail n'Infiestu, pero siendo una carrera curtia y de tarde, dábame pereza perder la mañana ensin facer gran cosa per casa, asina que falo con Carlos pa dar una vueltina pela zona, animándose Haritz con Laia, decidiéndonos por un techín nororiental como yera'l Picu Incós, techu del conceyu de Cabranes.

Pa ello, quedamos pa tomar un cafetín n'Infiestu a una hora moderada, averándonos dempués hasta'l cercanu pueblín de Lludeña, onde asítiase un Palaciu, una Ilesia curiosa y un Turruxón que bien valía la so reconstrucción, por munchos motivos, tanto hestóricos, como poles vistes que tien de tolos Picos d'Europa.

 

Salimos del pueblu de Lludeña (297 m) con vistes al picu Incós

Saldremos caleyando enfrente la Ilesia, baxando unos metros de carretera hasta la Picota, onde garramos camín hacia la Llantada, pasando pela enorme casería de la Blanca, siguiendo camín penriba del Turruxón medieval de Lludeña, el cuál caltiénse nun estáu curiosu, ensin esbarrumbe de les sos parés, pudiendo restaurase como puntu turísticu piloñés, con grandes vistes de tolos montes orientales astures.

 

Continuamos hacia la Llantada dempués de comprobar l'estáu d'otres pistes más direutes

Desdexamos los nuesos pensamientos de mierda de país, caleyando per pista hasta un depósitu, onde vemos que nun hai oportunidá de siguir ya que la pista muerre por mor de la broza, asina que damos vuelta y continuamos pelos cartelos que van llevanos a la casa La Llantada, una quintana remocicada en bioconstrucción.

 

Salimos per una viesquina delantre la Llantada hasta pistes forestales

Enantes de la casa, vamos salir a la mandrecha per un senderu pocu marcáu, que dirá bordiando la propiedá hasta atopar una pista maderera, que va llevanos per un cortafueos a pinchu hacia'l Picu Lludeña. Cómo veis, tan sólo esti pequeñu tramu dende la Llantada ye un pocu fuera de pista, ya que darréu, nun perderemos pista hasta'l Picu Lludeña (535 m), onde pararemos un pocu a sacar semeyes pa toles vistes de los milenta montes que tenemos enfrente nueso.

 

Entamamos el pistéu peles llombes que tienen de llevanos al Picu Incós

Con tolos montes de Piloña, Casu, Ponga y Picos asitiaos na nuesa mente, continuamos camín ya definitivu hasta'l Picu Incós (582 m) másima cota del día y bon llugar pa picar daqué contemplando dende la mar a les cotes más altes d'Asturies.

 

Facemos techu de Cabranes nel Picu Incós (582 m)

Pesie a ser una cota modesta, una llomba, nun podemos dicir que nun seya un llugar bien guapu onde acolumbrar tol oriente astur, poro'l mínimu ascensu dende'l pueblu d'Incós ye más que xostificáu pa tener munches visites domingueres.

El tiempu pasa, contando'l que perdimos buscando camín onde'l depósitu pa salir pel monte la Torre, toca descender apriesa hasta casi Incós, onde garraremos a la mandrecha una pista, que va llevanos cenciellu per tola faldera del picu Incós, hasta aportar a la baxera del picu Lludeña, onde descenderemos per cortafueos hasta'l rigu la Cuevona, más en concretu a la puente la Cuevona.

 

Baxamos hacia la carretera na puente la Cuevona pa garrar camín hacia Lludeña

A la vera d'esta puente na cerretera, tenemos un camín, del que nun tenemos referencia, pero por suerte, va llevanos cómoda y guapamente, penriba del Llendón, hasta'l Fontayu, onde ya garramos pista formigonada hasta Lludeña, onde zarramos esta curtia pero interesante circular.

En resume, los 7,3 km de percorríu circular, con +/-370 m de desnivel dan preste a un Techu de Conceyu, d'una forma más montañera que xubiendo direutamente dende Incós, teniéndonos entreteníos al menos dos hores y media.

Camudando'l Camín cola prósima xeneración montañera